এবছৰীয়া শিশুটিৰ মাহিলী উপাৰ্জন ৭৫০০০ টকা!

–তনয় চক্ৰৱৰ্তী |

এবছৰীয়া শিশু। এতিয়াও ভালদৰে খোজ দিবলৈও শিকা নাই। কিন্তু এই বয়সতেই শিশুটিয়ে ভাৰতীয় মুদ্ৰা অনুসৰি মাহে ৭৫০০০ টকা উপাৰ্জন কৰি আছে! সদা হাস্যময় এই বিস্ময়কৰ শিশুৰ পেশা হ’ল ‘মেডিয়া ইনফ্লুৱেন্সাৰ’; অৰ্থাৎ কেৱলমাত্ৰ সংবাদ মাধ্যমৰ জগতত তোলপাৰ কৰিয়েই এধানিমান শিশুটিয়ে মাহিলী উপাৰ্জনৰ দ্বাৰা পুনৰ সংবাদৰ শিৰোনাম দখল কৰি অধিক উপাৰ্জনৰ দিশে আগবাঢ়িছে। বহুতেই কৈছে যে বয়সৰ পিনেৰে তেনেই দুগ্ধপোষ্য হ’লে কি হ’ব, এই শিশুৰ উপাৰ্জনৰ দ্বাৰা এখন সংসাৰ সুন্দৰকৈ চলি যাব পাৰে। বহুতেই শিশুটিক ভৱিষ্যতৰ বিল গেটচ, জেফ বেজোছ বুলিও অভিহিত কৰিছে।
নেট সভ্যতাৰ অগ্ৰগতিৰ লগে লগে নতুন নতুন পেশাৰ সৃষ্টি হৈছে। যেনে, ব্লগাৰ, ইউটিউবাৰ, ভ্লগাৰ, ইত্যাদি। তেনে এক পেশা হ’ল ‘মেডিয়া ইনফ্লুৱেন্সাৰ’। অৰ্থাৎ, এজন মানুহে গোটেই দিনটোত কি কৰে, কি খায়, ক’ত ফুৰে, অথবা এটা ষাঁড়গৰুৱে দিনটো কি কি কৰে, কি কি খায়, ক’ত ঘূৰি ফুৰে, কিহত আনন্দ পায়, কিহত বেদনা পায়, ইত্যাদি চোছিয়েল মেডিয়াত আপলোড কৰা হয় আৰু তাৰপৰাও উপাৰ্জনৰ পথ মুকলি হয়। এই শিশুক কোৱা হৈছে বিশ্বৰ সৰ্বকনিষ্ঠ মেডিয়া ইনফ্লুৱেন্সাৰ।

ইনস্টাগ্ৰামত শিশুটিৰ প্ৰফাইলৰ নাম হ’ল ‘বেবি ব্ৰিগচ্’। তাতেই পৰিচয় ডাঙি ধৰা হৈছে ‘বিশ্বৰ সৰ্বকনিষ্ঠ পৰ্যটন উৎসাহী’ হিচাপে। ইয়াৰ দ্বাৰাই শিশুটিৰ মাহিলী উপাৰ্জন হৈছে ১০০০ আমেৰিকান ডলাৰ, অৰ্থাৎ ভাৰতীয় মুদ্ৰা অনুসৰি প্ৰায় ৭৫০০০ টকা। যোৱা বছৰৰ ১৪ অক্টোবৰত আমেৰিকাত জন্ম লাভ কৰা এই ১২ মহীয়া শিশুটিয়ে ইতিমধ্যে ৪৫ বাৰকৈ বিমান ভ্ৰমণ কৰিছে, আমেৰিকাৰ ১৬ খন প্ৰদেশত ভ্ৰমণ সমাপ্ত কৰিছে। শিশুটিয়ে ভ্ৰমণ কৰিছে উটাহ, ফ্লোৰিডা, আলাস্কা, কেলিফ’ৰ্ণিয়াৰ দৰে প্ৰদেশ। শিশুটিৰ বয়স যেতিয়া আছিল মাথোঁ ৩ সপ্তাহ, তেতিয়াৰে পৰাই যেন শৰীৰত বান্ধি লৈছিল ভ্ৰমণৰ ডেউকা। ইনস্টাগ্ৰামত শিশুটিৰ অনুৰাগীৰ সংখ্যা হ’ল ৩০০০০! শিশুটিৰ মাতৃ জেছ-এ এটা ব্লগ চলায়, সেইটোৰ নাম হ’ল ‘পাৰ্ট টাইম টুৰিস্ট’। যোৱা বছৰ জীৱনত প্ৰথম মাতৃত্বৰ আনন্দ লাভ কৰাৰ পিছত শিশুটিৰ মাতৃয়ে ভাবিছিল যে তেওঁৰ পক্ষে হয়তো ব্লগ চলাই থকা সম্ভৱ নহ’ব।

