বিশ্বনাথ ঘাটৰ সৌন্দৰ্য্য

বিশ্বনাথ ঘাট

ঐতিহাসিক আৰু প্ৰাকৃতিক সম্পদৰ সমাহাৰেৰে চহকী উত্তৰ অসমৰ এখন অতি মনোৰম ঠাই হৈছে ইতিহাসপ্ৰসিদ্ধ ব্ৰহ্মপুত্ৰ আৰু বুঢ়ীগাং নদীৰ সংগমস্থলত অৱস্থিত বিশ্বনাথ ঘাট।

পুৰণি শোণিতপুৰ জিলাৰ এটি প্ৰধান মহকুমা আৰু নৱগঠিত বিশ্বনাথ জিলাৰ মাজমজিয়াৰ পৰা প্ৰায় দহ কিলোমিটাৰ দক্ষিণত অৱস্থিত বিশ্বনাথ ঘাট হৈছে পুৰণি অসমৰ এখন পবিত্ৰ তীৰ্থস্থান।

সাধাৰণতে বিশ্বনাথ নগৰখনক কেন্দ্ৰ কৰি ব্ৰহ্মপুত্ৰৰ (উত্তৰ) পাৰতে এই ঐতিহাসিক ঠাইখন অৱস্থিত হোৱা বাবে বহু বছৰজুৰি ইয়াক বিশ্বনাথ ঘাট হিচাপে জানি অহা হৈছে।

অসমৰ ইতিহাসৰ পাতত সমগ্ৰ বিশ্বনাথ ঘাট অঞ্চলটোৰ এক বিশেষ গুৰুত্ব আছে। ইতিহাসে ঢুকি নোপোৱা সময়ৰ পৰাই এই ঠাইখনৰ ঐতিহ্য আৰু সৌন্দৰ্যই সকলোকে মুগ্ধ কৰি আহিছে।

ব্ৰিটিছ ইষ্ট ইণ্ডিয়া কোম্পানীৰ শাসনকালত এই ঘাটৰ গুৰুত্ব দুগুণে বৃদ্ধিপ্ৰাপ্ত হৈছিল। কিয়নো সমগ্ৰ বিশ্বনাথ অঞ্চলটোৰ পৰা এই বিশ্বনাথ ঘাটেদিয়েই অসমৰ বাহিৰৰ ঠাইসমূহলৈ চাহকে আদি কৰি বিভিন্ন বয়-বস্তুসমূহ ব্ৰহ্মপুত্ৰৰ বুকুৱেদি পৰিবহণ কৰা হৈছিল।

অপূৰ্ব ঐতিহাসিক, প্ৰাকৃতিক পৰিৱেশৰ আবেষ্টনীত বহু যুগ ধৰি থিয় হৈ থকা বহুবোৰ ঐতিহাসিক সম্পদ এই বিশ্বনাথ ঘাটতেই আজিকোপতি অক্ষত অৱস্থাত আছে। এককথাত বিশ্বনাথ ঘাট হৈছে অসমৰ সোণোৱালী ইতিহাসৰ পাতত খোদিত হৈ ৰোৱা বহু ঐতিহাসিক ঘটনাপ্ৰবাহৰ চিৰন্তন সাক্ষী।

এই বিশ্বনাথ ঘাটৰ ঐতিহাসিক গুৰুত্ব খুঁচৰি চালে আমি পাওঁ যে, বিশ্বনাথকে কেন্দ্ৰ কৰি এই বৃহৎ বিশ্বনাথ ঘাট অঞ্চলটোৰ সৈতে সংপৃক্ত হৈ ইয়াৰ আশে-পাশে প্ৰায় ত্ৰিশখনমান দ’ল-দেৱালয় আছে।

