বিশিষ্ট জাতীয়তাবাদী নেতা খনীন মহন্তৰ বিয়োগত

খনীন মহন্তৰ বিয়োগত

কুমাৰ দীপক দাস

অসমীয়া ভাষাৰ সুৰক্ষা বিচাৰি কৰা ছাত্ৰ আন্দোলনৰ পৰা আৰম্ভ কৰি অসম আন্দোলনৰ সময়ৰে পৰা খিলঞ্জীয়া লোকসকলৰ স্বাৰ্থ সুৰক্ষিত কৰাৰ বাবে সমুখৰ পৰা সংগ্ৰামক নেতৃত্ব দিয়া আমাৰ জ্যেষ্ঠ আৰু আদৰ্শবাদী নেতা , ১৯৭২ চনৰ মাধ্যম আন্দোলনৰ সদৌ অসম ছাত্ৰ সন্থাৰ সাংগঠনিক সম্পাদক তথা বৰপেটা জিলাৰ নেতৃত্বত থাকি নামনি অসমৰ চুকে-কোণে আন্দোলনটোৰ নেতৃত্ব প্ৰদান কৰি মাধ্যম আন্দোলনৰ সফল সমাপ্তি ঘটোৱাৰ ক্ষেত্ৰত এক বলিষ্ঠ ভূমিকা গ্ৰহণ কৰা আপোচহীন জাতীয়তাবাদী নেতা খনীন মহন্তদেৱে আজি ৭ ডিচেম্বৰ তাৰিখে ২বাজি ৩০ মিনিটত বৰপেটা চিকিৎসা মহাবিদ্যালয়ত শেষ নিঃশ্বাস ত্যাগ কৰে।

মৃত্যুৰ সময়ত তেওঁৰ বয়স হৈছিল ৭৫ বছৰ। তেখেতৰ সুযোগ্যা পত্নী বিশিষ্ট লেখিকা শ্ৰীমতী অমিয়া মহন্তৰ লগতে দুগৰাকী কন্যা আৰু পুত্ৰ সন্তান এৰি থৈ যোৱা খনীন মহন্তদেৱে মাধ্যম আন্দোলনৰ সময়ত সেইসময়ৰ হাউলীৰ ছাত্ৰ নেতা প্ৰয়াত নিশিথ দাসৰ সৈতে চৰকাৰী প্ৰতিহিংসাৰ বলি লৈ শিলচৰ কাৰাগাৰত কাৰাবাস খাটিবলগীয়া হৈছিল।

RelatedPosts

মানৱ সভ্যতাৰ কৰুণ উদ্যোগিক বিপৰ্যয় ভূপাল গেছ ট্ৰেজেডীৰ ৩৯ বছৰ

December 3, 2023

ৰাষ্ট্ৰনিৰ্মাতা হিচাপে চুকাফাৰ মূল্যায়ন

December 2, 2023

বৰপেটাৰ শৈক্ষিক, সাংস্কৃতিক আৰু অৰ্থনৈতিক উত্তৰণৰ বাটকটীয়া ডা⁰ সুৰেন্দ্ৰনাথ দাস

December 1, 2023

তেওঁ ১৯৬৮ চনত ভাৰতৰ ছাত্ৰ ফেডাৰেচন বৰপেটা জিলাৰ সাধাৰণ সম্পাদক ১৯৭২-৭৩ চনত মাধৱ চৌধুৰী মহাবিদ্যালয়ৰ সাধাৰণ সম্পাদক। ১৯৭২ চনত সদৌ অসম ছাত্ৰ সন্থাৰ কেন্দ্ৰীয় সাংগঠনিক সম্পাদক হিচাপে দায়িত্ব পালন কৰিছিল।

মাধ্যম আন্দোলনৰ সমাপ্তিৰ পিছতে প্ৰয়াত নিবাৰণ বৰাৰ নেতৃত্বত পূৰ্বাঞ্চলীয় লোক পৰিষদ নামেৰে এক আঞ্চলিক ৰাজনৈতিক দলৰ জন্ম দি মহন্তই অসমৰ বিভিন্ন প্ৰান্তত আঞ্চলিক ৰাজনীতি জনপ্ৰিয়তা কৰাৰ ক্ষেত্ৰত গ্ৰহণ কৰা পদক্ষেপে আজিও অসমত আঞ্চলিক শক্তিক সৱল কৰি ৰাখিছে।

