জাপানৰ পৰা মহাবাহুলৈ ৪

-ডাঃ সুকৃতি চৌধুৰী |

নাৰীৰ অধিকাৰৰ নৱযুগৰ অপেক্ষাত জাপান

The History of Blouse: Tied in with both Modesty and Sexuality

September 25, 2022

পবিত্ৰ মহালয়া

September 25, 2022

[ পাৰিবনে কোনো নাৰী জাপানৰ সাম্ৰাজ্ঞী হ’ব?]

এই সময়ত জাপানৰ সৰ্বাধিক চৰ্চিত বিষয় হ’ল জাপানৰ নতুন সম্ৰাট কোন হ’ব?

জাপান চৰকাৰে ৬ জনীয়া পেনেল বনাই দি নতুন সম্ৰাটৰ অনুসন্ধান কৰিবলৈ দিছে৷

আচলতে জাপানৰ বৰ্তমান সম্ৰাট নাৰিহিতো লাহে লাহে বৃদ্ধ হৈ আহিছে৷ তেওঁৰ কোনো পুত্ৰ সন্তান নাই৷ একমাত্ৰ সন্তান হ’ল ৰাজকুমাৰী আই-কো৷ ২৬০০ বছৰ পুৰণি এই ৰাজপৰিয়ালৰ সদস্য সংখ্যা ১৮ জন৷ তেওঁলোকৰ অধিক সংখ্যকৰ বয়স ০৭ বছৰৰ পৰা ৩০ বছৰ৷ নতুন প্ৰজন্মত ছোৱালীৰ সংখ্যাই বেছি৷ সম্ৰাট নাৰিহিতোৰ ভায়েকৰ ১৪ বছৰীয়া পুত্ৰ আচিহিতোয়েই হ’ল একমাত্ৰ ল’ৰা৷ ১৯৬৫ চনৰ পৰা আচিহিতোৰ জন্মলৈকে, মানে ২০০৬ চনলৈকে জাপানৰ ৰাজপৰিয়ালত কোনো ল’ৰা-সন্তান জন্ম হোৱা নাছিল৷

প্ৰশ্ন উঠে যে জাপানৰ দৰে বিশ্বৰ উন্নত দেশখনত নাৰী-পুৰুষৰ সম-অধিকাৰ কিয় স্থাপন নহ’ব? কিয় ৰাজকুমাৰী আই-কো ক সাম্ৰাজ্ঞী নিৰ্বাচন কৰা নহ’ব? আই-কো ৰ সমৰ্থনত জাপানৰ ৮৫% নাৰী ওলাই আহিছে৷ ৭০% পুৰুষেও সমৰ্থন কৰিছে৷ ছ’চিয়েল মিডিয়াকে ধৰি সৰ্বস্তৰতে আই-কোৰ সমৰ্থনত আৰু শাসনৰ ক্ষেত্ৰত নাৰী-পুৰুষৰ সম-অধিকাৰৰ বাবে ব্যাপক মতামত গঠন হৈছে৷ উদাহৰণ দি কোৱা হৈছে যে ইয়াৰ আগতে ১৭৬২ চনৰ পৰা ১৭৭১ চনলৈকে মহাৰাণী চাকুৰামাচিয়ে দেশ শাসন কৰিছিল৷ তেনেহ’লে আই-কো কিয় সাম্ৰাজ্ঞী হ’ব নোৱাৰিব?

দৰাচলতে দ্বিতীয় বিশ্বযুদ্ধত পৰাজিত হোৱাৰ পিছৰ দিনবোৰত আমেৰিকাকে ধৰি পশ্চিমীয়া শক্তিৰ ষড়যন্ত্ৰত জাপানত কেতবোৰ এনে নিয়ম বনোৱা হৈছিল যিবোৰৰ দ্বাৰা অ’তি চতুৰালি কৰি জাপানী সকলক পদদলিত কৰিবলৈ চেষ্টা কৰা হৈছিল যেন অনুভৱ হয়৷ এই নতুন আইনবোৰৰ আলমতে ১৯৪৭ চনত এনে আইন কৰা হয় যে কোনো নাৰী জাপানৰ সাম্ৰাজ্ঞী হ’ব নোৱাৰিব৷ অথচ ইয়াৰ আগতে এই নিয়ম নাছিল৷

