বেলুড় মঠ

ৰেজাউল কৰিম

চেপ্তেম্বৰ মাহৰ ২৬ তাৰিখে কলকাতাৰ বেলুড় মঠলৈ ফুৰিবলৈ গৈছিলোঁ।

স্বামী বিবেকানন্দই গঙ্গাৰ পাৰত এই মঠটো নিৰ্মান কৰিছিল। বিশ্বজনীন ধৰ্ম প্ৰচাৰ কৰিবলৈ আন্তৰাষ্ট্ৰীয় মূখ্যকাৰ্যালয় হিচাপে এই মঠ নিৰ্মান কৰিছিল।

বেলুড় মঠত দেৱ দেৱীৰ মূৰ্তি নাই। আছে ৰামকৃষ্ণ পৰমহংস, সাৰদা দেৱী আৰু বিবেকানন্দৰ মূৰ্তি।

বেলুড় মঠৰ দুটা ভাগ। এভাগ ৰামকৃষ্ণ পৰমহংস মঠ, অৰ্থাত ধৰ্মীয় কাম কাজৰ বাবে। আনটো ভাগ শিক্ষানুষ্ঠান। এইটো ৰামকৃষ্ণ পৰমহংস মিছন। শিক্ষানুষ্ঠান হিচাপে বেলুড় মঠত এখন বিশ্ববিদ্যালয় আছে। এখন কলেজো আছে য’ত কেইটামান বিষয়ত স্নাতকোত্তৰ কৰিব পৰা সুবিধা আছে।

মকবুল ইছলামে বিশ্ববিদ্যালয় আৰু কলেজত আঠ বছৰ শিক্ষকতা কৰিছিল। এই কলেজ আৰু বিশ্ববিদ্যালয়ত সকলো ধৰ্মৰ লোকে শিক্ষালাভ কৰিব পাৰে। মুছলমান ছাত্ৰও বেলুড় মঠত পঢ়া শুনা কৰে। বেলুড় মঠত পঢ়া মুছলমান ছাত্ৰ এজনক মই ব্যক্তিগতভাৱে চিনি পাওঁ। মই জনা মতে ৰামকৃষ্ণ পৰমহংসৰ মুছলমান ভক্তও আছে।

এইবাৰ বেলুড় মঠত প্ৰসাদ ভৱনত খিচিৰি প্ৰসাদ খাই আহিছোঁ। প্ৰসাদ ভৱনটো পাচ মহলীয়া। নতুনকৈ বনাই আছে। একোটা মহলত একেলগে ত্ৰিছ হাজাৰ লোকে খাব পৰা ব্যৱস্থা হ’ব।

দুজন মহাৰাজৰ সাক্ষাতো পাইছোঁ মকবুল ইছলামৰ জহতে । তেওঁলোক হ’ল মহাৰাজ বলভদ্ৰানন্দজী (Asstt secy. Belur math)আৰু মহাৰাজ শাস্ত্ৰজ্ঞানন্দজী (Secretary Sharada peeth)।

তেতিয়াই গম পাইছোঁ মকবুল ইছলাম চাহাবক তেওঁলোকে কিমান ভাল পায়। এটা উদাহৰণ দিছোঁ। ৰামকৃষ্ণ মিছনৰ পৰা এবাৰ বিশ্ব ধৰ্ম সংসদ পতা হৈছিল। সেইবাৰ ইছলাম ধৰ্মৰ ওপৰত বক্তৃতা দিবলৈ ৰামকৃষ্ণ মিছনৰ পৰা মকবুল ইছলামক নিমন্ত্ৰণ কৰা হৈছিল। এইটো এটা ডাঙৰ সন্মান।

