তৃতীয় বিশ্বযুদ্ধৰ সম্ভাৱনা বাইডেনেও উৰুৱাই দিয়া নাই

তৃতীয় বিশ্বযুদ্ধৰ সম্ভাৱনা

কৃষ্ণ সাগৰত ডুবি গৈছে ৰাছিয়াৰ বিখ্যাত যুদ্ধজাহাজ মস্কোভা। ইউক্ৰেনে ঘোষণা কৰিছে যে ইউক্ৰেনৰ ক্ষেপনাস্ত্ৰৰ আঘাততেই ডুবি গৈছে ৰাছিয়াৰ সবাতোকৈ মহিমামণ্ডিত যুদ্ধজাহাজ মস্কোভা।

মস্কোভা নামৰ ৰাছিয়াৰ যুদ্ধজাহাজখন কৃষ্ণ সাগৰত ডুবি যোৱাৰ পিছত আমেৰিকাৰ পেন্টাগনে মন্তব্য কৰিছে যে ইউক্ৰেনক আক্ৰমণ কৰাৰ পিছত এয়া ৰাছিয়াৰো বিপুল ক্ষতি।

যোৱা ৫০ দিনৰো অধিক সময় ৰাছিয়াই কৃষ্ণ সাগৰত ক্ষমতা প্ৰদৰ্শন কৰি আছিল। প্ৰকৃততে কৃষ্ণ সাগৰত অৱৰোধ কৰি আছিল ৰাছিয়াই। এনে অঘটনৰ ফলত ৰাছিয়াইও যে বিৰাট আঘাত পাইছে, সেয়া সহজেই অনুমেয়।

কৃষ্ণ সাগৰত পুটিনৰ দৰ্পচূৰ্ণ হোৱা খবৰ সংবাদ মাধ্যমত বিয়পি পৰিছে। কিন্তু আনুষ্ঠানিক ভাবে মস্কোই কৈছে যে কিবা এক বিজুতিৰ বাবে জাহাজখনত জুই লাগিছিল হেতুকে তেনে অঘটন হ’ল।

আনহাতে ইউক্ৰেনৰ সৈন্যবাহিনীৰ মতে ৰাছিয়াৰ মস্কোভা নামৰ যুদ্ধজাহাজ খন ইউক্ৰেনৰ ‘নেপচুন’ নামৰ ক্ষেপনাস্ত্ৰৰ আঘাতত ধ্বংস হৈছে।

উল্লেখযোগ্য যে যিসময়ত জাহাজখনত কিবা প্ৰকাৰে জুই লগাৰ বাবেহে সাগৰত ডুবা বুলি ৰাছিয়াই দাবী কৰিছে, সেইসময়তে আকৌ ৰাছিয়াৰ চৰকাৰী টেলিভিছন চেনেলৰ এজন উপস্থাপকে ঘোষণা কৰিছে -‘ তৃতীয় বিশ্বযুদ্ধ যে আৰম্ভ হৈ গৈছে, সেই সম্পৰ্কে কোনো সন্দেহ নাই।’

ship — Moskva. Image from defenceaviationpost.com

চৰকাৰী সংবাদ মাধ্যমৰ সেই উপস্থাপক ওল্গা স্কাবেইভাই পুনৰ কয় যে -‘ আমাৰ মোকাবিলা ‘নাটো’ৰ সৈতে হৈ আছে, সেয়া ষ্পষ্ট – যদিও নাটো দৃশ্যমান হোৱা নাই। কিন্তু আমি সেই সত্য স্বীকাৰ কৰিবই লাগিব।’ ৰাছিয়াৰ টেলিভিছন চেনেলৰ সেই অনুষ্ঠানত উপস্থিত থকা এজন অতিথিয়ে এনেদৰে টিপ্পনি দিয়ে যে ৰাছিয়াৰ যুদ্ধজাহাজৰ ওপৰত কৰা সেই আক্ৰমণ ৰাছিয়াৰ মাটিত কৰা আক্ৰমণৰ সমতুল্য।

ৰাছিয়াৰ ভক্তসকলে মস্কোভা ডুবি যোৱাৰ পিছত ‘নাটো’ক দোষাৰোপ কৰি সমালোচনা আৰম্ভ কৰি দিছে। বিভিন্ন মহলে আলোচনা কৰিছে যে পুটিনৰ ধাৰণা আছিল, তেওঁ যদি ইউক্ৰেনৰ ওপৰত আক্ৰমণ চলায় – মাত্ৰ কেইদিনমানৰ ভিতৰতে ইউক্ৰেন তেওঁৰ দখললৈ আহিব। ইউক্ৰেনৰ নাগৰিক সকলেও তাকেই বিচাৰে বুলিও ৰাছিয়াই প্ৰচাৰ কৰিছিল। কিন্তু বাস্তৱ ক্ষেত্ৰত দেখা গ’ল, ইউক্ৰেনৰ সৈন্যবাহিনীৰ লগতে দেশপ্ৰমী ইউক্ৰেনীয় জনতাই ৰাছিয়াক প্ৰৱল প্ৰতিৰোধ কৰিবলৈ সক্ষম হৈছে, নাস্তানাবুদ কৰিবলৈ সক্ষম হৈছে। যুদ্ধৰ আৰম্ভণিৰে পৰাই মস্কোভা আছিল ৰাছিয়াৰ বাবে এক মহাশক্তিৰ প্ৰতীক, সাগৰ অৱৰোধ কৰিব পৰাকৈ ক্ষমতাশালী। মস্কোভা নামৰ জাহাজখনত যি অত্যাধুনিক প্ৰযুক্তি আছিল, অইন জাহাজবোৰত নাছিল। গতিকে এইখন জাহাজ ডুবি যোৱাৰ লগে লগে ৰাছিয়াৰ আৰ্থিক ক্ষতি, সামৰিক ক্ষতিৰ লগতে সন্মান হানিও হৈছে।

এনে সময়তে আমেৰিকাৰ ‘চি-আই-এ’-ৰ সঞ্চালক উইলিয়াম বাৰ্ণছ-এ সতৰ্কবাণী শুনাইছে, যিহেতু ৰাছিয়াই আশা কৰা অনুসাৰে ইউক্ৰেনৰ বিৰুদ্ধে সাফল্য লাভত ব্যৰ্থ হৈছে – সেয়েহে বৰ্তমানৰ পৰিস্থিতিত ৰাছিয়াই যি কোনো সময়তে কম শক্তিৰ পৰমাণু বোমা ব্যৱহাৰ কৰিব পাৰে। কোহেনৰ ইউ-টিউব চেনেলত আমেৰিকাৰ ৰাষ্ট্ৰপতি জো বাইডেন-অৰ এক সাক্ষাৎকাৰ সম্প্ৰচাৰিত হৈছে আৰু বাইডেনে কৈছে -‘ এতিয়া দুটা বিকল্প আমাৰ হাতত আছে, তৃতীয় বিশ্বযুদ্ধ আৰম্ভ কৰা, অথবা ৰাছিয়াৰ বিৰূদ্ধে পোনপটীয়া যুদ্ধ আৰম্ভ কৰা।

১৮-০৪-২০২২

Mahabahu.com is an Online Magazine with collection of premium Assamese and English articles and posts with cultural base and modern thinking.