দ্বিতীয় বিশ্বযুদ্ধৰ পিছত ৰাজপৰিয়ালৰ একাংশ লোকৰ ৰাজকীয় উপাধি কাঢ়ি লৈ খেদি দিয়া হৈছিল৷ এতিয়া একাংশ লোকে মত প্ৰকাশ কৰিছে যে এই খেদা খোৱা লোক সকলক পুনৰ সংগঠিত কৰি আদৰি আনক আৰু এওঁলোকৰ মাজৰ পৰায়েই কোনো সুপুৰুষ নতুন সম্ৰাট হওক৷

আনহাতে এনে নিয়মো বান্ধি দিয়া হৈছিল যে যদিহে কোনো ৰাজকুমাৰীয়ে সাধাৰণ লোকক বিয়া কৰায়, তেনেহ’লে সেই মুহুৰ্তৰে পৰা সেই নাৰীৰ ৰাজকীয়ত্ব লোপ পাব৷ কিন্ত ৰাজকুমাৰে যদি সাধাৰণ ঘৰৰ পৰা বিয়া কৰায় তেনেহ’লে এই নিয়ম নাখাটে৷ মানে তেওঁ য’ৰে পৰা বিয়া নকৰাওক কিয়, ৰাজকুমাৰ হৈয়েই ৰ’ব৷ ইয়াৰ ফলত ৰাজকীয়ত্ব লোপ পোৱাৰ ভয়তে ছয় গৰাকী ৰাজকুমাৰী এতিয়ালৈ বিয়াই নহ’ল৷

ইতিমধ্যে শাসনাধিষ্ঠিত এল ডি পি পাৰ্টিৰ সাংসদ সকলে দ্বিতীয় বিশ্বযুদ্ধৰ পিছত খেদাখোৱা ৰাজপৰিয়ালৰ ঠাল-ঠেঙুলিবোৰক পুনৰ ৰাজকীয়ত্ব প্ৰদান কৰিব লাগে বুলি জাপানৰ সংসদত/ডায়েটত বিল উত্থাপন কৰিছেই৷ ইয়াৰ উদ্দেশ্য হ’ল কোনো উপযুক্ত পুৰুষক যাতে জাপানৰ ভৱিষ্যত সম্ৰাট হ’বলৈ বিচাৰি উলিওৱাত সহজ হয়৷

জাপানৰ প্ৰধানমন্ত্ৰী য়ুচিহিদে চুগাই মত প্ৰকাশ কৰিছে এজন উপযুক্ত পুৰুষেই জাপানৰ সম্ৰাট হোৱা উচিত৷

আনহাতে টেম্পল ইউনিভাৰ্চিটিৰ ট’কিও কেম্পাছৰ ৰাজনীতি বিজ্ঞান বিভাগৰ অধ্যাপিকা হিৰোমী মুৰাকামীয়ে নাৰীক ৰাজপাট নিদিয়াৰ প্ৰতিবাদত ব্যাপক মতামত গঠনত আগভাগ লৈছে৷ দেশখনৰ ৮৫% নাৰী হিৰোমীৰ সপক্ষে থিয় দিছে৷

পিছে সমগ্ৰ বিষয়টো চালি-জাৰি চাই বৰ্তমান সম্ৰাটৰ ১৪ বছৰীয়া ভতিজাক আচিহিতোয়েই ভৱিষ্যতৰ সম্ৰাট হ’ব যেন মোৰ মনে ধৰে৷ ফুকুই প্ৰিফেকচু্ৰেল ইউনিভাৰ্চিটিৰ অধ্যাপক য়ুইচি চিমাদাই কৈছে যে ৬ জনীয়া পেনেল বনোৱাটো ভেকোভাওনাহে৷ হয়তোবা আই-কোক বঞ্চিতা কৰাৰ সুৰুঙাহে বিচৰা হৈছে৷

সৰ্বগুণসম্পন্না আৰু অ’তি প্ৰতিভাশালী বুলি ৰাজকুমাৰী আই-কোৰ বিষয়ে কেইবাটাও লেখা পঢ়াৰ পিছত কিয় জানো মোৰ ভাৱ হৈছে যে মই যেন ৰেজিয়া চুলতানাৰ ঐতিহাসিক ঘটনাক্ৰম নতুন ধৰনে ৰাজকুমাৰী আই-কোক কৰা বঞ্চনাৰ মাজত দেখা পাইছো৷

ইমান এখন উন্নত দেশত কেৱল নাৰী হোৱাৰ বাবেই ৰাজকুমাৰী আই-কোক সাম্ৰাজ্ঞী নিৰ্বাচন নকৰাটো সমগ্ৰ পৃথিৱীৰ নাৰীসকলক কৰা বঞ্চনাৰ একৈশ শতিকাৰ সৰ্বশ্ৰেষ্ঠ উদাহৰণ৷