“মই আশা কৰিছো যে কৃত্ৰিম বুদ্ধিমত্তাৰ বাবে চাকৰিৰ ওপৰত যথেষ্ট প্ৰভাৱ পৰিব কিন্তু সেই প্ৰভাৱ ঠিক কেনেকুৱা হ’ব সেয়া ভৱিষ্যদ্বাণী কৰাটো অতি কঠিন” – ছেম অল্টমেন!
“ৰবটে ভালকৈ কৰিব নোৱাৰা কাম আৰু কম হ’ব” – ইলন মাস্ক!
“মই হুইচেল বজাব বিচাৰো আৰু ক’ব বিচাৰো যে আমি গুৰুত্বসহকাৰে চিন্তা কৰা উচিত” – জিঅ’ফ্ৰে হিণ্টন!
ইলন মাস্ক, চেটজিপিটিৰ বাবে বাতৰিৰ শিৰোনাম হোৱা ছেম অল্টমেন আৰু কৃত্ৰিম বুদ্ধিমত্তা(AI)ৰ গডফাদাৰ ওৰফে জেফ্ৰি হিণ্টনৰ বিষয়ে কোনে নাজানে?
২০১২ চনত জিঅ’ফ্ৰে হিণ্টন আৰু তেওঁৰ ছাত্ৰ-ছাত্ৰীসকলে সেই প্ৰযুক্তিৰ ভেটি স্থাপন কৰিছিল যাৰ ওপৰত কৃত্ৰিম বুদ্ধিমত্তাৰ সঁজুলিসমূহ ভিত্তি কৰি গঢ় লৈ উঠিছে। আজিয়েই ছ’চিয়েল মিডিয়া খুলিলে দেখা পোৱা যায় কৃত্ৰিম বুদ্ধিমত্তাই কৰিব নোৱাৰা কামো নাই৷ আমি কৃত্ৰিম বুদ্ধিমত্তাক গুৰুত্বসহকাৰে চাব লাগিব কাৰণ ইয়াৰ প্ৰভাৱ আমাৰ দেশত বিপুল প্ৰভাৱ পৰিব পাৰে। কৃত্ৰিম বুদ্ধিমত্তাৰ নেতিবাচক প্ৰভাৱৰ কথা ক্ষেত্ৰখনৰ অগ্ৰগামীসকলে আঙুলিয়াই দিছে।
নতুন প্ৰযুক্তিয়ে সমগ্ৰ বিশ্বক প্ৰভাৱিত কৰিব কাৰণ মেচিনবোৰ অধিক বুদ্ধিমান হ’ব, আৰু শেষত অনুভৱৰ বিকাশ ঘটিব। তেন্তে মানৱতাৰ ভৱিষ্যত কি হ’ব? আৰু ভাৰতৰ দৰে দেশত চাকৰিৰ বিষয়টো কি হ’ব? অহা ৫ বছৰত চাকৰিৰ ওপৰত কেনে প্ৰভাৱ পৰিব?
যদি কৃত্ৰিম বুদ্ধিমত্তাই সকলো চম্ভালি লয় – উৎপাদনৰ পৰা আৰম্ভ কৰি বিপণনলৈকে – তেন্তে মানৱ কৰ্মশক্তিয়ে কি কৰিব?
যিসকলে কৃত্ৰিম বুদ্ধিমত্তাৰ চাবি-কাঠি বিচাৰি পাব তেওঁলোকে সাফল্যৰ তলা খুলিব, আৰু যিয়ে নাপায় – তেওঁলোকক ৰাজপথত ভিক্ষা কৰা দেখা যাব।
কিন্তু আজি আমি জৰুৰীকালীন অৱস্থাবোৰৰ সমাধানত ইমান ব্যস্ত হৈ থকাৰ সময়তো আমি এতিয়াও কৃত্ৰিম বুদ্ধিমত্তা(AI) ৰ দ্ৰুত পৰিৱৰ্তিত ছুনামীৰ প্ৰতি অন্ধ হৈ আছো!
দেশত কৃত্ৰিম বুদ্ধিমত্তাৰ প্ৰভাৱ জানিব পৰাৰ আগতেই – প্ৰথমতে জানিব লাগিব কৃত্ৰিম বুদ্ধিমত্তা সঠিকভাৱে কি?
কিয় কৃত্ৰিম বুদ্ধিমত্তা (AI) ডেভেলপাৰসকলে কৃত্ৰিম বুদ্ধিমত্তাক ভয় কৰে?
