হৃদয়বিদাৰক চিঠি প্ৰকাশ কৰিলে ইউক্ৰেনৰ প্ৰশাসনে

‘মা, আমি পুনৰ স্বৰ্গত লগ হ’ম। স্বৰ্গত তোমাক যাতে মই দেখা পাব পাৰো, তাৰ বাবে মই ভাল জীয়ৰী হ’বলৈ আপ্ৰাণ চেষ্টা কৰি থাকিম।’ 

ইউক্ৰেন আৰু ৰাছিয়াৰ মাজত চলি থকা যুদ্ধৰ পটভূমিত বাৰ’ডায়াস্কাত মৃত্যুবৰণ কৰা মাতৃৰ উদ্দেশ্য কৰি এনেদৰেই এখন চিঠি লিখিছে ৯ বছৰীয়া এজনী ইউক্ৰেনীয় শিশুকন্যাই। হাতেলেখা সেই হৃদয়বিদাৰক চিঠিখনৰ ছৱি টুইটাৰত পোস্ট কৰিছে ইউক্ৰেনৰ আভ্যন্তৰীণ বিষয়ক মন্ত্ৰালয়ৰ উপদেষ্টা এষ্টন গেৰাচেম্বোই।

প্ৰাপ্ত তথ্য অনুসৰি ছোৱালীজনীৰ মাতৃয়ে গাড়ীত উঠি বাৰ’ডায়াস্কা অভিমুখে গৈ থাকোতেই ৰাছিয়াৰ সৈন্যৰ আক্ৰমণত মৃত্যুৰ মুখত পৰে।

ছোৱালীজনীয়ে নিহত মাতৃক উদ্দেশ্য কৰি চিঠিখনত লিখিছে, ‘মা, মোৰ জীৱনত ৯ বছৰ জুৰি তোমাৰ সঙ্গ পোৱা বাবে তোমাক অশেষ ধন্যবাদ। মোৰ শৈশৱত তোমাক পালো, তাৰ বাবে মই কৃতজ্ঞ। তুমি আকাশত সুখত থকাটোকেই মই বাঞ্চা কৰো। মইও যদি স্বৰ্গলৈ যাব পাৰিলোহেতেন, ভাল হ’লহেতেন। সপোনত আমি লগালগি হ’ম। স্বৰ্গলৈ যাতে যাব পাৰো, তাৰ বাবে মই এজনী ভাল ছোৱালী হৈ থাকিম।’

RelatedPosts

The Secret of Ukrainian Resilience and Russian Madness !

April 7, 2025

Trump vs Zelensky: Is Trump shifting alliances from Europe & Ukraine to Russia!

March 5, 2025

Trump Halts U.S. Military Aid to Ukraine Amid Rising Tensions and Policy Shifts!

March 4, 2025

এফালে যেতিয়া যুদ্ধবিধ্বস্ত দেশখনৰ এখনৰ পিছত এখনকৈ স্বজনহাৰাৰ অলেখ বেদনাদায়ক ছৱি প্ৰকাশ হৈছে, আনফালে কিভ সংলগ্ন একাধিক অঞ্চলত অজস্ৰ গণকবৰৰ সন্ধান পোৱা গৈছে বুলি ইউক্ৰেনৰ বাসিন্দাসকলে দাবী কৰিছে। ৰাজধানী চহৰ আৰু সংলগ্ন অঞ্চলৰ দখল ত্যাগ কৰি গুচি যোৱাৰ আগেয়ে ৰাছিয়াৰ বৰ্বৰ সৈন্যবাহিনীয়ে বুজোভা অঞ্চলত বহু মানুহক নিৰ্দয়ভাবে হত্যা কৰি কবৰ দিছে। মঙলবাৰে (১২ এপ্ৰিল, ২০২২)ও ক্ৰামাতোৰস্ত চহৰত ক্ষেপনাস্ত্ৰৰে আক্ৰমণ কৰি ৰাছিয়াই হত্যা কৰিছে ৫২ জনক। প্ৰতিদিনে নতুন নতুন খবৰ আহিয়েই আছে – মৃত্যুৰ, কবৰৰ, নিৰ্দয়তাৰ।

পুনৰ ৰাছিয়াৰ সৰ্বগ্ৰাসী নৃশংসতাৰ আশংকাত দেশখনৰ দক্ষিণলৈ পলাবলৈ আৰম্ভ কৰিছে বহু মানুহ। লুহান্সক চহৰত ৰাছিয়াৰ সৈন্যই চূৰ্ণ- বিচূৰ্ণ কৰি পেলাইছে হৈছে বিদ্যালয়, বহু মহলীয়া অট্টালিকা। ইউক্ৰেনক সম্পূৰ্ণৰূপে পদানত কৰিবলৈ যি ধৰণৰ সৰ্বাত্মক ধ্বংসলীলা চলাব লাগে, যি ধৰণৰ আক্ৰমণ চলাব লাগে, যি ধৰণে হত্যালীলা চলাব লাগে, এতিয়াও তেনেদৰে ৰাছিয়ান সেনাই চলোৱা নাই বুলি পতিয়ন গৈ ৰাছিয়াৰ ৰাষ্ট্ৰপতি ভ্লাডিমিৰ পুটিন-এ নতুন ৰাছিয়াৰ সেনাবাহিনীৰ জেনেৰেল হিচাপে আলেকজেণ্ডাৰ দোভোৰনিকভক নিযুক্তি দিছে।

