১৩ জুলাইঃ কেইটামান খবৰ

খবৰ

মোহন খাউণ্ড

ব্ৰিটেইনৰ কনজাৰ্ভেটিভ পাৰ্টিৰ নেতৃত্বৰ প্ৰতিযোগিতাত প্ৰাৰম্ভিকভাৱে আগশাৰীত থকা ঋষি সুনাকে আনুষ্ঠানিকভাৱে নিজৰ প্ৰাৰ্থীত্ব মুকলি কৰে।

যোৱা সপ্তাহত নিজে পদত্যাগ কৰাৰ ফলত বৰিছ জনছনক প্ৰধানমন্ত্ৰী পদৰ পৰা পদত্যাগ কৰিবলৈ বাট কাটি দিয়া পৰ্বৰ সূচনা কৰা প্ৰাক্তন বিত্তমন্ত্ৰীগৰাকীয়ে মুদ্ৰাস্ফীতি নিয়ন্ত্ৰণলৈ অনাৰ পূৰ্বে কৰ কৰ্তনৰ বিৰুদ্ধে যুক্তি দি প্ৰতিদ্বন্দ্বীসকলৰ পৰা নিজকে আঁতৰাই ৰাখিছিল।

১৩ জুলাইঃ কেইটামান সংক্ষিপ্ত খবৰ — ঋষি সুনাক

###

যোৱা দেওবাৰে বাতৰি কাকতত প্ৰকাশ হোৱা, উবেৰে নতুন বজাৰত প্ৰৱেশৰ বাবে লবী কৰা অভিযানক লৈ হোৱা বিতৰ্কত ফ্ৰান্সৰ ৰাষ্ট্ৰপতি ইমানুৱেল মেক্ৰনে উবেৰৰ সৈতে থকা নিজৰ ভূমিকাক ৰক্ষণাবেক্ষণ দিয়ে।

পূৰ্বৰ প্ৰশাসনৰ বিত্তমন্ত্ৰী হিচাপে মেক্ৰনে আমেৰিকাৰ ৰাইড-হেলিং কোম্পানীটোৰ সৈতে নিয়মীয়া যোগাযোগ ৰক্ষা কৰি আছিল।

তেওঁৰ বিৰোধীসকলে আনুষ্ঠানিক তদন্তৰ আহ্বান জনাইছে যদিও মেক্ৰনে কয় যে তেওঁ কেৱল নিজৰ কৰ্তব্য পালন কৰি “হাজাৰ হাজাৰ চাকৰি”ৰ সৃষ্টি কৰিছিল।

###

Spanish PM — প্ৰধানমন্ত্ৰী পেড্ৰ’ ছানচেজ

স্পেইন চৰকাৰে কয় যে মুদ্ৰাস্ফীতিৰ ফলত হোৱা যন্ত্ৰণা কম কৰিবলৈ বেংক আৰু শক্তি কোম্পানীসমূহৰ ওপৰত অহা দুবছৰত ৭ বিলিয়ন ডলাৰৰ মূল্যৰ উইণ্ডফল কৰ আৰোপ কৰা হ’ব।

সমাজবাদী প্ৰধানমন্ত্ৰী পেড্ৰ’ ছানচেজে যুক্তি আগবঢ়ায় যে এই পদক্ষেপে বৃদ্ধি পোৱা সুতৰ হাৰ আৰু উচ্চ শক্তিৰ ব্যয়ৰ বাবে হোৱা ফাৰ্মসমূহৰ অত্যধিক লাভৰ পৰিমাণ হ্ৰাস কৰিব। স্পেইনৰ বৃহৎ বেংকসমূহৰ শ্বেয়াৰমূল্য হ্ৰাস পাইছে।

###

আমেৰিকাই দাবী কৰিছে যে ইৰাণে ইউক্ৰেইনত ব্যৱহাৰৰ বাবে ৰাছিয়াক “কেইবাশ” যুদ্ধ ড্ৰ’ন যোগান ধৰাৰ পৰিকল্পনা কৰিছে।

