দীপৰ বিলৰ পাৰৰ ৰেলআলিৰ বৈদ্যুতিকৰণ-কৰ্মত বাধা বনবিভাগৰ

দীপৰ বিলৰ পাৰৰ ৰেলআলি

নেকিব আলি শইকীয়া

গুৱাহাটীৰ দীপৰ বিলখনৰ পাৰেৰে আৰু কিছু অংশত মাজেৰে যোৱা আজাৰা-কামাখ্যা ৰেলআলিত ৰেল বিভাগে ৰাষ্ট্ৰীয় সেউজ ন্যায়াধিকৰণ ( NGT)ৰ নিৰ্দেশ উলংঘা কৰি তথা বিশেষজ্ঞ কমিটিৰ পৰামৰ্শ আওকাণ কৰি পুনৰ বৈদ্যুতিকৰণৰ কাম আৰম্ভ কৰা বিষয়টোক লৈ ৰেল বিভাগ আৰু বন বিভাগৰ মাজত সংঘাত সৃষ্টি হৈছে বুলি শুনা গৈছে।

ইতিপূৰ্বে যোৱা কেইটামান বছৰত দীপৰ বিলৰ পাৰেৰে যোৱা ৰেলআলিত ৰেলগাড়ীৰ খুন্দাত ১৫ টা বনৰীয়া হাতীৰ মৃত্যু হোৱাৰ লগতে অইন বহুসংখ্যক বনৰীয়া জীৱ-জন্তুৰ প্ৰাণহানি হৈছে। তাৰেই পটভূমিত ৰাইজৰ মাজত দেখা দিয়া গভীৰ অসন্তুষ্টি আৰু প্ৰৱল প্ৰতিবাদৰ বাবে হাতীৰ লগতে অইন জীৱ- জন্তুৰ জীৱনৰ প্ৰতি আহিব পৰা ভাবুকিলৈ লক্ষ্য কৰি ৰাষ্ট্ৰীয় সেউজ ন্যায়াধিকৰণে ৰেল বিভাগক বৈদ্যুতিকৰণ তথা ৰেলআলি দ্বৈতকৰণৰ কাম দীপৰ বিলৰ পাৰত থকা অংশত, সেই বিষয়টোৰ চূড়ান্ত নিষ্পত্তি নোহোৱালৈকে, স্থগিত ৰাখিবলৈ যোৱা বছৰেই এক নিৰ্দেশ দিছিল।

সেই নিৰ্দেশৰ ভিত্তিত বন বিভাগৰ বাধাৰ বাবে বিগত কেইটামান মাহত ৰেলআলিৰ দ্বৈতকৰণ আৰু বৈদ্যুতিকৰণৰ কাম বন্ধ আছিল যদিও যোৱাকালি ৰাষ্ট্ৰীয় সেউজ ন্যায়াধিকৰণৰ নিৰ্দেশ জলাঞ্জলি দি দীপৰ বিলৰ পাৰৰ মিকিৰপাৰাত ৰেল বিভাগে পুনৰ ৰেলআলিৰ বৈদ্যুতিকৰণৰ কাম আৰম্ভ কৰিবলৈ ধৰাত দীপৰ বিলৰ সমীপত থকা বন বিভাগৰ বিষয়া ধনেশ্বৰ দলেৰ নেতৃত্বত বনবিভাগৰ দল এটাই ঘটনাস্থলীত উপস্থিত হৈ ৰেল বিভাগৰ বৈদ্যুতিকৰণৰ কাম বন্ধ কৰিবলৈ কয় আৰু ৰাষ্ট্ৰীয় সেউজ ন্যায়াধিকৰণৰ নিৰ্দেশৰ পটভূমিত ৰেল বিভাগে তথা বন বিভাগে ইতিপূৰ্বে লোৱা সিদ্ধান্তৰ বিষয়ে অৱগত কৰায়।

বন বিভাগৰ বিষয়া ধনেশ্বৰ দলেৰ পৰা অৱগত হৈ ৰেল বিভাগৰ দলটোৱে কাম বন্ধ কৰি প্ৰস্থান কৰিবলৈ বাধ্য হয়। বন বিভাগৰ এনে তৎপৰতাক স্থানীয় ৰাইজে বাৰুকৈয়ে প্ৰশংসা কৰিছে আৰু দীপৰ বিলৰ সংলগ্ন সেই অঞ্চলত থকা ‘এলিফেন্ট কৰিডৰ’ যাতে কোনোপধ্যে বাধাগ্ৰস্ত নহয় – সেই সম্পৰ্কে স্থানীয় ৰাইজেও অনবৰতে লক্ষ্য ৰাখিব বুলি মত প্ৰকাশ কৰিছে।

