জাতি আৰু খিলঞ্জীয়া একে নহয়

মৃণাল হাজৰিকা

উচ্চ স্তৰীয় সমিতিৰ প্ৰতিবেদনে “সাংবিধানিক অধিকাৰ” অসমীয়াৰ বাবে কৰিছে নে খিলঞ্জীয়াৰ বাবে কৰিছে?

১৯৫১ চনৰ ভিত্তিত ’অসমীয়াৰ’ সুৰক্ষা নে ’খিলঞ্জীয়াৰ’ সুৰক্ষা???

জাতি আৰু খিলঞ্জীয়া একেই নহয়৷ দুয়োটাৰ সংজ্ঞা সুকীয়া সুকীয়া৷ ’খিলঞ্জীয়া’ৰ সংজ্ঞা ভাৰতীয় সংবিধান মতে নহয়৷ সংবিধানে কি অনুমতি দিয়ে নিদিয়ে তাৰ ভিত্তিত ’খিলঞ্জীয়া’ৰ সংজ্ঞা নিৰূপণ নহয়৷ ই এক আন্তৰাষ্ট্ৰীয় প্ৰস্তাৱ৷ ইয়াক ভাৰতীয় সংবিধানৰ গইনা লৈ ১৯৫১ চনক ভিত্তি কৰাৰ অধিকাৰ কোনো সমিতি বা ভাৰত ৰাষ্ট্ৰৰ নাই৷

গতিকে ’উচ্চ স্তৰীয়’ সমিতিয়ে ইয়াক সংশোধন কৰাৰ দাবী জনালো৷

১৯৫১ চনৰ পূৰ্বতে অসমত বসবাস কৰি থকা সকলক ’অসমীয়া’ বুলি কোৱাটো যিদৰে সঠিক নহয়, সেইদৰে ’খিলঞ্জীয়া’ বুলি কোৱাটো আৰু অধিক গ্ৰহণযোগ্য নহয় ।

জাতি এটাৰ গঠন প্ৰক্ৰিয়া এক ধাৰাবাহিক প্ৰক্ৰিয়া৷ ইয়াক কেতিয়াও নিৰ্দ্দিষ্ট চন, তাৰিখেৰে নিৰ্ণয় কৰা নাযায়৷ নতুনকৈ প্ৰৱজন কৰি অহা এজনেও স্বইচ্ছাৰে নিজকে ’অসমীয়া জাতিৰ’ অঙ্গ হব পাৰে৷ সেয়েহে ’অসমীয়া’ জাতি প্ৰাচীন কামৰূপৰ দিনৰ পৰা বৰ্ত্তমানলৈকে থকা লোক সকলৰ সংমিশ্ৰণৰ এক ধাৰাবাহিক প্ৰক্ৰিয়াৰ মাজেৰে গঠন হৈ আছ আৰু ভৱিষ্যতেও থাকিব৷

১৯৮৫ চনত স্বাক্ষৰ হোৱা “অসম চুক্তি”ৰ সময়ত “অসমীয়া” শব্দৰ ব্যৱহাৰ কেৱল ১৮২৬ চনৰ পূৰ্বৰ পৰা বসবাস কৰি থকা মানুহ খিনিকহে সৰল অৰ্থত বুজোৱা হৈছিল৷ বাকী মনুহখিনিক বেঙ্গলী বা বঙ্গালী, বিহাৰী, মাৰোৱাৰী, বাগানীয়া আদি বুলিহে কোৱা বা ভবা হৈছিল৷ গতিকে “উচ্চ স্তৰীয়” সমিতিয়ে হয় ’চুক্তি’ত উল্লেখ কৰা ’অসমীয়া’’ শব্দৰ সংশোধন কৰিব লাগিছিল, নহয় এই শব্দৰ সেই সময়ৰ দৃষ্টিভংগীৰে বিশ্লেষণৰ সংযোজন ঘটাব লাগিছিল ৷ তাকে নকৰি নিজাববীয়াকৈ সকলোকে “খিলঞ্জীয়া”ৰ আওতালৈ অনাৰ যিদৰে অধিকাৰ নাই সেইদৰে চুক্তিৰ ৬ নং দফাৰ জৰিয়তে যিসকল মনুহৰ সুৰক্ষাৰ বিধান দিছিল সেইসকলৰ অস্তিত্ব ধ্বংস কৰাৰহে বিধান দিলে৷ গতিকে এই প্ৰতিবেদনে প্ৰকৃত ’খিলঞ্জীয়া’ লোকক সুৰক্ষিত নকৰি ধ্বংসহে কৰিব৷ যিটো কেতিয়াও গ্ৰহণযোগ্য হব নোৱাৰে৷ বি: দ্ৰ:— কিছু দিনৰ আগলৈকে অসমত “খিলঞ্জীয়া” শব্দৰ প্ৰচলন নাছিল৷ ৰাষ্ট্ৰ সঙ্ঘৰ মজিয়াত “খিলঞ্জীয়া”ৰ অধিকাৰ সন্দৰ্ভত UN-DRIP গ্ৰহণ কৰাৰ পিচত আমি প্ৰথম অসমত এই সন্দৰ্ভত বহুল প্ৰচাৰ কৰাৰ লগতে “খিলঞ্জীয়া” শব্দৰ প্ৰচলন হবলৈ ললে৷ বৰ্তমান সময়ত দূৰ্ভাগ্যজনক ভাৱে আমি প্ৰত্যক্ষ কৰিছো যে– বিভিন্ন সময়ত হোৱাই নোহোৱাই “খিলঞ্জীয়া” শব্দৰ প্ৰয়োগ সকলোৱেই কৰিবলৈ লৈছে৷ ই প্ৰকৃত “খিলঞ্জীয়া” লোকৰ ভৱিষ্যতৰ বাবে অশনি সংকেত বুলিয়েই গণ্য কৰিব পাৰি৷

Mahabahu.com is an Online Magazine with collection of premium Assamese and English articles and posts with cultural base and modern thinking.