মে’ মাহত এআইৰ গডফাদাৰ জিঅ’ফ্ৰে হিণ্টনে গুগলৰ পৰা পদত্যাগ কৰিছিল। ১০ বছৰ ধৰি তেওঁ কৃত্ৰিম বুদ্ধিমত্তা(এআই)ৰ কাম কৰি আছিল। শেষত তেওঁ কৃত্ৰিম বুদ্ধিমত্তা আৰু ইয়াৰ দ্বাৰা বিশ্বৰ বাবে হ’বলগীয়া সম্ভাব্য ‘বিপদ’ৰ বিষয়ে মুকলিকৈ ক’বলৈ সাজু হ’ল।
আপুনি কল্পনা কৰিব পাৰে যে জিঅ’ফ্ৰে হিণ্টনে নিজেই কৃত্ৰিম বুদ্ধিমত্তাৰ প্ৰযুক্তিৰ ভেটি স্থাপন কৰাৰ পাছত এতিয়া অনুশোচনা কৰাটো তেওঁৰ বাবে কিমান অশান্তিৰ বিষয়। অৱশ্যে তেওঁ নিজকে এই স্বাভাৱিক অজুহাতেৰে সান্ত্বনা দিয়ে যে তেওঁ নকৰিলে আন কোনোবাই কৰিলেহেঁতেন৷
কৃত্ৰিম বুদ্ধিমত্তাই হয়তো ভুৱা বাতৰিৰ বানপানীও সৃষ্টি কৰিব। ইতিমধ্যে মিছাৰ পৰা সঁচা কথা বিচাৰি উলিওৱাও অতিশয় কঠিন হৈ পৰিছে। কৃত্ৰিম বুদ্ধিমত্তাৰ বাবে মানুহে চাকৰি হেৰুৱাব। ইতিমধ্যে কৃত্ৰিম বুদ্ধিমত্তাই পেৰালিগেল, পাৰ্চনেল এচিষ্টেণ্ট, কল চেণ্টাৰৰ কৰ্মচাৰী, অনুবাদক আদি নিম্নস্তৰৰ চাকৰিবোৰ নাইকিয়া কৰি আছে আৰু, অধিক জটিল চাকৰিবোৰো বিপদত পৰিবলৈ ধৰিছে- যেনে, বিশ্লেষক, গৱেষক, ব্যৱসায়ী আদি।
একবিংশ শতিকাৰ মেচিনসমূহে ‘ইনপুট‘ লোৱা, প্ৰক্ৰিয়াকৰণ কৰা আৰু ‘আউটপুট‘ দেখুৱাব পৰা ক্ষমতা আছে। ‘অপাৰেচন টেবুল’ত থকা চিকিৎসকসকলকো মেচিনে সহায় কৰি আছে। যন্ত্ৰ আৰু মানুহৰ মাজত বাকী থকা একমাত্ৰ পাৰ্থক্যটো আছিল ‘জ্ঞান‘ – বুজিব পৰা ক্ষমতা। এই পাৰ্থক্য অতি সোনকালে কৃত্ৰিম বুদ্ধিমত্তাই মচি পেলাব আৰু নিজৰ পৰিৱেশৰ প্ৰতি সচেতন হ’ব।
‘মেচিন লাৰ্নিং‘ হৈছে এনে এক প্ৰক্ৰিয়া যাৰ দ্বাৰা মেচিনে নিজাববীয়াকৈ – স্নায়ু নেটৱৰ্কৰ জৰিয়তে (আমাৰ মগজুৰ নিউৰনৰ দৰেই) শিকে। উদাহৰণস্বৰূপে – যেতিয়া আপুনি খাদ্য ‘এপ‘ত কোনো ব্যঞ্জনৰ কেঁচা উপাদান যোগ কৰে, তেতিয়া কৃত্ৰিম বুদ্ধিমত্তাই আপুনি কোনবিধ খাদ্য প্ৰস্তুত কৰিব সেইটো ধৰা পেলাব পাৰে আৰু বস্তুৰ পৰামৰ্শ দিব পাৰে।
