ডালমাচিয়ান কুকুৰ

ডালমাচিয়ান কুকুৰ

ৰেজাউল কৰিম

মানুহ ভাল পোৱা মই মানুহজন

এদিন হঠাত কুকুৰ হৈ গ’লোঁ।

দীঘল নোম, চোকা দাঁত আৰু বেঁকা নখবোৰ প্ৰকট হ’ল।

মোৰ ঘ্ৰাণশক্তি বৃদ্ধি পালে।

চাৰিওপিনে কুকুৰৰ গাৰ গোন্ধ পালোঁ।

পদুলি মুখত আহি নঙলাখনত প্ৰস্ৰাৱ কৰি সীমাৰেখা আঁকিলোঁ।

দুটা সৰু কুকুৰ পোৱালী মোৰ পিনে আগুৱাই আহিল।

সিঁহতে এতিয়াও কুকুৰতকৈ মানুহৰ সংগ বেছি ভাল পায়।

মাকজনীও চোঁচা এটা লৈ মোৰ পিনে আগবাঢ়ি আহিল।

কুকুৰে হেনো দেও, ভূত, পিশাচ, জন্ম, মৃত্যু আদিৰ উমান পায়।

অলপ দূৰ আহিয়েই তাই মোলৈ চাই ৰৈ দিলে।

লাজত নে মৰমত তাই লেতু সেতু হৈ মোৰ ভৰিৰ কাষতে শুই দিলে।

তাই চাগে মোক চিনি পাইছেই।

মোৰ ভোক লাগিছিল।

সিহঁতৰ লগত ময়ো ডাষ্টবিনত খাদ্য বিচাৰিলোঁ।

গোলামী আৰু পৰাধীনতাৰ ইতিহাসেৰে

গৰিমামণ্ডিত মানুহে ডাষ্টবিনটো সজাই থৈছিল।

আমি ভোকাতুৰ পেটেৰেই উভতিলোঁ।

অকল বাটৰ কুকুৰেই ভোকাতুৰ নহয়।

এবাৰ এজাক কুকুৰ বাটেৰে গৈ থকা দেখিলোঁ।

কুকুৰবোৰ দেখিবলৈ বেলেগ বেলেগ।

জাত বেলেগ।

ডিঙিত ধুনীয়া ধুনীয়া বেল্ট।

মোৰ ভয় লাগিছিল।

কিজানিবা কামোৰেই।

বেলেগ জাতৰ কুকুৰক ইহঁতে বেয়া নেপায়।

ডিঙিত বেল্ট পিন্ধি

কুকুৰত্ব হেৰুৱাই মনুষ্যত্ব গ্ৰহণ কৰিব খোজা

ইহঁত স্বাধীনতা হেৰোৱা আভিজাত শ্ৰেণীৰ কুকুৰ ।

ইহঁতৰ প্ৰতি পুতৌহে ওপজে।

ইহঁত মালিক নিৰ্ভৰ হিতাধিকাৰী।

ইতিমধ্যে এটা মতা কুকুৰ আহি

নঙলা মুখত শুঙিবলৈ ধৰিলে।

তাৰো আছে এটা স্বাভিমান।

তাৰো আছে এটা নিদিষ্ট সীমা।

বিনা যুদ্ধে বশ্যতা স্বীকাৰ কৰাটো তাৰ তেজত নাই।

সি মোক প্ৰত্যাহ্বান জনাই পুনৰ নঙলাখনত প্ৰস্ৰাৱ কৰিলে।

মই তাক মনৰ ভিতৰতে এটা চেল্যুট জনালোঁ।

মোৰ ফুটুকা চোলাটো সিদিনা

ডালমাচিয়ানৰ ৰূপ লৈছিল।

কাষেৰে পাৰ হৈ যোৱা ছোৱালী এজনীয়ে

মোক ঘুৰি ঘুৰি চাইছিল।

ঘৰলৈ উভতি যাবলৈ মোৰ মন নাছিল।

ডিঙিটোত এটা সুৰসুৰণি অনুভৱ কৰিছিলোঁ।

মোৰ ডিঙিটোতো আছে এডাল বেল্ট।

প্ৰচাৰ আৰু সামাজিক মাধ্যমৰ যোগেদি

ডাঙৰ  মানুহে পিন্ধাই দিয়া।

ঘৃণাৰ বেল্ট।

হঠাত ঘৰৰ পৰা মতা শুনিলোঁ।

ক’তনো গৈছে মৰিবলৈ।

কুকুৰৰ দৰে অলৌ তলৌকৈ ঘুৰি ফুৰিলেই হয় নে ?

মই লাহে লাহে এটা মানুহৰ ৰূপ লৈ ঘৰ সোমালোঁ।

টিভিটোত তেতিয়া কোনোবাই কুকুৰৰ দৰে ভুকি আছিল।

এনেতে ঘৰৰ কলিং বেলটো বাজি উঠিল।

দুৱাৰ মুখত ধুনীয়া ছোৱালীজনী থিয় হৈ আছিল।

তাই বিনম্ৰভাৱে সুধিলে, আপোনালোকৰ ঘৰত

এটা ডালমাচিয়ান আছে নেকি ?

আমাৰ জনীৰ সৈতে মেটিং কৰাব খুজিছিলোঁ।

যদি বেয়া নাপায় ……

মই তেতিয়াও ফুটুকা চোলাটো পিন্ধি আছিলোঁ।

Mahabahu.com is an Online Magazine with collection of premium Assamese and English articles and posts with cultural base and modern thinking.  You can send your articles to editor@mahabahu.com / editor@mahabahoo.com ( For Assamese article, Unicode font is necessary)