হিতেশ ডেকা দেৱৰ আজি মৃত্যু দিৱস

হিতেশ ডেকা

কুমাৰ দীপক দাস

অসমৰ এগৰাকী সুসাহিত্যক ,বিশিষ্ট বুদ্ধিজীবি ,শিক্ষাবিদ , অসমৰ ভাষা সংস্কৃতি তথা অস্তিত্ব ৰক্ষা আন্দোলনৰ হোতা আৰু ইয়াৰ সক্ৰিয় আৰু সতৰ্ক প্ৰহৰি , অসম সাহিত্য সভাৰ প্ৰাক্তন সভাপতি আৰু আমাৰ সকলোৰে শ্ৰদ্ধাৰ স্বনামধন্য হিতেশ ডেকা দেৱৰ আজি মৃত্যু দিৱস ৷ আজিৰ এই পবিত্ৰ দিনটোত এই গৰাকী মহানুভৱৰ পবিত্ৰ স্মৃতিত আন্তৰিক শ্ৰদ্ধাঞ্জলি যাচিছোঁ ৷

এই গৰাকী অসমৰ জাতীয় আন্দোলনৰ গুৰি ধৰোঁতা ব্যক্তিৰ ১৯২৪ চনৰ ১৮ ফেব্ৰুৱাৰীত অসমৰ বৰপেটা জিলাৰ অন্তৰ্গত সৰ্থেবাৰীত জন্ম হৈছিল।
হিতেশ ডেকাদেৱে সৰ্থেবাৰীতে প্ৰাথমিক আৰু মাধ্যমিক শিক্ষা লাভ কৰে । ১৯৪৮ চনত সৰ্থেবাৰী হাইস্কুলৰ পৰা প্ৰবেশিকা পৰীক্ষাত উত্তীৰ্ণ হয়। ১৯৫২ চনত নলবাৰী মহাবিদ্যালয়ৰ পৰা স্নাতক পৰীক্ষাত উত্তীৰ্ণ হয়। ১৯৫৪ চনত তেখেতে কনিহা হাইস্কুলৰ শিক্ষকৰূপে কৰ্মজীৱন আৰম্ভ কৰে। পাছত কেইবাখনো বিদ্যালয়ত শিক্ষকতা কৰি ১৯৮৫ চনত তেওঁ অৱসৰ গ্ৰহন কৰে।

এগৰাকী সমাজ সচেতন আৰু জাতীয়তাবাদী মনৰ ব্যক্তি হোৱা বাবে শ্ৰদ্ধেয় ডেকাদেৱ অসমৰ প্ৰতিটো জাতীয় সন্ধিক্ষনত সক্ৰিয়তাৰে মাত মাতিছিল আৰু সমুখত আহি থিয় হৈছিল ৷ ১৯৬০ চনৰ ৰাজ্যভাষা আন্দোলনৰ তেখেত এগৰাকী সক্ৰিয় কৰ্মী আছিল। তেওঁ ১৯৭২ চনৰ মাধ্যম আন্দোলনত ওতঃপ্ৰোতভাবে জড়িত আছিল। ছয় বছৰীয়া বিদেশী বহিস্কাৰ আন্দোলনত অসম সাহিত্য সভাৰ প্ৰতিনিধি হিচাপে দিল্লীৰ আলোচনাত কেইবাবাৰো অংশ গ্ৰহন কৰিছিল।

তেওঁ সদৌ অসম হাইস্কুল শিক্ষক সন্থাৰ উপ-সভাপতি, সদৌ অসম কবি সন্মিলনৰ উপদেষ্টা আদি বিভিন্ন সাহিত্য, সামাজিক আৰু সাংস্কৃতিক অনুষ্ঠানৰ লগত বিশেষ ভাবে জড়িত আছিল৷ স্বনামধন্য হিতেশ ডেকা অসমৰ এগৰাকী প্ৰথিতযশা ঔপন্যাসিক ৷ অসমৰ সাহিত্য জগতলৈ আগবঢ়োৱা বিশেষ বৰঙণিৰ বাবে অসম সাহিত্য সভাই হিতেশ ডেকাদেৱক ১৯৯৫ চনৰ সৰ্থেবাৰী অধিবেশনৰ সভাপতি পদত অধিস্থিত কৰিছিল ।
হিতেশ ডেকাদেৱৰ ২০০০ চনৰ ৩০ আগষ্টত মৃত্যু হয়।

## হিতেশ ডেকাদেৱৰ ৰচনাৰাজি

# উপন্যাস
আজিৰ মানুহ
নতুন পথ
ভাৰাঘৰ
মাটি কাৰ
এয়েতো জীৱন (তিনি খণ্ড)
বৈৰী মানুহ
জীৱন সংঘাত
সীমাৰ কাজিয়া
ইতিহাসে সকীয়াই
সুখৰ সংসাৰ
নিৰ্যাতিতা সতী
গাঁৱৰ মানুহ
আচল মানুহ
কামপত্নী
ত্যাগ
বাঁৰীৰ কোঁৱৰ
সাহসী ল’ৰা