ককা আইতাৰ দিন আৰু চ্যেট জি.পি.টি  (Chat G.P.T)  

ককা আইতাৰ দিন আৰু চ্যেট জি.পি.টি  (Chat G.P.T)

ঝৰ্ণা শৰ্মা দেৱচৌধুৰী  

ছেপ্টেম্বৰ মাহ শিক্ষকৰ মাহ।

ডঃ সৰ্বপল্লী ৰাধাকৃষ্ণণৰ জন্মতিথি উপলক্ষে পাঁচ ছেপ্টেম্বৰ দিনটো প্ৰতি বছৰৰ দৰে  চলিত বছৰতো সমগ্ৰ ভাৰতবৰ্ষত অতি ধুমধামেৰে শিক্ষক দিৱস হিচাপে পালন কৰা হ’ল।

এখন সুস্থ সমাজ গঢ়িবলৈ শিক্ষাৰ গুৰুত্ব কিমান সেয়া অনুধাৱন কৰিয়েই  এটা নিৰ্দিষ্ট সময়ৰ ব্যৱধানত নতুন নতুন শিক্ষানীতিৰ প্ৰবৰ্তন কৰা হয়, আনহাতে শিক্ষাৰ প্ৰচাৰ আৰু প্ৰসাৰৰ গুৰুদায়িত্ব বহন কৰা শিক্ষকসকলৰ  গুৰুত্ব বুজিয়েই তেওঁলোকৰ সন্মানাৰ্থে  প্ৰতি বছৰে শিক্ষক দিৱসৰ আয়োজন কৰা হয়।

শিক্ষাব্যৱস্থা বুলি কোৱাৰ লগে লগে যদিও তাৎক্ষণিক ভাৱে  স্কুল, কলেজত দান কৰা পাঠ্যক্ৰমিক শিক্ষাৰ কথাই আমাৰ মনলৈ আহে, কিন্তু ব্যৱহাৰিক শিক্ষা, নীতিশিক্ষা, সামাজিক শিক্ষা, শুদ্ধ আচৰণৰ  শিক্ষা , সফলতা, বিফলতা দুয়োটাকে সহজভাৱে গ্ৰহণ কৰিব পৰা শিক্ষা, উদাৰচিত্ত হোৱা আৰু যিকোনো প্ৰত্যাহ্বানৰ সন্মুখীন হ’ব পৰা শিক্ষাৰ অবিহনে পাঠ্যক্ৰমিক শিক্ষা তেনেই মূল্যহীন হৈ পৰে।

সেয়েহে হয়তো আমাৰ ককা-আইতাহঁতৰ দিনত পাঠ্যক্ৰম ভিত্তিক উচ্চ শিক্ষাৰে শিক্ষিত লোকৰ সংখ্যা আজিৰ তুলনাত কম আছিল যদিও তেওঁলোকৰ  সামাজিক মূল্যবোধ অধিক আছিল।

বিজ্ঞানৰ দৃষ্টিৰে তেওঁলোক কিছু পিছপৰা আছিল যদিও আসক্তি, অসহনশীলতা আৰু বিয়োগাত্মক প্রতিযোগিতাৰ পৰা দূৰত থকাৰ হেতুকে  এক পৰিশীলিত  জীৱন যাপনেৰে জ্ঞানৰ এক অন্য দুৱাৰ মুকলি কৰিবলৈ সক্ষম হৈছিল।

যি কি নহওঁক সময়ৰ লগে লগে সকলো ক্ষেত্ৰতে পৰিৱৰ্তন অৱশ্যম্ভাৱী। শৃংখলিত পৰিৱৰ্তন সমাজ উন্নয়নৰ  মূল চাবিকাঠি। এনে পৰিৱৰ্তনক গ্ৰহণ কৰিব নোৱাৰা মানুহৰ মনবোৰ এটুকুৰা বন্ধ পানীৰ দৰে, য’ত কেৱল ম’হ দাঁহ আদি জীৱৰহে বাসস্থান হ’ব পাৰে।