এজন ব্যক্তিয়ে আমাক বেলুড় মঠৰ ভিতৰখন দেখুৱাইছিল। মই দেখিলোঁ ভিতৰৰ এপিনে এটা মছজিদ আছে। মই সুধিলোঁ যে মছজিদটো ব্যৱহাৰ হৈ আছে নে ? উত্তৰত ক’লে যে ব্যৱহাৰ হৈ থকা মছজিদ এইটো। ইয়াত থকা ইমাম জনৰ ঘৰটো মঠ কৰ্তৃপক্ষই সাজি দিছে। মছজিদটোৰ প্ৰয়োজনীয় বিজুলী আৰু পানীৰ ব্যৱস্থা মঠ কৰ্তৃপক্ষই কৰি দিছে। লগতে ধৰ্মীয় কাজকাজ সমূহ পালন কৰিবলৈ সকলো সুবিধা দিছে।

মই বিষয়টোৰ প্ৰতি বেচ আকৰ্ষিত হ’লোঁ এইবাবেই যে বিবেকানন্দই বিশ্বজনীন ধৰ্মৰ লগত ৰজিতা খুৱাই ইছলাম ধৰ্ম সম্পৰ্কে যি কথা কৈ গৈছিল সেই কথা কাৰ্যক্ষেত্ৰত পালনো হৈছে।

অকল মছজিদেই নহয়। আন এপিনে এটা প্ৰাচীন মাজাৰো আছে। সেইটোও বেলুড় মঠৰ চৌহদৰ ভিতৰত। তাতো মঠ কৰ্তৃপক্ষই সকলো সুবিধা কৰি দিছে।

বেলুড় মঠ গঙ্গাৰ পাৰত। গঙ্গাখন তেনেই লেতেৰা। ভক্ত সকলে এই পানীতেই গা ধুইছে। লেতেৰাৰ প্ৰতি তেওঁলোকৰ মন কাণ নাই। কাৰণ গঙ্গা পৱিত্ৰ। আমাক সঙ্গ দিয়া ব্যক্তিজনে মোক গঙ্গাৰ বিশালতাৰ কথা ক’লে। কিন্তু তেওঁৰ কথা মুখৰ পৰা কাঢ়ি আনি মকবুল ইছলাম চাহাবে ক’লে এখেতক গঙ্গাৰ বিশালতাৰ কথা নক’বা। কাৰণ এখেত ব্ৰহ্মপুত্ৰৰ পাৰৰ মানুহ। ব্ৰহ্মপুত্ৰ ইয়াতকৈ অনেক বিশাল আৰু পৰিস্কাৰো।

এৰা, ব্ৰহ্মপুত্ৰৰ বিশালতাৰ কথা শুনি মোৰ বুকুখন ফুলি উঠিছিল। কিন্তু ৰামকৃষ্ণ মিছনৰ শিক্ষাৰ অৱদানৰ কথা দেখি শুনি মনটো কোচ খাইও গৈছিল। কাৰণ অসমত শঙ্কৰদেৱৰ জন্ম হৈছিল ৰামকৃষ্ণ পৰমহংসৰ জন্মৰ চাৰিশ বছৰৰো আগতে। অসমতো শঙ্কৰদেৱৰ নামত এটা বিশ্বজনীন শিক্ষা মিছন হ’ব পাৰিলেহেঁতেন। আমি দেখোন ক’ৰবাতে পৰি ৰ’লোঁ।

ৰামকৃষ্ণ পৰমহংসৰ মুছলমান ভক্ত আজিও আছে। এনে কি আদৰ্শৰ দ্বাৰা মুছলমান লোক আজিও ৰামকৃষ্ণ পৰমহংসৰ আদৰ্শৰ প্ৰতি আকৰ্ষিত হয় যিটো শঙ্কৰদেৱৰ চান্দ সাইৰ নামতে শেষ হৈ থাকিল। কথাখিনি মনতে ভাবি মনতে গিলি থলোঁ।

[Images from Belur math website, Rezaul Karim and other sources]

Mahabahu.com is an Online Magazine with collection of premium Assamese and English articles and posts with cultural base and modern thinking. You can send your articles to editor@mahabahu.com / editor@mahabahoo.com ( For Assamese article, Unicode font is necessary)