কেইদিনমানৰ আগতে কিভত স্বচক্ষে যুদ্ধ পৰিস্থিতি প্ৰত্যক্ষ কৰিবলৈ হাজিৰ হৈছিল বৃটেইনৰ প্ৰধানমন্ত্ৰী বৰিছ জনছন। যুদ্ধবিধ্বস্ত অঞ্চলত পৰিভ্ৰমণ কৰি পুটিনৰ বৰ্বৰতা প্ৰত্যক্ষ কৰি বৰিছ জনছন-এ কৈছে,’ বুচা, ইৰপিনত পুটিনে যি ধৰণৰ যুদ্ধ অপৰাধ কৰিছে, সেই অপৰাধে ৰাছিয়াৰ মৰ্যদাক স্থায়ীভাৱে নষ্ট কৰিছে।’ সহস্ৰ প্ৰতিকুলতাক নেওচি ইউক্ৰেনে যিদৰে কিভক ৰক্ষা কৰিবলৈ জপিয়াই পৰিছে, তাৰবাবে ভূয়সী প্ৰশংসা কৰিছে বৃটেইনৰ প্ৰধানমন্ত্ৰী বৰিছ জনছন-এ। ইউক্ৰেনৰ ৰাষ্ট্ৰপতি ঝেলেনস্কিৰ সৈতে বৰিছ জনছন-এ কিভৰ ৰাজপথত খোজকাঢ়ি থকা ছৱি ইউক্ৰেনৰ প্ৰশাসনে সামাজিক মাধ্যমত ইতিমধ্যে প্ৰকাশ কৰিছে। 

“মা, মোৰ জীৱনত ৯ বছৰ জুৰি তোমাৰ সঙ্গ পোৱা বাবে তোমাক অশেষ ধন্যবাদ। মোৰ শৈশৱত তোমাক পালো, তাৰ বাবে মই কৃতজ্ঞ। তুমি আকাশত সুখত থকাটোকেই মই বাঞ্চা কৰো। মইও যদি স্বৰ্গলৈ যাব পাৰিলোহেতেন, ভাল হ’লহেতেন। সপোনত আমি লগালগি হ’ম। স্বৰ্গলৈ যাতে যাব পাৰো, তাৰ বাবে মই এজনী ভাল ছোৱালী হৈ থাকিম।“

এইবছৰৰ ২৪ ফেব্ৰুৱাৰী তাৰিখে ৰাছিয়াই ইউক্ৰেন আক্ৰমণ কৰে। সেই আক্ৰমণৰ পটভূমিত বিশেষজ্ঞসকলে ধাৰণা কৰিছিল যে পৰমাণু বোমাৰে বলীয়ান মহা শক্তিশালী ৰাছিয়াই এসপ্তাহৰ ভিতৰতে ইউক্ৰেন দখল কৰিবলৈ সক্ষম হ’ব আৰু ইউক্ৰেনে প্ৰতিৰোধ আগবঢ়াবলৈ সমূলি ব্যৰ্থ হ’ব। কিন্তু বাস্তৱ চিত্ৰখন সুকীয়া হৈ পৰিল! দেখা গৈছে যে এই এপ্ৰিল মাহৰ ১৭ তাৰিখ পৰ্যন্তও ৰাছিয়া সফল হ’ব পৰা নাই আৰু ইউক্ৰেন আক্ৰমণ কৰি নিজেও চৰম ক্ষতিৰ সন্মূখীন হ’বলগীয়া হৈছে বুলি ৰাছিয়াইইও স্বীকাৰ কৰিবলৈ বাধ্য হৈছে। অলপতে মস্কোই স্বীকাৰ কৰিছে বিপুল ক্ষয়-ক্ষতিৰ বিষয়ে। আৰু সেইবাবেই হয়তো নিজৰ মুখ ঢাকিবলৈ পুটিনে ৰাছিয়াৰ সৈন্যবাহিনীৰ জেনেৰেল সলনি কৰিবলৈ বাধ্য হ’ল। 

এতিয়া নতুন জেনেৰেল যে অধিক নৃশংস হৈ পৰিব আৰু ইউক্ৰেনৰ আকাশ বতাহত ক্ৰন্দন বাৰুদৰ ধোঁৱাৰ সৈতে উৰি ফুৰিব – সেয়া সকলোৱে অনুমান কৰিছে। সেইহেতুকেই বৃটেইনৰ প্ৰধানমন্ত্ৰী বৰিছ জনছন-এ ইউক্ৰেন ভ্ৰমণ কৰি ঝেলেনস্কিক বিপুল পৰিমাণে অত্যাধুনিক অস্ত্ৰ-শস্ত্ৰ যোগানৰ প্ৰতিশ্ৰুতি দি আহিছে। ইতিমধ্যে ৰাছিয়াৰ নতুন জেনেৰেল আলেকজেণ্ডাৰে অহা ৯ মে’ তাৰিখৰ আগতেই পুটিনক শুভ সংবাদ দিবলৈ সকলো ধৰণে চেষ্টা চলাব বুলি আন্তৰ্জাতিক সংবাদ মাধ্যমত প্ৰকাশ পাইছে। ৯ মে’ তাৰিখেই, দ্বিতীয় বিশ্বযুদ্ধৰ সময়ত, ৰাছিয়াই জাৰ্মানী জয় কৰিছিল। কিন্তু বিশেষজ্ঞসকলে ধাৰণা কৰিছে যে অধিক তৎপৰতা দেখুৱাবলৈ গৈ ৰাছিয়াৰ সৈন্যই অধিক ভুল সিদ্ধান্ত ল’ব পাৰে। 
(১৭-০৪-২০২২)