গৰুৰ গাখীৰৰ বিকল্প ১০০% 'ভেগান' গাখীৰ আমেৰিকাত প্ৰস্তুত হ'ল

গাখীৰ

দিলীপ দৈমাৰী

নিৰামিষ আৰু আমিষ খাদ্যৰ দ্বন্দ চিৰদিনৰ।‌

বিশ্বত প্ৰচুৰ পৰিমাণৰ নিৰামিষাহাৰী লোক আছে যিসকলে কেৱল নিৰামিষ খাদ্য, যেনেঃ শাক-পাচলি ইত্যাদিৰ ওপৰত নিৰ্ভৰশীল। তেওঁলোকক নিৰামিষাহাৰী বা ‘ভেজিটেৰিয়ান‘ বুলি কোৱা হয়। কিন্তু বহুত শাকাহাৰীয়ে আকৌ গাখীৰ বা কণী তথা কণীভিত্তিক কেক, বিস্কুট আদিও নাখায়। তেওঁলোকক ‘ভেগান‘ বোলা হয়। আচলতে ‘ভেগান ডায়েট‘ যিসকলে কৰে, তেওঁলোকে নিৰামিষ খাদ্য খোৱাৰ লগতে প্ৰাণীজাত সকলো খাদ্য বিসৰ্জন দিয়ে।

কিন্তু এয়া কোনো নতুন ঘটনা নহয়। প্ৰাচীনকালৰ পৰাই এতিয়াৰ ভাৰত নামৰ ভূ-খন্ডৰ লগতে ভূমধ্যসাগৰীয় অঞ্চলতো বহুতেই প্ৰাণীভিত্তিক প্ৰোটিন বৰ্জিত নিৰামিষ খাদ্য খাইছিল। এতিয়া পুনৰ বিশ্বজুৰি ক্ৰমশঃ ভেগানিজমৰ চৰ্চা বৃদ্ধি পাইছে।

বিশ্ব উষ্ণায়ন আৰু প্ৰকৃতিত কাৰ্বন ফুটপ্ৰিন্ট হ্ৰাস কৰিবলৈ খাদ্য আৰু পোছাকৰ বাবে প্ৰাণীৰ ওপৰত নিৰ্ভৰতা কমাবলৈ মানুহ আগ্ৰহী হৈছে। আনহাতে প্ৰাণীৰ প্ৰতি নৃশংসতা হ্ৰাস কৰিবলৈ প্ৰাণীভিত্তিক প্ৰোটিন বৰ্জনৰ আগ্ৰহ বাঢ়িছে।

১৯৪৪ চনত ডোনাল্ড ৱাটচনৰ উদ্যোগত ‘ভেগান চোছাইটি’ গঢ় লৈ উঠে। ২০১০ চনৰ পৰা ‘ভেগান ডে’ৰ উদযাপন আৰম্ভ হয়। আমেৰিকাৰ জাৰ্নাল অফ ক্লিনিকেল নিউট্ৰিশ্যনত প্ৰকাশিত এক গৱেষণা পত্ৰৰ পৰা জানিব পৰা গৈছে যে শাক-পাচলি, ফল আদিত থকা বিশেষ প্ৰাকৃতিক ৰাসায়নিক – যিবোৰে বিভিন্ন ৰং আৰু গোন্ধৰ সৃষ্টি কৰে, বিভিন্ন ফল আৰু পাচলিত প্ৰায় ৪০০০ ফাইটো কেমিকেলচ্ বা প্ৰাকৃতিক ৰাসায়নিক পোৱা যায়, আৰু সেইবোৰ শৰীৰৰ বাবে অত্যন্ত উপকাৰী। যেনে, বিলাহী, তৰমুজ, গাজৰ, আম, জাম, পালেং শাক। এইবোৰৰ প্ৰাকৃতিক ৰাসায়নিক পদাৰ্থই শৰীৰৰ ৰোগ প্ৰতিৰোধ ক্ষমতা বঢ়াই তোলে। সেইবাবেও আমেৰিকা, ইউৰোপত ‘ভেগান ডায়েট’ ক্ৰমে জনপ্ৰিয় হৈছে।