এতিয়া আপুনি হয়তো ভাবিব, ইমান ডাঙৰ কথানো কি হ’ল? কিন্তু এয়া মাত্ৰ কৃত্ৰিম বুদ্ধিমত্তাৰ মূল কথা – কৃত্ৰিম বুদ্ধিমত্তাৰ উন্নত ব্যৱহাৰো আছে।
মূলতঃ কৃত্ৰিম বুদ্ধিমত্তাক তলত দিয়া ৪ প্ৰকাৰত ভাগ কৰিব পাৰি:
১) ‘ৰিএক্টিভ মেচিন‘ – ই কৃত্ৰিম বুদ্ধিমত্তাৰ আটাইতকৈ মৌলিক ব্যৱহাৰ আৰু বিশুদ্ধভাৱে ‘ৰিএক্টিভ’। প্ৰতিক্ৰিয়াশীল কৃত্ৰিম বুদ্ধিমত্তাৰ উদাহৰণসমূহৰ ভিতৰত ‘নেটফ্লিক্স’ৰ পৰামৰ্শ বা দবা খেল অন্তৰ্ভুক্ত কৰা হৈছে য’ত কম্পিউটিঙে গতিৰ প্ৰতি সঁহাৰি জনায়। এয়া প্ৰথম পৰ্যায়ৰ কৃত্ৰিম বুদ্ধিমত্তা(AI)।
২) সীমিত স্মৃতিশক্তিৰ মেচিন – ই প্ৰতিক্ৰিয়াশীল মেচিনতকৈ অলপ বেছি উন্নত; ই কেৱল বৰ্তমানৰ আন্দোলনৰ প্ৰতি প্ৰতিক্ৰিয়া প্ৰকাশ কৰাই নহয়, অতীতৰ আচৰণৰ মাজত উকি মাৰিবলৈ বা পঢ়াৰ ক্ষমতাও আছে। ই যিকোনো বস্তু বা পৰিস্থিতি নিৰীক্ষণ কৰিব পাৰে। ইয়াৰ নিখুঁত উদাহৰণ হ’ল এখন স্বয়ংচালিত গাড়ী, যিয়ে কেৱল পথৰ কাৰ্যকলাপৰ প্ৰতি সঁহাৰি জনোৱাই নহয়, গাড়ী আৰু চালকৰ ড্ৰাইভিং বিদ্যা তথা বাট-পথ-গাড়ী-চালনা আদিৰ ইতিহাসৰো জ্ঞান আছে। সেয়েহে ই দ্বিতীয় পৰ্যায়।
৩/ মনৰ তত্ত্বজ্ঞান(মন:স্তত্ত্ব)– কৃত্ৰিম বুদ্ধিমত্তাই মানুহৰ মন, আৱেগ আৰু আচৰণ বুজিব আৰু ‘মেপিং‘ কৰিব পাৰে, আৰু মতামতো দিব পাৰে। ‘ছফিয়া’ৰ দৰে ‘ৰবট’বোৰ ‘মাইণ্ড এআই’ৰ তত্ত্বৰ ওপৰত নিৰ্মিত। ইতিমধ্যে ছৌদি আৰবে এই ৰবটটোক নাগৰিকত্ব দিছে। এইদৰে ৰবট প্ৰযুক্তিয়ে অহৰহ বিকশিত হৈ আছে আৰু মানুহৰ আৱেগক অধিক বুজি পাইছে।
৪) আত্মসচেতনতা – এয়াই হৈছে কৃত্ৰিম বুদ্ধিমত্তাৰ ভৱিষ্যত, য’ত যন্ত্ৰই স্বতন্ত্ৰভাৱে চিন্তা, বিশ্লেষণ আৰু প্ৰক্ৰিয়াকৰণ কৰিব পাৰে। ই প্ৰকৃত আৱেগ বুজিব পাৰে। কল্পনা কৰক এটা ৰবট যাৰ আত্মসচেতনতা, অনুভৱ, প্ৰয়োজন আৰু ইচ্ছা আছে! এইটোৱেই হৈছে কৃত্ৰিম বুদ্ধিমত্তাৰ পৰৱৰ্তী স্তৰ আৰু ইতিমধ্যে এই প্ৰযুক্তিৰ ওপৰত কাম চলি আছে। এতিয়া, কল্পনা কৰকচোন, ইয়াৰ প্ৰভাৱ আমাৰ সমাজত কেনেধৰণৰ হ’ব!
