বুলন দা, পৰৱৰ্তী সময়লৈকে আমি অপেক্ষাৰত…

বিক্ৰমাদিত্য দত্ত কাকতি 

কাহিনীবোৰ এদিন শেষ হ’ব লাগিব। আমি ভাল পাওঁ বা বেয়া, কাহিনীবোৰ এদিন শেষ হ’ব লাগিব। 

আৰু এদিন কাহিনীবোৰৰ অন্ত পৰে। 

সকলোবোৰ কাহিনীৰে একোটা দৈৰ্ঘ থাকে।

এই যে আপুনি ৰেল ষ্টেচনত ট্ৰেইন এখন ধৰি ডবা এটাত বহিল। তাত লগ পালে সহযাত্ৰী। আপুনি নিজৰ গন্তব্যস্থল নোপোৱালৈকে প্ৰতিটো ষ্টেচনত যাত্ৰী উঠিল আৰু নামিল।

আৰু যিমান সময় একোগৰাকী যাত্ৰীৰ লগত আপুনি অতিবাহিত কৰিলে, সিমান সময় থাকিল সেইটো কাহিনী। ৱেলেছ ষ্টেইগনাৰে (Wallace Staegner) আমাৰ প্ৰতিজনকে প্ৰতিগৰাকীৰ পৰিণতি বুলি কৈ গৈছে। 

অৰ্থাৎ আপোনাক ম‌ই লগ পালো বা নেপালো, আপোনাৰ লগত মোৰ এটা কাহিনী আছিল। ষ্টৈইগনাৰৰ মতে আপোনাৰ জীৱনৰ ম‌ই আৰু আপুনি মোৰ জীৱনৰ পৰিণতি। 

বুলন কুমাৰ শ‌ইকীয়াৰ তেতিয়া এটা পৰিচয় গঢ় লৈ উঠিছিল। ২০০৮ চনৰ কথা। ম‌ই তেওঁৰ লেখাবোৰৰ লগত পৰিচয় লাভ কৰিছিলো। কাহিনীটো আমাৰ আৰম্ভ হৈ গৈছিল ২০০৮ চনত। সময় গৈ থাকিল। ২০০৮ চনৰ পৰা ২০১৩ চন পালেগৈ । ম‌ই বুলন দাক জানো। তেওঁ মোক নেজানে। 

২০১৩ চনৰ শেষৰ ফালে ম‌ই তেওঁৰ লগত চিনাকি হ‌ওঁ। ইতিমধ্যে ময়ো সংবাদ জগতলৈ আহিছোঁ। তাৰ পাছত বুলন দাক বিভিন্ন দিনত লগ পোৱা হ’লো। প্ৰচুৰ গ্ৰন্থ অধ্যয়নৰ লগতে বুলন দাৰ আছিল এটা প্ৰতিষ্ঠানবিধোৰী স্থিতি। শাসক পক্ষ যি দলৰে নহ‌ওক কিয়, বুলন দাই তীক্ষ্ণ দৃষ্টিৰে যদিহে অনিয়ম দেখে তাৰ সমালোচনা কৰে। 

সশস্ত্ৰ সংগ্ৰামৰ ওপৰত, গণতান্ত্ৰিক আন্দোলনৰ ওপৰত, অসমৰ সম্পদ ৰক্ষাৰ ক্ষেত্ৰত বুলন দাৰ একোটা দৃষ্টিভংগী আছিল। 

পাচলৈ ব্যৱসায়ত বেছি মনোনিবেশ কৰিলোঁ। সংবাদ দাতা হিচাপে মোৰ যি অলপ সক্ৰিয়তা আছিল সেয়া কমি আহিল। মাথো মাজে মাজে টুকুৰা টুকুৰ বাতৰিটোৰ কৰোঁ।

বুলন দাই কিছু দিন এটা পৰ্টেলত নেতৃত্ব বহন কৰি সংবাদ সেৱাৰ বাবে আগবাঢ়ি আহি মালিক পক্ষৰ দুৰ্বল স্থিতিৰ বাবে আঁতৰি আহিব লগা হ’ল। তাৰ পাছতে তেওঁ আৰম্ভ কৰিছিল গ্ৰাউণ্ড নিউজৰ।

লগত দেৱজিৎ দা, কল্পদীপ, বিদ্যুৎ, দীপ জ্যোতি,মিনহাজহত আছিলেই প্ৰতিবাৰৰ দৰে।

মোৰ ওপৰতো এই পৰ্টেলতে কেইটামান কামৰ দায়িত্ব দিছিল বুলন দাই। তাৰ পাছত এদিন হৎঠাতে বুলন দা বেমাৰত আক্ৰান্ত হ’ল। জটিল যকৃতৰ ৰোগ ধৰা পৰিছিল তেওঁৰ।

গ্ৰাউণ্ড নিউজৰ যাত্ৰা সিমানতে ৰুদ্ধ হ’ল। 

বুলন দাৰ বাবে কি কি কৰিব পাৰিলো, নক‌ওঁ আজি। ৰুগীয়া দেহাৰে কৰা বুলন দাৰ আৰাকান ইণ্টেলৰ সহযোগী প্ৰকাশকৰ দায়িত্ব ল’লো। জন্ম হ’ল আৰাকান ইণ্টেলৰ। জন্ম পালে ঐকতান প্ৰকাশক গোষ্ঠীয়ে।

আৰাকান ইণ্টেলৰ দ্বিতীয় খণ্ডটোৰ পৰিকল্পনা চলিছিল। অসমৰ অগ্নিময় এচোৱা সময়ৰ দলিল চি ইন চিৰ প্ৰকাশৰ বাবে খোজ আগবঢ়োৱাৰ সিদ্ধান্ত হৈছিল। ছেইকজীন চাইৱামৰ (কাম কৰি থকা আন এখন উপন্যাস) ক্ষেত্ৰত কিছু চিন্তা নতুনকৈ কৰিবলৈ অনুৰোধ কৰিছিলো।