যিসমূহ হৈছে ক্ৰমে- উমা, চক্ৰেশ্বৰ, হৰিহৰ-কৰ্দমেশ্বৰ, বাসুদেৱ, নাংগলেশ্বৰ, ভৈৰৱেশ্বৰ, বাঘেশ্বৰী, সিদ্ধেশ্বৰ, বিশ্বনাথ, চণ্ডী, কমলেশ্বৰ, শিৱনাথ, মুক্তিনাথ, বানেশ্বৰ বা বৰদ’ল, জাগ্ৰা, প্ৰতাপগড়ৰ বুঢ়ামাধৱ, কালভৈৰৱ, বীৰভদ্ৰ বা বৰলা শিল, জোঙাশিল,পূৰ্বশংকৰ, সুৰ্য্যমাধৱ, অণ্ণপূৰ্ণা, গণেশ, বৃষধ্বজ, কাশীনাথ, উদ্ৰেশ্বৰ, গৌৰীবল্লভ, বিষ্ণু, দুৰ্গাশক্তি, মংগল চণ্ডিকা ইত্যাদি।

উল্লেখনীয় কথাটো হ’ল যে, এইসমূহ ঐতিহাসিক ঠাইৰ বহুকেইখনেই সম্প্ৰতি এই বিশ্বনাথ ঘাটৰ সৌন্দৰ্যক উজলাই ৰাখিছে। মূলতঃ এইসমূহ ধৰ্মকেন্দ্ৰিক হ’লেও ঐতিহাসিক, সাংস্কৃতিক, সামাজিক, অৰ্থনৈতিক আদি প্ৰতিটো দিশতে যিসমূহৰ বহু গুৰুত্ব আছে। যদি এই ঠাইসমূহক সুন্দৰৰূপত আমি পৰিৱেশন কৰোঁ তেন্তে ইয়াৰ গুৰুত্ব যথেষ্ট বৃদ্ধি হ’ব; আৰু লগতে অসমত পৰ্যটন উদ্যোগটো সম্প্ৰসাৰণৰো এখন নতুন দুৱাৰ খোল খাব।

অন্যহাতেদি, ধৰ্মীয় আৰু ঐতিহাসিক গুৰুত্বৰ বিপৰীতে প্ৰাকৃতিক দিশটো অত্যন্ত চহকী বিশ্বনাথ ঘাট। বৰ্তমান কাজিৰঙা ৰাষ্ট্ৰীয় উদ্যানৰ সৈতে সংযুক্ত হৈ থকা বিশ্বনাথ ঘাটত দেখিবলৈ পোৱা মহাবাহু ব্ৰহ্মপুত্ৰই সৃষ্টি কৰা নান্দনিক সৌন্দৰ্য, বিশ্বনাথ ঘাটৰ পৰা ব্ৰহ্মপুত্ৰৰ সিটো পাৰে জিলিকি ৰোৱা বুঢ়াপাহাৰৰ অন্তহীন সেউজীয়াই আৰু বিশ্বনাথ ঘাটৰ কাষতেই ব্ৰহ্মপুত্ৰৰ এটি সৰু সুতি পাৰ হৈ উপস্থিত হ’ব পৰা উমাটুমুনিৰ সেউজীয়া আৰু শীতলতাই প্ৰকৃতি প্ৰেমীসকলক সদায় বিশ্বনাথ ঘাটলৈ হাতবাউল দি মাতে।

তদুপৰি বিশ্বনাথ ঘাটৰ আশে-পাশে কৰা নৌকা ভ্ৰমণ বৰ ৰোমাঞ্চকৰ; বিশেষক ইয়াত হাত নাওঁৰ যথেষ্ট সুবিধা আছে। অৱশ্যে বাৰিষা ব্ৰহ্মপুত্ৰৰ পানী ফেনফুটুকাৰে বাঢ়ি অহাৰ ফলত এই নৈসৰ্গিকতাত কিছু ম্লান পৰিলেও এয়া অতি ক্ষন্তেকীয়া।

