কাশ্মীৰত বাঢ়িছে টাৰ্গেট কিলিং

অৰবিন্দ ৰাভা

এতিয়া ভূ-স্বৰ্গ কাশ্মীৰৰ পৰিস্থিতিক লৈ উদ্বেগ বৃদ্ধি হোৱাৰ লগে লগে আইন-শৃঙ্খলাৰ ইমানেই অৱনতি হ’বলৈ ধৰিছে যে ক্ৰমাৎ একপ্ৰকাৰ বিতত হৈ পৰিছে মোডী চৰকাৰ। এজনৰ পিছত এজনকৈ কাশ্মীৰি পন্ডিত, বেলেগ প্ৰদেশৰ পৰা কাশ্মীৰলৈ কাম কৰিবলৈ অহা বহিৰাগত সম্প্ৰদায়ৰ হিন্দু লোকক টাৰ্গেট কৰি হত্যা কৰিবলৈ ধৰিছে হত্যাকাৰীয়ে। অথচ মোডী চৰকাৰে কোনো সু-ব্যৱস্থা ল’বলৈ সক্ষম হোৱা নাই। 

RelatedPosts

U.S. strikes in Nigeria

January 2, 2026

Karbi Anglong on the Brink: Land, Identity, and the Deepening Fault Lines in Assam’s Tribal Heartland

December 24, 2025

Politics of ethnicity and Sub-Nationalism of North East India

December 18, 2025

বিগত কেইটামান দিনৰ ভিতৰত কেতিয়াবা চৰকাৰী কৰ্মী ৰাহুল ভাট, টিভি সঞ্চালিকা আমৰিনা ভাট, স্কুল শিক্ষক ৰজনী বালাক হত্যা কৰাৰ উপৰিও যোৱা বৃহস্পতিবাৰে, ২ জুন তাৰিখে, বেংক মেনেজাৰ বিজয় কুমাৰক ‘পইন্ট ব্লেংক ৰেঞ্জ’ৰ পৰা গুলিয়াই হত্যা কৰিছে। যোৱা বছৰৰ অক্টোবৰ মাহৰ পৰা, বিশেষকৈ কাশ্মীৰি পন্ডিত সকলক বাচি বাচি হত্যা কৰা হৈছে আৰু সম্প্ৰতি সেই নৃশংসতাৰ প্ৰৱণতা বৃদ্ধি পাইছে।

“অইন নালাগে, যোৱাকালি কাশ্মীৰৰ হত্যালীলাক কেন্দ্ৰ কৰি বিজেপিৰ সাংসদ স্বয়ং সুব্ৰহ্মনিয়াম স্বামীয়ে গৃহমন্ত্ৰী অমিত শ্বাহৰ পদত্যাগ ‌পৰ্যন্ত দাবী কৰিছে!! গতিকে, কাশ্মীৰ এতিয়া মোডী চৰকাৰৰ বাবে হৈ পৰিছে প্ৰচন্ড মূৰৰ বিষৰ কাৰণ!”

মোডী চৰকাৰৰ দিনত হুৰমূৰকৈ লোৱা কেতবোৰ ৰাজনৈতিক সিদ্ধান্তৰ বাবেই, তথা কিছুমান চিনেমা নিৰ্মাতাক মূৰত তুলি ঊৰ্দ্ধবাহু নৃত্য কৰাৰ পিছত, এতিয়া কাশ্মীৰি পন্ডিতসকল অসম আন্দোলনৰ আন্দোলনকাৰীৰ দৰেই উপেক্ষিত হোৱাৰ পটভূমিত সমগ্ৰ কাশ্মীৰত তীব্ৰ আতংকই বিৰাজ কৰিছে। কাশ্মীৰি পন্ডিতসকলে এতিয়া কাশ্মীৰৰ পৰা নতুন দিল্লী পৰ্যন্ত হত্যালীলাৰ বিৰুদ্ধে আৰু সঁচা অৰ্থত নিৰাপত্তাৰ দাবীত ৰাজপথত নামি আন্দোলন আৰু বিক্ষোভ কৰিবলৈ ধৰিছে। তুমুল ক্ষোভ প্ৰদৰ্শন কৰা হৈছে মোডী চৰকাৰৰ বিৰুদ্ধে।

পৰিস্থিতি নিয়ন্ত্ৰণৰ বাহিৰলৈ গুচি যোৱাৰ আশংকা কৰি অমিত শ্বাহৰ গৃহ বিভাগে ঘনে ঘনে বৈঠক কৰিব লগীয়া হৈছে। এনে হত্যালীলা যে কেৱল সৈন্যবাহিনী বা অৰ্দ্ধ-সামৰিক বাহিনী কাশ্মীৰত‌ নমাই বন্ধ কৰিব পৰা নাযাব – সেয়া স্পষ্ট বাবেই বিপাঙত পৰিছে মোডী চৰকাৰ। কাৰণ সম্পূৰ্ণ নিৰল প্ৰান্তীয় এলেকাত কোনো এক চৰকাৰী কাৰ্যালয়ত বা বেংকত বা বিদ্যালয়ত এজন বা দুজন হত্যাকাৰীয়ে প্ৰৱেশ কৰি কাৰোবাক টাৰ্গেট কৰি হত্যা কৰি আয়াসেৰে পলায়ন কৰিবলৈ সক্ষম হৈছে।

অৰ্থাৎ, আগৰ দৰে গণহত্যা বা বিস্ফোৰণ হোৱা নাই। গতিকে সমগ্ৰ কাশ্মীৰ সৈন্যৰে ভৰাই দিলেও এনেধৰণৰ বিক্ষিপ্ত আক্ৰমণৰ ঘটনা ঘটিয়েই থাকিব বুলি সকলোৱে প্ৰায় নিশ্চিত। তেনেহ’লে কি কৰা উচিত?

