ভাৱাৰ্থ স্বৰূপ সোঁৱৰণী মহাবাহু বঁটা প্ৰদান, গ্ৰন্থ -আলোচনী উন্মোচন আৰু বক্তৃতানুষ্ঠান

‘ভাৱাৰ্থ স্বৰূপ সোঁৱৰণী মহাবাহু বঁটা’ প্ৰদান, গ্ৰন্থ –আলোচনী উন্মোচন আৰু বক্তৃতানুষ্ঠান

অৰবিন্দ ৰাভা

গুৱাহাটী, ১৬ ছেপ্টেম্বৰ, ২০২৩: মহাবাহুৰ উদ্যোগত আৰু ‘মাল্টিকালচাৰেল এডুকেশ্যনেল ডেভেলপমেন্ট ট্ৰাস্ট‘ৰ সহযোগত ১৬-০৯-২০২৩ তাৰিখে গুৱাহাটীত ‘ভাৱাৰ্থ স্বৰূপ সোঁৱৰণী মহাবাহু বঁটা ‘ প্ৰদান অনুষ্ঠানৰ লগতে গ্ৰন্থ উন্মোচন, মহাবাহু ( পষেকীয়া ইংৰাজী, ডিজিটেল আৰু ছপা) উন্মোচন আৰু আন্তৰ্জাতিক পৰিৱেশকৰ্মী ঋতুৰাজ ফুকনৰ বক্তৃতা প্ৰদান অনুষ্ঠান এক গাম্ভীৰ্যপূৰ্ণ পৰিৱেশত অনুষ্ঠিত হয়।

১৬-০৬-২০২৩ তাৰিখে এক ভয়ংকৰ দুৰ্ঘটনাত প্ৰাণ হেৰুওৱা ১৮+ বছৰীয়া উদ্যমী যুৱক ‘ভাৱাৰ্থ স্বৰূপ’ৰ সোঁৱৰণত তেওঁৰ পৰিয়ালবৰ্গৰ সহযোগত অনুষ্ঠিত হোৱা ভাৱাৰ্থ স্বৰূপ সোঁৱৰণী মহাবাহু বঁটা প্ৰদান অনুষ্ঠানত মুখ্য অতিথি হিচাপে ড° অমৰজ্যোতি চৌধুৰী, আমন্ত্ৰিত অতিথি হিচাপে সাংবাদিক – সাহিত্যিক প্ৰশান্ত ৰাজগুৰুৱে অংশগ্ৰহণ কৰা সভাখন সঞ্চালন কৰে অসম নাট্য সন্মিলনৰ সভাপতি কুমাৰ দীপক দাসে।

সভাৰ আৰম্ভণি কৰে মহাবাহুৰ হৈ অঞ্জন শৰ্মাই আৰু মাল্টিকালচাৰেল এডুকেশ্যনেল ডেভেলপমেন্ট ট্ৰাস্টৰ হৈ দেবানন দাসৰ চমু দু-আষাৰ তথা বন্তি প্ৰজ্বলনৰ বাবে জনোৱা আহ্বানৰ পিছত ভাৱাৰ্থ স্বৰূপৰ প্ৰতিকৃতিৰ সন্মুখত বন্তি প্ৰজ্বলন, পুষ্পাৰ্পণ, এক মিনিট মৌন প্ৰাৰ্থনা কৰা হয়।

সভাৰ আৰম্ভণি হিচাপে পোনপ্ৰথমে উদীয়মান নৱীন লেখক ( লেখিকা) তথা মহাবাহুৰ সহকাৰী সম্পাদক কাকলি দাসৰ গ্ৰন্থ ‘Symphony of Thoughts: Reviewing Life Through A Critical Lens’ ড° অমৰজ্যোতি চৌধুৰীয়ে উন্মোচন কৰে।

উন্মোচন কৰাৰ পিছত গ্ৰন্হকাৰ কাকলি দাসে চমু বক্তব্যযোগে মহাবাহুৰ সৈতে জড়িত সকলোকে তথা ভাৱাৰ্থ স্বৰূপৰ পৰিয়ালবৰ্গৰ লগতে উপস্থিত সকলোকে আন্তৰিকতাৰে ধন্যবাদ জ্ঞাপন কৰি মহাবাহুৰ সৈতে তেওঁৰ তিনিবছৰৰো অধিক কালৰ যাত্ৰা সম্পৰ্কে উল্লেখ কৰি এই দিনটো চিৰস্মৰণীয় হৈ ৰ’ব বুলি কয়।

