ঋতুস্ৰাৱ সম্পৰ্কে কিছু গুৰুত্বপূৰ্ণ কথা

-ডা° সুকৃতি চৌধুৰী |

নমস্কাৰ বন্ধু-বান্ধৱী সকল

Indian Spirituality: Why is the West fond of it?

January 30, 2023

আপোনালোকৰ বহুতেই হয়তো কিশোৰী ছোৱালীৰ মাক বা দেউতাক ৷

উঠি অহা ছোৱালীবোৰক মাক-দেউতাকে বিজ্ঞানসন্মতভাৱে শিকাব লগা আটাইতকৈ জৰুৰী বিষয়টো হ’ল মাহেকীয়া ঋতুস্ৰাৱ সম্পৰ্কীয় বিজ্ঞানসন্মত কথাবোৰ ৷ দুখৰ কথা যে আমাৰ সমাজত এই বিষয়ে কোনেও একো আলোচনা কৰিব নোখোজে ৷ এটা বিৰাট লাজ লগা গোপন কথা বুলি অনাহকতে ছোৱালীজনীৰ শাৰীৰিক আৰু মানসিক বৃদ্ধিত বাধা জন্মায় ৷ মাহেকীয়া ঋতুস্ৰাৱৰ নামত কিমান যে ভুল ধাৰণা আছে ৷ বিভিন্ন পৰম্পৰাৰ নাম লৈ ঋতুস্ৰাৱ হ’লে শাৰীৰিক আৰু মানসিক ভাৱে এজনী ছোৱালীক কত যে জুলুম কৰে প্ৰতিজনী নাৰীয়েই এই কথা জানে ৷

মোক বহুতেই এই প্ৰশ্ন কৰিছে যে তেখেতসকলৰ ছোৱালী ডাঙৰ হৈ আহিছে ৷ কিদৰে তাঁহাতক ঋতুস্ৰাৱ সম্পৰ্কীয় কথাবোৰ শিকোৱা হ’ব ??

ইয়াৰ উত্তৰত মই আপোনাক ক’ব খোজো যে — ড° গীতা বৰাৰ “Moon Time” নামৰ কিতাপখন যদি এজনী কিশোৰী ছোৱালীৰ হাতত তুলি দিয়ে ইয়াতকৈ অমূল্য উপহাৰ তাইৰ বাবে আৰু আন একোয়েই হ’ব নোৱাৰে ৷ Amazon ত order কৰি এই কিতাপখন মগাই অনাব পাৰিব ৷ এই কিতাপখনত কমিকচৰ নিচিনাকৈ ছবি আৰু কথাৰে ড° গীতা বৰাই ইমান সাৱলীলভাৱে ঋতুস্ৰাৱৰ বিজ্ঞানসন্মত কথাবোৰ শিকাইছে যে এই কিতাপখন পঢ়াতোয়েই এজনী ছোৱালীৰ Life time experience হ’ব পাৰে ৷ আপোনাক যদি তোলনি বিয়ালৈ নিমন্ত্ৰণ দিছে এই কিতাপখন উপহাৰ দিয়ক ৷ আপুনি যদি ছোৱালী সন্তানৰ মা-দেউতা নহয়ো, তেতিয়াও এই কিতাপখন পৰিয়ালৰ মানুহৰ ছোৱালীহঁতক উপহাৰ দিয়ক ৷ বৰ উপকাৰ কৰা হ’ব ৷

ড°গীতা বৰা আৰু তেওঁৰ এই কিতাকখনক লৈ মই অলপদিন আগতে এটা লেখা যুগুতাইছিলো ৷ আজি সেই লেখাটো আপোনালৈ পুনৰ আগবঢ়ালো—–