সম্প্ৰতি পৃথিৱী তোলপাৰ লগোৱা তেনে এটা নতুন পৰিৱৰ্তনৰ নাম হৈছে চ্যেট জি.পি.টি ( Generative pre-trained Transformer) ২০২২ চনৰ ৩০ নৱেম্বৰ তাৰিখে  “Open AI” য়ে এই টুলতো লঞ্জ কৰিছিল, আৰু লঞ্জ কৰাৰ মাথোঁ পাঁচ দিনৰ ভিতৰতে দহলাখ মানুহে উক্ত টুলটোত ৰেজিষ্টাৰ কৰি পেলাইছিল।

কি এই চ্যেট জি. পি.টি?চ্যেট জি.পি.টিয়ে এনে কি কৰে? যাৰ বাবে টুলটোৰ প্ৰতি মানুহ ইমানকৈ আকৰ্ষিত হৈছে?

তেন্তে  জানো আহক…চ্যেট জি. পি.টি. এনে এটা টুল যি আপোনাক আপুনি বিচৰা সকলো কাম কৰি দিব পাৰে।

হয় সকলো কাম।

যেনে ?

যেনে – আপোনাৰ স্কুলৰ হ’মৱৰ্ক আছে, টুলটোক মাথোঁ আপুনি কোৱালৈকেহে দেৰি। আপোনাৰ পচন্দমতে নিমিষতে ই আপোনাৰ হ’মৱৰ্ক ৰেডি কৰি দিব।আপুনি এটা প্ৰবন্ধ লিখিব লাগে, টুলটোক মাথোঁ আপুনি বিচৰা  বিষয়টো বান্ধি দিয়ক, মুহূৰ্ততে প্ৰবন্ধ লিখি আপোনাৰ সন্মুখত প্ৰস্তুত কৰি দিব। গল্প, কবিতা, উপন্যাস,  আপোনাক যি লাগে, যেনে মানদণ্ডৰ লাগে ঠিক তেনে ধৰণেৰেই  আপোনাৰ সন্মুখত লিখি হাজিৰ কৰি দিব এই চ্যেট জি.পি.টি. য়ে।

ই-মেইল ফৰ্মেট কৰি দিব লাগে, কডিং কৰিব লাগে, ব্যাকৰণ শুদ্ধ কৰিব লাগে, বাক্যৰ গাঁঠনি অধিক শক্তিশালী কৰিব লাগে, সকলোবোৰ আপোনাক চ্যেট জি. পি.টি. য়ে অতি সহজতে কৰি দিব।

এতিয়া আৰু ছবি এখন আঁকিবৰ  বাবে আপোনাক কাগজ, পেঞ্চিল বা কম্পিউটাৰত পেইন্ট ব্ৰাছৰ প্ৰয়োজন নহয়। আপুনি মাথোঁ চ্যেট জি.পি.টিত টাইপ কৰিব বা ক’ব লাগে যে আপোনাক এটা পাখি থকা হাতী আকাশত উৰি থকা ছবি এখন লাগে। বচ…মুহূৰ্ত্ততে নীল দিগন্তত এটা বিশালকায় হাতী উৰি থকা ছবিখন আপোনাৰ চকুৰ সন্মুখত ভাঁহি উঠিব।

মাথোঁ ইমানেই নহয়, আপুনি যদি কাৰোবাৰ প্ৰেমত পৰিছে আৰু প্ৰপ’জ কৰিবলৈ বিচাৰিছে ?

প্ৰপ’জ কৰাৰ সম্পূৰ্ণ পদ্ধতি চ্যেট জি.পি টি.য়ে আপোনাক শিকাই দিব। আপোনাক যদি প্ৰয়োজন হয় প্ৰেমপত্ৰও এই চ্যেট জি.পি.টি.য়েই আপোনাৰ বাবে লিখি দিব। আপুনি যদি কনটেণ্ট ৰাইটাৰ, ই-মেইল ডেভলপাৰ, ব্লক ৰাইটাৰ, শ্লোগান বা টাইটেল ৰাইটাৰ তেন্তে চ্যেট জি. পি.টি.ৰ জৰিয়তে আপুনি কম কষ্টত আৰু কম সময়তে  অধিক উন্নত মানৰ কাম কৰিবলৈ সক্ষম হ’ব।

