বিকাশৰ দামামা

বিকাশৰ দামামা

সঞ্জীৱ কুমাৰ নাথ

বিকাশৰ দামামা বাজিছে চাৰিওফালে। বিকাশ-পুৰুষ সবে বিকাশ কৰিছে। দিনে ৰাতিয়ে বিকাশৰ কামত ব্যস্ত তেওঁলোক। তাৰ মাজতে আকৌ সময় উলিয়াই দুই অক্টোবৰ বা তেনে কোনো ভাল দিনত হাতত ঝাড়ু লৈ সহকাৰীসকলে সযতনে গোটাই দিয়া এখিলা দুখিলা সৰা পাতো সাৰিছে।

টেলিভিজনৰ স্ক্রীনত জিলিকিছে নতুন নতুন ঝাড়ু, আৰু কেমেৰাৰ দৃষ্টিৰ সমুখত জিলিকিছে সেই ঝাড়ু চলোৱা মহা প্রতাপী বিকাশ পুৰুষ। পৰিশ্রম কৰি ঘাম উলিয়াই সেই ঘাম মুখত ঘঁহি কেতিয়াবা নিজৰ মুখ নিজেই জিলিকাইছে। কেনে সত্যপ্রতিজ্ঞ আমাৰ বিকাশ পুৰুষ সকল!

বিকাশৰ দামামা বাজিছে চাৰিওফালে। বিকাশ হৈছে চহৰৰ মাজৰ বৰ বৰ দলঙেৰে—দলঙৰ প্রয়োজন থকা ঠাইৰ দলঙেৰে, আৰু দলঙৰ প্রয়োজন নথকা ঠাইৰ দলঙেৰে। কেতিয়াবা বহুত ধন খৰছ কৰি সাজি উলিওৱা পকী ৰাস্তা ভাঙি তাত ডাঙৰ দীঘল দলং সজা হৈছে।

বিকাশৰ নামত দৌৰিছে বিকট চাইৰেণ বজোৱা গাড়ী, বিকাশ পুৰুষৰ গাড়ীৰ পিছে পিছে দৌৰিছে পুলিচৰ গাড়ী। কেতিয়াবা বিকাশশীল চৰকাৰৰ চৰকাৰী বিষয়াৰ পুত্রসৱে চাইৰেণ গেং গঢ়িছে, আনন্দতে চাইৰেণ বজাই মানুহ মহটিয়াইছে। বিকাশ পুৰুষৰ আগমনত চহৰ কঁপিছে চাইৰেণৰ মাতত; বাঁহৰ বন্দীশালত সোমাই নাগৰিকে জনাইছে উষ্ম আদৰণি।

বিকাশৰ দামামা বাজিছে চাৰিওফালে। বাছে বাছে মানুহ আহি ভিৰ কৰিছেহি বিৰাট বিৰাট সভাত। মানুহ অনা গাড়ীৰ চালকে কেতিয়াবা পাবলগীয়া ভাৰাৰ পইছা নাই পোৱা বুলি এনেই হুলস্থুল কৰিছে। বিকাশ পুৰুষ সকলে আকাশী জাহাজত, হেলিকপ্তাৰত, গাড়ীত উঠি আহি উদ্দাত্ত ভাষণ দিছে বিকাশৰ বর্ণনাৰে।

বিকাশ পুৰুষৰ শ্রোতাসকলৰ কর্ণপথেৰে প্রবেশ কৰিছে বিকাশৰ খতিয়ান আৰু প্রতিশ্রুতিৰ জোৱাৰ, আৰু তেওঁলোকৰ হৃদয়ত উঠিছে আনন্দৰ লহৰী। ৰাইজে হাত চাপৰি বজাইছে, বাইদেউসকলৰ মুখত হাঁহি বিৰিঙিছে। কোনোৱে কৈছে মূল বিকাশ পুৰুষ জন স্বয়ং ঈশ্বৰৰ অৱতাৰ। কোনোৱে তেওঁৰ পূজা কৰিছে, তেওঁৰ মূর্ত্তি সাজিছে, মন্দিৰ সাজিছে।

বিকাশৰৰ দামামা বাজিছে দেশত। কোনে কয় বিকাশ হোৱা নাই? এছিয়াৰ ধন কুবেৰৰ দেশ আমাৰ দেশ। বিশ্বৰ আটাইতকৈ ধনী মানুহৰ কেবাজনো ভাৰতীয় নহয় জানো? আমাৰ বেঙ্কে এনে অতি ধনী ব্যৱসায়ীক ধন দিয়াত কৃপণালি নকৰে।

আমাৰ ব্যৱসায়ীসকলে দৰিদ্রজনৰ হিতৰ বাবে বৰ বিশেষ নকৰিলেও ৰাজনৈতিক দল দমূহক, বিশেষকৈ ক্ষমতা থকা দলক ধন দিবলৈ কুণ্ঠাবোধ কৰে জানো? (“I tell you, that to every one who has will more be given; but from him who has not, even what he has will be taken away” Luke 19: 26) ইমান ধনৰ লেন-দেন এনেই হয়নে—কাৰো কোনো বিকাশ নোহোৱাকৈ?

