এজনী কণমানি ছোৱালী, দুগৰাকী মহিলা আৰু মই

–ডা° সুকৃতি চৌধুৰী |

দেউতা সৌৱা চোৱা বুঢ়ীজনী চকীখনত বহি আছে, বিচনাখনৰ ওপৰত ইমানবোৰ ভয়ংকৰ কীট-পতংগ, খিৰিকীখন কিয় খুলি ৰাখিছা, ক’লা ক’লা চৰাইবোৰ সোমাই আহিছে, পলোৱা পলোৱা……নিশা এক বজাত মাক-দেউতাকৰ মাজত শান্তিৰে শুই থকা পাঁচবছৰীয়া মৰম লগা কণমানি ৰাধিকা এইদৰে চিঞৰ-বাখৰ কৰি অস্থিৰ হৈ উঠিল ৷ তাই বয়স অনুপাতে মানসিক বিকাশ নোহোৱা এগৰাকী কণমানি ৷ কিছুদিনৰে পৰা তাইক ময়েই চিকিৎসা কৰি আহিছিলো ৷ MRI কে ধৰি সকলো খিনি প্ৰয়োজনীয় পৰীক্ষা কৰাই যাবতীয় ঔষধ দিছিলো ৷ জন্মৰ ঠিক পিছতে হোৱা জণ্ডিছে কণমানিজনীক একেবাৰেই দুৰ্বল কৰি পেলাইছিল আৰু স্থায়ী ক্ষতি কৰিছিল ৷ পৰীক্ষা কৰি পোৱা গৈছিল যে তাইৰ বয়স পাঁচ বছৰ হ’লেও কিন্ত তাই মানসিকভাৱে আঢ়ৈ বছৰমানৰ হৈ আছে ৷ তাইৰ মনৰ জগতখন বুজিবলৈ মই বহুত কষ্ট কৰিছিলো ৷ আনকি ঘন্টাৰ পিছত ঘন্টা তাইক কোলাত লৈ ফুৰি, তাইৰ সৈতে খেলনাবোৰেৰে খেলি সময় দি তাইক সুক্ষ্মভাৱে লক্ষ্য কৰিছিলো ৷ অৱশেষত তাইক যি কেইটা point ত চিকিৎসাৰ দৰকাৰ সেয়া মই ধৰি পেলাইছিলো ৷ ঔষধ দিয়া হৈছিল ৷ মই দেউতাকক টেবলেটটোৰ কিমান অংশ খুৱাব লাগিব, কেতিয়া খুৱাব লাগিব কৈছিলো ৷ কিন্ত ইয়াতো মোৰ চিকিৎসাৰ অন্তৰায় হ’ল ‘ইউ টিউব’ ৷ মই কণমানিজনিৰ বাবে দুবিধ ঔষধ দিছিলো ৷ ইমানকৈ বুজাই দিয়াৰ পিছতো দেউতাকে ‘ইউ টিউব’ত চাই কোনো মূৰ্খই বৰ্ণনা কৰা মতে গোটেই টেবলেট আৰু দুয়োবিধ ঔষধ একেলগে দিলে ৷ যাৰ ফলত একপ্ৰকাৰ নিচাগ্ৰস্ত হৈ তাই লগে লগেই শুই পৰিলেও মাজ নিশা সাৰ পাই over dose হোৱাৰ পাৰ্শ্বক্ৰিয়া হিচাপে illusion হৈ এই ধৰণৰ নাভূত-নাশ্ৰুত কথা ক’বলৈ ধৰাৰ লগতে ভয় খোৱাৰ বাবে তাণ্ডব কৰিবলৈ আৰম্ভ কৰে ৷ দেউতাকে এতিয়া অসহায় হৈ মোক ফোন কৰিলে নিশা ১:৩০ মান বজাত ৷ মই লগে লগেই ‘ভিডিঅ’ কল’ কৰিবলৈ দি ৰাধিকাৰ লগত কথা পতা আৰম্ভ কৰিলো ৷ মই জানিছিলো কিমান সময়লৈ তাই এনে ব্যৱহাৰ কৰিব ৷ সেয়ে তাইক illusion ৰ মাজতেই ভয় নোখোৱাকৈ ৰাখিবলৈ কি যে নকৰিলো ৷ তাই কয় –বিচনা খনত ইমান ডাঙৰ ডাঙৰ পোক আছে ৷ মই লগে লগে সেই পোক খাই ভাল পোৱা ডাইন’ছৰৰ অভিনয় কৰি দেখুৱাওঁঁ ৷ লগে লগে ৰাধিকাই হাঁহি দিয়ে ৷ তাই কয় ৰূমৰ কোণটোত চকীপাৰি সেই দাতুলী বুঢ়ী বহি আছে ৷ লগে লগে মই সেই বুঢ়ীক খেদি পঠিওৱা পৰী হৈ পৰো ৷ ৰাধিকাই খিলখিলাই হাঁহি উঠে ৷ মই যিহেতু ইমান নিশা ৩০ কিলোমিটাৰমান দুৰৰ তেওঁলোকৰ ঘৰলৈ যাব নোৱাৰিম বা তেওঁলোকো অহাতো সহজসাধ্য নহয়, সেয়ে শেষ উপায় হিচাপে ৰাধিকাক এনেদৰেই মানসিক সমৰ্থন কৰি কৰি এটা সময়ত ভয় আৰু illusion মুক্ত কৰিবলৈ সক্ষম হ’লো ৷ তেতিয়ালৈ ৰাতিপুৱাই গৈছিল ৷ পিছদিনা যিহেতু OPD day আছিল সেয়ে আৰু শুই থকাৰ চেষ্টা নকৰি মুৰৰ বিষ কমাবৰ বাবে একাপ গৰম কফি খাই বাথৰুমত সোমালো …………..।

