হিমালয়ৰ এগৰাকী গুৰুৰ সান্নিধ্যতঃ এজন যোগীৰ আত্মকথা

মোহন খাউণ্ড

Apprenticed to a Himalayan Master: A Yogi’s Autobiography নামেৰে শ্ৰী এম-এ লেখা অসাধাৰণ কিতাপখনৰ বিষয়ে আধ্যাত্মিক জগতখনত ইতিমধ্যে বহুল চৰ্চা হৈছে।

কিতাপখনৰ লেখক শ্ৰী ‘এম’ এজন অসাধাৰণ ব্যক্তি।

তেওঁৰ স্বকীয়তা কেৱল এইটোৱেই নহয় যে চেমনীয়া কালতেই তেওঁ কেৰালাৰ পৰা বৰফেৰে আবৃত হিমালয়লৈ যাত্ৰা কৰিছিল, আৰু তাতেই তেওঁ এজন ‘বাস্তৱ সময়ৰ’ যোগী বাবাজীৰ লগত কেইবাবছৰ ধৰি বাস কৰিছিল তথা তেওঁৰ বৰ্তমান কালৰ জন্ম আৰু পূৰ্বজন্মৰ প্ৰতি লক্ষ্য ৰাখি মহান গুৰুজনাৰ নিৰ্দেশত তেওঁ এনে এক অস্বাভাৱিক আৰু দুঃসাহসিক অন্বেষণ হাতত লৈছিল।

london eye over the river thames in london england

“I felt like a big monster lived in my head, it’s like a lot of radio stations playing at the same time” : Adam Atkinson

March 23, 2023

Paper Leak in Recruitment Exams in the Country!

March 23, 2023

An eviction of Dreams – will the unity of the people herald in a different tomorrow?

March 23, 2023

উপনিষদৰ গভীৰ জ্ঞান আৰু গভীৰ ব্যক্তিগত অন্তৰ্দৃষ্টিসম্পন্ন যোগী, উচ্চ পৰ্যায়ৰ চেতনাৰে, প্ৰত্যক্ষ অভিজ্ঞতাৰ পৰা আৱিৰ্ভূত হোৱা মুমতাজ আলীৰ শ্ৰী ‘এম’লৈ ৰূপান্তৰ সঁচাকৈয়ে এক মনোমোহা কাহিনী।

যোগ, ধ্যান আৰু আধ্যাত্মিকতাৰ ৰহস্যৰ প্ৰতি আগ্ৰহীসকলৰ বাবে উল্লেখযোগ্য হ’ল এয়াই যে শ্ৰী ‘এম’ এতিয়াও জীয়াই আছে আৰু তেওঁৰ সাক্ষাৎ পাব পাৰি। তেওঁ স্বাভাৱিক জীৱন যাপন কৰে, দুটা সন্তানৰ পিতৃ, কোনো বিশেষ চোলা এতিয়ালৈকে পিন্ধা নাই আৰু আড়ম্বৰ বা সামগ্ৰী অবিহনে জীৱন নিৰ্বাহ কৰে।

শেহতীয়াকৈ তেওঁক লগ পোৱা কোনোবাই কৈছিল, “মই আশা কৰিছিলো তেওঁ হ’ব এজন জলমলাই থকা তথাকথিত ‘গডমেন’ ; কিন্তু তাৰ পৰিৱৰ্তে মই দেখিলো মুখত হাঁহি এটা লৈ এজন জিন পিন্ধা ভদ্ৰলোকক – যিজনাই মোৰ সমস্যাৰ বিষয়ে আলোচনা কৰিবলৈ সাজু।

পাঁচ মিনিট সময় পাৰ নৌহওঁতেই মই মনতে ক’লোঁ, এইজনা কোনো সাধাৰণ মানুহ নহয়। তেওঁৰ সান্নিধ্যৰে যে শান্তি পাব পাৰি – সেয়া স্পষ্ট”।

জন্মসূত্ৰে মুছলমান শ্ৰী এম ( মুমতাজ আলী খান) কম বয়সতে বৈদিক শিক্ষাৰ প্ৰতি আকৰ্ষিত হৈছিল।

৯ বছৰ বয়সত তেওঁ গুৰুজনক লগ পাইছিল আৰু ১৯ বছৰ বয়সত ঘৰ এৰি হিমালয়ত থাকিবলৈ লৈছিল, য’ত তিনিবছৰ গুৰুৰ লগত থকাৰ আগতে বহু সন্ত আৰু ঋষিক লগ পাইছিল।

এম কৃষ্ণমূৰ্তি ফাউণ্ডেশ্যনৰ প্ৰাক্তন ট্ৰাষ্টী হিচাপে বিখ্যাত ঋষি ভেলী স্কুলৰ সৈতেও তেওঁ জড়িত হৈ আহিছে। কোনো নিৰ্দিষ্ট ধৰ্ম বা পৰম্পৰা বাছি লোৱাতকৈ এম-এ সকলো ধৰ্মৰ সাৰ্বজনীন মৰ্ম শিকাইছে।