তেওঁ ১৯৭৭ চনত পূৰ্বাঞ্চলীয় লোক পৰিষদৰ কেন্দ্ৰীয় সাধাৰণ সম্পাদক হিচাপে কাৰ্যনিৰ্বাহ কৰিছিল। ১৯৭৯ চনৰ পৰা আৰম্ভ হোৱা ঐতিহসিক অসম আন্দোলনৰ সময়ত পূৰ্বাঞ্চলীয় লোক পৰিষদৰ প্ৰতিনিধি হিচাপে প্ৰতিনিধিত্ব কৰি সদৌ অসম গণ সংগ্ৰাম পৰিষদৰ কেন্দ্ৰীয় সাংগঠনিক সম্পাদকৰ দায়িত্ব পালন কৰিছিল।

অসম আন্দোলনৰ সমাপ্তিৰ পিছত তেওঁ পি এল পি দলৰ সতীৰ্থ সকলৰ লগত অসম গণ পৰিষদ দলত যোগদান কৰি দলৰ প্ৰতিস্থাপক কেন্দ্ৰীয় সাংগঠনিক সম্পাদক হিচাপে নিৰ্বাচিত হৈছিল। মহন্তই বৰপেটা জিলা আৰু সত্ৰ ন্যায়াধীষৰ আদালতত অধিবক্তা হিচাপে যোগদান কৰাৰ উপৰিও অসম চৰকাৰৰ বেচা-কিনা নিগম লিমিটেডৰ অধ্যক্ষৰ উপৰিও ১৯৯৭ চনত অসম ৰাজ্যিক সমবায় কৃষি আৰু গ্ৰামোন্নয়ন বেংকৰ অধ্যক্ষ হিচাপে কাৰ্যনিৰ্বাহ কৰিছিল।

তেওঁ বৰপেটাৰ সুন্দৰীদিয়া নিম্ন বুনিয়াদী বিদ্যালয়ৰ পৰা প্ৰাথমিক শিক্ষা গ্ৰহণ কৰি কটন কলজিয়েট উচ্চতৰ মাধ্যমিক বিদ্যালয়ৰ পৰা মেট্ৰিক আৰু গুৱাহাটী প্ৰাগজ্যোতিষ মহাবিদ্যালয়ৰ পৰা প্ৰাক বিশ্ববিদ্যালয় আৰু বৰপেটাৰ মাধৱ চৌধুৰী মহাবিদ্যালয়ৰ পৰা কলাত স্নাতক ডিগ্ৰী গ্ৰহণ কৰিছিল। মহন্তই বৰপেটা চৰকাৰী আইন মহাবিদ্যালয়ৰ পৰা আইনৰ স্নাতক ডিগ্ৰী লাভ কৰিছিল। তেওঁ এগৰাকী সুবক্তা আৰু তাৰ্কিক হিচাপে অতি জনপ্ৰিয় আছিল।

অসমৰ জাতীয়তাবাদী আন্দোলনৰ এগৰাকী অগ্ৰণী নেতা, বিশিষ্ট সমাজসেৱক খনীন মহন্তদেৱৰ বিয়োগত আমি এগৰাকী আঞ্চলিকতাবাদী তথা জাতীয়তাবাদী নেতাক হেৰুৱালো। আমাৰ আদৰৰ খনীন মহন্ত দা’ৰ বিদেহ আত্মাৰ সদগতি কামনা কৰি নেদেখা জনৰ ওচৰত প্ৰাৰ্থনা জনালোঁ লগতে শোকসন্তপ্ত পৰিয়ালবৰ্গলৈ আন্তৰিক সমবেদনা জ্ঞাপন কৰিলোঁ।

07-12-2022

Mahabahu.com is an Online Magazine with collection of premium Assamese and English articles and posts with cultural base and modern thinking.  You can send your articles to editor@mahabahu.com / editor@mahabahoo.com ( For Assamese article, Unicode font is necessary)