নিষেধাজ্ঞা থকা স্বত্বেও ৰাছিয়াৰ ৰুবল এতিয়া শক্তিশালী!

ৰাছিয়াৰ ৰুবল

মোহন খাউণ্ড

ডলাৰৰ দ্বাৰা নহয়, তেলৰ দাম পৰিশোধ কৰিব লাগিব ৰুবলৰ দ্বাৰা। এনে নীতি প্ৰযোজ্য হোৱাৰ পিছত ডলাৰৰ বিপৰীতে ক্ৰমান্বয়ে মূল্য বাঢ়ি বাঢ়ি এই বছৰটোৰ সবাতোকৈ শক্তিশালী মুদ্ৰা হিচাপে পৰিগণিত হৈছে ৰাছিয়াৰ ৰুবল-এ।

বিগত ২২ জুন তাৰিখ, ২০২২ চন, বুধবাৰে আন্তৰ্জাতিক বজাৰত বিশ্বৰ ‘শ্ৰেষ্ঠ – কাৰ্যকৰী মুদ্ৰা‘ হিচাপে ৰুবলক অভিহিত কৰা হ’ল। এই বছৰ ইউক্ৰেনৰ ওপৰত আক্ৰমণ চলোৱাৰ পিছৰে পৰাই ৰাছিয়াৰ ওপৰত নজিৰবিহীন অৰ্থনৈতিক নিষেধাজ্ঞা আৰোপ কৰে আমেৰিকাকে ধৰি আমেৰিকাৰ অইন পশ্চিমীয়া মিত্ৰ দেশবোৰে। তাৰপিছত ক্ৰমশঃ তিনিমাহ ধৰি ৰুবলৰ মূল্যৰ পতন হৈ থাকিলেও হঠাৎ ৰুবলৰ চমকপ্ৰদ উত্থান ঘটে।

Israel-Palestine: Gaza buckles under fuel shortage, healthcare in crisis

আমেৰিকাৰ সংবাদ মাধ্যমৰ খবৰ অনুসৰি এই বছৰৰ জানুৱাৰীৰ পৰা এতিয়ালৈ ডলাৰৰ বিপৰীতে ৰুবলৰ মূল্য ৪০% বৃদ্ধি পাইছে।

নিউয়ৰ্ক টাইমছৰ প্ৰতিবেদনত কোৱা হৈছে, ২০১৫ চনৰ জুনৰ পৰা এই বছৰৰ জুন পৰ্যন্ত ৭ বছৰত ৰুবলৰ মূল্য সৰ্বোচ্চ স্তৰত উপনীত হৈছে।

আনহাতে নিষেধাজ্ঞা থকা স্বত্বেও ৰাছিয়ান মুদ্ৰাৰ এনে চমকপ্ৰদ উত্থান সম্পৰ্কে হাৰ্ভাৰ্ড কেনেডী স্কুলৰ ইকোনমিক্স এন্ড বিজনেছ ষ্টাডিজ-অৰ অধ্যাপক জেফৰি ফ্ৰাঙ্কেল-এ কৈছে, ‘এয়া এক অস্বাভাৱিক পৰিস্থিতি ‘!

নিষেধাজ্ঞা থকা স্বত্বেও ৰাছিয়াৰ ৰুবল এতিয়া শক্তিশালী

মূলতঃ আন্তৰ্জাতিক নিষেধাজ্ঞা আৰু বৃহৎ প্ৰকাৰৰ সামৰিক সংঘাতৰ মুখামুখি হৈ থকা কোনো দেশৰ মুদ্ৰাৰ মান এনেদৰে বৃদ্ধি হোৱা ঘটনা বিশ্বৰ ইতিহাসত দেখা নাযায়। বিশেষজ্ঞসকলে কৈছে, এনে পটভূমিত দেশৰ পৰা বিনিয়োগকাৰী গুচি যায় আৰু পুঁজিৰ প্ৰৱাহ বাধাপ্ৰাপ্ত হয় – সেয়াই স্বাভাৱিক। তাৰফলত সেই দেশখনৰ মুদ্ৰাৰ দামো কমিবলৈ ধৰে।

কিন্তু ৰাছিয়াৰ ক্ষেত্ৰত একেবাৰে বিপৰীত ঘটনা ঘটা দেখা গ’ল। অৰ্থ আৰু পুঁজি নিজৰ দেশত নিয়ন্ত্ৰিত কৰি ৰাখিবলৈ ‘অস্বাভাৱিক’ পদক্ষেপ গ্ৰহণ কৰিছে ৰাছিয়াই। ইউৰোপৰ দেশবোৰৰ বাবে সৰ্বাধিক প্ৰয়োজনীয় হিচাপে পৰিগণিত হোৱা ইন্ধন তেল আৰু প্ৰাকৃতিক গেছৰ প্ৰধান ৰপ্তানীকাৰক ৰাছিয়াৰ ওপৰত জাপি দিয়া নিষেধাজ্ঞাই ‘হিতে বিপৰীত’ কৰিছে!

