১২ আগষ্টঃ কেইটামান খবৰ

কেইটামান খবৰ

মোহন খাউণ্ড

অষ্ট্ৰেলিয়ান ক্ৰিকেটাৰৰ বদান্যতা

অষ্ট্ৰেলিয়াৰ ক্ৰিকেটাৰসকলে সংকটত আক্ৰান্ত এছ এলত শিশু, পৰিয়ালক ট্যুৰ প্ৰাইজ মানি দান কৰিলে।

অষ্ট্ৰেলিয়াৰ পুৰুষ ক্ৰিকেট দলৰ খেলুৱৈসকলে শেহতীয়াকৈ শ্ৰীলংকাৰ ‘অল ফৰ্মেট’ ভ্ৰমণৰ পৰা লাভ কৰা তেওঁলোকৰ পুৰস্কাৰৰ ধন শ্ৰীলংকাৰ অৰ্থনৈতিক সংকটৰ ফলত প্ৰভাৱিত শিশু আৰু পৰিয়ালসমূহক সহায় কৰাৰ বাবে দান কৰে। মুঠতে ‘ইউনিচেফ অষ্ট্ৰেলিয়াৰ শ্ৰীলংকা’ৰ আবেদনলৈ সহাঁৰি জনাই দলটোৱে ৪৫ হাজাৰ অষ্ট্ৰেলিয়ান ডলাৰ দান কৰে।

পেট কামিন্সে কয় যে শ্ৰীলংকাৰ লোকসকলৰ বাবে আৰ্থিক সমস্যাৰ দৈনন্দিন জীৱনত কিমান প্ৰভাৱ পৰিছে সেয়া আমাৰ বাবে অতি স্পষ্ট হৈ পৰিছিল।

আনহাতে অইন এক ঘটনা ঘটে শ্ৰীলংকাত। শ্ৰীলংকাৰ প্ৰতিবাদকাৰীক সমৰ্থন কৰাৰ পিছত শ্ৰীলংকা এৰি যাবলৈ কয় ব্ৰিটিছ ইনষ্টাগ্ৰামাৰক এগৰাকীক। শ্ৰীলংকাত থকা এগৰাকী ব্ৰিটিছ মহিলা ইনষ্টাগ্ৰামাৰক চৰকাৰ বিৰোধী প্ৰতিবাদত অংশগ্ৰহণ কৰাৰ বাবে ১৫ আগষ্টৰ পূৰ্বে দেশ এৰি যাবলৈ কৰ্তৃপক্ষই কয়।

সংকটত আক্ৰান্ত দেশখনত থকাৰ সময়ত কেলি ফ্ৰেজাৰে ভিছাৰ কোনো চৰ্ত উলংঘা কৰিছে নে নাই সেইটো পৰীক্ষা কৰিবলৈ বিষয়াসকলে তেওঁৰ পাছপ’ৰ্ট জব্দ কৰে। শেহতীয়াকৈ ‘গোটা-গোহ’ম’ প্ৰতিবাদী অভিযানৰ ছবি আৰু ভিডিঅ’ পোষ্ট কৰিছিল ফ্ৰেজাৰে।

### 

‘চোৰ – চোৰ – চোৰ… তৃণমূল কংগ্ৰেছ চোৰ’

তৃণমূল কংগ্ৰেছৰ নেতা মণ্ডলক আদালতত হাজিৰ কৰাৰ সময়তে ৰাইজে ‘চোৰ-চোৰ’ ধ্বনি দিয়ে। যোৱাকালি বৃহস্পতিবাৰে তৃণমূল কংগ্ৰেছৰ (টিএমচি) বীৰভূমৰ জিলা সভাপতি অনুব্ৰত মণ্ডল শুনানিৰ বাবে তাত উপস্থিত হোৱাৰ সময়ত পশ্চিমবংগৰ আছানছোলৰ চিবিআই আদালতৰ বাহিৰত অচিনাক্ত লোকে “চোৰ-চোৰ” বুলি ধ্বনি দিয়ে। তেওঁ অহাৰ সময়ত মানুহে ক’লা পতাকা আৰু জোতাও দেখুৱাইছিল। মণ্ডলক বৃহস্পতিবাৰে গৰু সৰবৰাহ কেলেংকাৰীৰ গোচৰত গ্ৰেপ্তাৰ কৰা হয়। চিবিআইৰ আদালতে তেওঁক ১০ দিনৰ জিম্মালৈ প্ৰেৰণ কৰিছে।

