সম্ভাজী ৰাজে, অসম চুক্তিৰ ৬ নং দফা কমিটী, ইত্যাদি

অসম চুক্তিৰ ৬ নং দফা কমিটী

দিলীপ দৈমাৰী

মহাৰাষ্ট্ৰৰ কোলহাপুৰৰ বাসিন্দা, ৰাজ্যসভাৰ সদস্য সম্ভাজী ৰাজে ছত্ৰপতিয়ে লিখিত প্রশ্নৰ যোগেদি অসম চুক্তিৰ ৬ নং দফা ৰূপায়ণ কমিটীৰ কেইটামান বিষয় জানিব বিচাৰিছিল; সাংসদজন হ’ল বিজেপি দলৰে সাংসদ।

সম্ভাজী ৰাজে ছত্ৰপতিৰ মাৰাঠা মহাবীৰ ছত্ৰপতি শিৱাজীৰ বংশধৰ। ছত্ৰপতি শিৱাজীৰ তেওঁ প্ৰত্যক্ষভাৱে ত্ৰয়োদশ বংশধৰ ।

তাৰোপৰি তেওঁ কোলহাপুৰৰ ছত্ৰপতি শ্বাহ’ মহাৰাজৰ আজো নাতি।

তেওঁ ভাৰতীয় জনতা পাৰ্টীৰ সদস্য আৰু ২০১৬ চনত সেইসময়ৰ ৰাষ্ট্ৰপতি প্ৰণৱ মুখাৰ্জীয়ে তেওঁক ৰাজ্যসভালৈ মনোনীত কৰিছিল। গতিকে তেখেতৰ এক সুকীয়া মৰ্যদা আছে।

ছত্ৰপতিৰ লিখিত প্ৰশ্নৰ উত্তৰত বুধবাৰে, ১৬ নৱেম্বৰ ২০২০ তাৰিখে কেন্দ্ৰীয় গৃহ ৰাজ্য মন্ত্ৰীয়ে তেওঁক জনায় যে ‘অসম চুক্তি’ৰ ৬ নং দফা ৰূপায়ণ কমিটীৰ প্ৰতিবেদন এতিয়াও অসম চৰকাৰৰ জিম্মাত আছে আৰু অসম চৰকাৰে এতিয়াও প্ৰেৰণ কৰা নাই, পৰ্যালোচনা কৰি আছে, ইত্যাদি।

গতিকে, কেন্দ্ৰীয় চৰকাৰে গঠন কৰা উচ্চস্তৰীয় ৬ নং দফা কমিটিক কি মৰ্যদা চৰকাৰে দিছে, সেয়া আৰু বুজাই লাভ নাই। প্ৰতিবেদন দিল্লীয়েও গ্ৰহণ নকৰিলে আৰু সদৌ অসম ছাত্ৰ সন্থাৰ প্ৰাক্তন সভাপতি- সোণৰ অসম নিৰ্মাণ কৰা অগপৰ প্ৰাক্তন বিধায়ক-জাতীয় নায়ক- অসমৰ মুখ্যমন্ত্ৰী সোণোৱালেও আলমাৰীত সুমুৱাই থৈ দিলে!

অথচ, ছাত্ৰ সন্হাত থাকোতে, অগপত থাকোতে, নিৰ্বাচনৰ সময়ত – সোণোৱালৰ উত্তপ্ত ভাষণৰ প্ৰতিধ্বনি এতিয়াও মাৰ যোৱা নাই! সেইকাৰণে, এতিয়া অইনৰ লম্ফ-জম্ফৰ প্ৰতিও মানুহৰ মোহভঙ্গ হৈছে।

হায় শ্বহীদ! হায় অসম আন্দোলন!

আন্দোলনৰ বোকোচাত উঠি নেতাসকলৰ সৰহভাগেই নিজৰ কেৰিয়াৰ নিৰ্মাণ কৰিলে, দিল্লী-গুৱাহাটীত ঘৰ সাজিলে, দৰমহা ললে, বহুতে বিধায়ক-সাংসদৰ পেঞ্চন ভোগ কৰি আছে, তিনিপুৰুষলৈ লক-ডাউন হৈ থাকিলেও তেওঁলোকে সুন্দৰকৈ চলিব পাৰিব!

কিন্তু বাৰম্বাৰ অসম আন্দোলনৰ শাখা-প্ৰশাখা বাহিৰ কৰি, শ্বহীদৰ নাম লৈ এইবোৰ ভেকোভাওনা কৰি থাকিবলৈ তেওঁলোকে লাজ কৰা উচিত।

সোণোৱালৰ ভাষণ, তপন গগৈৰ ভাষণ, অতুল বৰাৰ ভাষত, প্ৰফুল্ল কুমাৰ মহন্তৰ ভাষণ, ….একে গছত এতিয়া আৰু বেলেগ ফল লাগিব বুলি মূৰ্খইহে ভাবিব! সম্ভাজী ৰাজে ডাঙৰীয়াক আন্তৰিক অভিনন্দন জ্ঞাপন কৰিলো, অন্ততঃ তেওঁ যে কিবা কাৰণত প্ৰশ্ন উত্থাপন কৰিছিল বাবেহে জানিলো!!

হায় অসমৰ সাংসদ!! নাগৰিক পঞ্জীৰো একেই দশা!

অথচ কিমান সময় সকলোৰে নষ্ট হ’ল – যিদৰে বিমুদ্ৰাকৰণৰ সময়ত নষ্ট হ’ল! আহক, সকলোৱে আৰু এবাৰ কাঁহী-বাতি বজাও!!

[First published on 15-08-2022]

Mahabahu.com is an Online Magazine with collection of premium Assamese and English articles and posts with cultural base and modern thinking. You can send your articles to editor@mahabahu.com / editor@mahabahoo.com ( For Assamese article, Unicode font is necessary)