ইউৰোপত স্থূলতাই মহামাৰীৰ ৰূপ লোৱাৰ পথত

ইউৰোপ

অৰবিন্দ ৰাভা

মোটা, শকত, থপথপীয়া হৈ পৰিছে ইউৰোপৰ বাসিন্দা। এইবিষয়ে আগতীয়াকৈ সতৰ্কবাণী শুনাইছে বিশ্ব স্বাস্থ্য সংস্থাই। ইউৰোপৰ ৬০% পূৰ্ণবয়স্ক আৰু এক-তৃতীয়াংশ শিশুৰ ওজন বেছি হোৱা হেতুকে বিভিন্ন ধৰণৰ শাৰীৰিক সমস্যা তেওঁলোকে ভুগিব লগীয়া হৈছে। আনকি স্থূলকায় প্ৰাপ্তবয়স্ক সকলেও, আমেৰিকা যুক্তৰাষ্ট্ৰক বাদ দিলে সংখ্যাৰ নিৰিখত যিকোনো মহাদেশতকৈ ইউৰোপ বহুখোজ আগবাঢ়ি আছে। 

RelatedPosts

স্লিপ এপনিয়া : টোপনি আৰু নাকৰ শব্দ

December 2, 2023

Growing Old : Seniority and Serendipity

December 1, 2023

Gaza doctors ‘terrified’ of deadly disease outbreak as aid teams race to deliver

November 29, 2023

বিশ্ব স্বাস্থ্য সংস্থাই জনাইছে, যিধৰণে ইউৰোপবাসী মোটা বা শকত হৈছে, তেনেদৰে থাকিলে অবিলম্বে ইউৰোপত স্থূলত্বৰ সমস্যাই মহামাৰীৰ ৰূপ ধাৰণ কৰিব।বিশ্ব স্বাস্থ্য সংস্থাৰ প্ৰতিবেদন অনুসৰি ইউৰোপত সবাতোকৈ অধিক মোটা মানুহৰ সন্ধান পোৱা গৈছে তুৰস্ক, মাল্টা, ইজৰাইল আৰু বৃটেইনত।

ইউৰোপৰ নানা দেশত বিপদজনক হাৰত স্থূলকায় ব্যক্তিৰ সংখ্যা বৃদ্ধি পাইছে। কিন্তু কোনো দেশেই ২০২৫ চনৰ ভিতৰত মোটা হৈ পৰাৰ সমস্যা হ্ৰাস কৰা সম্পৰ্কে বিশেষ উদ্যোগ লোৱা নাই। তাৰোপৰি অধিক ওজনৰ বাবে প্ৰতি বছৰে ১০ লাখৰো অধিক লোকৰ মৃত্যু হৈছে সমগ্ৰ ইউৰোপত। অতিৰিক্ত ওজনৰ বাবে শ্বাসকষ্টৰ সমস্যা, ডায়েবেটিচ সহ ১৩ ধৰণৰ কৰ্কট ৰোগ, হৃদযন্ত্ৰ বিকল হৈ পৰাৰ দৰে একাধিক প্ৰাণঘাতী ৰোগৰ কাৰণ বুলি বিজ্ঞানীসকলে ডাঙি ধৰিছে। 

বিশ্ব স্বাস্থ্য সংস্থাৰ ইউৰোপৰ স্বাস্থ্য অধিকৰ্তা হান্স ব্লগ-এ তেওঁৰ প্ৰতিবেদনত কৈছে, কৰ’না অতিমাৰীৰ সময়তে ইউৰোপত ‘ওবেচিটি’ বা স্থূলতাই অধিক বিপৰ্যয় কঢ়িয়াই আনে। আনকি ইউৰোপৰ কৰ’না ৰোগীসকলৰ মাজত যিসকলৰ সমস্যাই গুৰুতৰ আকাৰ ধাৰণ কৰিছিল, সেইসকলৰ সৰহভাগেই শকত বা লোদোৰ-পোদোৰ আছিল, অৰ্থাৎ মোটা আছিল।