কৃত্ৰিম বুদ্ধিমত্তাৰ তাৎক্ষণিক প্ৰভাৱ হৈছে নীতি-নিয়ম সলনি কৰা। উদাহৰণস্বৰূপে আমাৰ দেশত আটাইতকৈ ডাঙৰ পৰিৱৰ্তন হ’ব কৰ্মসংস্থাপনৰ ক্ষেত্ৰত। কিন্তু আটাইতকৈ ডাঙৰ বিতৰ্ক হৈছে কৃত্ৰিম বুদ্ধিমত্তাই কেনেকৈ চাকৰি নিৰ্মূল কৰিব বা সৃষ্টি কৰিব! সহজ ভাষাত ক’বলৈ গ’লে কৃত্ৰিম বুদ্ধিমত্তাই পুনৰাবৃত্তিৰ সৈতে কামৰ অন্ত পেলাব, যেনে গ্ৰাহক সেৱা, প্ৰতিক্ৰিয়া ‘কল’, ক্ৰেডিট কাৰ্ড বিক্ৰী, কম্পিউটাৰ সমৰ্থন ‘ভাৰ্চুৱেল বট‘ হৈ।
তাৰ পিছত একাউণ্টেন্সি, গ্রাফিক ডিজাইন আৰু বজাৰ গৱেষণাৰ দৰে ক্ষেত্ৰসমূহ কৃত্ৰিম বুদ্ধিমত্তাৰ দ্বাৰা প্ৰভাৱিত হ’ব।
টেকনোলজি কোম্পানীসমূহেও গণ ছুটী দিব কেৱল অৰ্থনৈতিক পৰিস্থিতিৰ বাবেই নহয়, কৃত্ৰিম বুদ্ধিমত্তাৰ ‘অটোমেচন‘ৰ বাবেও। সেয়েহে নিম্ন পৰ্যায়ৰ চাকৰিসমূহৰ ওপৰত দ্ৰুত প্ৰভাৱ পৰিব। আনহাতে – ‘নাছকম‘ৰ এক প্ৰতিবেদনত দেখা গৈছে যে ‘জি-২০‘ৰ সকলো দেশৰ ভিতৰত কৃত্ৰিম বুদ্ধিমত্তা দক্ষতাৰ ক্ষেত্ৰত প্ৰৱেশৰ ক্ষেত্ৰত ভাৰত ১ নম্বৰত আছে।
ভাৰতত প্ৰযুক্তি কৰ্মীসকলৰ ইতিমধ্যে কৃত্ৰিম বুদ্ধিমত্তাৰ মৌলিক জ্ঞান আছে আৰু উন্নত প্ৰশিক্ষণৰ দ্বাৰা (আপস্কিলিঙ) কৃত্ৰিম বুদ্ধিমত্তাৰে শক্তিশালী হ’বলৈ যথেষ্ট সহায় কৰিব। এতিয়া ই গুৰুত্বপূৰ্ণ কাৰণ বিশ্ব পৰ্যায়ত কৃত্ৰিম বুদ্ধিমত্তা সম্পৰ্কীয় প্ৰতিভাৰ চাহিদা বৃদ্ধি পাইছে।
যদি বিশ্বৰ বাকী দেশতকৈ ভাৰতৰ ‘স্কিলছেট‘ তিনিগুণ বেছি, তেন্তে ইতিমধ্যে ভাৰত কৃত্ৰিম বুদ্ধিমত্তাৰ ‘টেলেণ্ট হাব‘ কিয় নহয়?
উত্তৰটো হ’ল ‘শিক্ষা‘( Education) – আমি বুৰঞ্জীৰ ওপৰত বেছি গুৰুত্ব দিছো আৰু ভৱিষ্যতৰ ওপৰত কমকৈ দিছো। ‘মোগলৰ ইতিহাস‘তকৈ ‘মেচিন লাৰ্নিঙ‘ত অধিক বিনিয়োগ কৰিব লাগিব।
প্ৰথমতে, ‘কম্পিউটাৰ বিজ্ঞান’ৰ আসন বহুত কম । বহু ছাত্ৰ-ছাত্ৰীয়ে যিকোনো ততাতৈয়াকৈ পাঠ্যক্ৰম বাছি লোৱাৰ কথা ভাবে, ধৰক ‘মেটালাৰ্জী‘, যদিহে সেয়া কৃত্ৰিম বুদ্ধিমত্তা নিৰ্ভৰ হয়(আই আই টিৰ আৰু ভৱিষ্যত নিৰাপদ নে নহয় সেই বিষয়ে এটা লেখা মহাবাহুত লিখিছিলো)। ডিজিটেল যুগত দক্ষতাই বেছি গুৰুত্বপূৰ্ণ আৰু পাঠ্যক্ৰম নিৰ্বাচন গুৰুত্বপূৰ্ণ, আই আই টি বা আন কোনো প্ৰতিষ্ঠানৰ হ’লেও কোনো কথা নাই।
কম্পিউটাৰ বিজ্ঞানৰ পাঠ্যক্ৰমত যদি আপুনি আসন পায় তেন্তে ‘আপডেট’ কৰা অত্যাধুনিক পাঠ্যক্ৰম বা ১০ বছৰৰ আগৰ পুৰণি কিতাপৰ দৰে জ্ঞান থাকিবনে? পাঠ্যক্ৰম পুৰণি হ’লে ছাত্ৰজনৰ শ্ৰীবৃদ্ধি কেনেকৈ হ’ব?