তৃণমূল এতিয়া চোৰৰ দলত পৰিণত হৈছে- এনে মন্তব্য কৰিছে পশ্চিমবঙ্গৰ কংগ্ৰেছৰ মুৰব্বী অধীৰ চৌধুৰীয়ে। গৰুৰ চোৰাং কেলেংকাৰীৰ সৈতে জড়িত তৃণমূল কংগ্ৰেছৰ অনুব্ৰত মণ্ডলক চিবিআইয়ে গ্ৰেপ্তাৰ কৰাৰ পিছতে পশ্চিমবংগ কংগ্ৰেছৰ মুৰব্বী অধীৰ ৰঞ্জন চৌধুৰীয়ে কয় যে টিএমচি চোৰৰ দলত পৰিণত হৈছে। চৌধুৰীয়ে কয় যে কেলেংকাৰীত জড়িত হৈ আছে মুখ্যমন্ত্ৰী মমতা বেনাৰ্জী আৰু টিএমচিৰ নেতা। তেওঁ লগতে কয় যে চৰকাৰ আৰু আৰক্ষীৰ সমৰ্থন অবিহনে এনে কেলেংকাৰী সম্ভৱ নহয়।

### 

২০২৪ চনত বিজেপিৰ শিপা উভালি পেলোৱা হ’ব 

‘২০২৪ চনত উভালি পেলোৱা হ’ব বিজেপিৰ শিপা, ৩ খন ৰাজ্যত বিজেপিয়ে হেৰুৱাব ৪০ খন লোকসভাৰ আসন’ – জেডি(ইউ)। জনতা দল (সংযুক্ত)ৰ ৰাষ্ট্ৰীয় সভাপতি লালন সিঙে বৃহস্পতিবাৰে প্ৰকাশ কৰে যে ২০২৪ চনত কেন্দ্ৰত বিজেপিক ক্ষমতাৰ পৰা শিপাৰে সৈতে উভালি দিয়া হ’ব।তেওঁ লগতে কয় যে ২০১৯ চনত বিজেপিৰ বিজয়ী সংখ্যাৰ ভিতৰত ৪০খন লোকসভা আসন হেৰুৱাব তিনিখন ৰাজ্য — বিহাৰ, ঝাৰখণ্ড আৰু পশ্চিমবংগত। আৰজেডিৰ মুৰব্বী লালু প্ৰসাদ যাদৱক সাক্ষাৎ কৰাৰ পিছতে এই মন্তব্য কৰে সিঙে।

### 

মনুস্মৃতিয়ে নাৰীক সন্মানজনক স্থান দিয়ে

‘মনুস্মৃতিৰ দৰে শাস্ত্ৰই নাৰীক সন্মানজনক স্থান দিয়ে’ – উচ্চ ন্যায়ালয়ৰ ন্যায়াধীশৰ বক্তব্য। দিল্লী উচ্চ ন্যায়ালয়ৰ ন্যায়াধীশ প্ৰতিভা এম সিঙে কৈছে যে যিহেতু মনুস্মৃতিৰ দৰে শাস্ত্ৰই তেওঁলোকক অতি সন্মানজনক স্থান প্ৰদান কৰে গতিকে ভাৰতীয় মহিলাসকল “এক ধন্য গোট”। তেওঁ লগতে কয় যে মহিলাসকলক নেতৃত্বৰ ভূমিকাত ৰখাৰ ক্ষেত্ৰত ভাৰত অধিক প্ৰগতিশীল। শাস্ত্ৰৰ সাংস্কৃতিক আৰু ধৰ্মীয় পটভূমিৰ বাবে এছিয়াৰ দেশসমূহত নাৰীক সন্মান কৰা হয় বুলিও তেওঁ আৰু কয়।

### 

ৰাছিয়া সন্ত্ৰাসবাদৰ ৰাষ্ট্ৰীয় পৃষ্ঠপোষক 

লাটভিয়াৰ সংসদে ৰাছিয়াক ‘সন্ত্রাসবাদৰ ৰাষ্ট্ৰীয় পৃষ্ঠপোষক’ হিচাপে ঘোষণা কৰিছে।

ইউক্ৰেইন আক্ৰমণত সাধাৰণ নাগৰিকক আক্ৰমণ কৰাৰ অভিযোগত লাটভিয়াৰ সংসদে ৰাছিয়াক “সন্ত্রাসবাদৰ ৰাষ্ট্ৰীয় পৃষ্ঠপোষক” হিচাপে ঘোষণা কৰিছে। ৰিগাৰ সাংসদসকলে গ্ৰহণ কৰা এক প্ৰস্তাৱৰ পিছত শক্তিশালী শব্দৰে বিবৃতিত কোৱা হৈছে যে মস্কোৱে ইউক্ৰেইনৰ জনসাধাৰণক মনোবল হ্ৰাস কৰাৰ প্ৰচেষ্টাত “দুখ-কষ্ট আৰু ভয়-ভাবুকিক আহিলা হিচাপে ব্যৱহাৰ কৰিছে”।

### 

ই-ডি, চিবিআইয়ে শান্তি আনিব পাৰিলে নিজৰ বাসগৃহ কাৰ্যালয়ৰ বাবে দিবলৈ সাজু তেজস্বী