সেই প্ৰশ্নৰ উত্তৰ বিচাৰি পোৱাটোৱেই এতিয়া অতি জটিল হৈ পৰিছে। এপিনে চৰকাৰৰ ভাবমূৰ্তি মলিন হৈছে, আনপিনে বিব্ৰত হৈছে। কাৰণ বিৰোধী দলবোৰে অবিৰাম অভিযোগ উত্থাপিত কৰিছে – নব্বৈৰ দশকৰ পৰাই বিজেপিয়ে এনেদৰে কৈ আহিছিল যে ভাৰত চৰকাৰৰ ভুল নীতিৰ বাবে কাশ্মীৰি পন্ডিতসকল নিৰ্বাসিত হ’ব লগা হৈছে; সেয়ে বিজেপিয়ে ২০১৪ চনত ক্ষমতালৈ অহাৰ পিছত কাশ্মীৰি পণ্ডিতসকল নিশ্চিত হৈ আছিল – এইবাৰ তেওঁলোকৰ সুৰক্ষা অনিবাৰ্য আৰু তেওঁলোকে স্ব-গৃহলৈ উভতি যাব পাৰিব।

“এনে হত্যালীলা যে কেৱল সৈন্যবাহিনী বা অৰ্দ্ধ-সামৰিক বাহিনী কাশ্মীৰত‌ নমাই বন্ধ কৰিব পৰা নাযাব – সেয়া স্পষ্ট বাবেই বিপাঙত পৰিছে মোডী চৰকাৰ। কাৰণ সম্পূৰ্ণ নিৰল প্ৰান্তীয় এলেকাত কোনো এক চৰকাৰী কাৰ্যালয়ত বা বেংকত বা বিদ্যালয়ত এজন বা দুজন হত্যাকাৰীয়ে প্ৰৱেশ কৰি কাৰোবাক টাৰ্গেট কৰি হত্যা কৰি আয়াসেৰে পলায়ন কৰিবলৈ সক্ষম হৈছে।”

কিন্তু কাৰ্যতঃ মোডী চৰকাৰেও তেওঁলোকৰ বাবে একো নকৰিলে। বৰং হিংসাৰ অগনিৰ শিখা অধিক প্ৰজ্বলিত হ’বলৈ কিছুমান অবিবেচক কান্ড কৰিলে। তাৰোপৰি ‘কাশ্মীৰ ফাইল’ আদিৰ দৰে চিনেমা নিৰ্মাণ কৰি শত শত কোটি টকা উপাৰ্জন কৰা নিৰ্মাতাক কৰৰ পৰা ৰেহাই দিয়া, চিনেমা চাবলৈ চৰকাৰী ছুটি দিয়াৰ দৰে নাভূত- নাশ্ৰুত কান্ডই হিংসা- প্ৰতিহিংসাৰ মাত্ৰা অধিক বৃদ্ধি কৰা বুলি আন্দোলনকাৰী কাশ্মীৰি পন্ডিতসকলে পতিয়ন গৈছে। 

কেৱল কাশ্মীৰি পন্ডিতসকল নহয়, বেলেগ প্ৰদেশৰ পৰা কাশ্মীৰলৈ নানান চৰকাৰী সাধাৰণ কামৰ বাবে লৈ অহা চৰকাৰী কৰ্মীসকলো টাৰ্গেট হৈছে, এটাৰ পিছত এটাকৈ হত্যাকাণ্ড হৈছে। কংগ্ৰেছ দলে এতিয়া কৈছে, কাশ্মীৰি পন্ডিতসকলে এতিয়া কিয় কাশ্মীৰ এৰি পলায়ন কৰিছে? এতিয়া দেখোন শাসনত বহি আছে মোডী চৰকাৰ? অইন নালাগে, যোৱাকালি কাশ্মীৰৰ হত্যালীলাক কেন্দ্ৰ কৰি বিজেপিৰ সাংসদ স্বয়ং সুব্ৰহ্মনিয়াম স্বামীয়ে গৃহমন্ত্ৰী অমিত শ্বাহৰ পদত্যাগ ‌পৰ্যন্ত দাবী কৰিছে!! গতিকে, কাশ্মীৰ এতিয়া মোডী চৰকাৰৰ বাবে হৈ পৰিছে প্ৰচন্ড মূৰৰ বিষৰ কাৰণ!

০৪-০৬-২০২২

Mahabahu.com is an Online Magazine with collection of premium Assamese and English articles and posts with cultural base and modern thinking.