এফালে কোম্পানীসমূহে কৰ্মচাৰীক চাকৰিৰ পৰা বৰ্খাস্ত কৰিছে যদিও তেওঁলোকৰ ‘কৃত্ৰিম বুদ্ধিমত্তাৰ দল‘ৰ বাবেও নিযুক্তি দিছে। ব্যৱসায়ীসকলে গ্ৰাহক সেৱা, মানৱ সম্পদ, তথ্য প্ৰযুক্তি, স্বয়ংক্ৰিয়কৰণ আৰু সুৰক্ষাৰ ক্ষেত্ৰতেই হওক প্ৰতিটো কাৰ্য্য বা খণ্ডতে কৃত্ৰিম বুদ্ধিমত্তাৰ সৰ্বাধিক ব্যৱহাৰ কৰিবলৈ চেষ্টা কৰিছে।
ভাৰতত ১৫০০+ কৃত্ৰিম বুদ্ধিমত্তা কেন্দ্ৰীভূত ষ্টাৰ্ট-আপে সহায় কৰি আছে – সেয়া কথোপকথন কৃত্ৰিম বুদ্ধিমত্তা, প্ৰাকৃতিক ভাষা প্ৰক্ৰিয়াকৰণ, ভিডিঅ’ বিশ্লেষণ, ৰোগ ধৰা পেলোৱা, জালিয়াতি প্ৰতিৰোধ বা গভীৰ নকল ধৰা পেলোৱা – প্ৰযুক্তিৰ দ্বাৰা সৃষ্টি হোৱা সমস্যাৰ সমাধান আছে।
উদাহৰণস্বৰূপে: যিদৰে এন্টি-ভাইৰাছ চফট্ ৱেৰ ব্যৱহাৰ কৰা হৈছিল ক্ষতিকাৰক চফট্ ৱেৰৰ মোকাবিলা কৰিবলৈ, একেদৰে, গভীৰ তথা নকল আৰু কৃত্ৰিম বুদ্ধিমত্তাৰ জালিয়াতিৰ বিৰুদ্ধে যুঁজিবলৈ, এটা নতুন উদ্যোগ স্থাপন কৰা হ’ব আৰু তাৰ বাবে ‘এম এল‘(মেচিন লাৰ্নিং) অভিযন্তা, ডাটা ইঞ্জিনিয়াৰ, ডাটা বিজ্ঞানী, ডাটাৰে প্ৰশিক্ষিত অভিযন্তাৰ প্ৰয়োজন হ’ব!
এই কেইটা শ্ৰেণীয়ে ভাৰতত ৭৫% কৃত্ৰিম বুদ্ধিমত্তাৰ চাকৰি কৰে। যদি আপুনি ‘এম এল’ ইঞ্জিনিয়াৰ আৰু ডাটা ইঞ্জিনিয়াৰৰ কথা কয়, তেন্তে সেইটোৱে ৫০% কাম সামৰি লয় কাৰণ ইয়াৰ জটিল আৰু গুৰুত্বপূৰ্ণ ভূমিকা আছে।
এই চাকৰিবোৰ পূৰণ কৰিবলৈ সঠিক ঠাইৰ পৰা সঠিক শিক্ষাৰ প্ৰয়োজন হ’ব। ‘আই টি‘ বিপ্লৱে যিদৰে পৰিৱৰ্তন আৰু চাকৰিৰ বিৱৰ্তন আনিলে – কৃত্ৰিম বুদ্ধিমত্তাৰ আগমনৰ লগে লগে একেই হ’ব আৰু ভাৰতে দেশত মূল খণ্ডত ঘটা বিঘিনিৰ সাক্ষী হ’ব। যদি আমি আমাৰ পথটো বা দুৱাৰ সঠিকভাৱে খেলো, তেন্তে ইয়াৰ ফলত অৰ্থনীতি ৫০০ বিলিয়ন ডলাৰ বৃদ্ধি পাব পাৰে।
কিন্তু মনত ৰাখিব, নিঃসন্দেহে চাকৰিৰ ক্ষতি হ’ব – ভাৰতত ৫০ লাখ বিপিঅ’, বিপিএম, আইটিইএছ গ্ৰাহক সেৱাৰ চাকৰি আছে – কৃত্ৰিম বুদ্ধিমত্তাৰ আটাইতকৈ ডাঙৰ প্ৰভাৱ এইবোৰ ক্ষেত্ৰত দেখা যাব।