প্ৰাণীভিত্তিক আমিষৰ সোৱাদৰ পৰা নিৰামিষাহাৰী লোকসকল যাতে বঞ্চিত নহয়, তেনে গৱেষণাত লিপ্ত হৈ গৱেষক সকলে গৰুক বাদ দি ‘গৰুৰ গাখীৰ‘ প্ৰস্তুত কৰিছে। গৰুৰ গাখীৰৰ বিকল্প হিচাপে চয়াবিনৰ গাখীৰ আৰু বাদামৰ গাখীৰ আগতেই প্ৰস্তুত কৰা হৈছিল। কিন্তু সেইবোৰৰ সোৱাদ, গোন্ধ, পুষ্টিগুণ মুঠেও প্ৰকৃত গাখীৰৰ দৰে নহয়।

গৰুৰ গাখীৰৰ বিকল্প ১০০% 'ভেগান' গাখীৰ আমেৰিকাত প্ৰস্তুত হ'ল — **ৰায়ান পান্ডিয়া** আৰু **পেৰুমল গান্ধ**

গৰুৰ গাখীৰৰ সোৱাদ, গোন্ধ আৰু পুষ্টিগুণ অপৰিবৰ্তিত ৰাখি দুগৰাকী বায়ো- মেডিকেল ইঞ্জিনিয়াৰ ৰায়ান পান্ডিয়া আৰু পেৰুমল গান্ধ-এ এক বিশেষ ধৰণৰ কৃত্ৰিম গাখীৰ প্ৰস্তুত কৰিবলৈ সক্ষম হৈছে। আজিকালি প্ৰযুক্তিৰ সহায়েৰে কৃত্ৰিম প্ৰোটিন প্ৰস্তুত কৰা হয়। কৃত্ৰিম প্ৰোটিনেৰে আজিকালি লাখ লাখ মেডিচিন আৰু মাল্টিভিটামিন প্ৰস্তুত কৰা হয়। এনে প্ৰযুক্তিক কামত লগাই ভিটামিনযুক্ত কৃত্ৰিম গাখীৰ প্ৰস্তুত কৰিবলৈ সক্ষম হৈছে পান্ডিয়া আৰু গান্ধ-এ।

আমেৰিকাৰ গৱেষকদ্বয়ে প্ৰকাশ কৰা তথ্য অনুসৰি এই কৃত্ৰিম গাখীৰ পান কৰাৰ সময়ত আচল নে নকল সেয়া বুজি পোৱাৰ কোনো উপায় নাই। গৰুৰ গাখীৰৰ দৰে এই কৃত্ৰিম গাখীৰত লেক্টোজ নাই যদিও অতিৰিক্তকৈ উদ্ভিজ চেনি, ভিটামিন আৰু মিনাৰেল আছে – যিবোৰ শৰীৰৰ বাবে অত্যন্ত দৰকাৰ। আমেৰিকাৰ তৰুণ বিজ্ঞানী ৰায়ানে কৈছে,’ এনে গাখীৰ প্ৰস্তুত কৰোতে ‘বাটাৰকাপ’ নামৰ বিশেষ ধৰণৰ ‘ঈস্ট’ ব্যৱহাৰ কৰা হৈছে।’ আমেৰিকাৰ ডিপাৰ্টমেন্ট অফ এগ্ৰিকালচাৰে সৰবৰাহ কৰা এই ঈস্টত থ্ৰি-ডি(3-D) প্ৰিন্টিং প্ৰযুক্তি ব্যৱহাৰ কৰি গৰুৰ গাখীৰৰ জিন চিক্যুৱেন্স প্ৰৱেশ কৰাই একেবাৰে গৰুৰ গাখীৰৰ দৰে তৰললৈ পৰিৱৰ্তন কৰা সম্ভৱ হৈছে।

এই দুগৰাকী বিজ্ঞানীৰ প্ৰস্তুত কৰা গাখীৰ আমেৰিকাৰ ‘পাৰফেক্ট ডে‘ নামৰ এটা কোম্পানীয়ে ইতিমধ্যে সৰবৰাহ কৰিবলৈ আৰম্ভ কৰিছে। ইয়াৰ ফলত এনে গাখীৰে এহাতে গৰুৰ ওপৰত থকা চাপ হ্ৰাস কৰিব আৰু কোটি কোটি মানুহৰ বাবে প্ৰাণীভিত্তিক গাখীৰৰ বিকল্প চাহিদা পূৰণ কৰিবলৈ সক্ষম হ’ব বুলি দাবী কৰিছে বিজ্ঞানী পেৰুমলে।

Mahabahu.com is an Online Magazine with collection of premium Assamese and English articles and posts with cultural base and modern thinking. You can send your articles to editor@mahabahu.com / editor@mahabahoo.com ( For Assamese article, Unicode font is necessary)