উভতি চাওঁ : নাগালেণ্ডত পুনৰ ভাৰতীয় সৈন্যৰ নৃশংস হত্যালীলা !!

নাগালেণ্ডত পুনৰ ভাৰতীয় সৈন্যৰ নৃশংস হত্যালীলা

অৰবিন্দ ৰাভা

৫ ডিচেম্বৰ, ডিমাপুৰৰ পৰা প্ৰাপ্ত খবৰ অনুসৰি নাগালেণ্ড পুনৰ উত্তপ্ত হৈ পৰিছে।

নাগালেণ্ডৰ ম’ন জিলাৰ ওটিং আৰু টিৰু গাঁওৰ মধ্যৱৰ্তী অঞ্চলত ভাৰতীয় সৈন্য/অসম ৰাইফলচ-এ অমানৱীয় নৃশংস হত্যালীলাৰ দ্বাৰা ১৩ জন গাঁওৰ সাধাৰণ নীৰিহ মানুহৰ প্ৰাণ কাঢ়ি নিয়া ঘটনাৰ পিছত নাগালেণ্ড উত্তপ্ত হৈ পৰিছে। শনিবাৰে ( ৪ ডিচেম্বৰ, ২০২১) সন্ধিয়া ভাৰতীয় সৈন্যবাহিনীৰ নিৰ্বিচাৰ গুলীচালনাত কমেও ১৩ জন গাঁওবাসীৰ মৃত্যু হয় উল্লেখিত অঞ্চলত।

এখন ‘পিক-আপ ভান’ত উঠি গাঁওলৈ উভতি গৈ থকা ( প্ৰাপ্ত বাতৰি অনুসৰি এটা কয়লা খনিত কাম শেষ কৰি ঘৰলৈ উভতি থকা) সাধাৰণ গাঁওবাসীৰ ওপৰত নিদাৰুণভাৱে নিৰ্বিচাৰে গুলীচালনা কৰি অসম ৰাইফলচ-এ এনে এক জঘণ্য নাৰকীয় হত্যালীলা সংঘটিত কৰে। এই অমানৱীয় ঘটনা সংঘটিত কৰাৰ পিছত ‘পিক-আপ ভান’/ট্ৰাকখনতেই মৃতদেহবোৰ পৰি থাকে।

ইতিমধ্যে সেই গাওঁলীয়া লোকসকল নিজৰ নিজৰ ঘৰলৈ উভতি নহা বাবে আৰু বহুত ঘন্টা পলম হোৱা বাবে গাঁওৰ মানুহে তেওঁলোকৰ সন্ধানত ওলাই আহে আৰু সেই বাহনখনত তেওঁলোকৰ নিথৰ, ৰক্তাক্ত দেহবোৰ উদ্ধাৰ কৰা হয়। ডিমাপুৰৰ পৰা আজি ৰাতিপুৱা পোৱা খবৰ অনুসৰি ইতিমধ্যে নিৰাপত্তা বাহিনীৰ সৈতে কোহিমাকে ধৰি বিভিন্ন স্থানত গন্ডগোল হৈছে, নিৰাপত্তা বাহিনীৰ গাড়ী জ্বলাই দিয়া হৈছে।

নাগালেণ্ডৰ মুখ্যমন্ত্ৰী নেফিউ ৰিঅ’ই ঘটনাটোৰ তীব্ৰ নিন্দা কৰি উচ্চ পৰ্যায়ৰ তদন্ত কমিটি গঠন কৰি তদন্ত কৰা হব বুলি ঘোষণা কৰিছে যদিও উত্তেজনাৰ শাম কটা নাই। ‘চুমি হোহো’ৰ তৰফৰ পৰা নাগালেণ্ডত হ’বলগীয়া ‘হৰ্ণবিল উৎসৱ’ৰ পৰা তেওঁলোকৰ অংশগ্ৰহণ বাতিল কৰিছে আৰু অইনসকলেও বিভিন্ন ধৰণৰ সিদ্ধান্ত ল’ব বুলি অনুমান কৰা হৈছে।