‘ইডি, চিবিআইয়ে শান্তি কঢ়িয়াই আনিবলৈ বিচাৰিলে মোৰ বাসগৃহত কাৰ্যালয় স্থাপন কৰিব পাৰে’ – তেজস্বী যাদৱে এনেদৰে কৈছে। বিহাৰৰ উপ-মুখ্যমন্ত্ৰী তেজস্বী যাদৱে ইডি আৰু চিবিআইক ভয় কৰাৰ পৰা বহু দূৰত আৰু ইয়াৰ ফলত যদিহে শান্তি আহে, তেওঁলোকক তেজস্বীৰ নিজৰ বাসগৃহত কাৰ্যালয় স্থাপন কৰিবলৈ দিবলৈ সাজু বুলি কয়। তথাপিও যদি “শান্তি” আনিব নোৱাৰে, তেন্তে মই সহায় কৰিব নোৱাৰো,’ তেজস্বীয়ে কয়। তেওঁ দাবী কৰে যে তেওঁ উপ-মুখ্যমন্ত্ৰী হিচাপে প্ৰথম কাৰ্যকালতো এই সংস্থাসমূহক তেওঁ ভয় কৰা নাছিল।

### 

আত্মনিয়ন্ত্ৰণকাৰী সংস্থাৰ বাবে ফেচবুক সমৰ্থিত প্ৰস্তাৱৰ বিৰোধিতা গুগলৰ

ভাৰতত আত্মনিয়ন্ত্ৰণকাৰী সংস্থাৰ বাবে ফেচবুক সমৰ্থিত প্ৰস্তাৱৰ বিৰোধিতা কৰিছে গুগলে। ব্যৱহাৰকাৰীৰ অভিযোগ শুনিবলৈ ভাৰতৰ ছ’চিয়েল মিডিয়া খণ্ডৰ বাবে এটা আত্মনিয়ন্ত্ৰণকাৰী সংস্থা গঢ়ি তোলাৰ ক্ষেত্ৰত গুগলে গুৰুতৰ সংশয় প্ৰকাশ কৰিছে যদিও এই প্ৰস্তাৱক ফেচবুক আৰু টুইটাৰে সমৰ্থন দিছে – সূত্ৰৰ পৰা এইদৰে জানিব পৰা গৈছে।

ভাৰতে জুন মাহত কন্টেন্ট মডাৰেচন সিদ্ধান্তৰ বিষয়ে ব্যৱহাৰকাৰীৰ পৰা অভিযোগ শুনিবলৈ ‘চৰকাৰী পেনেল’ নিযুক্তিৰ প্ৰস্তাৱ দিছিল যদিও উদ্যোগটোৱে ইচ্ছুক হ’লে আত্মনিয়ন্ত্ৰণকাৰী সংস্থাৰ ধাৰণাটোৰ বাবে মুকলি বুলিও কয়।

‘টেক জায়েন্ট’সমূহৰ মাজত ঐকমত্যৰ অভাৱে অৱশ্যে চৰকাৰী পেনেল গঠনৰ সম্ভাৱনা বৃদ্ধি কৰে – যিটো সম্ভাৱনা ‘মেটা প্লেটফৰ্মছ ইনকৰ্পৰেশ্যন’ৰ (META) ফেচবুক আৰু টুইটাৰে এৰাই চলিবলৈ আগ্ৰহী, কাৰণ তেওঁলোকে ভাৰতত চৰকাৰী আৰু নিয়ন্ত্ৰণমূলক অতিমাত্ৰা প্ৰসাৰৰ আশংকা কৰিছে, সূত্ৰই জনোৱা মতে।

এই সপ্তাহত বন্ধ কক্ষত অনুষ্ঠিত এখন সভাত আলফাবেট ইনকৰ্পৰেশ্যনৰ (GOOGLE) হৈ গুগলৰ এজন কাৰ্যবাহীয়ে অইন উপস্থিত সকলক জনাইছে যে কোম্পানীটো এটা আত্মনিয়ন্ত্ৰণকাৰী সংস্থাৰ গুণগত মানৰ বিষয়ে অবিশ্বাসী। এই সংস্থাটোৰ অৰ্থ হ’ব এনে সিদ্ধান্তৰ বাহ্যিক পৰ্যালোচনা যিয়ে গুগলৰ আভ্যন্তৰীণ নীতি উলংঘা কৰিলেও গুগলে কন্টেন্ট পুনৰ স্থাপন কৰিবলৈ বাধ্য কৰিব পাৰে, কাৰ্যবাহীজনৰ উদ্ধৃতিৰে কোৱা হৈছে।

আত্মনিয়ন্ত্ৰণকাৰী সংস্থাৰ পৰা এনে নিৰ্দেশনাই এক বিপজ্জনক নজিৰ গঢ়ি তুলিব পাৰে বুলিও গুগলৰ কাৰ্যবাহীৰ উদ্ধৃতিৰে সূত্ৰসমূহে প্ৰকাশ কৰিছে। এই আলোচনা ব্যক্তিগত হোৱাৰ বাবে সূত্ৰসমূহে মুকলি কৰিবলৈ অস্বীকাৰ কৰে।