এম সৎসঙ্গ ফাউণ্ডেশ্যনৰ প্ৰতিষ্ঠাপক।

ফাউণ্ডেশ্যন আৰু ইয়াৰ উদ্দেশ্যৰ বিষয়ে সোধাত তেওঁ উত্তৰ দিছিল, “সংস্কৃতত পবিত্ৰ সংগ বুলি তাক কোৱা হয়, সেয়াই সৎসঙ্গ। সৎসঙ্গ গুৰুত্বপূৰ্ণ, কাৰণ পবিত্ৰ সংগৰ সান্নিধ্যৰ বাবে আমি সকলো পৰিস্থিতি আৰু বিক্ষিপ্ততা অতিক্ৰম কৰি আমাৰ জীৱনৰ প্ৰকৃত উদ্দেশ্যত উপনীত হওঁ আৰু জগতখনক উন্নীত কৰোঁ। পবিত্ৰ সংগ কেৱল সন্ত আৰু ঋষি আৰু অন্যান্য আন্তৰিক আধ্যাত্মিক সাধকৰ সৈতেই নহয়, আটাইতকৈ গুৰুত্বপূৰ্ণ কথাটো হ’ল আমাৰ প্ৰকৃত আত্মাৰ সৈতে, আমাৰ নিজৰ আত্মাৰ সৈতে, আমি গভীৰভাৱে প্ৰৱেশ কৰা আৰু ঐশ্বৰিক সত্তাৰ সৈতে চূড়ান্ত মিলন লাভ কৰা। সেইটোৱেই সকলো প্ৰাৰ্থনা, ধ্যান আৰু আধ্যাত্মিক অনুশীলনৰ লগতে সকলো ধৰ্মৰ লক্ষ্য।”

এইবোৰ সকলো ক’ব পৰা শ্ৰী এমে ভাৰতৰ দক্ষিণ উপকূলৰ পৰা ৰহস্যময় হিমালয় পৰ্বতমালালৈ যুৱক হিচাপে কৰা মনোমোহা যাত্ৰাৰ বিষয়ে আত্মজীৱনীখনত লিখিছে।

প্ৰায় ঊনৈশ বছৰ বয়সত তেওঁৰ মহান প্ৰভুৰ সন্ধানত হিমালয়লৈ যোৱাৰ এক অপ্ৰতিৰোধ্য হেঁপাহ অনুভৱ হৈছিল।

অৱশেষত তেওঁ বদ্ৰীনাথ মন্দিৰৰ সিপাৰে থকা ব্যাস গুহাত নিজৰ গুৰুদেৱক লগ পালে। হিমালয়ৰ পৰ্বতমালাৰ দৈৰ্ঘ্য আৰু প্ৰস্থৰ মাজেৰে মুক্তভাৱে বিচৰণ কৰি নিজৰ প্ৰভুৰ লগত তিনি বছৰৰো অধিক সময় কটোৱাৰ পিছত তেওঁক পুনৰ ভৈয়ামত থাকিবলৈ আৰু স্বাভাৱিক জীৱন যাপন কৰিবলৈ নিৰ্দেশ দিয়া হৈছিল।

তেওঁ জীৱিকাৰ বাবে কাম কৰিবলৈ আৰম্ভ কৰিলে, সামাজিক প্ৰতিশ্ৰুতি পূৰণ কৰিলে আৰু তেওঁ শিকি অহা আৰু অভিজ্ঞতা লাভ কৰা সকলোবোৰ আনক শিকাবলৈ নিজকে প্ৰস্তুত কৰিলে।

এই গ্ৰন্থখনে কেৰালাৰ এজন ডেকা ল’ৰাৰ আধ্যাত্মিক যাত্ৰাৰ বিষয়ে উন্মোচন কৰিছে, যিজনে নিজৰ আন্তৰিকতা আৰু নিষ্ঠাৰ দ্বাৰা এজন জীৱন্ত যোগীলৈ বিকশিত হৈছিল। শ্ৰী এমে উপনিষদৰ বিষয়ে তেওঁৰ জ্ঞান আৰু প্ৰত্যক্ষ অভিজ্ঞতাৰ পৰা জন্ম হোৱা আধ্যাত্মিক অন্তৰ্দৃষ্টি তেওঁৰ আত্মজীৱনীত বিধৌত কৰিছে।

হিমালয়ৰ এজন অসাধাৰণ গুৰুৰ সান্নিধ্যৰে পৰিপক্ক হোৱা শ্ৰী এমৰ জীৱন আৰু শিক্ষাৰ প্ৰতি যিসকল আগ্ৰহী, সেইসকলৰ বাবে এই গ্ৰন্হখন এক আকৰ্ষণীয় দস্তাবেজ হোৱাটো খাটাং।

