২১ ফেব্ৰুৱাৰীৰ আন্তৰ্জাতিক মাতৃ ভাষা দিৱসৰ সময়তে অসমৰ খিলঞ্জীয়া জনগোষ্ঠীৰ মাতৃ ভাষা সংকটত

যুগান্ত বায়ন

একবিংশ শতিকাৰ শিক্ষা ব্যবস্থাৰ বৈপ্লৱিক পৰিৱৰ্তনৰ ফলত মানুহৰ মাজত সৃষ্টিশীল চিন্তা ,চেতনাৰ ব্যাপক পৰিবৰ্তন হোৱাত মানুহে গভীৰ আত্মবিশ্বাসৰ দ্বাৰা মাতৃ ভাষাত জ্ঞান অৰ্জন কৰাটো অধিক কঠিন হৈ পৰিছে।এনে প্ৰেক্ষাপটত ২১ ফেব্ৰুৱাৰীৰ দিন টো আন্তৰ্জাতিক মাতৃ ভাষা দিবস হিচাপে বিশ্বই পালন কৰা সময়তে অসমৰ খিলঞ্জীয়া জাতি জনগোষ্ঠীৰ মাতৃ ভাষাৰ প্ৰতি অতি ভয়াবহ সংকট নামি আহিছে ।

অসমত খিলঞ্জীয়া লোকৰ অবাধ আৰু ব্যাপক আগ্ৰাসনৰ বাবে খিলঞ্জীয়া লোকৰ মাতৃ ভাষা আজি তীব্ৰ ভাবুকিৰ সমুখীন হৈছে| চৰকাৰী তথ্য মতে অসমত বড়ো ,ডিমাছা ,কাৰ্বি ,ৰাভা ,দেউৰী আদি খিলঞ্জীয়া জনগোষ্ঠীৰ লোকতকৈ হিন্দী বলয়ৰ লোকৰ সংখ্যা দিনক দিনে অতি দ্ৰুতহাৰত বৃদ্ধি পাব ধৰিছে।

ইয়াৰ উদাহৰণ হিচাপে অকল পশ্চিম কাৰ্বি আংলং আৰু কাৰ্বি আংলং জিলাত কাৰ্বি লোকৰ সংখ্যা ৩৫ শতাংশ হোৱাৰ বিপৰীতে হিন্দী ভাষীৰ সংখ্যা ৬৫ শতাংশ হৈছেগৈ। কাৰ্বি আংলং স্বায়ত্ত শাসিত পৰিষদৰ ২৬টা পৰিষদীয় সমষ্টিৰ ভিতৰত মাত্ৰ ১০টা সমষ্টিহে কাৰ্বি লোকৰ নিয়ন্ত্ৰণত আছে। ২০০১ চনৰ লোকপিয়ল অনুসৰি অসমত প্ৰতি ১০,০০০ লোকৰ বিপৰীত অখিলঞ্জীয়া হিন্দীভাষী লোকৰ সংখ্যা আছিল ৫৯৭ গৰাকী। বৰ্তমানে এই সংখ্যা দ্ৰুতগতিৰ আগ্ৰাসনৰ ফলত এক হেজাৰলৈ বৃদ্ধি পোৱাৰ আশঙ্কা ঘনীভূত হৈছে।

ঠিক সেইদৰে সংবিধানৰ ষষ্ঠ অনুসূচীৰ অন্তৰ্ভুক্ত হোৱাৰ পিছতো ৰাজ্যৰ এটা অন্যতম খিলঞ্জীয়া জনগোষ্ঠী বড়ো জনগোষ্ঠীৰ ২০০১ চনত বড়ো ভাষীৰ সংখ্যা মুঠ জনসংখ্যাৰ ৪,৮৬ শতাংশ হোৱাৰ বিপৰীতে ২০১৮ চনৰ ভাষিক পিয়ল মতে মুঠ জনসংখ্যাৰ বৰো ভাষী লোকৰ সংখ্যা ৪,৫৩ শতাংশ লৈ নামি আহিছে।