ফেচবুক, টুইটাৰ আৰু গুগলৰ উপৰিও স্নেপ ইন আৰু জনপ্ৰিয় ভাৰতীয় ছ’চিয়েল মিডিয়া প্লেটফৰ্ম শ্বেয়াৰচাটৰ প্ৰতিনিধিয়েও এই বৈঠকত অংশগ্ৰহণ কৰে। কোম্পানীকেইটাৰ একেলগে ভাৰতত লাখ লাখ ব্যৱহাৰকাৰী আছে। স্নেপচাট আৰু শ্বেয়াৰচাটেও আত্মনিয়ন্ত্ৰণ ব্যৱস্থাৰ সন্দৰ্ভত উদ্বেগ প্ৰকাশ কৰি কয় যে এই বিষয়টোৰ বাবে নাগৰিক সমাজকে ধৰি বহু বেছি পৰামৰ্শৰ প্ৰয়োজন আছে বুলি সূত্ৰসমূহে জনায়।

গুগলে এক বিবৃতিত কয় যে তেওঁলোকে এখন প্ৰাৰম্ভিক বৈঠকত অংশগ্ৰহণ কৰিছে আৰু উদ্যোগ আৰু চৰকাৰৰ সৈতে জড়িত হৈ আছে আৰু লগতে কয় যে তেওঁলোকে “সম্ভৱ উত্তম সমাধান”ৰ বাবে “সকলো বিকল্পৰ সন্ধান” কৰি আছে।

শ্বেয়াৰচাট আৰু ফেচবুকে কোনো মন্তব্য দিবলৈ অস্বীকাৰ কৰে। আন কোম্পানীসমূহেও সংবাদ মাধ্যমে মন্তব্যৰ বাবে কৰা অনুৰোধৰ কোনো সঁহাৰি নিদিলে।

ছ’চিয়েল মিডিয়া খণ্ডত কন্টেন্টক নজৰদাৰী কৰিবলৈ আত্মনিয়ন্ত্ৰণকাৰী সংস্থাসমূহৰ চেষ্টা বিৰল যদিও, এতিয়া সহযোগিতাৰ দৃষ্টান্ত দেখা গৈছে। নিউজিলেণ্ডতো বৃহৎ টেক কোম্পানীসমূহে অনলাইনত ক্ষতিকাৰক বিষয়বস্তু হ্ৰাস কৰাৰ লক্ষ্যৰে এক নিয়মাৱলীত স্বাক্ষৰ কৰিছে। 

ছ’চিয়েল মিডিয়াৰ কন্টেন্টৰ সিদ্ধান্তক লৈ উত্তেজনা ভাৰতত বিশেষভাৱে কাঁইটীয়া বিষয় হৈ পৰিছে। ছ’চিয়েল মিডিয়া কোম্পানীসমূহে প্ৰায়ে চৰকাৰৰ পৰা টেকডাউনৰ অনুৰোধ লাভ কৰে বা সক্ৰিয়ভাৱে কন্টেন্ট আঁতৰাই পেলায়। উদাহৰণস্বৰূপে গুগলৰ ইউটিউবে চলিত বৰ্ষৰ প্ৰথম ত্ৰৈমাসিকত ইয়াৰ নিৰ্দেশনা উলংঘা কৰা ১২ লাখ ভিডিঅ’ আঁতৰাই পেলাইছিল, যিটো বিশ্বৰ যিকোনো দেশৰ ভিতৰতে সৰ্বাধিক।

ভাৰত চৰকাৰে উদ্বিগ্নতা প্ৰকাশ কৰিছে যে তেওঁলোকৰ কন্টেন্ট ডাউনলোড কৰাৰ সিদ্ধান্তত বিচলিত ব্যৱহাৰকাৰীসকলৰ সেই সিদ্ধান্তসমূহৰ বিৰুদ্ধে আপীল কৰাৰ বাবে উপযুক্ত ব্যৱস্থা নাই আৰু তেওঁলোকৰ একমাত্ৰ আইনী আশ্ৰয় হৈছে আদালতলৈ যোৱা।

টুইটাৰে নিজৰ নীতি উলংঘা কৰাৰ কথা উল্লেখ কৰি কয় যে ৰাজনীতিবিদকে ধৰি প্ৰভাৱশালী ভাৰতীয়ৰ একাউণ্ট ব্লক কৰাৰ পিছতে টুইটাৰে প্ৰতিক্ৰিয়াৰ সন্মুখীন হৈছে। টুইটাৰেও যোৱা বছৰ ভাৰত চৰকাৰৰ সৈতে সংঘাতত লিপ্ত হৈছিল , যেতিয়া চৰকাৰে ভুল তথ্য বিয়পাই দিয়া বুলি কোৱা একাউণ্টসমূহ ডাউনলোড কৰাৰ নিৰ্দেশ সম্পূৰ্ণৰূপে মানি চলিবলৈ টুইটাৰে অস্বীকাৰ কৰিছিল। 