বিশ্বনাথ ঘাটৰ জনপ্ৰিয়তা নিতৌ ইয়ালৈ অহা-যোৱা কৰা লোকসকলে আমাক সদায় কৈ আহিছে। কিন্তু এইখিনিক আৰু অধিক ফলপ্ৰসূ ৰূপত পাবলৈ হ’লে আমাক প্ৰয়োজন আৰু অলপ নতুন উচ্চ চিন্তা-চৰ্চাৰ; যিটো কথাক শেহতীয়া আমাৰ বিশ্বনাথ ঘাট ভ্ৰমণৰ অভিজ্ঞতাই অনুভৱ কৰাই গ’ল। কিয়নো ৰাজ্যখনৰ ৰাজধানী চহৰ গুৱাহাটীৰ পৰা মাত্ৰ ২৬৫ কিলোমিটাৰ দূৰত্বত থকা এই বিশ্বনাথ ঘাট ঠাইখনক পৰ্যটনৰ এখন সম্ভাৱনাময় ক্ষেত্ৰ হিচাপে গঢ়ি তুলিব পৰাৰ বহুখিনি থল এতিয়াও বাকী ৰৈ আছে।

আমাৰ বিচাৰত, সম্প্ৰতি ইয়াৰ শূণ্য পৰ্যটনে ঠাইটুকুৰাক জনমানসৰ পৰা বহুদূৰ নিলাগাই ৰাখিছে। বিশ্বনাথ ঘাটলৈ যোৱা পথটোৰ মেৰামতি এতিয়াও সম্পূৰ্ণৰূপে সকলো দিশৰ পৰা হৈ উঠা নাই। দ্বিতীয়তে, নিজৰ বাহন নহ’লে বিশ্বনাথ নগৰৰ পৰা ইয়ালৈ যাব পৰাটোও বহুজনৰ বাবে অসমৰ্থৰ কথা।

আকৌ বিগত কেইটামান বছৰ ধৰি বিশ্বনাথ ঘাটৰ চৌপাশে অবৈধ লোকসকলৰ আবাসেৰে ভৰি পৰাৰ লগতে উপযুক্ত চোৱাচিতাৰ অভাৱত প্লাষ্টিকজাতীয় বস্তুবোৰ য’তে ত’তে পেলোৱাৰ ফলত ব্ৰহ্মপুত্ৰকে কেন্দ্ৰ কৰি এই বিশ্বনাথ ঘাট ঠাইখনত পৰিৱেশ প্ৰদূষণৰ হাৰ দিনক দিনে বৃদ্ধি পাইছে; যিসমূহ দিশৰ প্ৰতি চকু দিয়াৰ আজি বিশেষ সময় আহি পৰিছে।

অসম চৰকাৰৰ পৰ্যটন বিভাগে যদি সমগ্ৰ অঞ্চলটোৰ আন্তঃগাঁথনিসমূহ উন্নত কৰাৰ ব্যৱস্থাসমূহ গ্ৰহণ কৰি লগতে ঠাইখনৰ উপযুক্ত প্ৰচাৰৰ ব্যৱস্থা গ্ৰহণ কৰে তেন্তে নিশ্চিতভাৱে ইয়াৰ স্থানীয় লোকসকলৰ পৰা পৰ্যটন উদ্যোগটোও যথেষ্ট লাভৱান হ’ব।

লগতে ঐতিহ্য, সংস্কৃতি আৰু ধৰ্মীয় দিশটো বিশ্বনাথ ঘাট অঞ্চলটোৰ গুৰুত্ব আগতকৈ বৃদ্ধি পাব। ইয়াৰ বাবে প্ৰয়োজন সংশ্লিষ্ট পক্ষ আৰু বিশ্বনাথ ঘাটৰ স্থানীয় ৰাইজৰ এক সন্মিলিত প্ৰচেষ্টাৰ।

[লেখক ৰবীন্দ্ৰনাথ ঠাকুৰ বিশ্ববিদ্যালয়ৰ ইতিহাস বিভাগৰ সহকাৰী অধ্যাপক, ফোন: ৯৯৫৪০ ০০২০০]

Mahabahu.com is an Online Magazine with collection of premium Assamese and English articles and posts with cultural base and modern thinking. You can send your articles to editor@mahabahu.com / editor@mahabahoo.com ( For Assamese article, Unicode font is necessary)