ঝাৰগ্ৰামৰ আশ্ৰমত মমতাময়ী মাতৃ স্নেহৰ পৰশত মই সিক্ত

ঝাৰগ্ৰামৰ আশ্ৰম

কলিকতালৈ আহি ক’তনো ফুৰিবলৈ যাম তাকেই ভাবি আছিলোঁ। কিন্তু মকবুল ইছলাম চাহাবে আগতেই ঠাই ঠিক কৰি থৈছিল। তেওঁ কলে যে ঝাৰগ্ৰামত এখন আশ্ৰম আছে তালৈ মোক লৈ যাব।

আশ্ৰম বুলি শুনি মনটো ভাল লাগি গ’ল। কাৰণ মই কেতিয়াও আশ্ৰমত থাকি পোৱা নাই। কিন্তু এটা সময়ত মনটো অলপ কোচ খায়ো গৈছিল যেতিয়া শুনিছিলোঁ যে ঠাই টুকুৰা এটা সময়ত মাওবাদী উপদ্ৰুত এলেকা আছিল।

আমি এক জুন তাৰিখে steel express ফাষ্ট ট্ৰেইনেৰে আহি ৰাতি চাৰে আঠমান বজাত আশ্ৰম পালোঁ। আহোতে মকবুল চাহাবে এটা তৰমুজ, কিছু ফলমূল,কিছু মিঠাই আৰু আন কিছু বস্তু কিনি লৈছিল। আশ্ৰমৰ পৰা এখন গাড়ী পঠিয়াই দিছিল।

মই দেখিলো গাড়ীৰ ড্ৰাইভাৰে তেওঁক চিনি পায়। গাড়ীখন গৈ আশ্ৰম পোৱাত তেখেত ভিতৰলৈ সোমাই গ’ল আৰু গেৰুৱা বসন পিন্ধি থকা সন্যাসী এগৰাকীক ‘মা প্ৰণাম ‘ বুলি চৰণ স্পৰ্শ কৰিলে। কাষতে মই বুৰ্বকৰ দৰে থিয় দি থাকিলোঁ। কাৰণ এইখন কি আশ্ৰম আৰু আশ্ৰমৰ নিয়ম নীতি কি মই নাজানিছিলোঁ।

অলপ সময়ৰ ভিতৰত আশ্ৰমৰ কেবাগৰাকী ‘মা‘ আহি সমগ্ৰ পৰিবেশটো উখল মাখল কৰি তুলিলে, যেন বহুদিনৰ মূৰত ঘৰলৈ কোনো আপোনজন আহিছে।

এনেতে তেখেতে প্ৰণাম কৰা গৌৰী মায়ে হাতত এটা ডাঙৰ কেক লৈ টেবুল এখনত থৈ ক’লে যে ফেচবুকৰ পৰা তেওঁলোকে গম পাইছে যে আজি মকবুল চাহাবৰ জন্মদিন। গতিকে সকলোৱে মিলি আজি তেওঁৰ জন্মদিন পালন কৰিবলৈ এটা নিৰামিষ কেক অৰ্ডাৰ কৰি আনিছে। মকবুল ইছলাম যিহেতু নিৰামিষভোজী গতিকেই নিৰামিষ কেক।

ঝাৰগ্ৰামৰ আশ্ৰমত মমতাময়ী মাতৃ স্নেহৰ পৰশত মই সিক্ত

সমগ্ৰ ঘটনাত আমি আচৰিত হোৱাৰ পাল। কাৰণ মকবুল ইছলামে দিনত মোক এবাৰো কোৱা নাছিল যে আজি তেওঁৰ জন্মদিন। আনকি তেখেতসকলকো মকবুল ইছলামে তেওঁৰ জন্মদিন সম্পৰ্কে একো কোৱা নাছিল । জন্মদিন পতা হবই যেতিয়া মকবুল চাহাবে ক’লে যে কেক কাটি নহয় তৰমুজ কাটিহে জন্মদিন পালন কৰিব। কিন্তু কেকটোও সকলোৱে ভগাই খাব।

তৰমুজ আৰু কেক কটা হ’ল কিন্তু Happy Birthday বোলা নহ’ল। তাৰ সলনি তৰমুজ আৰু কেকৰ টুকুৰা কেইটামান এখন কাঁহীত লৈ বাবাক আগবঢ়াই দিয়া হ’ল। বাবা হ’ল আশ্ৰম খনৰ প্ৰতিষ্ঠাতা স্বামী শৰ্বানন্দ। আনুমানিক 1946 চন মানত এই আশ্ৰমখন তেখেতে প্ৰতিষ্ঠা কৰিছিল। ৰামকৃষ্ণ পৰমহংসৰ শিষ্য আৰু ৰামকৃষ্ণ মিছনৰ এসময়ৰ উপসভাপতি স্বামী শৰ্বানন্দই মহিলা সকলৰ শিক্ষা আৰু উত্তৰণৰ বাবে সুকীয়াকৈ সাৰদাপীঠ কন্যা গুৰুকুল আশ্ৰম প্ৰতিষ্ঠা কৰে।