এই গ্ৰন্হ উন্মোচন হোৱাৰ লগে লগে তেওঁ এগৰাকী গ্ৰন্হকাৰ হৈ পৰাৰ উপৰিও ভাৱাৰ্থ স্বৰূপ সোঁৱৰণী মহাবাহু বঁটাৰ বাবে তেওঁক নিৰ্বাচন কৰি পৰম উৎসাহিত কৰা বুলি কয় আৰু ভৱিষ্যতৰ যাত্ৰাত সকলোৰে সহায় সহযোগ কামনা কৰে। তাৰোপৰি একেটা দিনতে মহাবাহু ( ডিজিটেল আৰু ছপা ইংৰাজী পষেকীয়া)ৰ উন্মোচন হ’ব হেতুকে সেই পষেকীয়াৰ সম্পাদক হিচাপেও বিশেষ দিনটো চিৰ স্মৰণীয় হৈ ৰ’ব বুলি কয়।

দ্বিতীয়খন গ্ৰন্থ অঞ্জন শৰ্মাৰ ‘ইতিহাসৰ গোলাম‘ উন্মোচন কৰে প্ৰশান্ত ৰাজগুৰুৱে।

উন্মোচন কৰাৰ পিছত চমু বক্তব্যৰে অঞ্জন শৰ্মাই ১৯৮০ চনৰ পৰা আৰম্ভ কৰা মহাবাহুৰ যাত্ৰাৰ বিষয়ে কৈ সাম্প্ৰতিক কালত মহাবাহুৰ জৰিয়তে অসমৰ নৱীন লেখক- লেখিকাক বিশ্বৰ বিভিন্ন প্ৰান্তৰ সৈতে সম্পৰ্কিত কৰিবলৈ মহাবাহুক ইংৰাজী পষেকীয়া আলোচনী ( ছপা আৰু ডিজিটেল) হিচাপে এখন প্লেটফৰ্ম সৃষ্টি কৰা বুলি উল্লেখ কৰে তথা নতুন প্ৰজন্মৰ কেইবাগৰাকী লেখকক চিনাকি কৰাই দিয়ে।

ইয়াৰ পিছত মহাবাহু (ইংৰাজী পষেকীয়া) আলোচনী উন্মোচন কৰা হয় আৰু একেলগে মহাবাহু (ইংৰাজী পষেকীয়া)ৰ ডিজিটেল আলোচনী উন্মোচন কৰা হয়।

দুয়োখন উন্মোচন কৰে ড° অমৰজ্যোতি চৌধুৰী, প্ৰশান্ত ৰাজগুৰু, সঞ্জীৱ শৰ্মাই আৰু সহযোগ কৰে প্ৰবীৰ কুমাৰ দাস, অনুজ পালিৱাল, কুমাৰ দীপক দাস, ডা° নয়নজিৎ ডেকা, মণিকংকন বৰুৱা ,গৌতম চক্ৰৱৰ্তী, তনয় চক্ৰৱৰ্তী, দেবানন দাস, অপূৰ্ব খাউন্ড আদি বিশিষ্ট ব্যক্তিসকলে।

প্ৰথমবাৰৰ বাবে আৰম্ভ কৰা ‘ভাৱাৰ্থ স্বৰূপ সোঁৱৰণী মহাবাহু বঁটা ‘ প্ৰদান কৰা হয় যথাক্ৰমে আন্তৰ্জাতিক পৰিৱেশকৰ্মী ঋতুৰাজ ফুকন আৰু উদীয়মান বলিষ্ঠ লেখিকা তথা একেদিনাই উন্মোচন হ’বলগীয়া মহাবাহু ( ইংৰাজী পষেকীয়া)ৰ সম্পাদক কাকলি দাসক। ড° অমৰজ্যোতি চৌধুৰী, প্ৰশান্ত ৰাজগুৰুৱে , আৰু সহযোগ কৰে ভাৱাৰ্থ স্বৰূপৰ পিতৃ হেমেন দাস, অসম চৰকাৰৰ এগৰাকী প্ৰধান সচিব মুকেশ চাহু, কুমাৰ দীপক দাস, অঞ্জন শৰ্মাই।