বহুতে সন্দেহ প্ৰকাশ কৰিছে যে এই টুলটোৰ বাবে এতিয়া বহুলোকে  চাকৰি হেৰুৱাব , কাৰণ বহুলোকৰ কাম এতিয়া মাথোঁ এজন লোকে চ্যেট জি.পি.টি.ৰ সহায়তে সম্পন্ন কৰিব পাৰিব।

আন বহুতে ধাৰণা কৰিছে যে এই টুলটোৰ জৰিয়তে কাম কৰিবলৈ ভাল পোৱা লোকে কম সময়তে, উচ্চমানৰ কাম কৰি আর্থিকভাৱে অধিক লাভৱাম্বিত হ’ব পাৰিব।

চ্যেট জি. পি.টি.ৰ আৱিৰ্ভাৱৰ ফলত হ’ব লগা সলনি সমূহে পৃথিৱীক  পৰিৱৰ্তনৰ কোনটো  দিশলৈ লৈ যায় সেয়া সময়ে ক’ব।

কিন্তু আমি নিজা অভিজ্ঞতাৰপৰা দেখিছোঁ যে টেলিভিছন,  কম্পিউটাৰ, মোবাইল ফোন,ভিডিও গেম আদিৰ আৱিষ্কাৰ আৰু ব্যৱহাৰে জীৱন আগতকৈ সহজ আৰু আৰামদায়ক কৰি তুলিছে যদিও পৰোক্ষভাৱে বিৰূপ প্ৰভাৱো পেলাইছে। 

মানুহে সৃষ্টি কৰা গেজেটসমূহে বৰ্তমান মানুহক এনেদৰে নিজৰ মোহপাশত আবদ্ধ কৰি ৰাখিছে যে মানুহ ওলোটাই এই গেজেটসমূহৰ অধীন হৈ পৰিছে। মোবাইল ফোনত নাম টাইপ কৰিলেই নম্বৰ ওলোৱাৰ ফলত আগৰ দৰে আমি আনৰ ফোন নাম্বাৰসমূহ মনত ৰখাৰ প্ৰয়োজনবোধ নকৰা হ’লো। চচিয়েল মিডিয়া ব্যৱহাৰৰ ফলত শ-শ  অনলাইন  বন্ধু-বান্ধৱ গোট খোৱাৰ ফলত ওচৰ-চুবুৰীয়াৰ কাষত এখন্তেক থিয় দিবলৈ সময় নোহোৱা হ’ল।

ইণ্টাৰনেটৰ বহুল প্ৰচাৰ হোৱাৰ আগেয়েও মানুহে বাতৰি কাকত , আলোচনী আদিলৈ গল্প কবিতা আদি লিখি পঠাই আৰু প্ৰকাশ হ’লেই  লিখাটো ভাল হোৱা বুলি ধৰি লৈ আনন্দিত হৈছিল। আজি কালি কিবা এটা লিখি উঠি লাইক, কমেন্ট, শ্বেয়াৰ আদিৰ হিচাপ কৰা হয়। ভৱা মতে নহ’লেই হতাশগ্ৰস্ততাই আগুৰি ধৰা হ’ল।হাতে হাতে থকা মোবাইল ফোনবোৰে মানুহক চিন্তামুক্ত কৰাৰ সলনি অধিক উদ্বিগ্নহে কৰি তুলিলে।

ফোনটো কৰাৰ লগে লগে যদি বিপৰীত পক্ষই ৰিচিভ নকৰে  মনতো নানা দুৰ্ভাৱনাই চানি ধৰি অসুবিধা দিয়া হ’ল।

এতিয়া চ্যেট জি.পি.টিৰ ব্যৱহাৰৰ ফলত  বিনা কষ্টত থাওকতে  কামবোৰ সমাধা কৰিব পৰা সময়ত আমি যদি বুদ্ধিৰে পৰিচালিত হৈ সঠিকভাৱে, উচিত পৰিমাণত চ্যেট জি. পি.টি আৰু আন আন  আধুনিক গেজেট ব্যৱহাৰ কৰাত সাৱধান নহওঁ তেন্তে  হয়তো অধিক অলসতা, সৃষ্টিহীনতা, মগজুৰ কৰ্ষণৰ অভাৱত বুদ্ধিহীনতাৰ দিশে গতি কৰিম।