আমি এইখন কন্যা গুৰুকুলৰ আলহী । মকবুল ইছলাম চাহাবে তেওঁৰ জন্মদিনৰ তৰমুজ আৰু কেক সকলোকে ভগাই দিলে। গুৰুকুলৰ ছাত্ৰী নিবাসত প্ৰায় দুশ গৰাকী ছাত্ৰী থাকে। বেছিভাগেই আদিবাসী সম্প্ৰদায়ৰ। বৰ্তমান ছাত্ৰীৰ সংখ্যা তাকৰ। সকলোৱে শাৰী পাতি তৰমুজ আৰু কেক লৈছে। লগে লগে প্ৰত্যেকেই মকবুল ইছলামৰ চৰণ স্পৰ্শ কৰিছে। এয়া গুৰু পৰম্পৰা। সকলোৱেই মকবুল চাহাবক গুৰুৰ আসনত ৰাখিছে।

ঝৰগ্ৰাম নক্সাল অধ্যুষিত এলেকা। এসময়ত ঠাইখনত কোনোৱেই সুৰক্ষিত অনুভব কৰা নাছিল। ব্যতিক্ৰম আছিল এইখন আশ্ৰম। কাৰণ আশ্ৰমখনে আদিবাসী পৰিয়ালৰ ছোৱালীৰ শিক্ষাৰ উত্তৰণৰ ক্ষেত্ৰত গুৰুত্বপূৰ্ণ ভূমিকা লৈছিল। আশ্ৰম খনত স্কুল আছে। ছাত্ৰীৰ সংখ্যা হাজাৰৰ অধিক। বেছিভাগেই আদিবাসী।

আশ্ৰমখনৰ মূল পৰিচালনাৰ ভাৰ যি কেইগৰাকী ‘মা’ৰ ওপৰত তাৰ ভিতৰত অন্যতম হৈছে গৌৰী মা, গীতা মা, প্ৰয়াস মা আৰু মলী মা। গৌৰী মা উচ্চ শিক্ষিতা। ইকনমিক্সৰ প্ৰথম শ্ৰেণীৰ প্ৰথম হৈ এম এ পাছ কৰা। স্বৰ্ণ মেডেল প্ৰাপক এই গৰাকী নাৰীয়ে কেৱল সমাজ সেৱাৰ কাৰণেই সন্যাস ধৰ্ম গ্ৰহণ কৰি যুৱতীকালত অকলেই এইখন আশ্ৰম লৈ গুচি আহিছিল। এতিয়া এখেত আশ্ৰমখনৰ সচিব।

গীতা মা আশ্ৰমৰ সভানেত্ৰী। তেখেত আশ্ৰম খনৰ বয়সীয়াল ব্যক্তি। প্ৰয়াস মা এগৰাকী অভিযন্তা। সমাজৰ সেৱাৰ বাবে সংসাৰ ধৰ্ম ত্যাগ কৰিছে। মলী মা আশ্ৰম খনৰ ব্যৱস্থাপনাৰ লগত জড়িত।

মকবুল চাহাবে কৈছিল যে ইয়াত তেখেতৰ এগৰাকী কন্যা আছে। কন্যাৰ নাম কৃষ্ণা। মাক সৰুতে ঢুকাইছে। পিতৃৰ স্নেহৰ পৰা বঞ্চিত। পেহীয়েকৰ স্নেহৰ দ্বাৰা লালিত পালিত। সংস্কৃতৰ স্নাতকোত্তৰ। আশ্ৰমত থাকি বি এড কৰি আছে।

কৃষ্ণাই আহি মকবুল চাহাবক দীৰ্ঘ দি সেৱা কৰি মোকো সেৱা কৰিলে। মই এই পৰিস্থিতিৰ বাবে সাজু নাছিলোঁ। মকবুল চাহাবে কৃষ্ণাক পিতৃৰ দৰে স্নেহ কৰে। সমগ্ৰ দৃশ্য ৰাজীয়ে মোক অভিভূত কৰি পেলালে। মই যেন এখন বেলেগ পৃথিৱীত প্ৰৱেশ কৰিলোঁ।