ভাৱাৰ্থ স্বৰূপ সোঁৱৰণী মহাবাহু বঁটা হিচাপে প্ৰশংসা পত্ৰ, আৰু দুয়োগৰাকীকে দুখন পঞ্চাছ হাজাৰ টকাৰ চেক প্ৰদান কৰা হয়। এই বঁটা প্ৰদান কৰোতে সহযোগ কৰে ভাৱাৰ্থ স্বৰূপৰ পিতৃ হেমেন দাসৰ লগতে ভাৱাৰ্থ স্বৰূপৰ মাতৃ নমিতা দাসে।

সভাখনত মুখ্য অতিথি হিচাপে ড° অমৰজ্যোতি চৌধুৰীয়ে ভাৱাৰ্থ স্বৰূপৰ পৰিয়ালৰ সকলোকে সমবেদনা জ্ঞাপন কৰে আৰু ধৈৰ্য ধৰি আগবাঢ়ি যাবলৈ আহ্বান জনায়। তেওঁ কয় যে ভাৱাৰ্থ স্বৰূপ সোঁৱৰণী মহাবাহু বঁটা প্ৰদান অনুষ্ঠানৰ জৰিয়তে নতুন প্ৰজন্মৰ বাবে এক উৎসাহজনক পৰিৱেশ সৃষ্টি কৰা হৈছে আৰু নতুন প্ৰজন্মৰ ওপৰত তেওঁৰ অগাধ বিশ্বাস আছে।

কাকলি দাসৰ গ্ৰন্থখনৰ বিষয়ে তেওঁ ভূয়সী প্ৰশংসা কৰে আৰু মহাবাহু ( ইংৰাজী পষেকীয়া) আলোচনীখনৰ জলবায়ু পৰিৱৰ্তন ভিত্তিক বিশেষ সংখ্যাটো আন্তৰ্জাতিক মানদণ্ডসম্পন্ন হোৱা বুলি উল্লেখ কৰে। অঞ্জন শৰ্মাৰ ‘ইতিহাসৰ গোলাম’ সম্পৰ্কেও তেওঁ উল্লেখ কৰি লেখকক প্ৰশংসা কৰে। ড° চৌধুৰীয়ে ইংৰাজী পষেকীয়া আলোচনী মহাবাহুৰ প্ৰসাৰৰ গুৰুত্ব সম্পৰ্কে গুৰুত্ব দিবলৈ আহ্বান জনায়।

আমন্ত্ৰিত অতিথি প্ৰশান্ত ৰাজগুৰুৱে ভাৱাৰ্থ স্বৰূপৰ পৰিয়ালৰ সকলোকে ধৈৰ্য ধৰিবলৈ আহ্বান জনায় আৰু এগৰাকী পিতৃ হিচাপে তেওঁ নিজেও তেনে বেদনা কিমান গভীৰ হ’ব পাৰে সেই সম্পৰ্কে কিছু পৰিমাণে হ’লেও উপলব্ধি কৰা বুলি সদৰি কৰে।

তেওঁ ১৯৮০ চনৰ পৰা প্ৰকাশ হোৱা মহাবাহু, আৰু আজি কিছুবছৰ ধৰি ডিজিটেল ৰূপত প্ৰকাশ হৈ থকা মহাবাহু তথা আজি প্ৰকাশ পোৱা মহাবাহু ( ইংৰাজী পষেকীয়া আলোচনী) সম্পৰ্কে বিশদভাৱে ব্যাখ্যা কৰে। তেওঁ ঋতুৰাজ ফুকন আৰু কাকলি দাসক ভূয়সী প্ৰশংসা কৰে আৰু আগবাঢ়ি গৈ থাকিবলৈ উৎসাহিত কৰে। তেওঁ অঞ্জন শৰ্মাৰ বলিষ্ঠ লেখনি সম্পৰ্কেও চমুকৈ উল্লেখ কৰে।

