পৰেশ বৈশ্যৰ শিশু সাহিত্য

কিৰণ দাস

দদৰা উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ পৰেশ বৈশ্যই শিক্ষা জগতৰ উত্তৰণৰ বাবে উল্লেখযোগ্য বৰঙণি যোগাইছে।

পৰেশ বৈশ্য অসমৰ বৌদ্ধিক জগতৰ এটি চিনাকি নাম।‌ তেখেত এগৰাকী শিক্ষাবিদ, সাংবাদিক আৰু সু -লেখক। অসমীয়া সাহিত্যৰ ভঁৰাললৈও তেখেতে যথেষ্ট অৰিহণা যোগাইছে। তেখেত শতাধিক পাঠ্যপুথিৰো ৰচয়িতা।

RACHNA NATH from ASSAM Selected for Analog Astronaut Mission

যোৱা শতিকাৰ নব্বৈৰ দশকৰ পৰা সাহিত্য চৰ্চাত আত্মনিয়োগ কৰা বৈশ্যই এতিয়ালৈকে তিনি শতাধিক গ্ৰন্থ লিখি পাঠক সমাজত সমাদৃত হৈছে।

তেওঁৰ সাহিত্য কৰ্মৰ এটা বিশেষ বৈশিষ্ট্য হ’ল সাহিত্য চৰ্চাৰ সকলোবোৰ বিভাগতে তেখেতে বৰঙণি আগবঢ়াইছে। শিশু সাহিত্যৰ উপৰিও তেখেতে উপন্যাস, কবিতা, ইতিহাস, সাংবাদিকতা, কলা- সংস্কৃতি, অভিধান, আইন , ভ্ৰমণ আৰু সমালোচনা বিষয়ক গ্ৰন্থ ৰচনা কৰিছে। অনুবাদ সাহিত্যলৈ তেখেতে বৰঙণি আগবঢ়াইছে।

আনহাতে অসমীয়া আৰু ইংৰাজী উভয় ভাষাতেই তেখেতে গ্ৰন্থ প্ৰণয়ন কৰিছে। তেখেত শতাধিক পাঠ্যপুথি ৰচয়িতা হিচাপে যোৱা প্ৰায় তিনিটা দশকৰ শিক্ষাৰ্থীসকলৰ মাজত সুপৰিচিত। সম্ভৱতঃ বৈশ্যই হ’ব সৰ্বাধিক পাঠ্যপুথি লিখা সকলৰ অন্যতম। অসমৰ শিশু সাহিত্যৰ জগতখনলৈও পৰেশ বৈশ্যই অনবদ্য অৱদান আগবঢ়াইছে।

যোৱা চাৰিটা দশকত তেখেতে প্ৰায় চাৰি কুৰি শিশু উপযোগী জীৱনী গ্ৰন্থ, সাতখন সাধুকথা,ছয়খন শিশু উপযোগী জনপ্ৰিয় গণিতৰ পুথি লিখিছে। শিশুৰ বাবে অসমীয়া আৰু ইংৰাজী আৰু অসমীয়া উভয় ভাষাতেই তেখেতে জীৱনী গ্ৰন্থ ৰচনা কৰিছে। শংকৰদেৱৰ পৰা নৰেন্দ্ৰ মোদীলৈকে শ্ৰেষ্ঠ অসমীয়া আৰু ৰাষ্ট্ৰীয় তথা আন্তঃৰাষ্ট্ৰীয় পৰ্যায়ৰ বৰেণ্য ব্যক্তিৰ জীৱন লিখি তেখেতে মহৎ কাম কৰিছে।

বৈশ্যই ৰচনা কৰা জীৱনী গ্ৰন্থ আৰু সাধুকথাৰ গ্ৰন্থবোৰৰ ভাষা প্ৰাঞ্জল,সহজ- সৰল আৰু শিশু উপযোগী। তেখেতে যিসকল ব্যক্তিৰ জীৱনী লিখিছে,সেই আটাইবোৰৰ জীৱন দৰ্শন নতুন প্ৰজন্মৰ বাবে অনুকৰণীয়। তেখেতৰ সাধুকথাৰ পুথিবোৰত সন্নিৱিষ্ট সাধুসমূহো শিশুৰ মন জয় কৰিব পৰা বিধৰ। সাধুসমূহ পঢ়ি শিশুসকলে নৈতিক শিক্ষা লাভৰ সুযোগ আছে।

