ৰাষ্ট্ৰপতি পদৰ প্ৰাৰ্থীঃ বিজেপিৰ দ্ৰৌপদী মুৰ্মু আৰু বিৰোধী শিৱিৰৰ যশৱন্ত সিনহা

ৰাষ্ট্ৰপতি পদৰ প্ৰাৰ্থী

অৰবিন্দ ৰাভা

ৰাষ্ট্ৰপতি পদৰ প্ৰাৰ্থী হিচাপে বিজেপি দলে আদিবাসী নেত্ৰী দ্ৰৌপদী মুৰ্মু( Draupadi Murmu)ৰ নাম মঙলবাৰে ঘোষণা কৰিছে। বিজেপিৰ পৰিষদীয় দলৰ বৈঠকৰ পিছত এই সিদ্ধান্ত ঘোষণা কৰিছে বিজেপিৰ সভাপতি জে.পি.নাড্ডাই।

বিশ্বস্ত সূত্ৰৰ মতে এইবাৰ ৰাষ্ট্ৰপতি পদৰ প্ৰাৰ্থী হিচাপে বিজেপি দলৰ তালিকাত তামিলসাই সৌন্দৰাজন, আনন্দীবেন পেটেল আৰু দ্ৰৌপদী মুৰ্মুৰ নাম আছিল যদিও শেষত দ্ৰৌপদী মুৰ্মুৰ নাম চূড়ান্ত কৰা হয়। বৈঠকত প্ৰধানমন্ত্ৰী নৰেন্দ্ৰ মোদী, সভাপতি জে.পি.নাড্ডা আদি উপস্থিত আছিল।

দ্ৰৌপদী মুৰ্মুৰ নাম চূড়ান্ত হোৱাৰ লগে লগেই উৰিষ্যাৰ শাসকদল বিজেডিয়ে যে বিজেপিকেই সমৰ্থন কৰিব সেয়া প্ৰায় নিশ্চিত বুলি ৰাজনৈতিক বিশেষজ্ঞসকলে ধাৰণা কৰিছে। ঝাৰখণ্ডৰ ৰাজ্যপাল হিচাপেও যোৱা বছৰ পৰ্যন্ত দ্ৰৌপদী মুৰ্মুৱে কাৰ্যনিৰ্বাহ কৰিছে। ঝাৰখণ্ডৰ শাসকদল ঝাৰখণ্ড মুক্তি মৰ্চাৰ নেতা শিবু শোৰেন আৰু তেওঁৰ পুত্ৰ তথা মুখ্যমন্ত্ৰী হেমন্ত শোৰেনৰ সৈতেও দ্ৰৌপদী মুৰ্মুৰ সম্পৰ্ক মধুৰ। প্ৰথমবাৰৰ বাবে কোনো আদিবাসী মহিলাক যদি ৰাষ্ট্ৰপতি হিচাপে জয়ী কৰাব পাৰে, বিজেপিৰ বাবে বহু ক্ষেত্ৰত সুবিধা হ’ব – বিশেষকৈ এইবছৰ গুজৰাট বিধানসভা নিৰ্বাচনৰ লগতে অহাবছৰৰ মধ্যপ্ৰদেশৰ নিৰ্বাচনতো বিজেপিৰ সুবিধা হ’ব।

ৰাষ্ট্ৰপতি পদৰ প্ৰাৰ্থীঃ বিজেপিৰ দ্ৰৌপদী মুৰ্মু আৰু বিৰোধী শিৱিৰৰ যশৱন্ত সিনহা — দ্ৰৌপদী মুৰ্মু

কিন্তু দ্ৰৌপদী মুৰ্মুৰ যুঁজখন খুব সহজ হৈও থকা নাই। কাৰণ তেওঁৰ বিৰুদ্ধে বিৰোধী দলসমূহৰ প্ৰাৰ্থী হিচাপে যশৱন্ত সিনহাৰ নাম ঘোষণা হৈছে। তেওঁ ৰাজনৈতিক প্ৰজ্ঞা আৰু অভিজ্ঞতাৰে দ্ৰৌপদী মুৰ্মুৰ বহুত আগত স্থান পোৱাৰ যোগ্য। কিন্তু যদি বিজেডি দলে বিজেপিক সমৰ্থন কৰে আৰু বিৰোধী দলসমূহৰ ভোট বিভক্ত হয়, তেতিয়া বিজেপিৰ প্ৰাৰ্থীয়ে জয়লাভ কৰাৰ সুযোগ আছে।

আনহাতে যশৱন্ত সিনহাৰ নাম ঘোষণা হোৱাৰ পিছত উৎফুল্লিত হৈ পৰিছে তৃণমূল শিৱিৰ। তৃণমূলৰ সৰ্বভাৰতীয় সাধাৰণ সম্পাদক অভিষেক বেনাৰ্জীয়ে বিৰোধী দলসমূহৰ বৈঠকৰ শেষত কৈছে,’ যশৱন্ত সিনহা তৃণমূল কংগ্ৰেছৰ সৰ্বভাৰতীয় উপ-সভাপতি আছিল। ই বঙ্গৰ বাবে গৌৰৱৰ বিষয়। দীৰ্ঘদিন ধৰি তেওঁ বঙ্গৰ সৈতে জড়িত আৰু প্ৰচুৰ অভিজ্ঞতাৰে অভিজ্ঞ। যিদৰে কেন্দ্ৰীয় চৰকাৰৰ শাসক দলে বিভিন্ন কেন্দ্ৰীয় সংস্থাক নিজৰ ৰাজনৈতিক স্বাৰ্থত অইন দলৰ নেতাৰ ওপৰত জাপি দি সংবিধান কলুষিত কৰিছে, যশৱন্ত সিনহাৰই তেনে কাৰ্য প্ৰতিহত কৰিব পাৰিব।’

এসময়ত অটল বিহাৰী বাজপেয়ী চৰকাৰৰ মন্ত্ৰী যশৱন্ত সিনহা এতিয়া বিজেপি দলৰ বিৰোধী শিৱিৰৰ পৰা প্ৰক্ষেপিত ৰাষ্ট্ৰপতি পদৰ প্ৰাৰ্থী। কিন্তু তেওঁৰ পুত্ৰ জয়ন্ত সিনহা এতিয়াও গেৰুৱা শিৱিৰত। সেয়ে বিজেপিৰ সাংসদ হিচাপে নিজৰ কাম কৰি যাব বুলি জয়ন্ত সিনহাই প্ৰকাশ কৰি কৈছে যে তেওঁ নিঃসন্দেহে আনন্দিত, কিন্তু তেওঁ বিজেপিৰ সাংসদ হিচাপে নিজৰ কাম কৰিব। এই বিষয়টোক এক পাৰিবাৰিক বিষয় হিচাপে গণ্য নকৰিবলৈ তেওঁ সকলোকে অনুৰোধ কৰিছে।

২২-০৬-২০২২

Mahabahu.com is an Online Magazine with collection of premium Assamese and English articles and posts with cultural base and modern thinking. You can send your articles to editor@mahabahu.com / editor@mahabahoo.com ( For Assamese article, Unicode font is necessary)