এতিয়ালৈ ৩ টা অষ্ট্ৰেলিয়ান কেংগেৰু উদ্ধাৰ অসম সীমান্তত, এটা মৃত !

অসম সীমান্তত অষ্ট্ৰেলিয়ান কেংগেৰু

• অৰবিন্দ ৰাভা

কেংগেৰু!

গঁড়ৰ খড়্গৰ চোৰাং ব্যৱসায়, গঁড়ৰ খড়্গ উদ্ধাৰ, কেঁকো সাপ উদ্ধাৰ, বাৰ্মিজ চুপাৰি উদ্ধাৰ, সোণৰ বিস্কুট উদ্ধাৰ, হেৰোইন – মাৰিজুৱানা – আফিম উদ্ধাৰ, অসমীয়া কিশোৰী – গাভৰুক নাৰী সৰবৰাহকাৰীৰ কৱলৰ পৰা উদ্ধাৰ, ইত্যাদি সংবাদ বহুবছৰ ধৰি শুনি আহিছিলো; কিন্তু কাহানিও কল্পনা কৰা নাছিলো যে অসমৰ সীমান্তত কোনোবাদিনা উদ্ধাৰ হ’ব পাৰে কেংগেৰু!! অসমৰ মাজেৰে কি কি সৰবৰাহ হৈ থাকে বুলি যদি পৰীক্ষাত প্ৰশ্ন আহে, আৰু উত্তৰত যদি ‘কেংগেৰু’ বুলি লেখা হয় – সেই উত্তৰদাতাই শূণ্য নম্বৰ বা ‘মাইনাচ’ নম্বৰ পোৱাটো খাটাং।

কিন্তু এতিয়া ঘোৰ কলিকাল! আমৰ গছত বেল লগাৰ দৰে, সৰ্বানন্দ সিংহৰ বেংমৰাত বিহাৰী ‘খিলঞ্জীয়া’ হোৱাৰ দৰে এক নাভূত- নাশ্ৰুত কান্ড সংঘটিত হৈছে এই মুলুকৰ সীমান্ত অঞ্চলত। হয়, কেংগেৰু উদ্ধাৰ হৈছে!

যোৱা শুক্ৰবাৰে, ১ এপ্ৰিল, ২০২২ তাৰিখে, নিশাৰ ভাগত প্ৰথমে অসমৰ সীমা পাৰ হৈ কিছুদূৰ পাৰ হোৱাৰ পিছত অৱস্থিত জলপাইগুড়িৰ গজলডোবাৰ সমীপৰ ক্যানেল ৰোডৰ পৰা দুটাকৈ কেংগেৰু উদ্ধাৰ কৰা হয়। দুয়োটা কেংগেৰু ‘পোৱালি কেংগেৰু’ আছিল। স্থানীয় বাসিন্দাই কেংগেৰু দুটা দেখা পাই বন বিভাগক খবৰ দিয়ে আৰু বন বিভাগে কেংগেৰু দুটা উদ্ধাৰ কৰে। পোৱালি দুটা কিবা প্ৰকাৰে মাতৃ কেংগেৰুৰ পৰা বিচ্ছিন্ন হৈ পৰে বুলি বন বিভাগৰ কৰ্মীৰ ধাৰণা।

এই বিৰলতম ঘটনাৰ উত্তেজনাৰ উপশম নৌ- হওঁতেই পুনৰ শুক্ৰবাৰে নিশাই শিলিগুড়িৰ ফাড়াবাড়িৰ নেপালী বস্তিৰ পৰা এটা পূৰ্ণ- বয়স্ক কেংগেৰু উদ্ধাৰ কৰা হয়। নিশাটোৰ ভিতৰতেই ডাবগ্ৰাম ৰেঞ্জৰ বনকৰ্মীসকলে ঘটনাস্থলীলৈ গৈ পূৰ্ণ-বয়স্ক কেংগেৰুটোক উদ্ধাৰ কৰে। এই ঘটনাই তীব্ৰ চাঞ্চল্যৰ সৃষ্টি কৰি থাকোতেই সংঘটিত হয় পুনৰ অইন এক ঘটনা!