উল্লেখযোগ্য যে মহাবাহুৰ আৰম্ভণি সংখ্যা ‘জলবায়ু পৰিৱৰ্তন ‘( Climate Change)ৰ বিশেষ সংখ্যা হিচাপে প্ৰকাশ কৰা হৈছে আৰু তাৰে সৈতে সঙ্গতি ৰাখি বঁটা প্ৰাপক ঋতুৰাজ ফুকনে ‘Climate Change – A Decade of Fighting for Climate justice With Special Reference to Assam and North – East India’ শীৰ্ষক এক‌ মননশীল তথ্যনিৰ্ভৰ বক্তৃতা প্ৰদান কৰি তেওঁ পদাৰ্পণ কৰা সুমেৰু – কুমেৰু আদিত জলবায়ু পৰিৱৰ্তনৰ ফলত কিদৰে গ্লেচিয়াৰ গলিবলৈ ধৰিছে, হ্ৰাস পাবলৈ ধৰিছে, কিদৰে পৃথিৱীৰ তাপমাত্ৰাৰ বৃদ্ধি হৈছে, কিদৰে সৌৰশক্তিক সেউজ শক্তিলৈ পৰিবৰ্তন কৰিব পাৰিলে পৃথিৱীৰ তাপমাত্ৰা হ্ৰাস পাব পাৰে, কিদৰে কৃত্ৰিম বৰষুণ সৃষ্টি কৰিব পাৰি, এনে বিভিন্ন বিষয় উপস্থাপন কৰি সকলোকে এক বেলেগ পৰিৱেশৰ মাজলৈ লৈ যায়।

তেওঁ সকলোকে সজাগ হৈ জলবায়ু পৰিৱৰ্তনৰ বাবে পৃথিৱীৰ তাপমাত্ৰাৰ বৃদ্ধি হ্ৰাস কৰাৰ ক্ষেত্ৰত সহযোগ কৰিবলৈ আহ্বান জনায়। উল্লেখযোগ্য যে মহাবাহুৰ ‘জলবায়ু পৰিৱৰ্তন’ শিতানটো পৰিচালনা কৰিবলৈ তেওঁ দায়িত্ব বহন কৰিছে।

সভাৰ সঞ্চালক কুমাৰ দীপক দাসে ভাৱাৰ্থ স্বৰূপৰ বিষয়ে আৱেগিক ভাষণ প্ৰদান কৰি জীৱন – মৃত্যুৰ মাজতেই জীৱন বুলি উল্লেখ কৰি ভাৱাৰ্থৰ পৰিয়ালক সাহস যোগায়, সমবেদনা জ্ঞাপন কৰে, আৰু ভাৱাৰ্থ স্বৰূপৰ সোঁৱৰণী মহাবাহু বঁটাৰ জৰিয়তে ভাৱাৰ্থ স্বৰূপ স্মৰণীয় হৈ থাকিব বুলি উল্লেখ কৰে তথা এই উদ্যোগ গ্ৰহণ কৰা হেতুকে অঞ্জন শৰ্মাক বহুত ধন্যবাদ জ্ঞাপন কৰে।

সভাৰ সামৰণি হিচাপে মহাবাহুৰ হৈ ৰামকৃষ্ণ শৰ্মাই শলাগৰ শৰাই আগবঢ়াই সকলোকে সম্বোধন কৰি কৃতজ্ঞতা আৰু ধন্যবাদ জ্ঞাপন কৰে।

উল্লেখযোগ্য যে মহাবাহুৰ ডিজিটেল সংখ্যা উপলব্ধ হ’ব এই লিংকত:

Home

তাৰোপৰি কাকলি দাসৰ গ্ৰন্থ ‘Symphony of Thoughts: Reviewing Life Through A Critical Lens’ উপলব্ধ হ’ব এই লিংকত :

Amazon link of Kakali Das’s book

SYMPHONY OF THOUGHTS UNTOLD (REVIEWING LIFE THROUGH A CRITICAL LENS,) https://amzn.eu/d/3VYACt8

[The books are available at BANDHAB, Yoshowanta Road, Panbazar, Guwahati-781001, Assam, India]

16-09-2023

Mahabahu.com is an Online Magazine with collection of premium Assamese and English articles and posts with cultural base and modern thinking. You can send your articles to editor@mahabahu.com / editor@mahabahoo.com (For Assamese article, Unicode font is necessary)