কেৰেলাৰ ত্ৰিবেন্দ্ৰমত মুমতাজ আলী হিচাপে জন্মগ্ৰহণ কৰা শ্ৰী এমে পাঠকক লৈ যায় তেওঁৰ জীৱন যাত্ৰাত জন্মগ্ৰহণ কৰা এজন মুছলমানৰ পৰা আধ্যাত্মিক শিক্ষকলৈকে, হিন্দু দৰ্শন আৰু শিক্ষাৰ এক অসাধাৰণ ক্ষেত্ৰলৈ। উল্লেখযোগ্য যে শ্ৰী এমক আধ্যাত্মিকতাৰ ক্ষেত্ৰত বিশিষ্ট সেৱা আগবঢ়োৱাৰ বাবে ২০২০ চনত ‘পদ্মভূষণ’ বঁটাও প্ৰদান কৰা হৈছে।

এজন যোগীক সাধাৰণতে যোগ আৰু ধ্যান সাধক বুলি ক’ব পাৰি আৰু মই ধৰি লৈছিলো যে কিতাপখনৰ শিৰোনাম পঢ়িলে সেইটোৱেই হ’ব। এই কিতাপখন আৰম্ভ কৰিবলৈ আৰু তাৰ পিছত শেষ কৰিবলৈ মোক প্ৰেৰণা দিয়া আন এটা কথা হ’ল আধ্যাত্মিকভাৱে বিকশিত হোৱা বুলি দাবী কৰা লোকসকলে নিজৰ জীৱনৰ বিষয়ে কি ‘শ্বেয়াৰ’ কৰিব সেয়া বুজি পোৱা।

লেখকে প্ৰস্তাৱনা অংশত পাঠকক সকীয়াই দিছে যে এই কিতাপখন কেইজনমান মানুহৰ বাবে ‘বিশ্বাস কৰিব নোৱাৰাকৈ অদ্ভুত’ যেন লাগিব পাৰে। এই কথা লিখা নহ’লে প্ৰথম কেইটামান অধ্যায়ৰ পিছত কিতাপখন উলাই কৰি পেলালোহেতেন। গতিকে, লেখকৰ সতৰ্কবাণীয়ে লেখকে ভাগ কৰা কেইবাটাও অভিজ্ঞতা হজম কৰাটো সম্ভৱ কৰি তুলিছে।

এই বিখ্যাত গ্ৰন্থখন অসমীয়ালৈ অনুবাদ কৰিছে অঞ্জন শৰ্মাই। অনুবাদকে কৈছে, ‘শ্ৰী এম’- এই নামটোতেই যেন অন্তৰ্লীন হৈ আছে গুঢ় ৰহস্য। হয়, আমাৰ দৰে সৰ্বসাধাৰণৰ ধ্যান-ধাৰণা, চিন্তা -ভাৱনাৰ জগতখনৰ পৰা বহু বহু যোজন নিলগৰ এক বিশাল সত্তা ‘শ্ৰী এম’!

২০২৩ চনৰ ফেব্ৰুৱাৰী মাহৰ দ্বিতীয় সপ্তাহত এই গ্ৰন্হখন হাতত পৰাৰ লগে লগেই ৫০ টা অধ্যায়ৰ গ্ৰন্হখন সমাপ্ত কৰিব নোৱৰালৈ শান্তি নাপালো, আৰু সমাপ্ত হোৱাৰ পিছত অনুভৱ কৰিলো এক অনিৰ্বচনীয় শান্তি! আঃ, কি এক অসাধাৰণ যাত্ৰা। উজুটি নোখোৱা সৰল অনুবাদৰ বাবে শ্ৰী এম-এ নিজে বৰ্ণনা কৰি থকা যেন লাগিল। অনুবাদক শ্ৰীশৰ্মাক আন্তৰিক ধন্যবাদ।

কিতাপখনৰ প্ৰকাশক বাঙ্গালুৰুৰ মেজেন্টা প্ৰেছ এন্ড পাব্লিকেশ্যন প্ৰাইভেট লিমিটেড, ছপাৰ মানদন্ড অনন্য – ছপা হৈছে বিখ্যাত থমছন প্ৰেছ( Thomson Press)ত। কিতাপখনৰ মূল্য ৪৭০/- টকা; আৰু প্ৰাপ্তিস্থানঃ বান্ধৱ, পানবজাৰ, গুৱাহাটী-৭৮১০০১ (ফোনঃ 8135982641)

এই পাঠক গ্ৰন্হ সমালোচক নহয়, এজন সৰল পাঠক। পঢ়ি ভাল পোৱা হেতুকে বন্ধু -বান্ধৱৰ বাবে কথাখিনি লিখিলোঁ – যাতে তেওঁলোকেও শ্ৰী এমৰ সৈতে যাত্ৰা কৰি এই দুঃসময়ত অলপ হ’লেও শান্তি পাব পাৰে, এক নতুন অভিজ্ঞতা লাভ কৰিব পাৰে।

শ্ৰী এম-অক প্ৰণাম।

১০-০২-২০২৩

Mahabahu.com is an Online Magazine with collection of premium Assamese and English articles and posts with cultural base and modern thinking. You can send your articles to editor@mahabahu.com / editor@mahabahoo.com ( For Assamese article, Unicode font is necessary)