আজি শনিবাৰে ৰাতিপুৱাই ফাড়াবাড়িত উদ্ধাৰ কৰা হয় এটা মৃত কেংগেৰু। স্থানীয় সূত্ৰই জনোৱা অনুসৰি শনিবাৰে ৰাতিপুৱা শিলিগুড়িৰ বৈকুন্ঠপুৰ বন বিভাগৰ অধীনৰ চাৰুগাৰা ৰেঞ্জৰ আওতাত থকা ফাড়াবাড়িত এটা কেংগেৰু মৃত অৱস্থাত পোৱা হয়। কিদৰে কেংগেৰুটোৰ মৃত্যু হৈছিল, সেয়া এতিয়াও স্পষ্ট হোৱা নাই। হয়তো কোনো পশুৰ আক্ৰমণতো কেংগেৰুটোৰ মৃত্যু হ’ব পাৰে বুলি বন বিভাগৰ ধাৰণা।

অইন এক সূত্ৰৰ মতে ইতিমধ্যে কেংগেৰু তিনিটাক চিকিৎসা কৰাবলৈ বেঙ্গল চাফাৰী পাৰ্কলৈ পঠিওৱা হৈছে। এতিয়া প্ৰশ্ন উত্থাপন হৈছেঃ ক’ৰপৰা কিদৰে আহিল একাধিক কেংগেৰু? যি কেংগেৰু জলপাইগুড়ি বা অসমত পোৱা নাযায়, হঠাৎ ক’ৰপৰা আহিল এই কেংগেৰু!

kangaroos on green grass in nature — Photo by David Selbert on Pexels.com

এই সম্পৰ্কে এগৰাকী জ্যেষ্ঠতম শুল্ক বিষয়াই ব্যক্তিগত ভাবে টিপ্পনী দি কৈছে যে এই কেংগেৰুবোৰ নিশ্চিতভাৱে ইন্দো- ম্যানমাৰ সীমান্তৰে চোৰাংকৈ সৰবৰাহ কৰা হৈছে আৰু অসম সীমান্ত পাৰ হোৱাৰ পিছত বঙ্গত প্ৰৱেশ কৰি জটিল পৰিস্থিতিৰ সন্মুখীন হৈ পৰিত্যক্ত কৰিবলগীয়া হোৱাত জংগলৰ আশে-পাশে নমাই দিয়া হৈছে। এই প্ৰসঙ্গত তেওঁ কয় যে কেইমাহমানৰ আগতে দুষ্প্ৰাপ্যতম চৰাই, জন্তু, সৰীসৃপৰ দ্বাৰা বোজাই এখন ট্ৰাক অসম পুলিচে জব্দ কৰিবলৈ সক্ষম হৈছিল। সেই সকলোবোৰ দুষ্প্ৰাপ্য জীৱ অনা হৈছিল সুদূৰ অষ্ট্ৰেলিয়াৰ পৰা চোৰাংকৈ ইন্দোনেছিয়া, ম্যানমাৰ, মিজোৰাম হৈ, আৰু সেইবোৰৰ লক্ষ্যস্থান আছিল মহাৰাষ্ট্ৰৰ এজন ধনকুবেৰৰ ব্যক্তিগত চিৰিয়াখানা! সম্ভৱতঃ কেংগেৰুবোৰৰো লক্ষ্যস্থান তেনে ধৰণৰ ব্যক্তিগত চিৰিয়াখানা আছিল। এতিয়া প্ৰশ্ন উত্থাপন হৈছে, যদি অষ্ট্ৰেলিয়াৰ কেংগেৰুও অসমৰ মাজেৰে এনেদৰে সৰবৰাহ হ’ব পাৰে, বাৰ্মিজ চুপাৰি বা ড্ৰাগ বা সোণৰ বিস্কুট সৰবৰাহ কৰা কিমান উজু তথা কিমান ক্ষমতাশালীৰ দীঘল হাত এইবোৰৰ সৈতে জড়িত! এতিয়া চোৰাংকৈ অনা বিৰলতম কেংগেৰুৰ তদন্তও কি হয় দেখা যাওক!

02-04-2022