ইউক্ৰেইনৰ সামৰিক বিষয়াসকলে জনোৱা মতে, তেওঁলোকে আমেৰিকাত নিৰ্মিত হিমাৰ নামৰ এক প্ৰকাৰৰ ভ্ৰাম্যমাণ ৰকেট-লঞ্চাৰেৰে খেৰচনৰ ওচৰৰ ৰাছিয়াৰ এটা গোলাবাৰুদৰ ডিপো ধ্বংস কৰিবলৈ সক্ষম হয়। ইফালে ডনেস্ক প্ৰদেশৰ এটা আৱাসিক ভৱনত ৰাছিয়াৰ ক্ষেপণাস্ত্ৰৰ আক্ৰমণত মৃত্যু হোৱা লোকৰ সংখ্যা ৩৩ জনলৈ বৃদ্ধি পাইছে।

###

হিথ্ৰ’ৰ মুখ্য কাৰ্যবাহীয়ে ব্ৰিটেইনৰ আটাইতকৈ ব্যস্ত বিমানবন্দৰত সেৱা আগবঢ়োৱা বিমান সংস্থাসমূহক গ্ৰীষ্মকালৰ বাবে ৰিজাৰ্ভচন বুকিং কৰা বন্ধ কৰিবলৈ কৈছে।

বিমানবন্দৰত কৰ্মচাৰীৰ নাটনিয়ে অভাৱনীয় সংকট তীব্ৰতৰ কৰি তুলিছে, যাৰ ফলত শাৰীপতাৰ ক্ষেত্ৰকে ধৰি, উৰণৰ পলম আৰু বিভিন্ন ভুলৰ সৃষ্টি হৈছে- যিবোৰ কোনোপধ্যেই “গ্ৰহণযোগ্য নহয়”।

বিমান সংস্থাসমূহক হিথ্ৰ’ৰ ক্ষমতা প্ৰতিদিনে ১ লাখ যাত্ৰীলৈ সীমিত কৰাত সহায় কৰিবলৈ উৎসাহিত কৰা হৈছে।

###

বিশ্বৰ আটাইতকৈ শক্তিশালী টেলিস্কোপে দূৰৰ গ্ৰহত ‘পানীৰ চিহ্ন’ বন্দী কৰে।

নাছাৰ জেমছ ৱেব স্পেচ টেলিস্কোপে ১১৫০ আলোকবৰ্ষ দূৰত সূৰ্য্যৰ দৰে তৰা এটাক প্ৰদক্ষিণ কৰি থকা দূৰ গ্ৰহৰ বায়ুমণ্ডলত থকা পানীৰ সুকীয়া উপস্থিতি বন্দী কৰিছে। ক্ষুদ্ৰপথত অৱস্থিত বিশাল গেছ গ্ৰহ WASP 96-b ত বন্দী কৰা হৈছে। বিশ্বৰ আটাইতকৈ শক্তিশালী টেলিস্কোপটোৱে তোলা ফটোৰ কেইখনমান মুকলি কৰাৰ সময়তে নাছাই এই কথা প্ৰকাশ কৰে।

###

প্ৰথমবাৰৰ বাবে কেমেৰাত ধৰা পৰিল ‘গাখীৰৰ সাগৰ’( Milky Sea)ৰ ৰহস্যময় পৰিঘটনা।

এটা উপগ্ৰহই ইণ্ডোনেছিয়াৰ দক্ষিণ অংশত গাখীৰৰ দৰে সাগৰৰ বিৰল ক্ষেত্ৰৰ ছবি তুলি লৈছিল, যিটো পৰিঘটনাত দেখা যায় যে আলোকময় বেক্টেৰিয়াৰ বাবে পানী পোহৰ হৈ পৰে। আমেৰিকাৰ গৱেষকৰ এটা দলে নিশ্চিত কৰিছে যে এখন ব্যক্তিগত ইয়টৰ ক্ৰুৱে গাখীৰৰ দৰে সাগৰৰ সন্মুখীন হৈছে, যিটো সমগ্ৰ বিশ্বতে বছৰি মাত্ৰ এবাৰ বা দুবাৰহে দেখা দিয়ে বুলি ধাৰণা কৰা হৈছে।