‘জোহো কৰ্প’ৰেশ্যনৰ চিইঅ’ শ্ৰীধৰ ভেম্বুৱে চৰকাৰলৈ পত্ৰ প্ৰেৰণ কৰিছে যে কৃত্ৰিম বুদ্ধিমত্তা প্ৰযুক্তি ‘মানৱতাৰ বাবে বিশৃংখল আৰু সম্ভাৱ্য বিপৰ্যয়জনক পৰিণতিৰ আগজাননী’ হ’ব পাৰে। লাখ লাখ চাকৰি বিপদত পৰিব।
পূৰ্বে ‘মনষ্টাৰ ডট কম‘ত থকা ফাউণ্ডাৰ চিইঅ’ চেখৰ গাৰিছাইও কৈছে যে কৃত্ৰিম বুদ্ধিমত্তাই ৭% কম দক্ষ সেৱাৰ কৰ্মশক্তিৰ ঠাই ল’ব। কৃত্ৰিম বুদ্ধিমত্তাৰ বিকাশৰ হাৰে হয়তো এই ৭% সংখ্যা দ্ৰুতভাৱে বৃদ্ধি কৰিব পাৰে।
টাটা চন্সৰ অধ্যক্ষ এন চন্দ্ৰশেখৰনে কয় যে কৃত্ৰিম বুদ্ধিমত্তা এটা ‘বিঘ্নিতকাৰী’ আৰু লগতে কয় যে ভৱিষ্যতে ইয়াৰ প্ৰভাৱ চাকৰিৰ লগতে দক্ষতাৰ ওপৰতো পৰিব।
দেশ হিচাপে আমি কৃত্ৰিম বুদ্ধিমত্তাৰ দৌৰত আগবাঢ়িব পাৰো, কিন্তু আমিও বিকশিত হ’ব লাগিব। যদি প্ৰত্যক্ষভাৱে কৃত্ৰিম বুদ্ধিমত্তা নহয়, কিন্তু এই প্ৰযুক্তিৰ সৰ্বোচ্চ ব্যৱহাৰ জনা কোনোবাই আপোনাৰ কামটো গ্ৰহণ কৰিব, নিশ্চিতভাৱে।
বিশ্ব অৰ্থনৈতিক মঞ্চৰ (WEF) অধ্যয়নত ৪৫খন দেশৰ সামূহিকভাৱে ১ কোটি ১৩ লাখ শ্ৰমিক নিয়োগ কৰা ৮০০ৰো অধিক কোম্পানীত সমীক্ষা কৰা হৈছে। গৱেষণাৰ পৰা দেখা গৈছে যে অহা ৫ বছৰত কৃত্ৰিম বুদ্ধিমত্তাই ২৫% চাকৰিৰ ওপৰত প্ৰভাৱ পেলাব – লগতে ৬.৯ কোটি চাকৰি সৃষ্টিৰ ওপৰতো প্ৰভাৱ পেলাব, কিন্তু ৮.৩ কোটি চাকৰি হেৰুৱাব। অৰ্থাৎ ১৪-১৫ মিলিয়ন চাকৰিৰ লোকচান, সৰ্বোত্তম পৰিস্থিতিত।
‘গোল্ডমেন চেক্স‘ৰ মতে ৩০ কোটি চাকৰি কৃত্ৰিম বুদ্ধিমত্তাৰ দ্বাৰা প্ৰভাৱিত হ’ব পাৰে। সাধাৰণ জ্ঞান আৰু সংখ্যা দুয়োটাই দেখুৱাইছে যে কৃত্ৰিম বুদ্ধিমত্তাই চাকৰিৰ বজাৰত বৃহৎ প্ৰভাৱ পেলাব – গতিকে আমি তাৰ বাবে প্ৰস্তুতি চলাব লাগিব।
কৃত্ৰিম বুদ্ধিমত্তাই কেৱল চাকৰিৰ ক্ষেত্ৰতে নহয় জীৱনৰ অন্যান্য দিশতো প্ৰভাৱ পেলাব। আমোদজনক উদাহৰণ – আপোনালোক সকলোৱে শ্বেয়াৰ বজাৰৰ বিষয়ে জানে! এটা সময় আছিল যেতিয়া ‘ডিমেট একাউণ্ট‘ খোলাটো এটা বিৰক্তিকৰ প্ৰক্ৰিয়া আছিল – আৰু একাউণ্ট খোলাৰ পিছত কি শ্বেয়াৰ কিনিব লাগে তাকে লৈ বিভ্ৰান্তিৰ সৃষ্টি হৈছিল, গতিকে সেই সম্পৰ্কে উপদেশ দিবলৈ উপদেষ্টা, গৱেষক আৰু পৰামৰ্শদাতা আছিল।