অস্থিতিশীল ৰাজনৈতিক আৰু অৰ্থনৈতিক পৰিস্থিতিৰ প্ৰভাৱত বৃদ্ধি পাইছে খাৰুৱা তেল আৰু প্ৰাকৃতিক গেছৰ দাম। এনে অৱস্থাত পশ্চিমীয়া দেশবোৰৰ নিষেধাজ্ঞাৰ প্ৰত্যুত্তৰ হিচাবে ৰাছিয়াই ডলাৰৰ সলনি ৰুবলৰ দ্বাৰা ইন্ধনৰ মূল্য পৰিশোধ কৰিব লাগিব বুলি ,ময়ো নিৰ্দ্ধাৰণ কৰি দিছিল। গতিকে নিষেধাজ্ঞা আৰোপ কৰি অতি বেছি লাভৱান হ’ব নোৱাৰিলে পশ্চিমীয়া দেশবোৰে, বৰং ৰাছিয়াৰ অৰ্থনৈতিক পৰিস্থিতি মজবুত হ’বলৈ আৰম্ভ কৰিছে।

ৰুবল শক্তিশালী হোৱাৰ অৰ্থ হ’ল, ৰাছিয়াৰ ওপৰত জাপি দিয়া নিষেধাজ্ঞাই ‘সুফল’ দিয়া নাই। কিন্তু আমেৰিকাৰ গৱেষক সকলে কৈছে, ডলাৰৰ বিপৰীতে ৰুবলৰ এনে‌ সুৰক্ষা-ব্যৱস্থা কিমান দিনলৈ স্থায়ী হ’ব, এতিয়াও নিশ্চিত নহয়।

ইউক্ৰেনৰ ওপৰত ৰাছিয়াই আক্ৰমণ কৰাৰ পিছত ডলাৰৰ বিপৰীতে ৰুবল সৰ্বকালৰ দুৰ্বল মুদ্ৰাত পৰিণত হৈছিল। তেনে অৱস্থাত ৰাছিয়াৰ কেন্দ্ৰীয় বেংকটোৱে অৰ্থনীতিৰ পৰা ৰুবলৰ বহিঃপ্ৰবাহ ৰুদ্ধ কৰিবলৈ সুদৰ হাৰ দুইগুণৰো অধিক, ২০% বৃদ্ধি কৰে। তাৰপিছত ক্ৰমে কিছুমান বিধিনিষেধ শিথিল কৰা হয় আৰু সুদৰ হাৰ কমাই আনি ইউক্ৰেন আক্ৰমণ কৰা সময়ৰ আগৰ সময়ছোৱাৰ পৰ্যায়লৈ, অৰ্থাৎ পূৰ্বৰ ৯.৫% কৰা হয়।

তাৰপিছত বিশ্বৰ মুদ্ৰাৰ বজাৰত ৰুবল পুনৰ স্বাভাৱিক অৱস্থানলৈ উভতিবলৈ ধৰে। মুদ্ৰা ক্ৰমান্বয়ে শক্তিশালী হৈ পৰাত ৰাছিয়াৰ মুদ্ৰাস্ফীতিও এতিয়া বহুত সহজ হৈ আহিবলৈ ধৰিছে।

তদস্বত্ত্বেও বিশেষজ্ঞসকলে কৈছে যে ৰাছিয়াৰ বাজেটৰ ওপৰত প্ৰচন্ড চাপ থাকিবই। কাৰণ ৰাছিয়াৰ আয় প্ৰধানতঃ ইন্ধন ৰপ্তানীৰ ওপৰত বহুলাংশে নিৰ্ভৰশীল আৰু এই ইন্ধন বিক্ৰীৰ বিষয়টো বেছিভাগ ক্ষেত্ৰতে ডলাৰৰ ওপৰত নিৰ্ভৰশীল।

কিন্তু তাতেই ৰাছিয়াই ‘তাচপাতৰ টেক্কা’ প্ৰয়োগ কৰি কৈছে, ‘ডলাৰত নহয়, ৰুবলৰ দ্বাৰা লোৱা হ’ব ৰপ্তানী কৰিবলগীয়া ইন্ধনৰ দাম’!

২৭-০৬-২০২২

Mahabahu.com is an Online Magazine with collection of premium Assamese and English articles and posts with cultural base and modern thinking. You can send your articles to editor@mahabahu.com / editor@mahabahoo.com ( For Assamese article, Unicode font is necessary)