আত্মনিয়ন্ত্ৰণকাৰী সংস্থাটোৰ বাবে প্ৰস্তাৱটোৰ প্ৰাৰম্ভিক খচৰাত কোৱা হৈছে যে পেনেলত অধ্যক্ষ হিচাপে এজন অৱসৰপ্ৰাপ্ত ন্যায়াধীশ বা প্ৰযুক্তিৰ ক্ষেত্ৰখনৰ এজন অভিজ্ঞ ব্যক্তিৰ লগতে ছ’চিয়েল মিডিয়া কোম্পানীসমূহৰ কিছুমান জ্যেষ্ঠ কাৰ্যবাহীকে ধৰি আন ছয়জন ব্যক্তি থাকিব। সূত্ৰৰ মতে খচৰাটোত কোৱা হৈছে যে পেনেলৰ সিদ্ধান্তসমূহ “বাধ্যতামূলক প্ৰকৃতিৰ” হ’ব।

পশ্চিমীয়া টেক জায়েন্টসমূহে বছৰ বছৰ ধৰি ভাৰত চৰকাৰৰ সৈতে মতানৈক্যত লিপ্ত হৈ আহিছে, যুক্তি দিছে যে কঠোৰ নিয়মসমূহে তেওঁলোকৰ ব্যৱসায় আৰু বিনিয়োগৰ পৰিকল্পনাত আঘাত দিছে। এই মতানৈক্যৰ ফলত নতুন দিল্লী আৰু ৱাশ্বিংটনৰ মাজত বাণিজ্যিক সম্পৰ্কও স্তব্ধ হৈ পৰিছে।

টেক জায়েন্টসমূহক প্ৰতিনিধিত্ব কৰা আমেৰিকাৰ উদ্যোগ লবী গোটসমূহে বিশ্বাস কৰে যে চৰকাৰে নিযুক্ত কৰা এটা পৰ্যালোচনা পেনেলে নতুন দিল্লীয়ে ইয়াত কোন বহিব সেইটো নিয়ন্ত্ৰণ কৰিলে ই কেনেকৈ স্বতন্ত্ৰভাৱে কাম কৰিব পাৰে সেই সম্পৰ্কে উদ্বেগ প্ৰকাশ কৰিছে। উল্লেখযোগ্য যে চৰকাৰী পেনেলৰ প্ৰস্তাৱ জুলাইৰ আৰম্ভণিলৈকে জনসাধাৰণৰ পৰামৰ্শৰ বাবে মুকলি আছিল। ৰূপায়ণৰ বাবে কোনো নিৰ্দিষ্ট তাৰিখ নিৰ্ধাৰণ কৰা হোৱা নাই।

### 

দিল্লীত মাস্ক পিন্ধা বাধ্যতামূলক হ’ব 

কোভিড ৰোগীৰ সংখ্যা বৃদ্ধিৰ পিছত দিল্লীত মাস্ক পিন্ধা বাধ্যতামূলক নীতী পুনৰ বলবৎ হ’ব। বিগত পষেকত ক’ভিড-১৯ৰ সংক্ৰমণ বৃদ্ধি পোৱাৰ পাছত নতুন দিল্লীয়ে পুনৰ ‘মাস্ক মেণ্ডেট’ বলবৎ কৰিব বুলি বৃহস্পতিবাৰে চৰকাৰী আদেশত প্ৰকাশ পাইছে যদিও এপ্ৰিল মাহত একেধৰণৰ আদেশ মানি চলাৰ ক্ষেত্ৰত চৰকাৰ ব্যৰ্থ হৈছে।

ভাৰতৰ ৰাজধানীত ৰাজহুৱা স্থানত ‘মাস্ক’ অবিহনে ধৰা পৰা লোকসকলে ৫০০ টকা জৰিমনা ভৰিব লাগিব বুলি ৮ আগষ্টৰ আৰু যোৱাকালি বৃহস্পতিবাৰে সাংবাদিকৰ সৈতে শ্বেয়াৰ কৰা এই নিৰ্দেশত কোৱা হৈছে। বৰ্তমান শ্বপিং মল আৰু ভিৰ কৰা বজাৰতো মাস্ক পৰিধান কৰাটো যেন এক অস্বাভাৱিক ঘটনাত পৰিণত হৈছে! নতুন দিল্লীত বিগত ২৪ ঘণ্টাত ২১৪৬ জন লোক নতুনকৈ সংক্ৰমিত হোৱাৰ লগতে ৮ জনৰ মৃত্যু হৈছে, যিটো ভাৰতীয় ৰাজ্য আৰু ফেডাৰেল টেৰিটৰীসমূহৰ ভিতৰত আটাইতকৈ ভয়াৱহ পৰিসংখ্যা।