এগৰাকী মহিয়ষী নাৰী, এটা সংগঠন আৰু এখন কিতাপঃ

শিৰোনামাত মই যি গৰাকী মহিয়ষী নাৰীৰ কথা উল্লেখ কৰিছো, তেখেত হ’ল –ড° গীতা বৰা ৷ এখন কিতাপত তেখেতৰ নামটো দেখি প্ৰথম দৃষ্টিত মই তেখেতক চিকিৎসক বুলিহে ভাবিছিলো ৷ কাৰণ কিতাপখন আছিল মহিলা সকলৰ মাহেকীয়াৰ বিষয়ে আৰু নামৰ আগত Dr লিখা আছিল ৷ কিন্ত কিতাপ খন হাতত লৈয়েই মোৰ ভুল ভাগিল ৷ ৷ তেখেত এগৰাকী সুনামধন্য IT expert হে আছিল ৷ কাৰিকৰী দিশৰ উচ্চ শিক্ষাৰে শিক্ষিত ডক্টৰেট ডিগ্ৰী প্ৰাপ্ত এগৰাকী অ’তিশয় গুণী মহিলা ৷ তেখেতে সুদীৰ্ঘ 16 বছৰ কাল ভাৰত আৰু আমেৰিকাৰ IT sector ত উচ্চ পদবীত সুদক্ষতাৰে চাকৰি কৰি তাৰ পিছত নিজ ইচ্ছাৰে চাকৰিৰ পৰা পদত্যাগ কৰি জীৱনৰ এক অ’তিশয় মহান উদ্দেশ্যৰ দিশেৰে ধাৱমান হয় ৷ তেখেতৰ মহানতাৰ কথা ক’বলৈ এটা উদাহৰণেই যথেষ্ট যে –10 বছৰ ধৰি আমেৰিকাত Software architect হিচাপে কাম কৰি সুপ্ৰতিষ্ঠিত লোভনীয় চাকৰিৰ পৰা পদত্যাগ কৰি ড°গীতা বৰাই “Spherule Foundation” নামৰ এটা সামাজিক সংগঠন স্থাপনা কৰে ৷ এই সংগঠনটোৰ জৰিয়তে গ্ৰামীণ ভাৰতৰ দৰিদ্ৰ মহিলাৰ সেৱাৰ বাবে নিজকে সৰ্বাত্মক ভাৱে নিয়োগ কৰে ৷ এই সংগঠনৰ যোগেদি তেখেতে মহিলা সশক্তিকৰণৰ বাবে ব্যাপকভাৱে কাম কৰিবলৈ আৰম্ভ কৰে আৰু সামাজিক কু-প্ৰথা, আচাৰ-নীতি তথা অন্ধ বিশ্বাসৰ বিৰূদ্ধে সোচ্চাৰ হৈ উঠে।সেয়া আছিল 2016 চনৰ কথা ৷ এই সংগঠনে মহিলাৰ মাহেকীয়া ঋতু (menstruation) সন্দৰ্ভত নাৰী সকলৰ মাজত বিৰাট জনজাগৰণ সৃষ্টিৰ বাবে উঠি-পৰি লাগিছে ৷ “Lets talk about period– teach India programme” ৰ অধীনত তেওঁলোকে গাৱে-ভূঞে মহিলা সকলক বিজ্ঞানসন্মত শিক্ষা দি ফুৰিছে, এই সম্পৰ্কীয় স্বাস্থ্যৰ সমস্যাবোৰ জানি লৈ সমাধান কৰিছে আৰু ব্যাপকহাৰত চেনিটেৰী নেপকিন যোগান ধৰি ইয়াৰ ব্যৱহাৰ শিকাইছে ৷

তদুপৰি মহিলাৰ মাহেকীয়া হোৱাৰ বিষয়ে থকা সকলো ধৰনৰ অন্ধ বিশ্বাসৰ বিৰুদ্ধে তেওঁলোকে সৰ্বাত্মকভাৱে অভিযান চলাইছে ৷

পশ্চিম ভাৰত আৰু উত্তৰ ভাৰতৰ বহুতো ভিতৰুৱা ঠাইৰ অনগ্ৰসৰ মহিলা সকলৰ মাজত তেখেতৰ কামে ব্যাপক বিস্তাৰ লাভ কৰিছে ৷ এইবোৰ ৰাজ্যৰ লাখ লাখ দৰিদ্ৰ মহিলাৰ তেখেত নয়ণৰ মণি ৷