আমি পুথিগত শিক্ষাৰে উচ্চ শিক্ষিত হৈছোঁ যদিও আধুনিক জীৱনশৈলী আৰু গেজেটসমূহৰ ব্যৱহাৰে আমাৰ অবাঞ্চিত প্ৰত্যাশা বৃদ্ধি কৰিছে। ফলত আমি কৰবাত নহয় কৰবাত অসন্তুষ্ট হৈ থাকিবলৈ লৈছোঁ।এই ক্ষেত্ৰত আমাক আধ্যাত্মিক শিক্ষাৰো প্ৰয়োজন আছে। কোভিড কালত বিদ্যালয়, মহাবিদ্যালয়সমূহৰ শ্ৰেণীসমূহ অন লাইন হোৱাৰ সময়ত ভৱা হৈছিল যে এইবাৰ হয়তো পৃথিৱী কাগজমুক্ত হৈ পৰিব। বহু সমস্যাৰ হয়তো অন্ত পৰিব।

কিন্তু দিন যোৱাৰ লগে লগে অনলাইন ক্লাছৰ  ভাল দিশসমূহ সামৰিলৈও আমি উপলব্ধি কৰিলোঁ যে  হাজাৰ উন্নত মানৰ অনলাইন ক্লাছ থাকিলেও বিদ্যালয়লত শাৰীৰিক ভাৱে উপস্থিত থাকি গ্ৰহণ কৰা শিক্ষাৰ মূল্য অধিক।

ইয়াৰ দ্বাৰা ছাত্ৰ-ছাত্ৰীয়ে কেৱল পাঠ্যক্ৰমৰ শিক্ষাই নহয়, জীৱনৰ বাবে প্ৰয়োজনীয় নিয়মানুৱৰ্তিতা, গুৰুৰ প্ৰতি শিষ্যৰ থাকিব লগা শ্ৰদ্ধা, সহপাঠীৰ সৈতে অন্তৰংগতা, পৰস্পৰে পৰস্পৰৰ প্রতি থাকিব লগা সৌহাদ্যপূৰ্ণ আচৰণ, সহায়কাৰী মনোভাৱ আদিৰো বিকাশ হয়। এজন  সুনাগৰিকৰ মাজত থাকিব লগা এই আচৰণসমূহ আয়ত্ব কৰিবলৈ আধুনিক গেজেটৰ বজাৰখনৰ পৰা ওলাই আহি  মানুহে মানুহৰ সংগত বাস কৰিব লাগিব।

বৃদ্ধ অৱস্থাৰ  নিঃসংগতাক জয় কৰিবলৈ হ’লে  আধুনিক উপকৰণ সমূহতকৈ মানুহৰ সংগ উপভোগ কৰিবলৈ শিকিব  লাগিব।

আমাৰ ককা আইতাৰ দিনত যদিও চ্যেট জি.পি.টি. ৰ দৰে আধুনিক সংস্কৰণৰ  আবিৰ্ভাৱ হোৱা নাছিল,যদিও তেওঁলোকে চন্দ্ৰৰ বুকুৰ শিলাময় পাহাৰক তুলসীৰ তলৰ মৃগপহু বুলিয়েই ভাবি আছিল, তথাপি আধুনিক গেজেটৰ পৃথিৱীৰ পৰা দূৰত থাকি তেওঁলোক মানুহৰ ওচৰ চাপি আছিল। আজিৰ দিনৰ অভিশাপ স্বৰূপ নিসংগতা, বিষণ্ণতা, বৰদম আদিৰ পৰা তেওঁলোক শ-শ যোজন দূৰত আছিল।

গতিকে আমি এনে গেজেট সমূহৰ দ্বাৰা প্ৰভাৱাম্বিত নহৈ নিজৰ অধীনত ৰাখি ব্যৱহাৰ কৰিব জানিলেই  বহু সমস্যাৰ পৰা হাত সাৰি থাকিব পাৰিম যেন ধাৰণা হয়।

Images from different sources

[Declaration: This article is written by the writer, not by the ChatGPT/AI]

Mahabahu.com is an Online Magazine with collection of premium Assamese and English articles and posts with cultural base and modern thinking.  You can send your articles to editor@mahabahu.com / editor@mahabahoo.com (For Assamese article, Unicode font is necessary)