ৰাধিকাক লৈ মাক-দেউতাক হস্পিতাল আহি পাওঁতে দুপৰীয়া হ’ল ৷ মোৰ আৰু দুগৰাকী ৰোগী চাবলৈ বাকী আছিল ৷ দুয়োগৰাকী মধ্যবয়সৰ মহিলা ৷ প্ৰফাইল চাই দেখো যে দুয়ো depression ৰ চিকাৰ ৷ দুয়োকে প্ৰয়োজনীয় ঔষধ আদিৰ দিহা দি কাউন্সেলিং আদিৰ বাবে তাৰিখ নিৰ্দিষ্ট কৰা হ’ল ৷ মোৰ বাবে ৰৈ থকা মহিলা ৰোগী দুগৰাকীৰ ভিতৰত এগৰাকী মহিলাৰ চৰিত্ৰহীন স্বামীয়ে তেওঁক ঘৰৰ বাহিৰ কৰি দিছিল ৷ মহিলা গৰাকীক পাগল আখ্যা দি স্বামীয়ে সন্তান কেইটাক নিজৰ লগত ৰাখিছিল ৷ ইয়াৰ পিছত তেওঁৰ মানসিক স্থিতি কি হ’ব পাৰে সহজেই অনুমেয় ৷ মোৰ বাবে অপেক্ষাৰতা আনগৰাকীৰ মহিলাৰ স্বামী মদপী ৷ দৈনিক মদ খাই আহি মাৰ-পিট কৰে ৷ হঠাতে একমাত্ৰ সন্তানটোৰো অকাল মৃত্যু হ’ল ৷ এফালে মদপী স্বামীৰ অত্যাচাৰ আৰু আনফালে সন্তানৰ মৃত্যুৰ বেদনাই তেওঁক গভীৰ নৈৰাশ্য লৈ ঠেলি দিলে ৷ তেওঁলোকৰ চলিব লগা ঔষধ আৰু চিকিৎসা পদ্ধতি চলি থকাৰ লগতে মই বিশ্বাস কৰিছিলো যে ৰাধিকাই মোৰ এই দুয়োটা কেচৰ সমিধান কৰোতে সহায়ক হ’ব পাৰিব ৷ মইয়ো গাওঁৰ ছোৱালী হে ৷ ৰাধিকাক ফেৰেকা কোলাত লৈ হস্পিতালখনৰ পাৰ্কলৈ আহিলো ৷ লগে লগে মহিলা ৰোগী দুগৰাকী ৷ ৰাধিকাক খেলিবলৈ লগাই দি গভীৰ নৈৰাশ্যত ভোগা মহিলা দুগৰাকীক তাইক খেলাবলৈ দিলো ৷ ৰাধিকাৰ মাক-দেউতাক আৰু মহিলা দুগৰাকীৰ লগত অহা পৰিয়ালৰ মানুহে মোলৈ চকু ডাঙৰ কৰি চাই আছিল ৷ হয়তো ভাবিছিল –এই বাইদেউজনী কিবা আধা পাগল ঔ ৷ কিন্ত মই সুপৰিকল্পিতভাৱে থিকেই কৰিছিলো ৷ মই সদায়েই ৰাধিকা আৰু মহিলা দুগৰাকীৰ চিকিৎসালয়লৈ আহিব লগা তাৰিখ একেটাই ৰাখি দিওঁ আৰু চিকিৎসাৰ শেষত তিনিওৰে পাৰ্কত খেল-ধেমালি চলে ৷ কিছুদিনৰ পিছত তিনিওৰে মাজত এৰাব নোৱাৰাা আত্মীয়তা হৈ উঠিল ৷ বচ্ ৷ মই ইমানকে বিচাৰিছিলো ৷ মই তেওঁলোকৰ পৰিয়ালৰ মানুহক কৰা অনুৰোধমৰ্মে তিনিওজনীকে হস্পিতাললৈ অহাৰ দিনটোৰ বাদেও আন দিনাও বিভিন্ন স্থানত লগ কৰোৱাৰ ব্যৱস্থা কৰাই থকা হ’ল ৷ কণমানিজনীৰ প্ৰতি উন্মেষ হোৱা মৰমে মহিলা দুগৰাকীৰ জীৱনত যেন নতুন ৰং সিঁচি দিলে ৷ আনহাতে ঔষধ আৰু দৰকাৰী চিকিৎসা বিধিও সমানে চলি থাকিল ৷ সাধাৰণতে লাগিব লগা সময়তকৈ কম সময়ৰ ভিতৰতে দুয়োগৰাকী মহিলা সম্পুৰ্ণ সুস্থ হৈ উঠিল ৷ আৰু ৰাধিকা ? তাই আগতকৈ বহুত বেছি নিজক develope কৰিব পাৰিছে ৷ মোৰ বিশ্বাস এদিন তাইয়ো তাই আন দহজন শিশুৰ দৰে হৈ উঠিব ৷ হয়তো অকণমান slow হ’ব পাৰে ৷ আপোনাক কথা দিছো, মোৰ বিচাৰেৰে ৰাধিকা যিদিনা সুস্থ হৈ উঠিব, মই তাইৰ এখন ফটো আপলোড কৰিম ৷