###

ইউক্ৰেইনত যুদ্ধ আৰম্ভ হোৱাৰ পিছত ৫ হাজাৰৰো অধিক সাধাৰণ নাগৰিকৰ মৃত্যু হৈছে।

ৰাষ্ট্ৰসংঘৰ মানৱ অধিকাৰ কাৰ্যালয়ে মঙলবাৰে জনোৱা মতে, ২৪ ফেব্ৰুৱাৰীত ৰাছিয়াই ইউক্ৰেইনত আক্ৰমণ আৰম্ভ কৰাৰ পিছত ইউক্ৰেইনত ৫ হাজাৰতকৈ অধিক সাধাৰণ নাগৰিকৰ মৃত্যু হৈছে আৰু ৬৫০০ৰো অধিক লোক আহত হৈছে। ইউক্ৰেইনত অ’.এইচ.চি.এইচ.আৰৰ বহু কেইজন মানৱ অধিকাৰ নিৰীক্ষক আছে।

###

ক’ভিড-১৯ৰ দ্বাৰা আক্ৰান্তৰ সংখ্যা বৃদ্ধি পোৱাৰ লগে লগে মণিপুৰত বিদ্যালয় বন্ধ কৰাৰ নিৰ্দেশ দিয়া হৈছে।

মঙলবাৰে মণিপুৰ চৰকাৰে কোভিড-১৯ত আক্ৰান্তৰ সংখ্যা তীব্ৰভাৱে বৃদ্ধি পোৱাৰ বাবে ৰাজ্যৰ সকলো বিদ্যালয় তাৎক্ষণিকভাৱে কাৰ্যকৰী হোৱাকৈ বন্ধ কৰাৰ নিৰ্দেশ জাৰি কৰিছে। ২৪ জুলাই, ২০২২ লৈকে বিদ্যালয় সমূহ বন্ধ থাকিব। মঙলবাৰে মণিপুৰত ৫৯ গৰাকী লোকৰ দেহত কৰ’না পজিটিভ পোৱাৰ লগে লগে পৰীক্ষাৰ পজিটিভিটি ৰেচিঅ’ই ১৫% সীমা অতিক্ৰম কৰাৰ সময়তে এই কাৰ্য সংঘটিত হৈছে।

###

দেশৰ প্ৰয়োজন নাই নীৰৱ ৰাষ্ট্ৰপতি!

ৰাষ্ট্ৰপতি নিৰ্বাচনৰ প্ৰাৰ্থী যশৱন্ত সিনহাই কয় যে দেশত নীৰৱ ৰাষ্ট্ৰপতি নহয়, বৰঞ্চ নৈতিক কৰ্তৃত্ব আৰু বিবেচনাৰে আগবঢ়া ব্যক্তিৰ প্ৰয়োজন। আগন্তুক ৰাষ্ট্ৰপতি নিৰ্বাচনৰ বিৰোধী প্ৰাৰ্থী হৈছে যশৱন্ত সিনহা। ৰাজনৈতিক প্ৰতিদ্বন্দ্বীৰ বিৰুদ্ধে শাসকীয় দলটোৱে চিবিআইৰ দৰে কেন্দ্ৰীয় সংস্থাক অপব্যৱহাৰ কৰাৰ অভিযোগ উত্থাপন কৰি সিনহাই কয় যে তেওঁ নিৰ্বাচিত হ’লে এনে কাৰ্য বন্ধ কৰি দিব।

ৰাষ্ট্ৰপতি নিৰ্বাচনৰ বাবে বিৰোধী প্ৰাৰ্থী যশৱন্ত সিনহাই মঙলবাৰে কেন্দ্ৰীয় চৰকাৰক সমালোচনা কৰি কয় যে তেওঁ কেতিয়াও প্ৰতিদ্বন্দ্বীক ঠিক কৰিবলৈ কেন্দ্ৰীয় সংস্থাসমূহৰ এনে প্ৰকাশ্য, নিৰ্লজ্জ অপব্যৱহাৰ দেখা নাই। অশান্ত পৰিস্থিতিত ৰাষ্ট্ৰপতি পদৰ নিৰ্বাচন চলি আছে বুলি উল্লেখ কৰি গণতন্ত্ৰ ভয়াৱহ বিপদত পৰিছে বুলিও তেওঁ উল্লেখ কৰে। অৰ্থনীতি বেয়াকৈ পৰিচালিত হৈছে বুলিও তেওঁ লগতে কয়।

