সুৰেন্দ্ৰ নাথ মেধি

কুমাৰ দীপক দাস

১৯৭৪ চনত ‘গোলাম’ নামৰ সংকলনৰ বাবে সাহিত্য অকাডেমি বঁটা আৰু ১৯৯৫ চনত অসম উপত্যকা সাহিত্য বঁটা লাভ কৰা ,জীৱিত কালত কোনোধৰণৰ বঁটা বাহন গ্ৰহণ কৰিবৰ বাবে নিজে নোযোৱা আৰু আজীৱন প্ৰচাৰ, গ্লেমাৰ, যশস্যা আৰু খ্যাতিৰ পৰা আঁতৰত থাকি নীৰৱে ছদ্মনামেৰে অসমীয়া সাহিত্যত এক ব্যতিক্ৰমী ধাৰাৰ গদ্যৰীতিৰ সূচনা কৰা সৌৰভ কুমাৰ চলিহা, যি গৰাকী ব্যক্তিৰ প্ৰকৃত নাম আছিল সুৰেন্দ্ৰ নাথ মেধি সেই গৰাকী ব্যক্তি যাৰ চুটিগল্পৰ ভাৱ, বিষয়, ৰূপ আৰু আবেদনৰ ফালৰপৰা সমান্তৰাল গল্প আধুনিক ভাৰতীয় সাহিত্যতে বিৰল, ব্যতিক্ৰমী সেই গৰাকী বিশিষ্ট সাহিত্যিক শিক্ষাবিদৰ ২০১১চনৰ ২৫ জুন তাৰিখত দেহাৱসান হৈছিল ।

আজি ২৫ জুনৰ পবিত্ৰ এই মৃত্যুতিথিত এইজনা বিৰাট মনীষালৈ আমাৰ আন্তৰিক শ্ৰদ্ধাজ্ঞলি জ্ঞাপন কৰিলোঁ ।

   সুৰেন্দ্ৰ নাথ মেধিৰ জন্ম হয় দৰং জিলাৰ মঙলদৈত।  বাওঁপন্হী চিন্তাৰে প্ৰবুদ্ধ মেধিদেৱে কলেজীয়া জীৱনতে   ৰিভ'লুশ্বনাৰী কমিউনিষ্ট পাৰ্টি অৱ ইণ্ডিয়াৰ কাম-কাজত জড়িত হোৱাৰ বাবে জে'ললৈ যাবলগীয়া হৈছিল।এনেকৈ  ৰাজনৈতিক কাম-কাজত জড়িত হৈ পৰাৰ বাবে তেখেতৰ পিতৃ স্বনামধন্য কালিৰাম মেধিদেৱে উচ্চ শিক্ষাৰ বাবে তেওঁক বিলাতলৈ পঠিওৱাৰ সিদ্ধান্ত লয়। 
    ১৯৫২ চনত তেখেত ইংলেণ্ডলৈ যায় ,দুবছৰৰ পিছত তেওঁ লণ্ডন ইউনিভাৰ্ছিটিৰ পৰা পদাৰ্থ বিজ্ঞানত স্নাতকোত্তৰ ডিগ্ৰী লাভ কৰে। তাৰ পিছত তেওঁ জাৰ্মানীৰ ভিতৰুৱা ঠাই গুটিংগেনৰ এখন স্কুলত শিক্ষকতাৰ পাতনি মেলে। জাৰ্মানীৰ কেইবাখনো শিক্ষানুষ্ঠানত পাঠদানৰ অভিজ্ঞতা লৈ ১৯৬০ চনত মেধি গুৱাহাটীলৈ প্ৰত্যাৱৰ্তন কৰে আৰু অসম অভিযান্ত্ৰিক মহাবিদ্যালয়ত অধ্যাপক হিচাপে যোগদান কৰে। তাৰ পৰাই তেওঁ ১৯৮৮ চনত স্বেচ্ছাই অৱসৰ গ্ৰহণ কৰে।

       সৌৰভ কুমাৰ চলিহা আধুনিক অসমীয়া সাহিত্যৰ এক ব্যতিক্ৰমী আৰু অনন্য প্ৰতিভা। চৈধ্য বছৰ বয়সতে তেখেতে ‘পাৰিজাত’ নামৰ আলোচনীত গল্পকাৰ হিচাপে আত্মপ্ৰকাশ কৰিছিল। ৰামধেনুৰ পাতত ‘অশান্ত ইলেক্ট্ৰন’ নামৰ গল্পৰে সম্পূৰ্ণ নতুন আৰু আধুনিক শৈলী প্ৰৱৰ্তন কৰি তেখেতে অসমীয়া সাহিত্যক এক অভিনৱ মাত্ৰা দান কৰি গৈছে।

এইক্ষেত্ৰত আধুনিক, এই কথাষাৰ আমি ‘সকলো কালতেই আধুনিক’—এনে অভিধাৰেহে গ্ৰহণ কৰিব লাগিব।সৌৰভ কুমাৰ চলিহাই প্ৰায়বোৰ গল্প নাগৰিক জীৱনৰ ভেটিত নিৰ্মাণ কৰা বাবে গল্পৰ বিৱৰণীও নাগৰিক। গ্ৰাম্য-চেতনাৰ উপস্থাপনা তাকৰ বুলিবই পাৰি। কিন্তু ‘ নাগৰিক জীৱনৰ কথা লিখা বাবেইহে যে তেখেতৰ গল্প আধুনিক, সেয়া নহয়—বৰং এই বাবেহে যে আধুনিক যে, তেখেতৰ গল্পবোৰসময়ৰ সোঁতত পুৰণি হৈ নাযায়। বাৰে বাৰে পঢ়ি থকিলেও তাৰ নতুন ৰসাস্বাদন ওলাই থাকিব, কিয়নো গল্পত তেখেতে মানুহৰ মহত্তৰ জীৱনৰ অফুৰন্ত সম্ভাৱনাবোৰৰ কথা কৈ গৈছে।’
এই গৰাকী প্ৰথিতযশা সাহিত্যিকৰ ২০১১ চনৰ ২৫ জুন তাৰিখে বৃক্ক আৰু হাঁওফাঁওৰ ৰোগত ভুগি গুৱাহাটীৰ ইণ্টাৰনেশ্বনেল হাস্পতালত পুৱা ৫.৪০ বজাত মৃত্যু হয়।

সৌৰভ কুমাৰ চলিহাৰ সৃষ্টিৰাজী :

গল্প সংকলন

অশান্ত ইলেকট্ৰন (১৯৬২)
দুপৰীয়া আৰু অন্যান্য গল্প (১৯৬৩)
এহাত ডাবা (১৯৭২)
গোলাম (১৯৭৪)
সৌৰভ কুমাৰ চলিহাৰ স্বনিৰ্বাচিত সংকলন(১৯৯৪)
সৌৰভ কুমাৰ চলিহাৰ স্বৰচিত গল্প (১৯৯৮)
কবি(১৯৯৯)
ছয় দশকৰ গল্প (২০০১)
জন্মদিন আৰু অন্যান্য গল্প (২০০৫)
জোনবিৰি (২০০৬)
নৱজন্ম (২০০৮)