আজি ৫ মিনিটত ‘ডিমেট একাউণ্ট‘ খুলি ‘ট্ৰেডিং এলগৰিদম ছেট‘ কৰিব পাৰি। ‘ষ্টক মাৰ্কেট‘ত ৫০% ‘ এলগৰিদমিক ট্ৰেডিঙ‘ৰ জৰিয়তে কৰা হয় – এটা ‘প্ৰগ্ৰেমে‘ গৱেষণা আৰু পৰামৰ্শৰ পৰা আৰম্ভ কৰি ক্ৰয় আৰু বিক্ৰীলৈকে সকলো কাম কৰে। গতিকে, কৃত্ৰিম বুদ্ধিমত্তাৰ এই ভূমিকাৰ বাবে কিমান চাকৰি বাদ পৰিল? আৰু এইটো কেৱল আৰম্ভণি হে…
চিন্তনীয় কথাটো হ’ল আমি কৃত্ৰিম বুদ্ধিমত্তাৰ বাবে ইমান সাজু নহয়! আমাৰ হাতত বিশ্বৰ ভিতৰতে আটাইতকৈ ডাঙৰ ষ্টাৰ্ট-আপৰ পৰিৱেশ হ’ব পৰাকৈ ক্ষমতা আছে, কিন্তু কৃত্ৰিম বুদ্ধিমত্তাৰ ক্ষেত্ৰত ইয়াৰ উল্লেখযোগ্য উপস্থিতি নাই। ‘OpenAI’s ChatGPT‘ বা ‘Bard by Google‘ পাহৰি যাওক – ভাৰতত ৪ বিলিয়ন ডলাৰৰ পুঁজিৰে ১৫০০ কৃত্ৰিম বুদ্ধিমত্তা ষ্টাৰ্ট-আপে কি কি ডাঙৰ উদ্ভাৱন কৰিছিল?
ভাৰতীয় ষ্টাৰ্ট-আপৰ মিছন বেলেগ – প্ৰক্ৰিয়াসমূহ মসৃণ কৰি তোলা – যেনেকৈ ‘ফ্লিপকাৰ্টে‘ কৃত্ৰিম বুদ্ধিমত্তাৰ সৈতে বজাৰ কৰাৰ অভিজ্ঞতা উন্নত কৰিলে, ‘ৰেজৰপে‘ই কৃত্ৰিম বুদ্ধিমত্তাৰ সহায়ত প্ৰৱঞ্চনা বন্ধ কৰিবলৈ চেষ্টা কৰিছে, ‘বেদান্টু‘ৱে ক্লাছসমূহ অধিক মজাদাৰ আৰু সুলভ কৰি তুলিবলৈ কৃত্ৰিম বুদ্ধিমত্তা ব্যৱহাৰ কৰিছিল।
বিশেষজ্ঞসকলৰ মতে, সতেজ উদ্ভাৱন কৰিবলৈ আমাৰ কৃত্ৰিম বুদ্ধিমত্তাৰ বাবে দক্ষ কৰ্মশক্তি নাথাকিলে কৃত্ৰিম বুদ্ধিমত্তাৰ উদ্ভাৱন বৃদ্ধি নহ’ব। ভাৰতত ৫০ লাখৰো অধিক ‘আই টি’ কৰ্মচাৰী আছে, কিন্তু বিপিঅ’ বা চিষ্টেম মেইণ্টেনেন্সৰ ওপৰত কাম কৰা এই ‘লো এণ্ড স্পেকট্ৰম‘ সলনি কৰিব লাগিব।
“যদি তুমি পঢ়াশনা নকৰা তেন্তে তুমি হয়তো দোকানৰ কাউণ্টাৰত বহিব লাগিব” –ল’ৰা-ছোৱালীয়ে পঢ়া-শুনা নকৰাৰ সময়ত অভিভাৱকসকলে এই কথা কয়, কিন্তু এনে কথাও সোনকালে সলনি হ’ব পাৰে।
কৃত্ৰিম বুদ্ধিমত্তাৰ ‘ৰিএক্টিভ মেচিন‘-এ নতুন ৰূপ গ্ৰহণ কৰাৰ সময়তে নতুন ‘ভেণ্ডিং মেচিন‘ নিৰ্মাণ কৰা হৈছে। ‘ছাবৱে’ই মুকলি কৰিছে এটা নতুন ‘ভেণ্ডিং মেচিন’ – ‘গ্ৰেব এণ্ড গ’ – এনে মেচিনে আপোনাৰ ‘চেণ্ডুইচ’ প্ৰস্তুত কৰিব কণ্ঠস্বৰ চিনাক্তকৰণ সঁজুলিৰ সহায়ত। ‘পেমেন্ট অনলাইন’ হ’ব, আৰু গ্ৰাহকৰ পৰা উপযুক্ত পইচা ল’বলৈ ‘চেন্সিং মেচিন’ ব্যৱহাৰ কৰা হ’ব।
