মায়াৱী কুকুৰা

মায়াৱী কুকুৰা

অঞ্জন শৰ্মা

একক কণ্ঠ:

শুনা শুনা সকলোৱে শুনা কাণ পাতি

যোগিনীতন্ত্ৰৰপৰা মই দিম উদ্ধৃতি—

‘‍‘ত্ৰিংশদ্ যোজনবিস্তীৰ্ণং দীৰ্ঘেণ শতযোজনং।

কামৰূপং বিজাণীহি ত্ৰিকোণাকাৰমূত্তমম।।’’

সমৱেত কণ্ঠ:

সংস্কৃত নাজানো আমি, দিবনে ভাঙি?

একক কণ্ঠ: 

আতুৰ নহ’বা, মই দিম ভাঙি-পাতি,

শুনা শুনা শুনা

সকলোৱে কাণ পাতি পাতি

কালিকাপুৰাণৰপৰাও মই এয়া দিওঁ উদ্ধৃতি—

সমৱেত কণ্ঠ:

ৱা: ৱা: ৱা: ৱা:.. ঈৰশ্বাদ্ ঈৰশ্বাদ্।

একক কণ্ঠ:

‘‍‘কৰতোয়া নদী পূৰ্বং যাবদ্দিক্কৰ বাসিনীম্।

ত্ৰিংশদ্ যোজনবিস্তীৰ্ণং যোজনৈকশতায়তম্।।

ত্ৰিকোণং কৃষ্ণবৰ্ণঞ্চ প্ৰভূতাচল পুৰিতম্।

নদীশতসমাযুক্তং কামৰূপং প্ৰকীৰ্ত্তিতম।।’’

সমৱেত কণ্ঠ: 

সংস্কৃত নাজানো আমি, দিবনে ভাঙি?

একক কণ্ঠ:

স্বাধীন আছিল কামৰূপ, বৰ শক্তিশালী

কামৰূপৰ পশ্চিমে সীমা কৰতোৱা নদী

কামৰূপ ৰাজ্যৰ পূবে দিক্কৰবাসিনী

কামৰূপ আছিল বহলে তিনিশ যোজন

আৰু দীঘলে আছিল কামৰূপ এশ যোজন।

কামৰূপ ৰাজ‍্যখন ত্ৰিকোণাকৃতি

য’ত কৃষ্ণবৰ্ণ লোকৰ বসতি

কামৰূপ বহু পৰ্বতেৰে বেষ্টিত

জান-জুৰি নদ-নদীৰে বিধৌত।

সমৱেত কণ্ঠ: 

কামৰূপ কামৰূপ

নৰক-ভগদত্তৰ কামৰূপ

কামৰূপ কামৰূপ

ভাস্কৰবৰ্মাৰ কামৰূপ

কামৰূপ কামৰূপ

কিমান যে তাৰ ৰং-ৰূপ!

একক কণ্ঠ:

নৰক, নৰক আছিল কামৰূপৰ ৰোমাণ্টিক হিৰো,

চকুত ছাট মাৰি ধৰা আছিল শৌৰ্য-বীৰ্য।

নৰক হৈ পৰিছিল দেৱী কামাখ‍্যাৰ প্ৰেমাসক্ত,

বিবাহৰ প্ৰস্তাৱ দিছিল দেৱীক হৈ প্ৰেমোন্মত্ত।

সমৱেত কণ্ঠ:

তাৰপিছত? তাৰপিছত?

একক কণ্ঠ:

দেৱী কামাখ‍্যাই বুজিছিল কথা বিষম,

আ: ৰোমাণ্টিক নৰকৰ কি তীব্ৰ প্ৰেম!

নৰক, নৰকক দেৱীয়ে প্ৰস্তাৱ দিছিল—

‘‍‘হে নৰক, মোৰ মন্দিৰ থকা পৰ্বতখনৰ চাৰিওদিশে

যদিহে পাৰা সাজিব চাৰিখন শিলৰ খটখটী

লগতে এটি বিতোপন জিৰণি-গৃহ—একেনিশাই

তোমাৰ সৈতে নিশ্চিতভাৱে বিবাহপাশত আবদ্ধ হ’ম মই।’’

সমৱেত কণ্ঠ:

ৱা: ৱা: ৱা: ৱা:.. ঈৰশ্বাদ্ ঈৰশ্বাদ্।

তাৰপিছত? তাৰপিছত?

একক কণ্ঠ:

কামৰূপাধিপতি নৰক আছিল মহাশক্তিৱন্ত

চূৰ্ণ-বিচূৰ্ণ কৰিছিল সৰগৰ দেৱতাৰো দম্ভ।

দেৱীৰ প্ৰতিশ্ৰুতি শুনি

হেলাৰঙে শিল দাঙি দাঙি আনি

নিশাতেই প্ৰায় সমাপ্ত কৰিছিল

জিৰণি-গৃহ আৰু খটখটী।

সমৱেত কণ্ঠ:

বিবাহ হ’ল নেকি? বিবাহ!

কেঁচা কল কাটি নৰক-কামাখ‍্যাৰ?

একক কণ্ঠ:

দেৱীয়ে দেখিছিল কথা অতি বিষম

নৰকৰ সৈতে বিবাহ! অসম্ভৱ! অসম্ভৱ!!

পাহৰি গৈছিল স্ব-মুখেৰে নৰকক দিয়া প্ৰতিশ্ৰুতি।

কামৰূপক কৰি অহা প্ৰতাৰণাৰ

সেয়াই আৰম্ভণি!

নিশাটোৰ অন্ত নৌপৰোতেই দেৱীয়ে স্ৰজিলে

মায়াৱী কুকুৰা

যেন অসম চুক্তি বা আই-এম-ডি-টি কিম্বা

হিন্দু বাংলাদেশীৰ নাগৰিকত্ব বা

আলফাৰে আলোচনা…

মায়াৱী কুকুৰা!

মায়াৱী কুকুৰাৰ মাতত

সমগ্ৰ নীলাচল পাহাৰ ৰজনজনাই গ’ল

অন্ধকাৰতেই অন্ধকাৰ খণ্ড-বিখণ্ড হৈ গ’ল

কামৰূপাধিপতি নৰকক কৰা হ’ল

প্ৰচণ্ড প্ৰতাৰণা

নিজে দিয়া প্ৰতিশ্ৰুতি দেৱীয়ে

নিজেই কৰিলে উলংঘা

কামৰূপক সৰগৰ দেৱ-দেৱীয়ে কৰা প্ৰতাৰণাৰ

সেয়াই সূচনা!

সমৱেত কণ্ঠ:

হয় হয় হয়

প্ৰতাৰণাৰ বিষপান আমাৰ অদৃষ্ট

আমি যে নীলকণ্ঠ!

আমি যে নীলকণ্ঠ!!

Mahabahu.com is an Online Magazine with collection of premium Assamese and English articles and posts with cultural base and modern thinking.  You can send your articles to editor@mahabahu.com / editor@mahabahoo.com ( For Assamese article, Unicode font is necessary)