মোডীলৈ মুকলি চিঠি ১০৮ গৰাকী প্ৰাক্তন আমোলাৰ

ঘৃণা আৰু বিদ্বেষৰ পৰিৱেশত আমি ভীতিবিহ্বল

সংখ্যালঘু আৰু দুৰ্বল মানুহক নতুনকৈ জীৱন আৰু স্বাধীনতাৰ আশ্বাস দিয়াৰ প্ৰয়োজন বুলি প্ৰধানমন্ত্ৰীক মুকলিকৈ জনালে ১০৮ গৰাকী অৱসৰপ্ৰাপ্ত আমোলাই।

সমগ্ৰ ভাৰত জুৰি সংখ্যালঘু সকলৰ প্ৰতি বিদ্বেষ আৰু অসহিষ্ণুতাৰ পৰিস্থিতি সৃষ্টিৰ প্ৰচেষ্টাক লৈ উদ্বেগ প্ৰকাশ কৰিলে অৱসৰপ্ৰাপ্ত আমোলাসকলৰ একাংশই। ২৬ এপ্ৰিল, ২০২২, মঙলবাৰে প্ৰধানমন্ত্ৰী নৰেন্দ্ৰ মোদীক তেওঁলোকৰ আশংকাৰ বিষয়ে জনাই মুকলি চিঠি লিখিছে অৱসৰপ্ৰাপ্ত বিষয়াসকলে। চিঠিখনত স্বাক্ষৰ কৰিছে ১০৮ জন অৱসৰপ্ৰাপ্ত আই-এ-এছ, আই-এফ-এছ, আই-আৰ-এছ আমোলাই।

প্ৰধানমন্ত্ৰী নৰেন্দ্ৰ মোদীক উদ্দেশ্যে কৰি লেখা সেই চিঠিত দিল্লী, অসম, গুজৰাট, হাৰিয়ানা, কৰ্ণাটক, মধ্যপ্ৰদেশ, উত্তৰপ্ৰদেশ, আৰু উত্তৰাখণ্ডৰ সাম্প্ৰতিক অশান্তিৰ প্ৰসঙ্গৰ উল্লেখ কৰি তেওঁলোকে কৈছে, ‘ যি যি ঘটিছে সেয়া ভাৰতীয় সংবিধানৰ মৌলিক নীতি আৰু আইনৰ শাসনৰ পৰিপন্হী। এইবোৰ স্থানত সংখ্যাগৰিষ্ঠৰ আধিপত্যবাদ ক্ৰমশঃ প্ৰতিস্থিত হৈছে।’ উল্লেখযোগ্য যে উল্লেখিত প্ৰতিখন ৰাজ্য বিজেপি শাসিত আৰু কেন্দ্ৰীয় চৰকাৰৰ অধীনত আছে দিল্লীৰ পুলিচ।

crop businessman giving contract to woman to sign

এই পৰিস্থিতিত সমাজৰ সংখ্যালঘু আৰু দুৰ্বল মানুহক নতুনকৈ জীৱন আৰু স্বাধীনতাৰ আশ্বাস দিয়াৰ প্ৰয়োজন বুলি প্ৰধানমন্ত্ৰীক মুকলিকৈ জনালে ১০৮ জন অৱসৰপ্ৰাপ্ত আমোলাই। সংখ্যালঘু সম্প্ৰদায়ৰ মানুহে যাতে নিজৰ পোছাক, খাদ্যাভ্যাস আৰু সংস্কৃতি বজাই ৰাখিব পাৰে, তাৰবাবে অবিলম্বে চৰকাৰী পদক্ষেপ গ্ৰহণৰ বিষয়েও তেওঁলোকে কৈছে। লগতে আশাভঙ্গৰ কথা জনাই চিঠিত লিখিছে, ‘ঘৃণা আৰু বিদ্বেষৰ এনে এক ভয়াবহ পৰিৱেশত সংখ্যালঘু সকলৰ মনত ভয় অধিক প্ৰৱল হৈ পৰিছে।’

মোডী চৰকাৰৰ আমোলত ভাৰতৰ সংখ্যালঘু, দলিত, দৰিদ্ৰ আৰু প্ৰান্তিক জনগোষ্ঠীক ঘৃণাৰ লক্ষ্যবস্তুত পৰিণত কৰি পৰিকল্পিতভাৱে তেওঁলোকক মৌলিক অধিকাৰৰ পৰা বঞ্চিত কৰা হৈছে বুলিও মুকলি চিঠিত অভিযোগ কৰা হৈছে। তেওঁলোকৰ দীঘলীয়া সময়ৰ অভিজ্ঞতাৰ ভিত্তিত অৱসৰপ্ৰাপ্ত আমোলা সকলে দাবী কৰিছে,’ সৰ্বোচ্চ স্তৰৰ ৰাজনৈতিক অনুমোদন অবিহনে এনে পৰিৱেশ সৃষ্টি হোৱা সম্ভৱ নহয়।’ দিল্লীৰ জাহাঙ্গিৰপুৰীৰ সাম্প্ৰতিক ঘটনাত উচ্চতম ন্যায়ালয়ৰ নিৰ্দেশ উপেক্ষা কৰি যিধৰণে কেইবা ঘন্টা ধৰি পে-লোডাৰৰ দ্বাৰা নিৰ্মাণ ভাঙি দিয়া হৈছে, তাৰে অন্তৰালত ‘সুনিৰ্দিষ্ট ৰাজনৈতিক অভিসন্ধি’ থকা বুলি তেওঁলোকে অভিযোগ কৰিছে।

চিঠিৰ শেষত স্বাধীনতাৰ অমৃত মহোৎসৱৰ পটভূমিত সাংবিধানিক দায়িত্ব পালন কৰাৰ ক্ষেত্ৰত সক্ৰিয় হ’বলৈ প্ৰধানমন্ত্ৰীক আহ্বান জনাইছে অৱসৰপ্ৰাপ্ত আমোলাসকলে।

উল্লেখযোগ্য যে এই ১০৮ গৰাকী প্ৰাক্তন আমোলাৰ ভিতৰত আছে প্ৰাক্তন বৈদেশিক সচিব সুজাতা সিং, প্ৰাক্তন ৰাষ্ট্ৰীয় সুৰক্ষা উপদেষ্টা শিৱশঙ্কৰ মেনন, প্ৰাক্তন গৃহ সচিব জি-কে-পিল্লাই, দিল্লীৰ প্ৰাক্তন লেফটেনেন্ট গৱৰ্ণৰ নাজিব জং, প্ৰাক্তন প্ৰধানমন্ত্ৰী মনমোহন সিঙৰ প্ৰধান সচিব টি-কে-এ নায়াৰ ইত্যাদি।

27-04-2022

Mahabahu.com is an Online Magazine with collection of premium Assamese and English articles and posts with cultural base and modern thinking.