অতি কম সময়ৰ ভিতৰতে ‘ছাবৱে‘ই এই মেচিন ভাৰতত মুকলি কৰিব। সেয়েহে দোকানতো বহিবলৈ কঠিন হ’ব যেন লাগে, কৃত্ৰিম বুদ্ধিমত্তাৰ আক্ৰমণৰ লগে লগে।
‘ডালচিনি টেকন’লজিছ‘ৰ মুখ্য কাৰ্য্যবাহীয়ে কৈছে যে ‘ৰেডি টু ইট’, ঘৰতে ৰন্ধা খাদ্য ‘ভেণ্ডিং মেচিন‘ৰ জৰিয়তে প্ৰেৰণ কৰিব পাৰি – ভাৰতৰ বাবে ই হ’ব এক নতুন বজাৰ – ৬০ লাখতকৈও অধিক স্থান আছে য’ত এনে মেচিন ব্যৱহাৰ কৰিব পাৰি। গতিকে, কৃত্ৰিম বুদ্ধিমত্তাইও দোকানৰ ঠাই ল’ব।
কৃত্ৰিম বুদ্ধিমত্তা আহিব আৰু বহু কথা যে সলনি কৰিব, সেয়া বিতৰ্কিত যদিও চাকৰিৰ ওপৰত কৃত্ৰিম বুদ্ধিমত্তাৰ প্ৰভাৱ ইতিমধ্যে স্পষ্ট হৈ পৰিছে। দেশ নহয়, ধৰ্ম নহয় – আমাৰ চাকৰি বিপদত পৰিছে। আমি কৃত্ৰিম বুদ্ধিমত্তাৰ পৰা বিপদৰ পৰা হাত সাৰিবলৈ ‘আপস্কিল‘ আৰু কৃত্ৰিম বুদ্ধিমত্তাৰ জ্ঞানেৰে সাজু হ’ব লাগিব, আৰু ভাৰতত ৯০ৰ দশকৰ তথ্য প্ৰযুক্তি বিপ্লৱৰ দৰেই দ্বিতীয় অধ্যায় সৃষ্টি কৰিব পাৰিব লাগিব।
( ঘোষণা : এই প্ৰৱন্ধটো লেখকে নিজৰ মগজু খটুৱাই আৰু বিভিন্ন তথ্য পাতি যোগাৰ কৰি লিখিছে আৰু ইয়াৰ কোনো অংশই কৃত্ৰিম বুদ্ধিমত্তাৰ দ্বাৰা লেখা হোৱা নাই । মূল ইংৰাজী লেখাটোৰ অসমীয়া ভাঙনি অৰবিন্দ ৰাভাৰ)
Images from different sources
Mahabahu.com is an Online Magazine with collection of premium Assamese and English articles and posts with cultural base and modern thinking. You can send your articles to editor@mahabahu.com / editor@mahabahoo.com (For Assamese article, Unicode font is necessary)
Bhutan Food Systems Summit Puts Consciousness on Global Policy Map as Countries Move Towards Implementation RITURAJ PHUKAN The first Global...
Read moreDetails
Mahabahu: An International Journal Showcasing Premium Articles and Thought-Provoking Opinions on Global Challenges - From Climate Change and Gender Equality to Economic Uplift.
Oops!! The Content is Copy Protected.
Please ask permission from the Author.