কিন্তু শিশুটি সামান্য ডাঙৰ হোৱাৰ লগে লগে পুনৰ ব্লগৰ কাম আৰম্ভ কৰিলে তেওঁ। সংবাদ মাধ্যমৰ সন্মুখত মাতৃয়ে সদৰি কৰিছে যে পৰ্যটন উৎসাহী কোনো শিশুৰ ইনস্টাগ্ৰামত একাউণ্ট আছে নে নাই সেয়া তন্ন তন্নকৈ চলাথ কৰি তেনে একাউণ্ট দেখা নাপাই কেৱল মনোৰঞ্জনৰ বাবেই ‘বেবি ব্ৰিগচ্’ নামেৰে এটা একাউণ্ট খুলি সাধাৰণ মানুহৰ সৈতে নিজৰ সন্তানৰ ভ্ৰমণৰ আনন্দ ভাগ কৰি ল’বলৈ আৰম্ভ কৰো। নিজৰ সন্তানৰ বিষয়ে তেওঁ কয় যে ব্ৰিগচ্- এ ইতিমধ্যে আলাস্কাত ভালুক দেখিছে, ইউলোস্টোন নেশ্যনেল পাৰ্কত কুকুৰনেছীয়া দেখিছে, উটাহত ডেলিকেট চাৰ্চ দেখিছে, কেলিফ’ৰ্ণিয়াৰ উষ্ণ সমুদ্ৰ উপকুলৰ বালিত বাগৰিছে, নিৰল ঠাইত তম্বুত থকাৰ অভিজ্ঞতা লভিছে, আৰু পৰ্যটনৰ নিচাই শিশুটিক আসক্ত কৰি পেলাইছে।

আগতে ব্লগ চলাই যি উপাৰ্জন হৈছিল, সেই ধনেৰে তেওঁ আমেৰিকাৰ বিভিন্ন স্থান ভ্ৰমণ কৰিছিল। এতিয়া শিশুটিয়ে সংসাৰৰ লেকাম ধৰিব পৰা হ’ল, গতিকে চিন্তা কিহৰ! মাতৃৰ ভাষাৰে – ভ্ৰমণ কৰি সেই স্থানবোৰৰ বিষয়ে ব্লগত লেখি, ছৱি আপলোড কৰি মই ঘৰ চলাইছিলো। গতিকে ব্ৰিগচ্ পেটত থিতাপি লওঁতে চিন্তা হৈছিল – সন্তানক লৈ ভ্ৰমণ হয়তো সম্ভৱ নহ’ব। কিন্তু এতিয়া মোৰ চিন্তাধাৰা সলনি হৈ পৰিছে। কাৰণ এতিয়া মানুহে জানিবলৈ বিচাৰে, এটি শিশুক লগত লৈ ভ্ৰমণ কৰিবলৈ হ’লে কি কি সুবিধা- অসুবিধা হ’ব পাৰে, কি কি প্ৰস্তুতি ল’ব লাগে, ইত্যাদি; সেয়েহে মোৰ ব্লগৰ পৰা তেওঁলোকৰ উপকাৰ হয়। যোৱাবছৰ কোভিডৰ বিধি-নিষেধ সমূহ মানি ব্ৰিগচ্-অক লৈ ভ্ৰমণ কৰোতে বিপদজনক নিউয়ৰ্কৰ দৰে ডাঙৰ চহৰ তালিকাৰ পৰা বাদ দিছিলো। স্থানীয় ভ্ৰমণ আৰু পথযাত্ৰাৰ ওপৰতো গুৰুত্ব দিছিলো। সেয়ে সমস্যা হোৱা নাছিল।
ব্ৰিগচ্-এ ইতিমধ্যে তেওঁৰ নিত্য ব্যৱহাৰ্য ডাইপাৰ আৰু ওৱাপ্স আদিৰ স্পনছৰ লাভ কৰিছে। সেই সূত্ৰেও লাভ কৰে নগদ ডলাৰ। মাতৃয়ে খিলখিলাই হাঁহি সংবাদ মাধ্যমক জনাইছে যে তেওঁলোকৰ পৰৱৰ্তী গন্তব্যস্থল হ’ল সমগ্ৰ ইউৰোপ। ব্লু-প্ৰিন্ট ইতিমধ্যে তৈয়াৰ হৈছে।