থানেশ্বৰ বড়ো : এক অনন্য আঞ্চলিকতাবাদী সত্বা

কুমাৰ দীপক দাস

অসম গণ পৰিষদ দলৰ প্ৰাক্তন সভাপতি ,প্ৰাক্তন মন্ত্ৰী তথা বিশিষ্ট শিক্ষাবিদ আমাৰ অতি শ্ৰদ্ধাৰ থানেশ্বৰ বড়ো ছাৰৰ বিয়োগত মৰ্মাহত হৈছো ৷

গুৱাহাটীৰ বি বৰুৱা কলেজৰ এগৰাকী অধ্যাপক হিচাবে কৰ্মজীৱন আৰম্ভ কৰা বুৰঞ্জীবিদ হিচাবে খ্যাত বড়ো ছাৰ আছিল অসমৰ বিশেষকৈ জনজাতি সকলৰ ইতিহাস বিশেষজ্ঞ এগৰাকী ব্যক্তি ৷

অতি সহজ সৰল ব্যক্তিত্বৰ অধিকাৰী এই গৰাকী শিক্ষাবিদ ৰাজনীতিজ্ঞৰ জীৱন পৰিচৰ্যা অসমৰ সমাজ জীৱনৰ এক ব্যতিক্ৰম অধ্যায় ৷ তেখেত অসমৰ জাতীয়তাবাদী আন্দোলনৰ এগৰাকী সদা সষ্টম যোদ্ধা আছিল ৷

থানেশ্বৰ বড়োদেৱৰ নিবিড় সান্নিধ্য আৰু অসম আন্দোলনৰ দিনৰ কঠিন সময়বোৰত , সামাজিক বিভিন্ন স্তৰত উথ্থাপিত দিৰ্ঘদিনীয়া সমস্যাৰ পৰা আঞ্চলিক দলৰ মজিয়াত বিভিন্ন আলাপ আলোচনাত উল্লেখ কৰা যুক্তিনিষ্ঠ পৰামৰ্শ সমুহে আমাক এই জাতীয়তাবাদী আন্দোলনত সক্ৰিয়তাৰে আগবাঢ়ি যোৱাত প্ৰেৰণা দিছিল আৰু আমাক শিক্ষিত কৰিছিল ৷ তেখেত বড়ো সাহিত্য সভাৰ নেতৃস্থানীয় ব্যক্তি হিচাবেও পৰিচিতি লাভ কৰিছিল ।

অসমৰ ৰাজহ আৰু শিক্ষা সংস্কাৰৰ ক্ষেত্ৰত এগৰাকী মন্ত্ৰী হিচাবে তেখেতে প্ৰভূত পৰিমানৰ অৰিহনা আগবঢ়াই থৈ গৈছে ৷ অসমৰ এগৰাকী বিশিষ্ট আঞ্চলিকতাবাদী নেতা হিচাবে প্ৰখ্যাত এইগৰাকী বিশিষ্ট চিন্তাবিদ আছিল অসমৰ প্ৰতিটো জাতীয় আন্দোলনৰ অংশিদাৰ ।

তেখেতে ঐতিহাসীক ছবছৰীয়া অসম আন্দোলনত সক্ৰীয়তাৰে য়োগদান কৰে আৰু পূৰ্বাঞ্চলীয় লোক পৰিষদৰ সভাপতিৰ দায়িত্বভাৰ লৈ থকা সময়চোৱাত অসম চুক্তি সম্পাদনৰ সময়ত অসম গণসংগ্ৰাম পৰিষদৰ প্ৰতিনিধি হিচাবে দিল্লীত উপস্থিত থাকি এই চুক্তি সম্পাদনত বিশেষ ভূমিকা গ্ৰহন কৰিছিল ৷ আনহাতে , অ গ প দল গঠনৰ সময়ত তেখেতে সক্ৰীয় ভূমিকা গ্ৰহন কৰি ইয়াৰ সভাপতি মণ্ডলীৰ সদস্যহিচাবে ইয়াৰ প্ৰতিস্থাৰ সৈতে জড়িত হৈ পৰে ৷

১৯৯০ চনত তেখেতে ভাৰপ্ৰাপ্ত সভাপতি হিচাবে অ গ প দলৰ কাৰ্যভাৰ গ্ৰহন কৰি আঞ্চলিক দলটোক নতুন গতি দিবলৈ সক্ষম হয় ৷ নিজৰ আটাইতকৈ প্ৰিয় পত্নী আৰু একমাত্ৰ পুত্ৰক হেৰুৱাৰ পিচতো য়ি ধীৰ স্থিৰ আাৰু দৃঢ়তাৰে চৰকাৰী আৰু দলীয় কাম কাজ চলাই নিছিল সেয়াও তেখেতৰ জীৱনৰ এক অনন্য অধ্যায় ৷ পিচলৈ তেখেত শাৰিৰীক ভাবেও দুৰ্বল হৈ পৰিছিল ৷
সৰ্বজনপ্ৰিয় এনে এগৰাকী আঞ্চলিকতাবাদী আৰু জাতীয় প্ৰেমী নেতাৰ বিয়োগত অসমৰ ৰাজনৈতিক তথা শিক্ষা আৰু সামাজিক ক্ষেত্ৰ খনত এক অপূৰণীয় ক্ষতি হ’ল ৷ ছাৰৰ প্ৰতি আমাৰ গভীৰ শ্ৰদ্ধাঞ্জলি জ্ঞাপন কৰিলো৷ তেখেতৰ বিদেহ আত্মাৰ সদগতি কামনা কৰিলো ৷

17-05-2024