পৰেশ বৈশ্যৰ চাৰি কুৰি জীৱনী গ্ৰন্থসমূহৰ উল্লেখযোগ্য কেইখনমান হ’ল: শংকৰদেৱ, মাধৱদেৱ, আজান ফকীৰ, লক্ষ্মীনাথ বেজবৰুৱা,ভবেন্দ্ৰ নাথ শইকীয়া, আনন্দ ৰাম বৰুৱা, ভূপেন হাজৰিকা, নৱকান্ত বৰুৱা, লক্ষ্যধৰ চৌধুৰী, গোপীনাথ বৰদলৈ, ড.সৰ্বেপল্লী ৰাধাকৃষ্ণণ, চৰ্দাৰ বল্লভভাই পেটেল, শ্বহীদ কুশল কোঁৱৰ, মামণি ৰয়ছম গোস্বামী, নিৰ্মল প্ৰভা বৰদলৈ, শোভাব্ৰহ্ম, জ্যোতিপ্ৰসাদ আগৰৱালা, সতী জয়মতী, মণিৰাম দেৱান, ড.ভীমৰাও আম্বেদকাৰ, চন্দ্ৰপ্ৰভা শইকীয়ানী, হেমাংগ বিশ্বাস, হীৰেন ভট্টাচাৰ্য, পাৰ্বতি প্ৰসাদ বৰুৱা, অমলপ্ৰভা দাস, মহেন্দ্ৰ মোহন চৌধুৰী, খগেন মহন্ত, ড.গুণাৰাম খনিকৰ, আবুল কালাম আজাদ, আমাৰ হেম বৰুৱা, বিষ্ণুৰাম মেধি, কৃষ্ণকান্ত সন্দিকৈ, এপিজে আব্দুল কালামৰ সোণসেৰীয়া কথা, নৰেন্দ্ৰ মোদী, বাৰাক ওবামা, বৰেণ্য গণিতজ্ঞ, বৰেণ্য অসমীয়া, শ্ৰেষ্ঠ অসমীয়াৰ জীৱনী আৰু অসমৰ স্বাধীনতা যুঁজাৰুসকল আদি।

তেওঁ ইংৰাজীতো শিশু উপযোগী জীৱনী গ্ৰন্থ লিখিছে। সেই কেইখন হ’ল Makers of Assam, Freedom Fighters of Assam, Jyoti Prasad Agarwalaআৰু Bhabendra Nath Saikia । পৰেশ বৈশ্যৰ সাধুকথাৰ কিতাপ কেইখন হ’ল: ৰচকী আইতাৰ সাধু, সাউদৰ সাধু, লাপুং ককাৰ সাধু, পৰীৰ দেশৰ সাধু, আইতাৰ সাধু, ককাৰ সাধু আৰু ককাৰ যাদুকৰী সাধু।

পৰেশ বৈশ্যই শিশুসকলৰ মাজত অংক ভয় মৰিষণৰ বাবে এলানি জনপ্ৰিয় গণিতৰ পুথিও ৰচনা কৰি শিশুসকলৰ মহৎ উপকাৰ সাধিছে। তেখেতৰ তেনে কেইখনমান গ্ৰন্থ হ’ল: অংক মামৰ যাদু, অংকৰ অদ্ভুত কথা, অংকৰ যাদু অংকৰ সাধু, যাদুকৰী গণিত, গণিতৰ যাদু গণিতৰ সাধু আৰু জ্যামিতিৰ নানা কথা। তেখেতে শিশুসকলৰ নৈতিক চৰিত্ৰ গঠনত সহায়ক হ’ব পৰাকৈ’ ছাত্ৰ ছাত্ৰীৰ নীতিশিক্ষা’ নামৰ গ্ৰন্থৰ পাঁচটা খণ্ড প্ৰকাশ কৰিছে ।

শেহতীয়াকৈ ‘ বিদ্যাৰ্থীৰ নীতিশিক্ষা’ নামৰ আন এখনি মূল্যবান গ্ৰন্থ শিশুসকলৰ বাবে লিখি উলিয়াইছে। তেওঁ শিশুসকলৰ সহায়ক হোৱাকৈ ” বিদ্যাৰ্থীৰ অভিধান” নামৰ এখন অভিধান লিখি প্ৰকাশ কৰিছে।

‘ হাতী’ তেওঁৰ এখন অনুদিত শিশু উপযোগী গ্ৰন্থ। পৰেশ বৈশ্যৰ চন্দ্ৰপ্ৰভা শইকীয়ানী নামৰ জীৱনী গ্ৰন্থখন ইতিমধ্যে হিন্দী ভাষালৈ অনুবাদ হৈছে। আনহাতে তেওঁৰ ‘ বল্লভভাই পেটেল’ আৰু ‘ ‘ড. ভীমৰাও আম্বেদকাৰ’ নামৰ জীৱনী গ্ৰন্থ দুখন বড়ো ভাষালৈ অনুদিত হৈছে।

পৰেশ বৈশ্যৰ এই শিশু সাহিত্যসমূহে নিসন্দেহে অসমীয়া শিশু সাহিত্যৰ ইতিহাসত এক বিশেষ স্থান দখল কৰিব। শিশুৰ মনত সাঁচ বহুৱাব পৰাকৈ বৈশ্যই আৰু অধিক শিশু সাহিত্য ৰচনা কৰক।

Images collected from different sources

Mahabahu.com is an Online Magazine with collection of premium Assamese and English articles and posts with cultural base and modern thinking. You can send your articles to editor@mahabahu.com / editor@mahabahoo.com (For Assamese article, Unicode font is necessary)