এই সময়ছোৱাত ভাৰতত নতুনকৈ ১৬,২৯৯ জন লোক সংক্ৰমিত হোৱাৰ বিপৰীতে সঞ্চিত মুঠ সংখ্যা ৪ কোটি ৪২ লাখলৈ বৃদ্ধি পোৱাৰ বিপৰীতে মৃত্যু হোৱা লোকৰ সংখ্যা ৫৩ বৃদ্ধি পাই ৫২৬,৮৭৯ জনলৈ বৃদ্ধি পাইছে। প্ৰকৃত সংখ্যা একাধিক গুণ বেছি বুলি ধাৰণা কৰা হৈছে।

### 

ৰাছিয়াৰ চৰকাৰী টিভিৰ প্ৰতিবাদকাৰীক দুমাহৰ বাবে গৃহবন্দী

ৰাছিয়াৰ চৰকাৰী টিভিৰ প্ৰতিবাদকাৰীক দুমাহৰ বাবে গৃহবন্দী কৰা হৈছে। ৰাছিয়াৰ সশস্ত্ৰ বাহিনীৰ বিষয়ে ভুৱা বাতৰি প্ৰচাৰ কৰাৰ অভিযোগত অভিযুক্ত কৰা অপৰাধমূলক গোচৰত বৃহস্পতিবাৰে ৰাছিয়াৰ প্ৰাক্তন টিভি সাংবাদিক মেৰিনা অভছিয়ানিকোভাক দুমাহৰ বাবে গৃহবন্দী কৰি ৰখা হৈছে ।

ইউক্ৰেইনত ৰাছিয়াৰ যুদ্ধৰ বিৰুদ্ধে প্ৰতিবাদ কৰাৰ বাবে ইতিমধ্যে অভছিয়ানিকোভাক দুবাৰকৈ পৃথক পৃথক গোচৰত জৰিমনা বিহা হৈছে, য’ত মাৰ্চ মাহত এটা লাইভ ৰাষ্ট্ৰীয় বাতৰি বুলেটিনত বাধা দি “যুদ্ধ বন্ধ কৰক!” আৰু দৰ্শকক ৰাষ্ট্ৰৰ অপপ্ৰচাৰক বিশ্বাস নকৰিবলৈ কোৱা এখন প্লেকাৰ্ড ওপৰলৈ তুলি ধৰা অভিযোগ সন্নিৱিষ্ট হৈছে। শেহতীয়া গোচৰটোত চৰকাৰী একাউণ্টৰ পৰা ৰাছিয়াৰ সেনাৰ বিষয়ে তথ্য বিতৰণ কৰাৰ অপৰাধত দোষী সাব্যস্ত হ’লে তেওঁ ১০ বছৰ পৰ্যন্ত কাৰাদণ্ডৰ সন্মুখীন হ’ব লাগিব।

জুলাই মাহত ক্ৰেমলিনৰ বিপৰীতে থকা নদীৰ মথাউৰিৰ ওপৰত থিয় হৈ ৰাষ্ট্ৰপতি ভ্লাদিমিৰ পুটিনক হত্যাকাৰী আৰু তেওঁৰ সৈন্যসকলক ফেচিষ্ট বুলি লিখা পোষ্টাৰ এখন ওপৰলৈ তুলি লোৱাৰ প্ৰতিবাদৰ সৈতেও তেওঁ জড়িত। “আপুনি যুদ্ধ বন্ধ কৰাৰ আগতে আৰু কিমান ল’ৰা-ছোৱালীৰ মৃত্যু হ’ব লাগিব?”- সেই পোষ্টাৰখনত লিখা আছিল।

ৰাছিয়াই ইউক্ৰেইন আক্ৰমণ কৰাৰ আঠ দিনৰ পিছত ৪ মাৰ্চত সশস্ত্ৰ বাহিনীক বদনাম কৰাৰ বিৰুদ্ধে এখন নতুন আইন প্ৰণয়ন কৰিছিল, যাক তেওঁলোকে “বিশেষ সামৰিক অভিযান” বুলি অভিহিত কৰিছে।

ইন্টাৰফেক্সে জনোৱা মতে, মস্কোৰ বাছমানী জিলা আদালতে ৯ অক্টোবৰলৈকে অভছ্যানিকোভাক গৃহবন্দী কৰি ৰাখিছে।

### 

স্তম্ভিত হৈ পৰিছে ফ্ৰীটাউন

ছিয়েৰা লিয়নৰ প্ৰতিবাদত কেইবা ডজন লোক নিহত হোৱাৰ পিছত স্তম্ভিত হৈ পৰিছে ফ্ৰীটাউন। ছিয়েৰা লিয়নত চৰকাৰ বিৰোধী প্ৰতিবাদত কেইবা ডজন লোকৰ মৃত্যু হোৱা বুলি আৰক্ষী আৰু অন্যান্য সূত্ৰই জনাইছে। এই দুৰ্বিসহ ঘটনাত ৰাজধানী ফ্ৰীটাউনত স্তম্ভিত হৈ পৰা নাগৰিকসকলে বেছিভাগেই বন্ধ দুৱাৰৰ আঁৰত থকাৰ সময়তে পূৰ্বৰ দিনটোৰ সংঘৰ্ষৰ পৰা মৃত্যু হোৱা লোকৰ সংখ্যা তীব্ৰভাৱে বৃদ্ধি পাইছে।