কৰ’না আক্ৰান্ত মোটা ৰোগীসকলেই আই-চি-ইউত বেছি সংখ্যক ভৰ্তি হৈছিল। ইয়াৰ কাৰণ ব্যাখ্যা কৰি বিশ্ব স্বাস্থ্য সংস্থাৰ ইউৰোপৰ স্বাস্থ্য অধিকৰ্তাই কৈছে, কৰ’নাৰ বাবে দীৰ্ঘদিন ধৰি হোৱা লক-ডাউনৰ বাবে স্কুল-কলেজ, অফিচ-কাছাৰী বন্ধ হৈ আছিল। গৃহবন্দী মানুহৰ মাজত ফাষ্টফুড আৰু অস্বাস্থ্যকৰ খাদ্য গ্ৰহণ কৰাৰ প্ৰৱণতা বৃদ্ধি পাইছিল। খোজ কঢ়া, লৰা-ঢপৰা নাইকিয়া হোৱাত পেটত চৰ্বি জমা হৈছিল আৰু বৃদ্ধি হৈ গৈ আছিল। 

কেৱল ইউৰোপতেই নহয়, স্থূলতাৰ সমস্যা ভাৰততো মূৰৰ বিষ হৈ পৰাৰ উপক্ৰম হৈছে। সাম্প্ৰতিক এক গৱেষণাত গম পোৱা গৈছে, ২০২৫ চনৰ ভিতৰত ভাৰতত মোটা শিশুৰ সংখ্যা হৈ পৰিব ১ কোটি ৭০ লাখ। সমীক্ষাত দেখা গৈছে, সমগ্ৰ বিশ্বতে ২০০ কোটি প্ৰাপ্তবয়স্ক আৰু শিশু অতিৰিক্ত ওজনৰ সমস্যাত ভুগিছে। ওজন বেছি হোৱা হেতুকে অধিক ৰোগ ভোগ কৰিবলগীয়া হৈছে আৰু তাৰেই ভিত্তিত মৃত্যুৰ সংখ্যা বৃদ্ধি পাইছে বুলি সেই সমীক্ষাই দাবী কৰিছে। ২০১৫ চনত সমগ্ৰ বিশ্বত স্থূলতাৰ বাবে ৪০ লাখ লোকৰ মৃত্যু হৈছিল। সমগ্ৰ বিশ্বৰ ১০ কোটি ৮০ লাখ শিশু আৰু ৬০ কোটি প্ৰাপ্তবয়স্ক লোকৰ ‘বডি মাস্ক ইনডেক্স’ বা বি-এম-আই ৩০-অৰ অধিক।

বি-এম-আই অধিক মানেই সেই ব্যক্তিক মোটা বা শকত বুলি ধৰা হয়। চীনত মোটা শিশুৰ সংখ্যা ১ কোটি ৫৩ লাখ। ভাৰতত ১ কোটি ৪৪ লাখ। মোটা ব্যক্তিৰ সংখ্যা আমেৰিকাত সৰ্বাধিক, ৭ কোটি ৯৪ লাখ। তাৰপিছত চীন, চীনত ৫ কোটি ৭৩ লাখ। বিজ্ঞানীসকলৰ মতে তেল-মছলাযুক্ত খাদ্য, ফাষ্টফুড, পেকেট- ফুড আদি খোৱাৰ প্ৰৱণতা বৃদ্ধি আৰু পুষ্টি সম্পৰ্কে ভুল ধাৰণাই হ’ল মোটা হোৱাৰ মূল কাৰণ। একে নিশাই ওজন নাবাঢ়ে। জাংক ফুড খোৱাৰ বাবেই চৰ্বি জমা হ’বলৈ আৰম্ভ কৰে। উদ্বিগ্ন হৈ পৰা বিশ্ব স্বাস্থ্য সংস্থাৰ আক্ষেপ, সমগ্ৰ বিশ্বতে মুখৰোচক খাদ্য খোৱাৰ প্ৰৱণতা বৃদ্ধি পাইছে আৰু জাংক ফুডৰ বাবেই মানুহৰ শৰীৰত চৰ্বি জমা হৈ অত্যাধিক মেদবহুলতাৰ চিকাৰ হৈ ওজন বৃদ্ধি হৈছে তথা অধিক ৰোগ কঢ়িয়াই আনিছে।

১০-০৬-২০২২

Mahabahu.com is an Online Magazine with collection of premium Assamese and English articles and posts with cultural base and modern thinking.