মণিপুৰ: ৬০০০ এজাহাৰ আৰু গ্ৰেপ্তাৰ মাত্ৰ ৭ জনক !!

মণিপুৰ: ৬০০০ এজাহাৰ আৰু গ্ৰেপ্তাৰ মাত্ৰ ৭ জনক !!

অৰবিন্দ ৰাভা 

‘মণিপুৰৰ পৰিস্থিতি লক্ষ্য কৰি এনে লাগিছে যেন মণিপুৰৰ সাংবিধানিক ব্যৱস্থা সম্পূৰ্ণৰূপে ভাঙি পৰিছে’ – এনেদৰে মন্তব্য আগবঢ়াই ১ আগষ্ট, ২০২৩ চন, মঙ্গলবাৰে চৰকাৰ আৰু মণিপুৰ আৰক্ষীক কঠোৰ বাক্যৰে নিন্দা কৰে ভাৰতৰ উচ্চতম ন্যায়ালয়ে।

মণিপুৰৰ ৰক্তাক্ত গোষ্ঠী সংঘৰ্ষ আৰু কুকি নাৰীক উলংগ কৰি নিৰ্যাতন চলোৱা গোচৰৰ শুনানিৰ সময়ত উচ্চতম ন্যায়ালয়ৰ মুখ্য ন্যায়াধীশ ডি ৱাই চন্দ্ৰচূড়ে সাংবিধানিক ব্যৱস্থা ভাঙি পৰাৰ লগতে মণিপুৰৰ আইন-শৃংখলাৰ সম্পূৰ্ণ ব্যৰ্থতাৰ বাবে মণিপুৰৰ আৰক্ষী সঞ্চালক প্ৰধানজনক ৭ আগষ্ট, ২০২৩ তাৰিখে পৰৱৰ্তী শুনানিৰ সময়ত উচ্চতম ন্যায়ালয়ত উপস্থিত হ’বলৈ আদেশ জাৰি কৰে। 

উচ্চতম ন্যায়ালয়ৰ মুখ্য ন্যায়াধীশ ডি ৱাই চন্দ্ৰচূড়ে কয় যে, ‘ এনে লাগিছে সাংবিধানিক ব্যৱস্থা সম্পূৰ্ণৰূপে ভাঙি পৰিছে , আইন-শৃংখলা একো নাই, তদন্ত হৈছে অত্যন্ত লেহেমীয়া গতিৰে। অভিযোগ লাভ কৰিও আৰক্ষীয়ে অভিযোগৰ বিপৰীতে এজাহাৰ পঞ্জীয়ন কৰা নাছিল, গ্ৰেপ্তাৰ কৰা হোৱা নাই, ভাষ্য লিপিবদ্ধ হোৱা নাছিল।’

মণিপুৰৰ আৰক্ষীক ‘অতিশয় অলস’ বুলি অভিহিত কৰি উচ্চতম ন্যায়ালয়ৰ মুখ্য ন্যায়াধীশ ডি ৱাই চন্দ্ৰচূড়ে প্ৰশ্ন কৰে – ‘আৰক্ষীৰ লোকেই মণিপুৰৰ নাৰীক উন্মাদ জনতাৰ হাতত অৰ্পন কৰা কাৰ্যৰ তদন্ত আৰক্ষীয়ে কৰিছে নে?’

উল্লেখযোগ্য যে বিগত ৪ মে’ তাৰিখে উন্মত্ত মেইটেই পুৰুষৰ দলে তিনিগৰাকী কুকি মহিলাক বিৱস্ত্ৰ কৰি পদযাত্ৰা কৰাইছিল আৰু দলৱদ্ধভাৱে ধৰ্ষণ কৰিছিল। এই মহিলা কেইগৰাকীক পিতৃ -ভাতৃসহ বৰ্বৰ উন্মত্ত মেইটেই মণিপুৰীৰ হাতত আৰক্ষীয়েই তুলি দিছিল।

কিন্তু সেই ঘটনাৰ তদন্ত আৰম্ভ হৈছে নে নাই , উচ্চতম ন্যায়ালয়ে তাকে লৈও প্ৰশ্ন উত্থাপন কৰে। উচ্চতম ন্যায়ালয়ৰ ১ আগষ্ট তাৰিখৰ বিচাৰপীঠখনত মুখ্য ন্যায়াধীশ ডি ৱাই চন্দ্ৰচূড়ৰ উপৰিও ন্যায়াধীশ জে বি পাৰ্ডিৱালা আৰু ন্যায়াধীশ মনোজ মিশ্ৰ উপস্থিত আছিল।

উচ্চতম ন্যায়ালয়ৰ বিচাৰপীঠে প্ৰশ্ন উত্থাপন কৰে যে আইন – শৃংখলা ব্যৱস্থাই যদি মানুহক সুৰক্ষা দিব নোৱাৰে, তেনেহলে নাগৰিকসকলৰ কি হ’ব? এই কথা অতি স্পষ্ট যে মণিপুৰী মহিলাক উলঙ্গ কৰা ভিডিঅ’ ভাইৰেল হোৱা ঘটনাটোৰ গোচৰ ৰজু কৰাত যথেষ্ট পলম হৈছিল।

উচ্চতম ন্যায়ালয়ে মণিপুৰৰ আৰক্ষীক ভৰ্ৎসনা কৰে আৰু কয় যে মণিপুৰৰ আৰক্ষীয়ে তদন্ত কৰাত ব্যৰ্থ হৈছে আৰু নিয়ন্ত্ৰণ হেৰুৱাই পেলাইছে। 

চৰকাৰৰ হৈ ছলিছিটৰ জেনেৰেল তুষাৰ মেহতাই তৃণমূল স্তৰৰ পৰিস্থিতি বিবেচনা কৰাৰ বিষয়ে কোৱাত উচ্চতম ন্যায়ালয়ে কয় যে আৰক্ষীৰ ওচৰত ৬০০০ এজাহাৰ দাখিল হৈছিল আৰু আপোনালোকে গ্ৰেপ্তাৰ কৰিছে মাত্ৰ ৭ জনক! 

02-08-2023

Mahabahu.com is an Online Magazine with collection of premium Assamese and English articles and posts with cultural base and modern thinking.  You can send your articles to editor@mahabahu.com / editor@mahabahoo.com (For Assamese article, Unicode font is necessary)

RelatedPosts

Comparative Legal Analysis of the Role of Artificial Intelligence in Human Rights Protection

July 8, 2025

NATIONAL EDUCATION POLICY VS. PEOPLE’S EDUCATION POLICY

July 6, 2025

ONE NATION ONE ELECTION ?

June 28, 2025