পৰিৱেশ সংৰক্ষণৰ অনুপম গ্ৰন্থঃ সংকট-সম্ভাৱনাৰ আলিবাটেৰে মানুহ আৰু প্ৰকৃতি

সংকট-সম্ভাৱনাৰ আলিবাটেৰে মানুহ আৰু প্ৰকৃতি

দেৱব্ৰত গগৈ

  সংকট-সম্ভাৱনাৰ আলিবাটেৰে মানুহ আৰু প্ৰকৃতি–  মানস প্ৰতিম দত্তৰ নৱতম গ্ৰন্থ ৷

লেখকে গ্ৰন্থৰ পাতনিতে যদিও উল্লেখ কৰিছে যে গ্ৰন্থখন প্ৰধানকৈ শিক্ষাৰ্থী-অভিভাৱকৰ উপযোগীকৈ লিখিবলৈ চেষ্টা কৰিছে; কিন্তু আমি ভাবো প্ৰকৃতিক ভালপোৱা প্ৰতিজন ব্যক্তিয়ে এই গ্ৰন্থখন পঢ়া উচিত ৷

RelatedPosts

How can Artificial Intelligence prevent Climate Change?

April 22, 2025

Al Gore Calls for Unified Action at The Climate Reality Project’s ‘The Reality Tour’ in New Delhi

April 22, 2025

“We are the answer”: Indigenous Voices Unite for Climate Justice at COP30

April 22, 2025

গ্ৰন্থখনৰ উদ্দেশ্য কি তেখেতে পাতনিতে স্পষ্ট কৰিছে এনেদৰে–‘এতিয়া সময় হ’ল কাম কৰাৰ৷ পৰিৱেশ সুৰক্ষিত এখন পৃথিৱী পুনৰুদ্ধাৰ কৰা৷

আমাৰ জীৱনত সুস্থ পৰিৱেশৰ গুৰুত্ব আৰু ইয়াৰ সংৰক্ষণ চেতনা বিকাশৰ উদ্দেশ্যে- ‘সংকট-সম্ভাৱনাৰ আলিবাটেৰে মানুহ আৰু প্ৰকৃতি’ গ্ৰন্থখনৰ বিষয়সমূহ নিবাৰ্চন কৰা হৈছে৷’

সেইবাবে আমি এই গ্ৰন্থখন কেৱল প্ৰকৃতি বিষয়ক গ্ৰন্থ বুলি ক’ব নোৱাৰি; বৰ্তমান প্ৰকৃতিৰ-সংকটৰ সময়ত হাতে-কামে কাৰ্য কৰাৰ বাবে আমাৰ এক উদ্যম; আমাৰ বাবে এক জাগৰণ ৷

লেখকে গ্ৰন্থখনৰ  ৰচনাসমূহত কেৱল সংকট কিম্বা সমস্যাসমূহৰ উল্লেখ কৰিয়ে দায়িত্ব সামৰা নাই; সেই সমূহৰ সমাধানৰ যি সাম্ভ্যৱ্য উপায়; সেই সমূহো আন্তৰিকতাৰে আঙুলিয়াই দেখুৱাইছে ৷

গ্ৰন্থখনত মুঠ- ৮ টা অধ্যায় আছে আৰু সেই ৮ টা অধ্যায়ত মুঠ-২৯ টা বিষয় সামৰি লৈছে৷ কিতাপখন এবাৰ হাতত ল’লেই লেখকৰ শ্ৰম চকুত পৰিব৷ সহজ ভাষাত অতি সুক্ষ্মভাৱে প্ৰতিটো বিষয়ৰ পটভূমিৰ পৰা সমাধানলৈকে দৃষ্টি ৰাখিছে লেখকে।

কেৱল সমস্যাসমূহ উপস্থাপন কৰিয়ে ক্ষান্ত থকা নাই । প্ৰতিটো সংকট আৰু সমস্যাৰে একোটা উচিত সমাধান দিছে; আনহাতে প্ৰতিটো লেখা গুৰুত্বপূৰ্ণ তথ্যৰে সমৃদ্ধ কৰায়ে নহয় ভিতৰৰ অংগসজ্জা কিম্বা চিত্ৰসমূহেও আমাক ভিন্ন তথ্য দিয়ে ৷

গ্ৰন্থখনৰ বিষয়সমূহ এনেধৰণৰ– ‘প্ৰকৃতিৰঃ সংজ্ঞাৰ পৰা সংৰক্ষণলৈ’, ‘পৰিৱেশ নৈতিকতা’, ‘জনগোষ্ঠীয় লোকসংস্কৃতিত প্ৰকৃতি’,‘ প্ৰাকৃতিক চুৰি’, ‘বন্য কোন? ঘৰৰ মানুহ নে হাবিৰ পশু’, ‘প্লাষ্টিক আৰু প্ৰকৃতি’, ‘জল সংকট’,‘ গছপুলিৰোপনৰ প্ৰাসংগিক চিন্তা’, ‘প্ৰকৃতিৰ শিবিৰ’, ‘ইতিবাচক চিন্তাৰে কাৰ্যকৰী পৰিৱেশ শিক্ষা’ আদি৷

এয়া মাত্ৰ দুটামান উদাহৰণহে; এনেধৰণৰ লেখাৰে সমৃদ্ধ গ্ৰন্থখন৷ গ্ৰন্থখনৰ এটা বিশেষ উল্লেখযোগ্য আৰু ভাললগা দিশ হৈছে পৰিশিষ্টত- ‘ক’ সূচীত পৰিৱেশ সম্পৰ্কীয় গুৰুত্বপূৰ্ণ দিনসমূহ আৰু ‘খ’ সূচীত পৰিৱেশ সংক্ৰান্তীয় আইনসমূহ সন্নিবিষ্ট কৰিছে৷ এই কথাবোৰ সকলো স্তৰৰ লোকে জনা উচিত৷

                    মানস প্ৰতিম দত্তৰ–‘সংকট-সম্ভাৱনাৰ আলিবাটেৰে মানুহ আৰু প্ৰকৃতি’ গ্ৰন্থখনত প্ৰকৃতি, লোকসাহিত্য, সজাগতা, কিছু দুৰ্লভ তথ্যৰে সমৃদ্ধ হোৱাৰ লগতে প্ৰকৃতিক ৰক্ষা আৰু মানৱৰ সুৰক্ষাৰ বাবে হাতে-কামে কাম কৰাৰ উদ্যমৰূপে চিহ্নিত হৈছে৷

আশা কৰো গ্ৰন্থখন কেৱল সাহিত্য বা সজাগতাৰ সৃষ্টিৰ সমল হিচাপে নহয়; প্ৰকৃতিৰক্ষাৰ জাগৰণ হওক৷ আমি ভাবো শিক্ষাৰ্থী বা অভিভাৱকে নহয়; প্ৰতিজন ব্যক্তিয়ে এই গ্ৰন্থখন পঢ়া উচিত আৰু প্ৰকৃতিৰ বাবে কাৰ্যকৰীভাৱে কিবা এটা কৰাত সকলোৱে আগভাগ লোৱা উচিত ৷

মানস প্ৰতিম দত্তৰ এই গ্ৰন্থখনে প্ৰকৃতি আৰু পৰিৱেশৰ লগতে আমাৰ অসমীয়া পৰিৱেশ সাহিত্যৰো ভঁৰাল চহকী কৰিলে বুলিব পাৰি৷

Mahabahu.com is an Online Magazine with collection of premium Assamese and English articles and posts with cultural base and modern thinking.  You can send your articles to editor@mahabahu.com / editor@mahabahoo.com ( For Assamese article, Unicode font is necessary)