আমেৰিকাত কৰি থকা উচ্চ চাকৰি আৰু নিজৰ সকলো সুখ-ভোগ ত্যাগ কৰি অনগ্ৰসৰ নাৰী সকলৰ স্বাস্থ্য সজাগতা সৃষ্টি কৰাতোকে জীৱনৰ ব্ৰত হিচাপে লোৱা শ্ৰীযুতা বৰাক বিভিন্ন সন্মানেৰে সন্মানিত কৰা হৈছে ৷ মহাৰাষ্ট্ৰত ড° গীতা বৰাক Pad Hero award দি সন্মানিত কৰা হৈছে ৷ ষ্টেজত তেখেতক এই বটা প্ৰদান কৰিছিল অভিনেতা অক্ষয় কুমাৰে ৷

আমাৰ চুবুৰীয়া বেংগলে তেখেতক BD অকাডেমী পুৰস্কাৰেৰে সন্মাণ জনাইছে ৷

আপুনি ইউ টিউবত Dr Geeta Bora বা Spherule Foundation বুলি বিচাৰি চালে তেখেতৰ সামাজিক কাম-কাজৰ সন্দৰ্ভে জানিব পাৰিব ৷

এতিয়া আহো ৰাইজৰ হিতাৰ্থে ক’ব খোজা এটা বিষয়লৈ ৷ ড° গীতা বৰাই “MOON TIME” নামৰ এখন এনে কিতাপ লিখি উলিয়াইছে যিখনে আপোনাৰ কণমানি ছোৱালীজনীৰ জীৱনত বহুত ভাল প্ৰভাৱ পেলাব পাৰে ৷ এই কিতাপ খন ইমান সহজ ভাষাৰে আৰু কমিকছৰ ৰূপত বনাইছে যে আঠ ন বছৰীয়া ছোৱালীজনীয়েও আগ্ৰহেৰে পঢ়িব ৷ এই কিতাপ খনত কমিকছৰ ৰূপত তেখেতে এজনী ছোৱালীয়ে তোলনি হৈ হোৱা সকলো আশংকা দুৰ কৰিছে ৷ “মাহেকীয়া কি, কিয় হয়, কেনেদৰে চলিব লাগে” আদি প্ৰতিটো কথা বিজ্ঞান সন্মত ভাৱে ইমান সৰলতাৰে বুজাই দিছে যে প্ৰতিজনী ছোৱালীক মাক-দেউতাকে এই কিতাপ খন আনি দিয়া উচিত ৷ মোৰ বিচাৰেৰে সমসাময়িক কালত ভাৰতত যিমানবোৰ কিতাপ প্ৰকাশ হৈছে, তাৰ ভিতৰত এই কিতাপ খনেই হ’ল এজনী কিশোৰীৰ কামত আহিব পৰা সৰ্বশ্ৰেষ্ঠ কিতাপ ৷

MOON TIME কিতাপখন আপুনি 199 টকা মূল্যত AMAZON ত পাব ৷ লাজ সংকোচ এৰকচোন ৷ আপুনি যদি কন্যা সন্তানৰ পিতৃ বা মাতৃ, আজিয়েই এই কিতাপখন আপোনাৰ ছোৱালীক আনি দিয়ক ৷ গোটেই জীৱনৰ বাবে তাইৰ দৰকাৰী বিষয় এটাত আটাইতকৈ ভাল শিক্ষা পাব ৷ তদুপৰি আপুনি কোনো কিশোৰীক এই কিতাপ খন উপহাৰ দি তাইক এটা বহুত ডাঙৰ উপকাৰ কৰিব পাৰে ৷

পুণে (মহাৰাষ্ট্ৰ) ৰ পৰা অসম মুলুকলৈ ড° গীতা বৰাক আমন্ত্ৰণ জনাই তেখেতৰ সজ কাম খিনি আমাৰ নাৰী সকলৰ মাজলৈকো সম্প্ৰসাৰিত কৰিলে বহুতো জনহিতকৰ কাম হ’ব ৷৷

ড° গীতা বৰাৰ “MOON TIME” কিতাপখন অনতিপলমে অসমীয়ালৈ অনুবাদ হ’ব

লাগে । আপোনালৈ বুলি ড° গীতা বৰা আৰু MOON TIME কিতাপ খনৰ ফটো সংলগ্ন কৰিলো ৷

ধন্যবাদ