বিকাশৰ দামামা বাজিছে চাৰিওফালে। বিদেশী সংস্থাই ক’লেই হ’ল নেকি আমাৰ চহৰ বিশ্বৰ দ্বিতীয় সর্বাধিক প্রদূষিত চহৰ? কোনে কি কয় কওক। আমি উঠিছো বিকাশ-বাঘৰ পিঠিত। এতিয়া নমাৰ প্রশ্ন নুঠে।

আমাৰ চহৰৰ নদীয়ে কঢ়িয়াইছে বর্ধিত বিকাশৰ বিভিন্ন চিন : পলিথিনৰ দ’ম, মাছ কঢ়িওৱা বাকচৰ টুকুৰা (যদিও নদীত মাছ নাই), ক’লা, গেলা “পানী”, দুর্গন্ধ যুক্ত ৰাসায়নিক পদার্থ, প্লাষ্টিকৰ ভঙা টুকুৰা, পেলনীয়া জোতা, চেণ্ডেল, কাপোৰ, প্লাষ্টিক বস্তাৰ টুকুৰা, বিষ্ঠা, মূত্র আদি। আমাৰ বিলৰ পৰা ওলাইছে দুর্গন্ধ; মাছতো নায়েই, ভেকুলীও মৰিছে।

বিল পুতি আমি  কি সজা নাই : ইটা ভাটা, ৰেল লাইন, ফেক্টৰী, ঘৰ, হোটেল….। আমাৰ চহৰৰ বাটৰ কাষৰ নলাক আমি ব্যৱহাৰ কৰিছোঁ জাবৰ পেলোৱা ঠাই হিচাপে। আমাৰ ঘৰৰ ভিতৰত আবর্জনা নাথাকে।

সকলো আবর্জনা—পেলনীয়া পলিথিন, প্লাষ্টিক আৰু অন্য বস্তু আমি নলাত পেলাওঁ, নদীত পেলাওঁ, বিলত পেলাওঁ। বাটত, ফুট-ব্রিজত থু, খেকাৰ পেলাবলৈ আমি কি সংকোচ কৰিম? আমিতো অফিচ-কাছাৰী-বেঙ্ক আদিৰ চোতাল, খটখটী, কৰিডৰ আদিতে থু, খেকাৰ, পিক পেলাবলৈ ভয় নকৰোঁ। আমিযে বিকশিত দেশৰ নাগৰিক।

বিদেশী সংস্থা এটাই কিবা কিবি এসোপা ক’লেই হ’ল নে? আমি কি নিয়ন্ত্রণ কৰিব নাজানো নেকি : প্রদূষণ নিয়ন্ত্রণ, বানপানী নিয়ন্ত্রণ, ভিন্ন দলৰ নেতা সবে ইজনে সিজনৰ কথা কওঁতে কৰিবলগীয়া বাক-নিয়ন্ত্রণ?

কিন্তু এটা কথা। আমি অসমীয়া, আমি বিশ্ব ৰেকর্ড কৰি ভাল পোৱা মানুহ। আমি দুই নম্বৰত কিয় থাকিম? বিশ্বৰ সর্বাধিক প্রদূষিত চহৰৰ তালিকাত আমি দুই নম্বৰত কিয় থাকিম? আমাৰ আপোচহীন বিকাশৰ গতিয়ে নিশ্চয় আমাক অতি সোনকালে এক নম্বৰ স্থান পাবলৈ সক্ষম কৰি তুলিব।

ভাৰতৰ ১০০ খন স্মার্ট চহৰৰ তালিকাত আকৌ আমাৰ স্থান ৯৭। আমি ৯৭ত সন্তুষ্ট নহয়। ১০০ নম্বৰ লাগে আমাক। আৰু অলপ বিকাশ কৰিলেই চাগৈ আমি ১০০ নম্বৰো পামগৈ।

(Sanjeev Kumar Nath, English Department, Gauhati University, sanjeevnath21@gmail.com)

Images from different sources

Mahabahu.com is an Online Magazine with collection of premium Assamese and English articles and posts with cultural base and modern thinking.  You can send your articles to editor@mahabahu.com / editor@mahabahoo.com (For Assamese article, Unicode font is necessary)