ভাৰতৰ পৰা সন্ধানহীন ৪ কোটি ৫৮ লক্ষ নাৰী !!

-মহাবাহুৰ মেজৰ পৰাঃ |

পাঁচ দশকত ভাৰতৰ পৰা সন্ধানহীন ৪ কোটি ৫৮ লক্ষ নাৰী !!

ইলন মাস্কৰ টুইটাৰৰ মালিকীস্বত্ব আৰম্ভ হ’ল অব্যাহতি, অনিশ্চয়তাৰে!

ৰাষ্ট্ৰসংঘ ( জেনেভা): কৰ’নাক্ৰান্ত সময়ৰ সৈতে দিনে-নিশাই সমগ্ৰ বিশ্ব ব্যস্ত হৈ থাকোতেই এক ভয়ংকৰ প্ৰতিবেদন পোহৰলৈ আনিলে ৰাষ্ট্ৰসংঘই। বিষয়টো হ’ল বিশ্বৰ বিভিন্ন দেশৰ পৰা নাৰী( কন্যাসন্তান ইত্যাদি) সন্ধানহীন! এই ক্ষেত্ৰত সকলোতকৈ প্ৰথমতে আছে চীনদেশ। সমগ্ৰ বিশ্বৰ ভিতৰতে চীনৰ পৰাই সৰ্বাধিক নাৰী সন্ধানহীন হৈছে। প্ৰতিবেদনত প্ৰকাশ পাইছে যে যোৱা ৫০ বছৰত সমগ্ৰ বিশ্বত ১৪ কোটি ২৬ লাখ সন্ধানহীন হৈছে। আৰু ইয়াৰে ৪ কোটি ৫৮ লক্ষ কন্যাসন্তান/ কিশোৰী আদি সন্ধানহীন হৈছে ভাৰতৰ পৰা!! যোৱা পাঁচ দশকত বিশ্বত নাৰী সন্ধানহীন হোৱা ঘটনা দুগুণ হৈ পৰিছে। ১৯৭০ চনত যি সংখ্যা আছিল ৬ কোটি ১০ লক্ষ, ২০২০ চনত সেই সংখ্যা হৈ পৰিছে ১৪ কোটি ২৬ লক্ষ! ইয়াৰে ৭ কোটি ৩০ লক্ষ সন্ধানহীন হৈছে চীনত। ‘ The State of World Population 2020’ শীৰ্ষক প্ৰতিবেদনত কোৱা হৈছে যে ২০১৩ চনৰ পৰা ২০১৭ চনৰ ভিতৰত ভাৰতৰ পৰা ৪ লক্ষ ৬০০০০ নাৰী(কন্যাসন্তান) সন্ধানহীন হৈছে। আৰু এইসকলৰ অধিকাংশ সন্ধানহীন হৈছে ভূমিস্থ হোৱাৰ পিছতেই। এই সংখ্যাক তিনিটা ভাগত ভাগ কৰি তাৰে দুভাগৰ বাবে ৰাষ্ট্ৰসংঘই দায়ী কৰিছে ভাৰতৰ পাৰিবাৰিক লিংগ- বৈষম্যক। ‘কন্যা-সন্তান নিবিচৰা’ কাৰণটোও এইদৰে সন্ধানহীন হোৱাৰ সৈতে মিলি গৈছে বুলি ৰাষ্ট্ৰসংঘই কৈছে। চীনৰ পৰিসংখ্যাও ভাৰততকৈ বৰ বেছি সুকীয়া নহয়। পৃথিৱীত যিমানসংখ্যক সদ্যজাত কন্যাসন্তানৰ মৃত্যু হয়, তাৰে ৯৫% হৈছে ভাৰতৰ আৰু চীনৰ! আকৌ এই দুয়োখন দেশেই প্ৰতিবছৰে নতুন সন্তান জন্ম দিয়াৰ ক্ষেত্ৰত পৃথিৱীৰ অইন দেশবোৰতকৈ বহুত আগবাঢ়ি আছে। ৰাষ্ট্ৰসংঘৰ প্ৰতিবেদনত বাখ্যা কৰি কোৱা হৈছে যে প্ৰতিহাজাৰ কন্যাসন্তানৰ জন্মৰ সময়ত ১৩.৫ গৰাকী শিশুৰ মৃত্যু হয় বা সন্ধানহীন হয় একমাত্ৰ ‘কন্যাসন্তান হৈ জন‌ম লোৱাৰ অপৰাধত’! ৫ বছৰৰ কম বয়সৰ ৯ গৰাকী শিশুৰ ১ জনৰ মৃত্যু হয় , কাৰণ ‘কন্যাসন্তান’!

