মই খটখটী

মই খটখটী

অঞ্জন শৰ্মা

হয়, মই দশক দশক ধৰি বোজা বৈ আছো 

সকলোকে মোক ব্যৱহাৰ কৰিবলৈ দি দি

মই খটখটী

ৰাতি ৩ বজাত পানী খাবলৈ নামি অহা খালী ভৰিবোৰক  

পুৱতি নিশা উঠি অহা অসংলগ্ন খোজ দিয়া জোতাবোৰক 

দুখন তক্তাক এখন বুলি ধৰি লৈ

একেলগে জঁপিয়াই হাঁহি হাঁহি নামি অহা শিশুবোৰক 

গোপন বোজা কঢ়িয়াই উশাহে নিশাহে নামি অহা আৰু উঠি অহা

ভদ্ৰলোক বোলা মানুহবোৰক

মই সকলোৰে বৈ আছো বোজা

মই কেতিয়াও কাকো একো অভিযোগ কৰা নাছিলো

মই সকলোৰে ভাৰ লৈ লৈ নীৰৱে কেকাইছিলো

আপত্তি কৰা নাই কোনোদিনে 

নহয় নে পংখী, বা অৰুন্ধতী!

কিন্তু সময়ে দাগ দি দি যায় সময়ে সময়ে ..

মোৰ হাড় – এই কাঠৰ তক্তাবোৰ – এতিয়া অলপ বেঁকা হৈ পৰিছে 

জীৱনে যেতিয়া উঠা-নমা কৰাসকলক পিছলৈ টানিছিল, 

তেতিয়া তেওঁলোকৰ গোৰোহাই য’ত হেঁচি ধৰিছিল, 

ভৰিৰ পতাই য’ত ঘৰ্ষণ কৰিছিল 

মোৰ ছালত সেই চিনবোৰ বিদ্যমান হৈ আছে… 

আতংকত সিহতে যিবোৰ খুটাত খামুচি ধৰিছিল

সেই খুটাবোৰ এতিয়া নৈৰ শিলৰ দৰে মসৃণ।

মই এতিয়া নীৰৱে কেকাই থাকো 

মই হৈ পৰিছো শীৰ্ণকায় 

হৈ পৰিছো কিছু সোলোক ধোলোক

স্মৃতিৰ ভৰত

হয়, মই শুকান পাতৰ দৰে হৈ পৰিছো

মোৰ হাড়বোৰ বা তক্তাবোৰ মোলায়েম হৈ পৰিছে 

আৰু মোৰ গাঁঠিবোৰো এতিয়া ক্লান্ত!

কিন্তু আজিও ৰাতি যেতিয়া ওপৰৰ সেই বিজুলী চাকি জ্বলি উঠিব,  

আৰু মোৰ শৰীৰত কোনোবাই খোজ দিব

কোনোবাই থমকি ৰ’ব

মই তেতিয়াও তেওঁক ধৰি ৰাখিম

মোক তাৰ বাবেই তৈয়াৰ কৰা হৈছিল,

মই মোৰ দায়িত্ব পালন কৰিছো

নীৰৱে 

ওজৰ আপত্তি নকৰাকৈ

কাৰণ এই খটখটীয়েও

খটখটীৰ জীৰ্ণ কাঠেও প্ৰতিশ্ৰুতি পালন কৰিব জানে।

১০-০৪-২০২৬

Mahabahu.com is an Online Magazine with collection of premium Assamese and English articles and posts with cultural base and modern thinking.  You can send your articles to editor@mahabahu.com / editor@mahabahoo.com (For Assamese article, Unicode font is necessary) Images from different sources.