এইখন উপন্যাসৰ কাম বহু খিনি হৈ থকাৰ পাছতো তেওঁ আগবঢ়া নাছিল।

বুলন দাৰ শ্লেষসমূহৰ বহু গুণ গ্ৰাহী আছিল অসম জুৰি। তেওঁৰ কলমৰ অন্তত এখন চেটায়াৰ প্ৰকাশ হ’ব । এই পৰিকল্পনা আছিল। 

যকৃৎ সংৰোপনৰ পাছত তেওঁৰ ব্ৰাণ্ড ‘স্বাদ অসম‘ক সম্প্ৰসাৰিত কৰাৰ এটা প্ৰস্তাৱ আছিল। এখন সুপৰিকল্পিত আউটলেট কৰাৰ কথাবোৰ বহু বাৰ পাতিছিলো।

আমাৰ‌ কাহিনীটো এনেকৈ আগবাঢ়ি গৈ আছিল।

২৩ নৱেম্বৰৰ পৰা তিনিটা দিন গুৱাহাটীত আছিলোঁ।

নৰ্থ ইষ্ট ইণ্ডিজেনাচ পিপলচ ফ’ৰামৰ সভাপতি অনুপ চেতিয়া চাৰৰ লগত , খিলঞ্জীয়া অসমৰ সভাপতি মৃণাল হাজৰিকা দাৰ লগত গুৱাহাটীতো কথা পাতিছিলো।

বুলন দাৰ চিকিৎসা ব্যয় সম্পৰ্কে উদ্বিগ্ন আছিল। কৰণী‌য় খিনি কৰাৰ কথা কৈছিল। 

কাৰ কাৰ কথা লিখিম? 

বিশিষ্ট সাংবাদিক, বুদ্ধিজীৱী মুনীন বায়ন দা, বিশিষ্ট কবি নীলকান্ত শ‌ইকীয়া, গুৱাহাটীস্হ সাংবাদিক ধীৰুমণি গগৈ, বিশিষ্ট চিকিৎসক ডাঃ মনপ্ৰতিভ বৰুৱা, দুলীয়াজানৰ ৰঞ্জন মহন্ত ,নাম প্ৰকাশত অনিচ্ছুক আমাৰ কেইবাগৰাকীও বন্ধু সুহৃদ।

সকলোৰে মুখত এটাই কথা বুলন শ‌ইকীয়াৰ যকৃৎ সংৰোপনৰ ক্ষেত্ৰত সোনকালে আগবাঢ়িব লাগে। 

 গুৱাহাটীত থাকোতেই বুলন দাক এই সম্পৰ্কে কৈছিলো। কৈছিলো গ্ৰাউণ্ড নিউজ আকৌ আৰম্ভ কৰাৰ মোৰ ইচ্ছাটোৰ কথা। 

কালি গুৱাহাটীৰ পৰা বুলন দাৰ শুভাকাংক্ষী ধীৰুমণিদাই মোৰ লগত পৰৱৰ্তী দিনত বুলন দাৰ কাৰণে উপন্যাসখনৰ প্ৰকাশৰ ক্ষেত্ৰত, তেওঁৰ যকৃতৰ চিকিৎসাৰ ক্ষেত্ৰত কেনেকৈ আগবাঢ়িছো বুজ লৈছিল। 

কথা আছিল, চাৰি পাঁচ গৰাকী সুহৃদক লৈ বুলন দাৰ বাবে মানুহৰ ওচৰত আবেদন জনাম। ৩৫ – ৪০ লক্ষ টকা‌ আপোচহীন মানুহজনৰ বাবে অসমৰ ৰাইজে দিব। এই প্ৰত্যয় আমাৰ আছিল। গুৱাহাটীৰ পৰা গৈয়েই আমি এই দিশত অগ্ৰসৰ হ’ম। এনে পৰিকল্পনা আছিল। 

গুৱাহাটী যাওতে মনোৰম গগৈদাৰ থলগিৰি ত সোমাই ভাত এসাজ খাইছিলো। তাত তেওঁৰ ষ্টলত স্বাদ অসমৰ বিভিন্ন সামগ্ৰীবোৰ দেখিছিলো। সামগ্ৰীবোৰ ধুনীয়াকৈ সজাই থোৱা আছিল। তেওঁক উৎসাহ জনাম বুলি ফটো কেইখনমান তুলিছিলো।

এটা অদম্য ব্যক্তিত্বৰ নাম আছিল বুলন কুমাৰ শ‌ইকীয়া। Anarchist, Path Breaker, Indomitable figure- বুলন কুমাৰ শ‌ইকীয়া নিজৰ ভাষাত। 

কাহিনীটো ইমানেই আছিল জানো? 

কাহিনীটো আগবঢ়াই নিব লাগিব। 

এই কাহিনীটো আগবঢ়াই নিয়াৰ স্বাৰ্থত আপোনালোকৰ লগত কথা পাতিম। লগ বিচাৰিম।

বুলন দাক আকৌ ক’ৰবাত লগ পাম। কাহিনীটোৰ কি হ’ল গৈ কম। 

বুলন দা, পৰৱৰ্তী সময়লৈকে আমি অপেক্ষাৰত…

Until Next Time, take care, Bulon Da…..

28-11-2024

Mahabahu.com is an Online Magazine with collection of premium Assamese and English articles and posts with cultural base and modern thinking.  You can send your articles to editor@mahabahu.com / editor@mahabahoo.com(For Assamese article, Unicode font is necessary) Images from different sources.