আনহাতে সামগ্ৰিকভাৱে অসমীয়া ভাষাই ধ্ৰুপদী ভাষাৰ মৰ্যাদা পোৱা আৰু অসমীয়া ভাষা অতি প্ৰাচীন ভাষা হিচাপে মান্যতা পোৱাৰ পাছতো ভাৰত চৰকাৰৰ শেহতীয়া এক তথ্য অনুসৰি অসমীয়া ভাষা কোৱা লোকৰ সংখ্যা তুলনামূলক ভাবে কমি অহাৰ ভয়াবহ তথ্যই সচেতন মহলক উদ্বিগ্ন কৰি তুলিছে। যোৱা ১৬ ডিচেম্বৰত ভাৰত চৰকাৰৰ শিক্ষা মন্ত্ৰণালয়ে প্ৰকাশ কৰা এক তথ্য মতে, ধ্ৰুপদী ভাষা সংস্কৃতক বাদ দি বাংলা ,কানাৰা ,মালায়ালম ,মাৰাঠী , ওৰিয়া, তামিল আৰু তেলেগু ভাষীৰ সংখ্যাত কৈ অসমীয়া ভাষীৰ সংখ্যা যথেষ্ঠ পৰিমাণে কমি আহিছে।

চৰকাৰী তথ্য মতে ,অসমীয়া ভাষীৰ সংখ্যা বৰ্তমান অসমত ১,৫৩ ,১১,৩৫০ গৰাকী। আনহাতে ইয়াৰ বিপৰীতে ধ্ৰুপদী ভাষা বাংলা ভাষী ৯,৭২,৩৭,৬৬৯ গৰাকী, কনাৰা ভাষী ৪,৩৭,০৬,৫৫২ গৰাকী, মাৰাঠী ৮,৩০ ,২৬ ,৬০০ গৰাকী ,ওৰিয়া ভাষী ৩,৭৫,২১,৩২৪ গৰাকী, তামিল ভাষী ৬,৯০,২৬,৮৮১গৰাকী আৰু তেলেগু ভাষীৰ সংখ্যা ৮১১,২৭,৭৪০ গৰাকী।

এনে পৰিস্থিতিত বৰ্তমানে ৩ কৌটি ৬০ লাখৰো অধিক জনসংখ্যা থকা অসমত ভাৰত চৰকাৰৰ এই তথ্যই আগন্তুক লোকপিয়লত বাংলা আৰু হিন্দী ভাষীৰ তুলনাত অসমীয়া ভাষা কোৱা লোকৰ সংখ্যা দ্ৰুতগতিত কমি আহিব বুলি আশংকা প্ৰকাশ কৰি বিবৃতিটোত কোৱা হয় যে, এনে পৰিস্থিতি অব্যাহত থাকিলে অনাগত দিনত অসমীয়া ভাষালৈ গুৰুতৰ সংকট নামি আহিব।

২০১৮ চনৰ ২৮ জুনত প্ৰকাশ পোৱা লোকপিয়লৰ ভাষিক তথ্য মতে অসমত অসমীয়া ভাষীৰ সংখ্যা মুঠ জসংখ্যাৰ ৪৮,৩৮ শতাংশ আৰু ইয়াৰ বিপৰীতে বাংলা ভাষী আৰু হিন্দী ভাষীৰ সংখ্যা মুঠ জসংখ্যাৰ ৩৫,৬৪ শতাংশ। এনে প্ৰেক্ষাপটত অসমত সম্প্ৰতি বাংলা ভাষী ৯০,২৪,৩২৪ গৰাকী আৰু হিন্দী ভাষী ২১,৩১,৪৩৫ গৰাকী লোকে বাস কৰি থকা অসমত অসমীয়া ভাষাই পূৰ্বৰ মৰ্য্যদা ৰক্ষা কৰাৰ ক্ষেত্ৰলৈ এক অশনি সংকেত কঢ়িয়াই আনিছে।

Mahabahu Climate Forum

Mahabahu.com is an Online Magazine with collection of premium Assamese and English articles and posts with cultural base and modern thinking. You can send your articles to editor@mahabahu.com / editor@mahabahoo.com (For Assamese article, Unicode font is necessary) Images from different sources.