###

বিত্ত বৰ্ষ ২৩ত হোটেল উদ্যোগৰ ৰাজহ পুনৰ ক’ভিডৰ পূৰ্বৰ স্তৰলৈ ঘূৰি আহিব বুলি আই.চি.আৰ.এ. মত প্ৰকাশ কৰিছে।

হোটেল উদ্যোগৰ ‘ৰাজহ আৰু মাৰ্জিন’ বিত্তীয় বৰ্ষ ২৩-অত পুনৰ ক’ভিডৰ পূৰ্বৰ স্তৰলৈ ঘূৰি অহাৰ সম্ভাৱনা আছে বুলি ৰেটিং এজেন্সী আইচিআৰএ প্ৰকাশ কৰিছে। আইচিআৰএ জনোৱা মতে, চাহিদা মূলতঃ ঘৰুৱা অবসৰ আৰু ক্ষণস্থায়ী ভ্ৰমণৰ দ্বাৰা পৰিচালিত হ’ব যদিও ব্যৱসায়িক ভ্ৰমণ আৰু বিদেশী পৰ্যটকৰ আগমনৰ ক্ষেত্ৰতো ক্ৰমান্বয়ে পুনৰুদ্ধাৰ হ’ব। ইয়াত লগতে কোৱা হৈছে যে বিত্তীয় বৰ্ষ ২৩ৰ বাবে প্যান-ইণ্ডিয়া প্ৰিমিয়াম হোটেলৰ দখল ৬৮-৭০% হ’ব বুলি আশা কৰা হৈছে।

###

বিশ্বৰ আটাইতকৈ শক্তিশালী মহাকাশ টেলিস্কোপৰ পৰা লোৱা পূৰ্ণ ৰঙীন ছৱিৰ ১ম পৰ্যায়ৰ ছৱি মুকলি কৰা হ’ল।

বিশ্বৰ আটাইতকৈ শক্তিশালী মহাকাশ দূৰবীণ জেমছ ৱেব স্পেচ টেলিস্কোপৰ পৰা লোৱা নতুন পূৰ্ণৰঙী ছবি নাছাই মঙলবাৰে প্ৰকাশ কৰে। ইয়াত চাউদাৰ্ণ ৰিং গ্ৰহৰ নিহাৰিকাৰ ছবি মুকলি কৰা হৈছিল, য’ত ধূলি আৰু পোহৰৰ তৰপেৰে আবৃত এটা মৃত্যুমুখী তৰা দেখা গৈছিল। আন এখন ছবিত দেখা গৈছে ষ্টেফানৰ কুইণ্টেট, যিটো পাঁচটা তাৰকাৰাজ্যৰ এক বিৰল দৃশ্যমান গোট। কেৰিনা নেবুলাৰ কেঁচুৱা তাৰকা উন্মোচন কৰা এখন ছবিও মুকলি কৰা হৈছিল।

###

ইউৰোক মুদ্ৰা হিচাপে গ্ৰহণ কৰা ২০ সংখ্যক দেশ হ’ব ক্ৰ’ৱেচিয়া।

ইউৰোপীয় সংঘই মঙলবাৰে ক্ৰ’ৱেচিয়াৰ ইউৰো মণ্ডলত যোগদানত আনুষ্ঠানিকভাৱে অনুমোদন জনাইছে, যাৰ ফলত বাল্কন দেশখনে ২০২৩ চনৰ ১ জানুৱাৰীৰ পৰা ইউৰোক নিজৰ মুদ্ৰা হিচাপে গ্ৰহণ কৰাৰ পথ মুকলি কৰি দিছে। , ইউৰোপীয় আয়োগৰ উপ-সভাপতি ভালডিছ ডম্ব্ৰ’ভস্কিছে কয়। ক্ৰ’ৱেচিয়াৰ বিত্তমন্ত্ৰীয়ে কয় যে ক্ৰ’ৱেচিয়াৰ বাবে এইটো এটা ডাঙৰ দিন।