সূত্ৰসমূহে জনোৱা মতে, অৰ্থনৈতিক কষ্ট আৰু চৰকাৰে বৃদ্ধি পোৱা মূল্যৰ প্ৰভাৱ কমোৱাত চৰকাৰে হোৱা ব্যৰ্থতাৰ বাবে হতাশ হৈ শতাধিক লোকে ৰাজপথলৈ ওলাই অহাৰ সময়তে ৬ জন আৰক্ষী বিষয়া আৰু কমেও ২১ জন সাধাৰণ নাগৰিকৰ মৃত্যু হৈছে।

বিশেষকৈ পশ্চিম আফ্ৰিকাৰ দেশখনৰ ৰাজধানী ফ্ৰীটাউনত ছিয়েৰা লিয়নৰ বাবে এই অশান্তি অতি অস্বাভাৱিক। বিগত বছৰবোৰত আন চহৰত হোৱা বিচ্ছিন্ন প্ৰতিবাদত দুই এজন লোকৰ মৃত্যু হৈছে।

ফ্ৰীটাউনৰ পৰা সংবাদ মাধ্যমে পৰীক্ষা কৰা এটা ভিডিঅ’ত দেখা গৈছে যে এজন আৰক্ষী বিষয়াই ভিৰক লক্ষ্য কৰি বন্দুকেৰে গুলিয়াইছে।

পূব ফ্ৰীটাউনত বাস কৰা ১৯ বছৰীয়া সুলেমান টুৰাইয়ে আৰক্ষীয়ে কন্দুৱা গেছ নিক্ষেপ কৰিবলৈ আৰম্ভ কৰাৰ পূৰ্বে কিছু সময়ৰ বাবে সমদল উলিয়াই কয় যে পিছত তেওঁ তেওঁৰ বাৰাণ্ডাৰ পৰা বিক্ষোভকাৰীক গুলীয়াই হত্যা কৰা দেখিছিল। সংবাদ মাধ্যমক তেওঁ কয় যে, “মই ভাবো যে মানুহ স্তম্ভিত হৈছে। আমি জনা দেশখন এইখন নহয়। ছিয়েৰা লিয়ন এখন শান্তিপূৰ্ণ ঠাই।”

ৰাষ্ট্ৰপতি জুলিয়াছ মাডা বায়’ই কয় যে বুধবাৰৰ পৰিঘটনাৰ পৰিস্থিতিৰ বিষয়ে “সম্পূৰ্ণৰূপে তদন্ত” কৰা হ’ব। ফ্ৰীটাউনৰ আন আন পৰীক্ষিত ছবিত দেখা গৈছে যে বৃহৎ জনসমাগমে শিলগুটি নিক্ষেপ কৰি টায়াৰ জ্বলাইছিল আৰু অস্ত্ৰধাৰী বিষয়াসকলে ৰাজপথত টহল দিছিল।

বিৰোধীৰ উত্তৰ হৃদপিণ্ড আৰু ৰাজধানীত কেন্দ্ৰীভূত হৈছিল প্ৰতিবাদ। দীৰ্ঘদিন ধৰি নিয়ন্ত্ৰণত ৰখা এই দেশখনত বিশ্ব বেংকৰ মতে, প্ৰায় ৮০ লাখ লোকৰ আধাতকৈ অধিক জনসংখ্যা দৰিদ্ৰ সীমাৰেখাৰ তলত বাস কৰে। দেশখনত মৌলিক সামগ্ৰীৰ মূল্য বৃদ্ধিয়ে নাগৰিকৰ হতাশা আৰু অধিক ভয়াৱহ কৰি তুলিছে।

আৰক্ষী মহাপৰিদৰ্শক উইলিয়াম ফায়া চেলুৱে ৰয়টাৰ্ছক জনোৱা মতে, বুধবাৰে মৃত্যু হোৱা লোকৰ সংখ্যাৰ ভিতৰত ফ্ৰীটাউনত নিহত দুজন আৰক্ষী বিষয়া, উত্তৰৰ চহৰ কামাকুইত তিনিজন আৰু উত্তৰ চহৰ মাকেনিত এজন নিহত হৈছে।

ফ্ৰীটাউনত কমেও ১৩ জন সাধাৰণ নাগৰিকক গুলীয়াই হত্যা কৰা হৈছে বুলি চহৰখনৰ মূল মৰ্চাৰীৰ কৰ্মচাৰীসকলে জনায়। হাস্পতালৰ সূত্ৰই জনোৱা মতে, কামাকৱিত চাৰিজন আৰু মাকেনিত আন চাৰিজন সাধাৰণ নাগৰিক নিহত হৈছে।