ৰাষ্ট্ৰসংঘৰ প্ৰতিবেদনত এই বিপুল সংখ্যক সদ্যজাত আৰু নাবালিকা ছোৱালীৰ সন্ধানহীন হোৱাৰ কাৰণ হিচাপে পোনপটীয়াকৈ একো নকলেও আকাৰে-ইংগিতে বুজাই দিছে যে এই ঘটনাবোৰ হত্যাৰ বাহিৰে অইন একো নহয়। প্ৰতিবেদনত ৰাষ্ট্ৰসংঘই কৈছে যে কন্যাসন্তানৰ ক্ষেত্ৰত আৰু অধিক প্ৰচাৰৰ আলোক সঞ্চাৰ কৰিব লাগিব। দেখুৱাই দিব লাগিব যে মহিলাই কিদৰে সমাজ সলনি কৰি দিব পৰা ক্ষমতাৰ অধিকাৰী! প্ৰতিটো ক্ষেত্ৰত সমাজে ছোৱালীৰ সাফল্যক অধিকভাবে উদযাপনৰ ব্যৱস্থা কৰিব লাগিব। কন্যাসন্তানৰ আধিক্য লৈও যে একো- একোখন সংসাৰ উন্নত হ’ব পাৰে, তেনে দৃষ্টান্ত ডাঙি ধৰিব লাগিব। লগতে ছোৱালীৰ শিক্ষাৰ ক্ষেত্ৰখনকো অতি গুৰুত্ব দিব লাগিব। প্ৰয়োজনত নাৰীশিক্ষাৰ বাবে বিশেষ আৰ্থিক সহায়তা আগবঢ়োৱা উচিৎ হ’ব। পুত্ৰসন্তানৰ প্ৰতি অধিক আগ্ৰহৰ বিশেষ কাৰণবোৰ বুজি লৈ সেই আগ্ৰহ ছোৱালীৰ বাবে কিয় প্ৰযোজ্য নহয় তাক ফহিয়াব লাগিব আৰু সেইমতে ৰাষ্ট্ৰবোৰে নীতি প্ৰণয়ন কৰা উচিত হ’ব। সমগ্ৰ বিশ্বজুৰি ছোৱালীৰ ওপৰত কেনেকুৱা লিঙ্গ-নিৰ্ভৰ অত্যাচাৰ চলে, প্ৰতিবেদনত সবিস্তাৰে ডাঙি ধৰা হৈছে। শাৰীৰিক আৰু মানসিক ভাবে ছোৱালীক প্ৰভাৱিত কৰি যৌন- নিৰ্যাতন কৰাৰ উপৰিও বিশ্বৰ নানা দেশত চলি আছে স্তন ‘আয়ৰণিং’-অৰ পৰা ‘জেনিটেল মিউটেশ্যন’ আদিৰ দৰে ঘৃণনীয় প্ৰথা! প্ৰতিবেদনত কৈছে যে এইবোৰ কাৰণতেই বৃহৎ সংখ্যক মানুহে কন্যা সন্তান কামনা নকৰে। প্ৰতিদিনে ১৮ বছৰৰ তলৰ ছোৱালী গড়ে ৩৩০০০ জনীক বলপূৰ্বক বিয়া দিয়া হয়। এই বছৰটোত পিশৱিকভাৱে বিশ্বত ৪১ লাখ কিশোৰীৰ ভগাঙ্কুৰ কাটি দিয়া হৈছে। ইয়াৰোপৰি দৰিদ্ৰ আৰু উদ্বাস্তু পৰিয়ালৰ ছোৱালীবোৰ সকলোতকৈ বেছি সমস্যাৰ সন্মুখীন হৈছে। এইবছৰ কৰ’নাৰ পটভূমিত এনে অত্যাচাৰ আৰু যৌন-নিগ্ৰহ অত্যাধিক হৈ পৰিছে বুলিও ৰাষ্ট্ৰসংঘৰ মহাসচিবে ব্যক্ত কৰিছে।