ইয়াৰোপৰি নাগালেণ্ডৰ প্ৰস্তাৱিত শান্তি চুক্তিৰ আলোচনাৰ ক্ষেত্ৰত এই ঘটনাই গুৰুত্বপূৰ্ণ ভূমিকা পালন কৰিব বুলিও অনুমান কৰা হৈছে।

উল্লেখযোগ্য যে ম’ন জিলাৰ বিজেপি সভাপতি ন্যাৱাং কন্যাক-এ গুলীচালনাৰ খবৰ পোৱা মাত্ৰকেই ঘটনাস্থলীলৈ ৰাওণা হৈছিল, কাৰণ তেওঁৰ গাওঁ ওটিঙৰো কেইবাজন লোকৰ মৃত্যু হোৱা বুলি তেওঁ খবৰ পাইছিল। কিন্তু তেওঁৰ গাড়ীখনত বিজেপিৰ পতাকা লাগি থকা স্বত্বেও, তেওঁৰ গাড়ীখনৰ ওপৰতো নিৰ্বিচাৰে সৈন্যবাহিনীয়ে গুলীচালনা কৰিছিল, টায়াৰ ফুটাই দিছিল, আৰু তেওঁৰ তিনিজন সহযোগী গুলীবিদ্ধ হোৱা বুলি তেওঁ প্ৰকাশ কৰিছে।

তেওঁ নিজমুখে প্ৰকাশ কৰিছে যে , ‘ আৰ্মিলোগ খুচি খুচি হামলোগকো মাৰ ৰহা থা ( “They were joyously firing at us.”) !! অৰ্থাৎ, এই হত্যালীলা আছিল শীতল মস্তিষ্কৰে কৰা নিৰ্মম হত্যাকান্ড! ম’ন জিলাৰ বিজেপি সভাপতিৰ ভাষ্য এনেধৰণৰঃ “They should have at least seen that, but instead they punctured my car’s tyres,” he said. “How will the world run if the Hindustani Army kills civilians like this?”

আজি প্ৰশ্ন উত্থাপন হৈছে, নাগালেণ্ডত ভাৰতীয় সৈন্যৰ নৃশংস হত্যালীলাৰ বাবে প্ৰধানমন্ত্ৰী, প্ৰতিৰক্ষামন্ত্ৰী, গৃহমন্ত্ৰীক তথাকথিত ৰাষ্ট্ৰীয় সংবাদ মাধ্যমে জবাবদিহি কৰিব পৰা নাই কিয়?

প্ৰশ্ন উত্থাপন হৈছে, যোৰহাটত ক’লা লৰাৰ ৰহস্যজনক মৃত্যুৰ পিছত অসম পুলিচৰ বিশেষ সঞ্চালক প্ৰধান এজনে যি ‘নিউটনৰ তৃতীয় সূত্ৰ’ৰ বিষয়ে উল্লেখ কৰিছিল, সেই সূত্ৰ অনুসৰি এতিয়া নাগালেণ্ডত ভাৰতীয় ৰাষ্ট্ৰযন্ত্ৰৰ এনে নিৰ্বিচাৰ হত্যালীলাৰ পিছত নাগাসকলে কি কৰা উচিত হ’ব?

প্ৰশ্ন উত্থাপন হৈছে, সামাজিক মাধ্যমত সৰু সৰু কথাতে তালফাল লগোৱাসকলৰ কন্ঠস্বৰ স্তব্ধ কিয়?

[একেবাৰে ওপৰৰ ছৱিখনত নাগালেণ্ডৰ ম’নত নিহত লোককেইজনৰ কফিনবোৰ দেখুওৱা হৈছে ]

December, 2021

Mahabahu.com is an Online Magazine with collection of premium Assamese and English articles and posts with cultural base and modern thinking. You can send your articles to editor@mahabahu.com / editor@mahabahoo.com ( For Assamese article, Unicode font is necessary)