বৃহস্পতিবাৰে ফ্ৰীটাউনলৈ এক ভয়ংকৰ অশান্তি ঘূৰি আহিছিল বুলি বাসিন্দাসকলে জনায়, কিয়নো ষ্ট’ৰসমূহ বন্ধ হৈ আছিল আৰু অশান্তিৰ ভয়ত মানুহবোৰ তাত থাকিছিল।

ইণ্টাৰনেট মানৱ নিৰীক্ষণ কেন্দ্ৰ ‘নেটব্লকছ’-এ জনোৱা মতে, বুধবাৰে দুঘণ্টাৰ বাবে ইণ্টাৰনেট কৰ্তন কৰা হৈছিল আৰু পুনৰ নিশাটোৰ ভিতৰতে কৰ্তন কৰা হৈছিল।

আৰক্ষীয়ে জনোৱা মতে, সন্ধিয়া ৭ বজাৰ পৰা সান্ধ্য আইন প্ৰযোজ্য হৈ থাকিব। বৃহস্পতিবাৰৰ পৰা স্থানীয় সময় অনুসৰি পুৱা ৭ বজালৈ চৰকাৰে হিংসাত্মক পৰিস্থিতি ৰোধ কৰাৰ উদ্দেশ্যে বুধবাৰে সান্ধ্য আইন প্ৰণয়ন কৰে।

### 

 চীনৰ সামৰিক ভাবুকি হ্ৰাস পোৱা নাই

টাইৱানৰ ৰাষ্ট্ৰপতিয়ে কৈছে যে চীনৰ সামৰিক ভাবুকি হ্ৰাস পোৱা নাই। টাইৱানৰ ৰাষ্ট্ৰপতি ছাই ইং-ৱেনে বৃহস্পতিবাৰে কয় যে বৰ্তমান চীনৰ সামৰিক ভাবুকি হ্ৰাস পোৱা নাই আৰু টাইৱানে সংঘাত বৃদ্ধি বা বিবাদৰ সৃষ্টি নকৰে যদিও নিজৰ সাৰ্বভৌমত্ব আৰু ৰাষ্ট্ৰীয় নিৰাপত্তা দৃঢ়তাৰে ৰক্ষা কৰিব।

 টাইৱানৰ ৰাষ্ট্ৰপতি ছাই ইং-ৱেনে বৃহস্পতিবাৰে কয় যে চীনৰ বল প্ৰয়োগৰ ভাবুকি হ্ৰাস পোৱা নাই যদিও দ্বীপটোৰ চাৰিওফালে বেইজিঙে এতিয়ালৈকে কৰা সৰ্ববৃহৎ সামৰিক অনুশীলনসমূহ হ্ৰাস পোৱা যেন লাগিছে।

যোৱা সপ্তাহত আমেৰিকাৰ প্ৰতিনিধি সদনৰ অধ্যক্ষ নেন্সি পেলোছিয়ে চীনৰ দাবী কৰা টাইৱান ভ্ৰমণৰ বাবে ক্ষুব্ধ হৈ পৰা চীনে বেলিষ্টিক মিছাইল নিক্ষেপ কৰে আৰু যোৱা কিছুদিনত সাগৰীয় আৰু বায়ু আক্ৰমণৰ অনুকৰণ কৰিবলৈ একাধিক বিমান আৰু যুদ্ধজাহাজ নিয়োগ কৰে।

চীনে বুধবাৰে কয় যে তেওঁলোকে টহল দি থাকিব যদিও টাইৱানৰ চাৰিওফালে “বিভিন্ন কাম সম্পূৰ্ণ কৰিছে”, যিয়ে হেঁচা বজাই ৰাখিও যুদ্ধৰ খেলসমূহৰ সম্ভাৱ্য অন্ত পৰাৰ সংকেত দিছে।

টাইৱানেও তুলনামূলকভাৱে সৰু সৰু, বাৰ্ষিক অনুশীলন চলাই আহিছে, যিবোৰ ফ্লেয়াৰ-আপৰ পূৰ্বেই নিৰ্ধাৰণ কৰা হৈছিল আৰু ইয়াৰ লক্ষ্য হৈছে আক্ৰমণ প্ৰতিহত কৰাৰ প্ৰস্তুতি। তেওঁৰ কাৰ্যালয়ৰ পৰা প্ৰকাশিত এক বিবৃতিত কোৱা হৈছে যে বৰ্তমান চীনৰ সামৰিক বাহিনীৰ ভাবুকি কমি অহা নাই,’ ছাইয়ে বায়ুসেনাৰ বিষয়াসকলক কয়।

12-08-2022 ( Heading Image: টাইৱানৰ ৰাষ্ট্ৰপতি ছাই ইং-ৱেন)

[Images from different sources]

Mahabahu.com is an Online Magazine with collection of premium Assamese and English articles and posts with cultural base and modern thinking.  You can send your articles to editor@mahabahu.com / editor@mahabahoo.com ( For Assamese article, Unicode font is necessary)