মোবাইল আসক্তৰ বাবে মাঞ্চেস্টাৰত পৃথক ৰাস্তা

মোবাইল আসক্তৰ পৃথক ৰাস্তা

এনে কিছুমান মানুহ আছে, যিসকলে ঘনে ঘনে মোবাইল ফোনৰ পৰ্দাখনত দৃষ্টি নিক্ষেপ কৰিবলৈ অক্ষম হ’লে ছটফটাই থাকে। কাৰণে – অকাৰণে মোবাইল ফোন পিটিকি থকাটো এনে কিছুমান মানুহৰ বাবে এৰিব নোৱাৰা আসক্তিত পৰিণত হৈছে। মোবাইল কাণত থকা অৱস্থাতে তেওঁলোকে প্ৰচন্ড গতিৰে গাড়ী অহা-যোৱা ৰাস্তাও পাৰ হয়। গাড়ী ঘোঁৰা মটৰ-চাইকেলে তেওঁলোকৰ দেহত ঘহনি খুৱাব বিচাৰিলেও তেওঁলোকে গমকেই নাপায় – ইমানেই ব্যস্ত তেওঁলোক!

গান শুনি শুনি, বাৰ্তালাপ কৰি কৰি, মোবাইলৰ পৰ্দালৈ দৃষ্টি নিক্ষেপ কৰি কৰি অতি ব্যস্ত ৰাস্তা পাৰ হৈ তেনেবোৰ মানুহে যে নিজেই নিজৰ বিপদ মাতি আনিছে, বুজিব নিবিচাৰে বা বুজি নাপায়, অথবা বুজিও নুবুজে। কেৱল পথাচাৰী সকলক দোষ দি লাভ নাই, গাড়ী চলাই থকা অৱস্থাতো বহু চালকে ঘনে ঘনে মোবাইলৰ পৰ্দাত দৃষ্টি নিক্ষেপ কৰে, কথা পাতি থাকে।

আমেৰিকাৰ এখন বিশ্ববিদ্যালয়ে ডেৰ বছৰৰ আগতে এক সমীক্ষা প্ৰকাশ কৰি জনাইছিল, ২০০১ চনৰ পৰা ২০০৭ চন পৰ্যন্ত মোবাইল ফোনত ‘টেক্সট্ মেছেজ’ চাই থাকোতে আৰু কথা পাতি থাকোতে ১৬০০০ মানুহে পথ দুৰ্ঘটনাত মৃত্যুবৰণ কৰিছে। কিন্তু তেনে বিষয় গুৰুত্ব দিয়ে কোনে!

ইতিহাস ৰচি মাউণ্ট কাঞ্চনজংঘাৰ শিখৰত ‘গামোছা’ উন্মোচন কৰা অসমীয়া পৰ্বতাৰোহী দলক পাঠশালাত উষ্ম আদৰণি

June 4, 2023

All About Domestic Abuse and Violence

June 4, 2023

The Dangers of AI is Coming: Beware!

June 4, 2023

আজিৰ এনে সৰ্বগ্ৰাসী মোবাইল সভ্যতাৰ দিনত, মদাহীৰ মদৰ প্ৰতি থকা নিচাৰ দৰেই, বিশাল সংখ্যক জনসাধাৰণে মোবাইলৰ নিচাৰে নিচাসক্ত হৈ পৰিছে। তেওঁলোকে ৰাস্তা ঘাট পাৰ হৈ থাকোতে বা গাড়ী চলাই থাকোত গাড়ী চাইকেল মানুহ আদি একোকে দেখা নাপায়। ইমানেই নিচা! এতিয়া তেনেবোৰ মানুহৰ কথা চিন্তা কৰিয়েই লন্ডনৰ উপকন্ঠ‌ মাঞ্চেস্টাৰত এটা ৰাস্তা নিৰ্মাণ কৰা হৈছে।‌ মাঞ্চেস্টাৰৰ স্পিনিংফিল্ডচ্ অঞ্চলত দুটাকৈ ৭৫ ফুটৰ ৰাস্তা ফুটপাথৰ সমান্তৰালকৈ নিৰ্মাণ কৰা হৈছে মোবাইল আসক্তসকলৰ কথা চিন্তা কৰিয়েই। মাঞ্চেস্টাৰৰ পৌৰসভাই দাবী কৰিছে যে এনে ৰাস্তাত মোবাইল ফোন ব্যৱহাৰ কৰিলে কোনোধৰণৰ বিপদ নাই।

চোছিয়েল মেডিয়াত প্ৰচাৰ হোৱা এক ভিডিঅ’ত দেখা গৈছে, মসৃণ আৰু গাড়ী-চাইকেল আদিৰ চলাচল নথকা এক ৰাস্তাৰে নিশ্চিন্ত মনেৰে ফোনৰ পৰ্দাত চকু থৈ মোবাইলপ্ৰেমীয়ে খোজ কাঢ়িছে। ৰাস্তাৰ নামাকৰণ কৰা হৈছে ‘শ্লো লেন’। পৌৰ নিগমে ছাইনবোৰ্ড লগাই দি ঘোষণা কৰিছে যে এইছোৱা পথ কেৱল মোবাইল ফোন ব্যৱহাৰকাৰী সকলৰ বাবেহে।

বিভিন্ন সমীক্ষাৰে গম পোৱা গৈছে যে তথ্য বিস্ফোৰণৰ এই যুগত হাতৰ মুঠিত থকা সাধাৰণ মোবাইল ফোনটো কেৱলমাত্ৰ আড্ডা, বিনোদন, সময় অতিবাহিত কৰা আহিলা বা ভিডিঅ’ গেম খেলাৰ উপকৰণ নহয়। পৃথিৱীৰ বিভিন্ন তথ্য পলকতে আহৰণ কৰাৰ এক নিচাইও মানুহক গ্ৰাস কৰিছে আৰু তাৰফলত অসাৱধানবশতঃ চেলফি তুলিবলৈ গৈ বা গেম খেলি থাকোতে অথবা প্ৰয়োজনীয় তথ্য আহৰণ কৰি থাকোতে দুৰ্ঘটনাৰ চিকাৰ হৈছে বিভিন্ন মানুহ।

সাম্প্ৰতিক এক গৱেষণা অনুসৰি কেৱল বৃটেইনতেই ৭৫% মানুহে ৰাস্তা পাৰ হৈ থকাৰ সময়তো মোবাইল ফোনত চকু ৰাখি বা কাণ পাতি পাৰ হয়। এনেদৰে পাৰ হওতে অইনক খুন্দা মাৰা মানুহৰ সংখ্যা প্ৰায় ৬৫% । সমীক্ষামতে এইসকলৰ ৩৮% মানুহে অইনক খুন্দা মৰাৰ পিছত অনুতপ্ত বোধ কৰি ‘ছৰি’ বুলি কয়, কিন্তু অইন ২৭% মানুহে তেনেদৰে ক’বলৈও সময় নাপায়!

Mahabahu.com is an Online Magazine with collection of premium Assamese and English articles and posts with cultural base and modern thinking.