###

পাকিস্তানৰ বেলুচিস্তানত হোৱা প্ৰচন্ড বৰষুণত ৬০ জনতকৈ অধিক লোকৰ মৃত্যু হৈছে।

পাকিস্তানৰ বেলুচিস্তানত বৰষুণৰ লগত জড়িত ঘটনাৱলীৰ বাবে ২৪ জন শিশুসহ ৬২ জন লোকে প্ৰাণ হেৰুৱাইছে বুলি বিষয়াসকলে জনায়। অঞ্চলটোত হোৱা প্ৰচণ্ড বৰষুণৰ ফলত ৬৭০ টাতকৈও অধিক বাসগৃহ ভাঙি যোৱাৰ লগতে প্ৰায় ৫০ জন লোক আহত হোৱা বুলি জানিব পৰা গৈছে। পৃথকভাৱে পাকিস্তানৰ বতৰ বিজ্ঞান বিভাগে ১৪ জুলাইৰ পৰা ১৭ জুলাইলৈ কৰাচীত “প্ৰচণ্ডৰ পৰা অতি প্ৰচণ্ড” বৰষুণ হ’ব বুলি ভৱিষ্যদ্বাণী কৰিছে।

###

ছিৰিয়াত আমেৰিকাৰ বিমান আক্ৰমণত নিহত হ’ল ইছলামিক ষ্টেটৰ নেতা।

আইছিছৰ শীৰ্ষ পাঁচজন নেতাৰ ভিতৰত অন্যতম তথা ছিৰিয়াৰ আইছিছৰ নেতা মাহেৰ আল-আগাল আমেৰিকাৰ বিমান আক্ৰমণত নিহত হৈছে বুলি মঙলবাৰে আমেৰিকাৰ সেনাই প্ৰকাশ কৰিছে। এই আক্ৰমণৰ সময়ত মাহেৰৰ সৈতে ওতঃপ্ৰোতভাৱে জড়িত আইছিছৰ এজন জ্যেষ্ঠ বিষয়া গুৰুতৰভাৱে আহত হয়। বিবৃতিটোত লগতে কোৱা হৈছে যে প্ৰাৰম্ভিক পৰ্যালোচনাই ইংগিত দিয়ে যে কোনো সাধাৰণ নাগৰিকৰ মৃত্যু হোৱা নাই।

###

আৰ্থিক সংকটত দেশবাসীক ডুবাই থৈ সপৰিবাৰে মালদ্বীপলৈ পলায়ন কৰিলে শ্ৰীলংকাৰ ৰাষ্ট্ৰপতি গোতাবায়া ৰাজাপক্ষে – এই খবৰ সংবাদ মাধ্যমৰ। মালদ্বীপেই নহয়, তেওঁৰ তালিকাত আছিল ভাৰত আৰু ডুবাইৰো নাম। কিন্তু অৱশেষত মালদ্বীপলৈ পলায়ন কৰিবলগীয়া হ’ল তেওঁ, সংবাদ মাধ্যমৰ দাবী। অৱশ্যে তেওঁ আগতেই ইংগিত দিছিল যে নিজৰ পৰিয়ালক নিৰাপদ স্থানলৈ নিনিয়া পৰ্যন্ত তেওঁ পদত্যাগ নকৰে। ইতিমধ্যে তেওঁ পলায়ন কৰাৰ পিছত শ্ৰীলংকাত জৰুৰী অৱস্থা ঘোষণা কৰা হৈছে বুলি জানিব পৰা গৈছে।

আজি বুধবাৰে তেওঁ পদত্যাগ কৰা কথা। তেওঁৰ ভাতৃ তথা প্ৰাক্তন বিত্তমন্ত্ৰী বাচিল-এও ডুবাই অভিমুখে ৰাওনা হ’ব বিচাৰিছিল যদিও বিমানবন্দৰত তেওঁক চিনিব পৰাৰ পিছত যাবলৈ অনুমতি দিয়া নহ’ল।

13-07-2022

Mahabahu.com is an Online Magazine with collection of premium Assamese and English articles and posts with cultural base and modern thinking. You can send your articles to editor@mahabahu.com / editor@mahabahoo.com ( For Assamese article, Unicode font is necessary)