কুঁহিৰ হোলি

মৌলি ধৰ

কুঁহিৰ বাবে এইবাৰৰ হোলি আনবাৰতকৈ অলপ বেলেগ ।

বেলেগ ঠাই, মানুহবোৰো নতুন | কিন্তু হোলিৰ উচাহ অলপো কম নহয় |

নগাঁওত তাই ককা- আইতা, বৰমা-বৰদেউতা, ৰিকি-দাদা, নিনি-বা সকলোৰে সৈতে হোলি খেলিছিল | মাকৰ চাকৰিটো সুদূৰ দিল্লীলৈ বদলি হোৱা বাবে তাইও মৰমৰ ঘৰখন এৰি আহিবলগীয়া হ’ল |

The Legacy of Gauripur Raj Estate, Birthplace of Pratima Pandey & Pramathesh Barua!

October 5, 2024

উত্তৰ ভাৰতৰ ৰঙা মলুৱা বান্দৰ আৰু দাক্ষিণাত্যৰ খিলঞ্জীয়া জটি!

October 4, 2024

তথাপি ইয়াৰ মাজতো তাইৰ বাবে ভাল লগা কথাটো হ’ল কুঁহিৰ অতিকৈ মৰমৰ মুন আন্কলক পোৱাটো | আজি তাই মুন আন্কলৰ লগত হোলি খেলিব ওলাল |

কুঁহিৰ মুন আন্কল ওৰফে মৃগেন গগৈ, কুঁহিৰ মাক জাহ্নবীৰ বহুত আগৰে পৰা চিনি পায় |

কুঁহিৰ বৰদেউতাকৰ লগত একেটা বিভাগতে চাকৰি কৰা মৃগেন গগৈৰ জাহ্নবী বিয়া হৈ সেইখন ঘৰলৈ যোৱাৰ আগৰে পৰা ঘৰখনত মৃগেনৰ অহাযোৱা | বিয়াখন ঠিক হওতে মৃগেনৰ পৰাই ঘৰখনে জাহ্নবীৰ বিষয়ে খবৰবোৰ লৈছিল |

‘বহুত ভাল ছোৱালী জাহ্নবী‘- একেষাৰতে উত্তৰ দিছিল মৃগেনে |

আবিয়ৈ বায়েক, বুঢ়া বাপেকৰ দায়িত্ব লওতে লওতে মৃগেনৰো বিয়াৰ বয়স প্ৰায় ওকলিল | আবিয়ৈ ছোৱালী থকা ঘৰত যে ছোৱালী দিবলৈ কোনেও সন্মত নহয় | যোৱা বছৰেই বদলি হৈ তেখেত দিল্লীলৈ আহিছে | কুঁহিক লগ পাই তেওঁৰো মনটো ভাল লাগি গ’ল |

এইয়া কি! তাই সঁচাকৈ আচৰিত হ’ল | জন্ম হবৰে পৰা এই পাঁচটা বছৰত তাই মাকক যি সাজত দেখিছে, দিল্লীত দেখোন প্ৰায় সকলোবোৰ মানুহেই একে সাজতেই হোলী খেলিব ওলাইছে! শুভ্ৰ বগা | তাইতো আগতে কাকো নতুন বগা কাপোৰ পিন্ধি হোলী খেলা দেখা নাই |

কি অদ্ভুত বাৰু ছোৱালীবোৰ, বগা ছেলোৱাৰ পিন্ধি হোলী খেলিছে | কিন্তু মাকক কেতিয়াও তাই হোলী খেলা দেখা নাই | মাৰ গাত হোলীৰ ধুনীয়া ৰং লাগিলেহে চাগে মায়ে অন্য ৰঙৰ কাপোৰ পিন্ধিব পাৰিব |

কুঁহি কুঁহিকৈ মাতি মাক ওলাই অহা দেখি তাই সৰু হাতৰ মুঠিৰেই অলপ অলপকৈ সাতটা ৰঙেৰে মাকক ৰঙীন কৰি তুলিলে | চকুৰে নিগৰি অহা পানীখিনি মচি মাকে তাইৰ সৰু, কোমল মুখখনলৈ চাই সৰুকৈ ক’লে – নাপায় কুঁহি |

অবুজ সৰু ছোৱালীজনী নুসুধি নোৱাৰিলে ,,’কিয় মা?’

অস্পষ্ট সুৰত জাহ্নবী কৈ গ’ল ” তোমাৰ দেউতা নাই যে, সেইবাবে |”

ইমান পৰে ওচৰতে ৰৈ থকা মৃগেন গগৈ আৰু ৰৈ থাকিব নোৱাৰিলে | দোপট্টাখনেৰে মুখত লাগি থকা ৰঙবোৰ মচিব লোৱা জাহ্নবীৰ হাতখন সজোৰে ধৰি তেখেতে কৈ গ’ল “ তোমাৰ এতিয়াই বিবৰ্ণ হোৱাৰ বয়স হোৱা নাই জাহ্নবী | যদি মোক তোমাৰ উপযুক্ত বুলি ভাবা, তেনেহ’লে তোমাৰ জীৱনটো পুনৰ ৰঙেৰে ভৰাই তোলাৰ অধিকাৰ মোক দিবানে?”

আকাশ, বতাহ সকলোটি ফাগুনৰ মলয়া বতাহ আৰু হোলীৰ ৰঙে জীপাল কৰি তুলিলে | এমুঠি ৰঙা আবিৰ মৃগেনে জাহ্নবীৰ মুখখনত বুলাই দিলে | সেইয়া আবিৰ নাছিল, আছিল প্ৰতিশ্ৰুতি |

ওচৰতে ক’ৰবাত জোৰেকে বাজি উঠিল “হোলী কে দিন দিল খিল যাতেহ্য ৰংগো ম্যে ৰং মিল যাতেহ্যে.…..” |

Photographs: Anita Sarma

Mahabahu.com is an Online Magazine with collection of premium Assamese and English articles and posts with cultural base and modern thinking. You can send your articles to editor@mahabahu.com / editor@mahabahoo.com ( For Assamese article, Unicode font is necessary)