উল্লেখযোগ্য যে দীপৰ বিলৰ পাৰৰ ৰেলআলিৰ বৈদ্যুতিকৰণ-কৰ্ম বিগত ২৫ জুন, ২০২১ তাৰিখৰ পৰাই ৰাষ্ট্ৰীয় সেউজ ন্যায়াধিকৰণৰ নিৰ্দেশৰ পটভূমিত বন্ধ হৈ আছিল। এই বছৰৰ ৩০ এপ্ৰিল তাৰিখেও ৰেল বিভাগে সেই স্থানত ৰেলআলিৰ কাম আৰম্ভ কৰিবলৈ ধৰাত স্থানীয় ৰাইজে বাধা প্ৰদান কৰিছিল। তাৰপিছত যোৱাকালি পুনৰ একেই ধৰণে কাম আৰম্ভ কৰিবলৈ গৈ বন বিভাগৰ দ্বাৰা বাধাপ্ৰাপ্ত হয়।

এই সম্পৰ্কে ৰেল বিভাগৰ মুখ্য জনসম্পৰ্ক বিষয়া ( CPRO) সব্যসাচী দে-ই কৈছে, ‘ আজাৰা-কামাখ্যা পথছোৱাৰ বৈদ্যুতিকৰণৰ কাম আধৰুৱা হৈ আছে আৰু সেয়া ৰেল বিভাগে এতিয়া পুনৰ আৰম্ভ কৰিব। ইতিমধ্যে ৰেল বিভাগে Ministry of Environment, Forest and Climate Change( MoEFCC)ৰ সেউজ সংকেত যোৱা ২৪ এপ্ৰিল তাৰিখে লাভ কৰিছে আৰু সেই মৰ্মে ৰেল বিভাগৰ ভূমিত ৰাজ্য চৰকাৰৰ কোনো ধৰণৰ অনুমতি লোৱাৰ প্ৰয়োজন নাই। কিন্তু অসমৰ বন বিভাগে সেই সম্পৰ্কে হয়তো এতিয়াও অৱগত হোৱা নাই।

দীপৰ বিলৰ পাৰৰ ৰেলআলিৰ বৈদ্যুতিকৰণ-কৰ্মত বাধা বনবিভাগৰ — দীপৰ বিলৰ পাৰৰ বনাঞ্চল

তেওঁ কয়, MoEFCCৰ নিৰ্দেশত কোৱা হৈছে,’ All zonal railways who had earlier sought tree cutting permission, permission for diversion of forest land and wildlife clearance for railway projects on railway owned land within the railway’s right of way should now approach the concerned field offices of forest and wildlife department and apprise them of the content of the MoEFCC letter dated March 10, 2022, and specify that the railway would be going ahead with the extension of railway works for which now no permission is required from the state forest/wildlife department. However, mitigation measures shall be provided on mutual consent, “the MoEFCC said in a letter on April 24, 2022,” the order stated.’

তেওঁ পুনৰ কয়, ““NFR will take up the matter with PCCF as we do not have to take any clearance from the forest/wildlife department to do railway work on railway land as per the new directives.”

উল্লেখযোগ্য যে ৰাষ্ট্ৰীয় সেউজ ন্যায়াধিকৰণৰ হস্তক্ষেপ সম্পৰ্কীয় বিষয়টো ৰেল বিভাগে এৰাই চলিব বিচাৰিছে আৰু পুনৰ কাম আৰম্ভ কৰিবলৈ বিচাৰিছে। অসমৰ বনৰীয়া হাতীৰ মৃত্যু বা অইন বনৰীয়া জীৱ-জন্তুৰ মৃত্যুক লৈ ৰেল বিভাগে মূৰ ঘমোৱা পৰিলক্ষিত হোৱা নাই। এনে স্থলত অসমৰ বন বিভাগৰ ভূমিকা গুৰুত্বপূৰ্ণ হ’ব বুলি স্থানীয় ৰাইজে মত পোষণ কৰিছে।

০৪-০৬-২০২৩